بِسْمِ ٱللّٰهِ ٱلرَّحْمٰنِ ٱلرَّحِيمِ
اَلْحَمْدُ للَّهِ رَبِّ الْعاَلَمِينْ، وَالصَّلاَة وَالسَّلاَمُ عَلَى رَسُولِ ٱللَّهِ، وَعَلَى آلهِ وَصَحْبِهِ أَجْمَعِينْ.
ނާލާފުށީގެ ލޮބުވެތި އެންމެހައި ރައްޔިތުން، މި ރަށުގެ ކައުންސިލްގެ ރައީސް، މި ދާއިރާގެ ޢިއްޒަތްތެރި މަޖިލިސް މެންބަރު، ކައުންސިލަރުންނާއި، މުއައްސަސާތަކުގެ ވެރިން، މި ރަށުގެ ޚިދުމަތްތެރި އިސް ރަށްވެހިން، ވަޑައިގެން ތިއްބެވި އެންމެހައި ޢިއްޒަތްތެރިން، އަދި މި ޖަލްސާ، ދުރާއިގާތުން ބައްލަވަމުން ގެންދަވާ، އަދި އަޑުއައްސަވަމުން ގެންދަވާ ލޮބުވެތި އެންމެހައި ރައްޔިތުން؛
السَّلامُ عَلَيْكُم ورَحْمَةُ اللهِ وَبَرَكاتُهُ.
އާދެ، ނާލާފުށްޓަށް އަޅުގަނޑުމެންނަށް އާދެވުނު ވަގުތު ތިޔަބޭފުޅުން ވަޑައިގެން، އަޅުގަނޑުމެންނަށް ވިދާޅުވި ހޫނު މަރުޙަބާއަށްޓަކައި، ރަށުގެ އެންމެހައި ލޮބުވެތި ރައްޔިތުންނަށް ހިތުގެ އެންމެ ފުންމިނުން، ވަރަށް ބޮޑަށް ޝުކުރު ދަންނަވަން.
މި ރަށުގެ ތަރައްޤީގެ ކަންކަމުގައި، އަޅުގަނޑު ވަޢުދުތަކެއްވިން. އެއީ، ރައްޔިތުންނަށް މި ރަށުގެ ތަރައްޤީއަށް، ވަރަށް ބޭނުންޖެހިފައިވާ، އަދި ވަރަށް މުހިންމު މަޝްރޫޢުތަކެއް. އިރާދަކުރެއްވިއްޔާ މިހާރު މިވަނީ މި ހުރިހާ ވަޢުދުތަކެއް ފުއްދުމުގެ މަސައްކަތް ފެށިފައި. ބައެއް މަޝްރޫޢުތަކުގައި މިއަދު ސޮއިކުރެވުނީ. އަދި ބައެއް މަސައްކަތްތައް ފެށިގެން ގޮސްފައި މިވަނީ.
ޖުމުލަކޮށް ދަންނަވަންޏާ، ދަންނަވާލަން ބޭނުންވަނީ، މި ހުރިހާ މަޝްރޫޢުތަކެއް، މި ހުރިހާ ވަޢުދުތަކެއް ވަރަށް ފުރިހަމަކަމާއެކީ، ތިޔަބޭފުޅުންނަށްޓަކައި ނިންމައިދޭނެކަމުގެ ޔަޤީންކަން.
އާދެ، ކޯޒްވޭގެ ވާހަކަ ދަންނަވާލަންޏާ، އަޅުގަނޑު އެކަމުގައި ފާހަގަކޮށްލަން ބޭނުންވަނީ، އެއީ ޙަޤީޤަތުގައި ތިޔަބޭފުޅުންނަށް، މިރަށުގެ ތަރައްޤީއަށް، އަޅުގަނޑު ހިތުން އެންމެ މުހިންމު އެއް މަޝްރޫޢަށް ވާނެ. ތަޢުލީމު ހާސިލުކުރުމަށް ޚާއްޞަކޮށް، ދަރިވަރުން، ބެލެނިވެރިން އުފުލަންޖެހޭ ވަރަށް ގިނަ ތަކުލީފުތަކެއް ނިމުމަކަށް އައުމާއި، އަދި ޖުމުލަކޮށް ހަމަ ހުރިހާ ކަމަކަށް. އިޤްތިޞާދީ މަސައްކަތް ކަމުގައިވިޔަސް. އަދި އެހެނިހެން ކަންކަމުގައިވިޔަސް، މުއްޔާ ގުޅިގެން ދިޔުމަކީ، ތިޔަބޭފުޅުންނަށް ވަރަށް މުހިންމު ކަމެއް. އެ މަސައްކަތް ޢަމަލީގޮތުން އަޅުގަނޑުމެންވާނީ ފަށާފައި.
މިހާރު އަޅުގަނޑުމެން ބައެއް ކަންތައްތައް ފަންނީގޮތުން މި ރަނގަޅުކޮށްލަނީ. ނޫނީވިއްޔާ އިތުރަށް ބާރުމިނުގައި ގެންދެވޭނެ ގޮތަށް ބައެއް ކަންކަން މި ފުރިހަމަކޮށްލީ. އެކަމަށް ކުޑަ ވަގުތުކޮޅެއް ނެގީ. އެހެންނަމަވެސް، އެކަންކަންވެސް ހަމަޖެހިފައި މިހާރު މިއޮތީ. ކުރީގައި ސޮއިކުރެވިފައި އޮތް އެގްރިމެންޓުގައި އޮތް މުއްދަތަށްވުރެ އަވަހަށް ނިންމޭނެގޮތަށް މިހާރު މިވަނީ ހަމަޖެހިފައި. އެހެންވީމާ، އިރާދަކުރެއްވިއްޔާ އެއީ ބާރުމިނުގައި، ބާރު ސްޕީޑުގައި ކުރިއަށްދާނެ މަޝްރޫޢެއް.
އާދެ، އޭގެއިތުރަށް، ދެން ހަމަ އެފަދަ މުހިންމު މަޝްރޫޢުތަކެއްގައި މިއަދު މި ސޮއިކުރެވިގެންދިޔަ. ބިން ވަރަށް ބޮޑަށް ދަތިވެފައި މިއޮތީ. ބިން ވަރަށް ބޮޑަށް ދަތިވެފައި. ހުސްވެފައި. އާދެ، އަޅުގަނޑު ވަޢުދުވިން، ބިން އިތުރުކޮށްދޭނެ ކަމަށް. މިއަދު މި ސޮއިކުރެވުނު މަޝްރޫޢުގެ ތެރެއިން، މި ރަށުގައި މިހާރު އޮތް ބިމުގެ ސައިޒަށްވުރެ ބޮޑު ސައިޒަކަށް ބިން ހިއްކިގެން ދާނެ. މި ރަށުގައި މިހާރު 12 ހެކްޓަރު ހުރީ. އިތުރުވެގެންދަނީ އިތުރު 15 ހެކްޓަރަށް. އެހެންވީމާ، ރަށަށްވުރެ ބޮޑު ސަރަޙައްދެއް އިރާދަކުރެއްވިއްޔާ ހިއްކިގެންދާނެ.
ބަނދަރުގެ ޖާގަ ވަރަށް ކުޑަ. ބަނދަރު ބޮޑުކުރުމަށް، ތަރައްޤީކުރުމަށް، މިއަދު މި ހަވާލުކުރީ. އާދެ، ބަނދަރު ބޮޑުކުރުމާއި، ބިން ހިއްކުމާއި، ކޯޒްވޭގެ މަސައްކަތާ، އެއްކުންފުންޏެއް މެދުވެރިކޮށް، އެކުއެކީގައިދާގޮތަށް މި އޮތީ އަޅުގަނޑުމެން ހަމަޖައްސާފައި. ބިން ހިއްކުމާއި، ބަނދަރުގެ މަސައްކަތާއި، މި ދެ މަސައްކަތްވެސް މި އަހަރު ތެރޭގައި، އިރާދަކުރެއްވިއްޔާ ވަރަށް ބާރު ސްޕީޑުގައި ގެންދެވޭގޮތަށް ކަންތައްތައް ހަމަޖެހޭނެ. މި އަހަރު ތެރޭގައި ހަމަ. އެންމެ ލަސްވެގެން ޑިސެންބަރު މަހުގެ ތެރޭގައި، ދެ މަސައްކަތްވެސް އަޅުގަނޑުމެން ޢަމަލީގޮތުން ފަށާނަން.
އާދެ، މީގެއިތުރަށްވެސް، އަޅުގަނޑުމެން ބައެއް ކަންކަން މިއަދު ފަށައިފިން. ޒުވާނުންނަށް ފިޓްނަސްގެ ދާއިރާއިން، ކުޅިވަރުގެ ދާއިރާއިން މުހިންމު މަޝްރޫޢެއް، ފިޓްނަސް އެންޑް ރިކްރިއޭޝަން ސެންޓަރު، ނޫނީ ޔޫތު ސެންޓަރު. ހުރިހާ ރަށެއްގައި ގާއިމުކުރާ މަރުކަޒެއް މިއީ. މިއީވެސް ވަރަށް މުހިންމު މަޝްރޫޢެއް.
ހަމަ މިގޮތަށް، ފުލުހުންގެ ޚިދުމަތް ދިނުމަށް، ފުލުހުންގެ މަރުކަޒެއް ގާއިމުކުރުމަކީވެސް ހަމަ އެހާ މުހިންމު މަޝްރޫޢެއް.
ކައުންސިލުން ޚިދުމަތް ދިނުމަށް، ކައުންސިލްގެ އިމާރާތެއް ގާއިމުކުރުމަކީވެސް ހަމަ އެފަދަ މަޝްރޫޢެއް. އޭގެ އިތުރަށްވެސް ކަންކަން އެބަހުރި.
އާދެ، ފެނާއި ނަރުދަމާ މިއީ އެންމެ ދަތިވެފައިވާ މައްސަލަ. އެކަން ނިންމުމަށްޓަކައި، ވަރަށް އިސްކަމެއްދީގެން، މަސައްކަތްތަކެއް އެބަ ކުރެވޭ. އިރާދަކުރެއްވިއްޔާ އެކަންވެސް، އަޅުގަނޑުމެން ވަރަށް ރަނގަޅަށް ގެންގޮސްދޭނަން. ބައެއް ކަންކަން އަޅުގަނޑުމެން ހަމަޖައްސަން ބައެއް ވަގުތުނެގި. ތަކެތީގެ ކަންކަމާއި އަދި ތަރުތީބުކުރަންޖެހޭ ބައެއް ކަންކަން. އެހެންވީމާ، އެ ކަންކަންވެސް، މިހާރު އެ މަރުޙަލާ ނިމި، މަސައްކަތުގެ މަރުޙަލާއަށް ގޮސްފައި މިއޮތީ.
އޭގެއިތުރަށް ބަލާނަމަ، ސްކޫލުގެ މަޝްރޫޢުވެސް އެބަ ކުރިއަށްދޭ. އެއީވެސް އިރާދަކުރެއްވިއްޔާ، ރަނގަޅަށްދާނެ މަޝްރޫޢެއް. ސްކޫލް މި ބަލަނީ، އިރާދަކުރެއްވިއްޔާ އާ ދިރާސީ އަހަރަށް އިމާރާތް ނިންމައިލެވޭނެ ކަމަށް. ނިންމައިލެވޭނެ. އެހެންވީމާ، ނިއު އެކެޑަމިކް އިޔަރ ފެށޭއިރުގައި، ބޭނުންހިފޭ ތަނަކަށް، އިރާދަކުރެއްވިއްޔާ އެތަން ވެގެންދާނެ.
ޞިއްޙީ ދާއިރާއިން ބަލާއިރުގައި، މިހާރު ޓެންޑަރިންގ މަރުޙަލާ ނިމިގެން މިހާރު އެ ދަނީ، ބަޔަކު ހޮވުމުގެ މަސައްކަތް. މި މަޝްރޫޢުގެ ތެރެއިން، ޞިއްޙީ މަރުކަޒަށް ގެނެވޭ ތަރައްޤީގެ ތެރެއިން، ނޫނީވިއްޔާ ޞިއްޙީ މަރުކަޒުގެ އިމާރާތް އެޅިގެންދާއިރުގައި، 4 އެނދާއި، އިމަރޖެންސީ ރޫމާއި، ލެބޯރެޓަރީއާއި، ކޮންސަލްޓޭޝަން ރޫމާއި، ޑްރެސިންގ ރޫމާއި، ސްޓޯރޭޖާއި، މި ހުރިހާ ތަނެއް ހިމެނޭގޮތަށް ޞިއްޙީ މަރުކަޒެއް އެޅިގެން މިދަނީ. އިރާދަކުރެއްވިއްޔާ، އެ މަޝްރޫޢު މިހާރު ޓެންޑަރިންގ މަރުޙަލާ މި ނިމެނީ. އެހެންވީމާ، ސޮއިކުރުމާއި، މޮބިލައިޒްކުރުމާ، މިހުރިހާ ކަމަކާ އެކީގައި ބަލާކަމުގައިވަންޏާ، ގިނަވެގެން ދޮޅުމަހެއް، ދެ މަހެއްހާ ދުވަސް ތެރޭގައި، އިރާދަކުރެއްވިއްޔާ ޢަމަލީ މަސައްކަތް ފެށޭނެ. އެ ހިސާބަށް ގެންދެވިފައި މިހާރު އެއޮތީ. ދެން ހަމަ ޔަޤީނުންވެސް މި އަހަރު ތެރޭގައި ފެށޭނެ.
އާދެ، ދެން އަޅުގަނޑު ފާހަގަކޮށްލާނީ، ފުޓްސަލް ދަނޑާ ބެހޭގޮތުން ކަމެއް. އާދެ، މިހާރު އަޅުގަނޑުމެން މިކުރާ ކަމަކީ، ރައްޔިތުން ބޭނުންވާ ގޮތަށް އެތަން ޑިޒައިން ކުރުމުގެ ކަންތައް. ރޮސްޓްރަމަކާ އެކީގައި، ރަނގަޅު ފެންވަރުގެ ފުޓްސަލް ދަނޑެއް އަދި ފުޓްސަލް ދަނޑު ހަދާއިރުގައި، ހޭންޑްބޯލްވެސް ކުޅެވޭގޮތަށް، ދެ ކުޅިވަރު ކުޅެވޭގޮތަށް ފުޓްސަލް ދަނޑު ހެދުން. އެއީ، އަޅުގަނޑުމެން ކުރިއަށް ގެންދަން މި ނިންމާ ގޮތަކީ. އެހެންވީމާ، މިގޮތަށް ފުރިހަމަކުރެވިގެންދާ، ލައިޓާ ހުރިހާ އެއްޗެއް ޖެހިފައިވާ، ފުޓްސަލް އަދި ހޭންޑްބޯލް ކުޅެވޭ ފުރިހަމަ ދަނޑެއްގެ މަސައްކަތް، ދާދި އަވަހަށް ބަޔަކާ ހަވާލުކުރުމަށް މިހާރު އެދަނީ ތައްޔާރުވަމުން. އެހެންވީމާ، އެ މަރުޙަލާ ނިމި، ޢަމަލީ މަސައްކަތަށް މި އަހަރު ތެރޭގައި ދާނެ.
އާދެ އެހެންވީމާ، ޖުމްލަކޮށް އަޅުގަނޑަށް މި ދަންނަވާލެވުނީ ވަރަށް ގިނަ ކަންތައް. އަދިވެސް ބައެއް ކަންކަން އެބަހުރި. ކުނި މެނޭޖްކުރުމަކީ ރާއްޖޭގެ ހުރިހާ ރަށެއްގައި އަޅުގަނޑުމެން، މި އަހަރު ތެރޭގައި މަސައްކަތް ފަށަން ނިންމާފައި އޮތް ކަމެއް. މި ރަށަށްވެސް ދަތިވެފައިވާ ކަމެއް.
އަދި އެކަހަލަ ބައެއް އެހެން ކަންތައްތައްވެސް ހުންނާނެ. އެހެންވީމާ، ޖުމްލަކޮށް ދަންނަވަންޏާ، އަޅުގަނޑު ފަށަމުންވެސް ދެންނެވިފަދައިން، އަޅުގަނޑު ވެފައިހުރި ހުރިހާ ވަޢުދެއް އިރާދަކުރެއްވިއްޔާ ވަރަށް ފުރިހަމަކަމާއެކީގައި ނިންމައިދޭނަން. އަދި އޭގެއިތުރަށްވެސް، ބައެއް މަސައްކަތްތައް ކުރެވޭނެ. ކުރެވިގެންދާނެ.
އެހެންވީމާ، ނާލާފުށީގެ ތަރައްޤީ އަޅުގަނޑުމެން އިރާދަކުރެއްވިއްޔާ ތިޔަބޭފުޅުން އުންމީދުކުރާ ވަރަށް، ފުރިހަމަކަމާއެކީގައި ހާސިލުކޮށްދޭނެ ކަމުގެ ޔަޤީންކަމާއެކީގައި، އަޅުގަނޑު ވަކިވެލާނަން. އަޅުގަނޑު އަނެއްކާވެސް ތިޔަބޭފުޅުންގެ އަރިހަށް މީގެ ބައެއް ކަންކަން ނިމިގެން، އެ ކަންކަން ފާހަގަކުރުމުގެ އުފަލުގައި، ތިޔަބޭފުޅުންނާއެކީ ބައިވެރިވުމަށް، އައުމުގެ އުންމީދުގައި ވަކިވެލާނަން. އިރާދަކުރެއްވިއްޔާ މާލަސްތަކެއްނުވެ، އެނބުރި އައުމުގެ އުންމީދުގައި.
އަޅުގަނޑުގެ ދުޢާއަކީ، އަޅުގަނޑުމެން ކުރާ މަސައްކަތްތަކުގައި، اللهُ سُبْحَانَهُ وَتَعَالَى ބަރަކާތް ލެއްވުން. އާމީން.
وَمَا تَوْفِيقِي إِلَّا بِاللَّهِ عَلَيْهِ تَوَكَّلْتُ وَإِلَيْهِ أُنِيبُ.
وَالسَّلَامُ عَلَيْكُمْ وَرَحْمَةُ اللهِ وَبَرَكَاتُه.