بِسْمِ ٱللّٰهِ ٱلرَّحْمٰنِ ٱلرَّحِيمِ
اَلْحَمْدُ للَّهِ رَبِّ الْعاَلَمِينْ، وَالصَّلاَة وَالسَّلاَمُ عَلَى رَسُولِ ٱللَّهِ، وَعَلَى آلهِ وَصَحْبِهِ أَجْمَعِينْ.
ފެލިދޫގެ ލޮބުވެތި އެންމެހައި ރައްޔިތުން، މި ރަށުގެ ކައުންސިލްގެ ރައީސް، ދާއިރާގެ ޢިއްޒަތްތެރި މަޖިލިސް މެންބަރު، ކައުންސިލަރުންނާއި، މުއައްސަސާތަކުގެ ވެރިން، ރަށުގެ ޚިދުމަތްތެރި އިސް ރަށްވެހިން، ރަށުގެ ލޮބުވެތި އެންމެހައި ރައްޔިތުން، ވަޑައިގެން ތިއްބެވި އެންމެހައި ޢިއްޒަތްތެރިން، އަދި މި ޖަލްސާ، ދުރާއި ގާތުން ބައްލަވާ، އަޑުއައްސަވާ ލޮބުވެތި އެންމެހައި ރައްޔިތުން؛
السَّلامُ عَلَيْكُم ورَحْمَةُ اللهِ وَبَرَكاتُهُ.
އާދެ، އަޅުގަނޑުމެންނަށް މިރޭ މި ރަށަށް އާދެވުނު ވަގުތު ތިޔަބޭފުޅުން، ރަށުގެ ރައްޔިތުން ވަޑައިގެން ވިދާޅުވި ހޫނު މަރުޙަބާއަށްޓަކައި، ހިތުގެ އެންމެ ފުންމިނުން މި ރަށުގެ ލޮބުވެތި އެންމެހައި ރައްޔިތުންނަށް ވަރަށް ބޮޑަށް ޝުކުރު ދަންނަވަން.
އާދެ، ރިޔާސީ އިންތިޚާބުގައި، އަދި ފަހުންވެސް މި ރަށުގެ ތަރައްޤީއަށްޓަކައި ވަރަށް މުހިންމު ކަންތައްތަކެއް ކުރުމަށް ސަރުކާރުން ވާނީ ނިންމާފައި. ވަޢުދުތަކެއް އަޅުގަނޑު ވެފައި. މީގެތެރެއިން ބައެއް މަޝްރޫޢުތައް މިއަދާއި މާދަމާ މި ރަށުގައި ފެށިގެން މިދަނީ. އަދި އިރާދަކުރެއްވިއްޔާ، އިތުރު ކަންތައްތައްވެސް ކުރިއަށް ގެންދިޔުމަށް ކުރިއަށް އޮތީ.
އާދެ އޭގެތެރެއިން، އަޅުގަނޑު ހިތުން މާދަމާ އަޅުގަނޑުމެން މި ޢަމަލީ މަސައްކަތް ފަށާ ހޮސްޕިޓަލް މަޝްރޫޢު ވެގެންދާނީ، މި ރަށުގެ ރައްޔިތުންނަށް، އަދި މި އަތޮޅުގެ ރައްޔިތުންނަށްވެސް ވަރަށް ބޮޑު ކުރިއެރުމެއް ޞިއްޙީ ދާއިރާއިން ލިބިގެންދާނެ މަޝްރޫޢަކަށް. 30 އެނދުގެ ޒަމާނީ ހޮސްޕިޓަލެއް، މި މަޝްރޫޢުގެ ތެރެއިން އެޅިގެން މިދަނީ. އިރާދަކުރެއްވިއްޔާ ވަރަށް ބާރު ސްޕީޑްގައި، ވަރަށް ހަލުވިމިނުގައި އެ މަޝްރޫޢު ކުރިއަށްގެންގޮސް ނިމިގެންދާނެ.
އަދި ހަމައެއާއެކީގައި، މިރޭ މިތާނގައި އަޅުގަނޑުމެން މި ސޮއިކުރި ކުޅިވަރުގެ މަޝްރޫޢު އާދެ، ފިޓްނަސް އެންޑް ރިކްރިއޭޝަން މަރުކަޒަކީ، ޢާންމުކޮށް އެހެން ރަށްރަށުގައި މި އަޅާ ސްކޭލަށްވުރެ، ސްކޯޕަށްވުރެ ފުޅާކޮށް، އިންޑޯ ސްޕޯޓްސް ކޮމްޕްލެކްސެއް ގޮތުގައި، އެތަނުގެ އެތެރޭގައި އެކިކަހަލަ ކުޅިވަރުތައް، ފިޓްނަސް އެންޑް ރިކްރިއޭޝަން ސެންޓަރެއްގައި ނުހުންނަ، ޖާގަ ބޮޑު، އެކި ކުޅިވަރުތައް ކުޅެވޭ ކަހަލަ ސެންޓަރެއް ގޮތުގައި އެ މަރުކަޒު ހެދިގެންދާނެ. އެހެންވީމާ، އެކަމުގެ އުފާވެރިކަން އަދި ޔަޤީންކަން މި ރަށުގެ ރައްޔިތުންނަށް އަޅުގަނޑު އަރުވަން.
އާދެ، މި ރަށުގެ ބިންއޮތީ ފުރިފައި. އަޅުގަނޑު ވީ ވަރަށް މުހިންމު ވަޢުދެއް އެއީ. މި ދަތުރުގައި މި ރަށުގެ މި މަޝްރޫޢެއް ނުއެއްފެށޭ. އެއީ، އެކަމުގެ މަތިން އަޅުގަނޑު ހަނދާންނެތިގެން ވީ ކަމެއް ނޫން. މި އަހަރުގެ ބަޖެޓުގެ ތެރެއިން އަޅުގަނޑުމެންނަށް ތަރުތީބުކޮށްލެވުނުއިރުގައި، ޞިއްޙީ ދާއިރާ ތަރައްޤީކުރުމާއި، އަދި ބައެއް އެހެން ކަންތައްތައް ކުރުމަށް އިސްކަން މި ދެވުނީ. ބިން ހިއްކުމުގެ މަޝްރޫޢުގެ ދަށުން އިރާދަކުރެއްވިއްޔާ، މި އަންނަ އަހަރުގެ ބަޖެޓުގެ ތެރެއިން އަހަރުގެ ކުރީކޮޅު، އިރާދަކުރެއްވިއްޔާ 12 ހެކްޓަރުގެ ބިން، މިރަށާ ގުޅިގެން ހިއްކައިދޭނެކަމުގެ ޔަޤީންކަން ތިޔަބޭފުޅުންނަށް ދެން. އޭގެ ނަތީޖާއަކަށް ވާނީ، ރަށުގެ އެކިއެކި ބޭނުންތަކަށް ބޭނުންވާ ބިން އިތުރުވެގެންދިޔުން.
އާދެ، އޭގެކުރިން މި އަހަރު ތެރޭގައި ވަރަށް މުހިންމު އެހެން މަޝްރޫޢެއް އަޅުގަނޑުމެން ކުރިއަށް ގެންދާނަން. އެއީ، ތަޢުލީމީ ދާއިރާއަށް ކުރިއެރުން ގެނައުމަށްޓަކައި 14 ކްލާސްރޫމް ހިމެނޭގޮތަށް، އަދި އެހެނިހެން ވަސީލަތްތައް ޤާއިމުވެގެންދާ ހަތަރުބުރީގެ ސްކޫލް އިމާރާތެއް އެޅުމުގެ މަސައްކަތް މި އަހަރު ތެރޭގައި ޢަމަލީގޮތުން ފަށާނެކަމުގެ ޔަޤީންކަން އަރުވަން. އެ މަޝްރޫޢުގެ ހުރިހާ ކަމެއް ނިންމައި، ޢަމަލީގޮތުން މަސައްކަތް ފެށުމަށްޓަކައި ވާންޖެހޭ ހުރިހާ ތައްޔާރީތައް އެޑިޔުކޭޝަން މިނިސްޓްރީގެ ފަރާތުން ސްކޫލާ ގުޅިގެން، ކައުންސިލާ ގުޅިގެން ކުރިއަށް ގެންދާނެ. އެކަން ވެގެންދާނީ، ތަޢުލީމީ ދާއިރާއިން ވަރަށް ބޮޑު ކުރިއެރުމެއް ސްކޫލްގެ ޙާލަތަށް ބަލާއިރުގައި، ކޮންމެހެން ކުރަންޖެހޭ ކަމެއް ކަމުގައިވާތީ، އެކަން ކުރެވިގެންދިޔައީމާ ކުރިއެރުން ލިބޭނެ ކަމަކަށް. އާދެ، އަޅުގަނޑުމެން އިރާދަކުރެއްވީތީ އިސްކަން މިދިނީ ތަޢުލީމީ ދާއިރާއާއި، ޞިއްޙީ ދާއިރާއާއި، ކުޅިވަރުގެ ދާއިރާއިން ކުރަންހުރި މިކަހަލަ މުހިންމު ކަންތައްތަކެއް ފެށުމަށް މި އަހަރު ތެރޭގައި. މި އަންނަ އަހަރު ކުރީކޮޅުގައި ބިން ހިއްކުމުގެ މަޝްރޫޢު މި ކުރިއަށް ގެންދަނީ.
އާދެ، މިކަންކަމުގެ އިތުރަށް، ދެންމެ އަޅުގަނޑުމެން މި ފެށީ އައި.ޑީ.ކާޑު އަދި ޕާސްޕޯޓުގެ ޚިދުމަތް. އަޅުގަނޑު މިކަމަށްވެސް ވާނީ ރިޔާސީ ބަޔާން މި އަހަރު ރައްޔިތުންގެ މަޖިލީހުގައި އިއްވިއިރުގައި ކޮމިޓްމަންޓެއް ދީފައި، ނޫނީވިއްޔާ ވަޢުދުވެފައި. އަދި މިދިޔަ އަހަރުވެސް އަޅުގަނޑު އެ ވާހަކަ ދެއްކިން، ޖުމްހޫރީ ދުވަހުވެސް. ރާއްޖޭގެ ހުރިހާ އަތޮޅެއްގައި، މަދުވެގެން އެއް ރަށުގައި، އައި.ޑީ.ކާޑު ލިބޭނެގޮތާއި، ޕާސްޕޯޓް ލިބޭނެގޮތް ޤާއިމުކުރާނެ ކަމަށް، މި އަހަރު ނިމެންވާއިރަށް. މިރޭ މި ރަށުގައި އައި.ޑީ.ކާޑުގެ ޚިދުމަތް ފެށިގެންދިޔައީމަ، އަޅުގަނޑުމެންނަށް އެ ފުރިހަމަކުރެވުނީ، ރާއްޖޭގެ ކޮންމެ އަތޮޅެއްގައިވެސް އައި.ޑީ.ކާޑުގެ ޚިދުމަތް ދިނުމުގެ ކަންތައް. އިރާދަކުރެއްވިއްޔާ މާ ލަސްތަކެއްނުވެ، މި އަންނަ މަސް ނިމުމުގެ ކުރީގައި، އަޅުގަނޑަށް މިހާތަނަށް ލިބިފައިވާ މަޢުލޫމާތު އަޅުގަނޑުމެން މިކުރާ މަސައްކަތުގެ ތެރެއިން، މި އަންނަ މަސް ނިމެންވާއިރަށް ދެން އޮތް ކަންތައްވެސް އާދެ، އަޅުގަނޑު ވަޢުދުވީ މި އަހަރު ނިމެންވާއިރަށޭ، އެކަމަކު އެއަށްވުރެ ދެމަހެއްހާ ދުވަސް ކުރިން، މި އަންނަ މަސް ނިމެންވާއިރަށް، އައި.ޑީ.ކާޑުގެ މި ދެންނެވި ވަޢުދުވެސް ކޮންމެ އަތޮޅެއްގައި މަދުވެގެން އެއް ރަށުގައި ޤާއިމުވެގެންދާނެ. ބައެއް އަތޮޅުތަކުގައި ދެ ރަށުގައި، ތިން ރަށުގައިވެސް އެބަ ޤާއިމުކުރެވޭ ޕާސްޕޯޓް ދޫކުރުން، އައި.ޑީ.ކާޑު ދޫކުރުން. މިއީ ކީއްކުރަން ކުރާ ކަމެއްތޯ ވިސްނާލަމާ ހިންގަވާ. މިކަން އަޅުގަނޑުމެން މިކުރާ ސަބަބަކީ، އަޅުގަނޑުގެ ވިސްނުމަކީ، ރައްޔިތުންނާ ގާތުން ޚިދުމަތް ޤާއިމުކުރުން. ކުރީގައި މިވާގޮތަކީ، މާލެއަށް ހުރިހާ ކަމެއްގައިވެސް ބަރޯސާވާން މިޖެހެނީ. އަޅުގަނޑު ގަބޫލުކުރާ ހަމައެއްނޫން.
އެހެންވީމާ، އޭ.ޓީ.އެމް.ވެސް ކޮންމެ ރަށެއްގައި ޤާއިމު މިކުރަނީ. އޭ.ޓީ.އެމް. ޤާއިމުކުރީމާ، 200 ރުފިޔާ، 500 ރުފިޔާ ނަގަން، ނޫނީވިއްޔާ ކުޑަކުޑަ އަދަދަކުން ފައިސާ ނަގަން ކުރީގައި ޖީބުން އެ ކުރަންޖެހޭ ޚަރަދުކުރުން ނިމުމަކަށް އައިސް، ވަރަށްބޮޑެތި ފަސޭހަތައް އެބަ ލިބިގެންދޭ. ތަކުލީފުތަކުން އަރައިގަނޭ އެބަ. ނިކަމެތިގޮތެއްގައި އުޅެމުންދާންޖެހުނު ދިޔުން ނިމުމަކަށް އެބަ އާދޭ. މާލޭގައި އުޅޭ މީހެކޭ، އެންމެ ކުޑަ ރަށެއްގައި، އެންމެ ދުރުގައި އޮތް ރަށެއްގައި އުޅޭ މީހެކޭ، ހަމަހަމަވީ އެހިސާބުން. އަޅުގަނޑުގެ ކުރިމަތީގައި އަޅުގަނޑު ގަބޫލުކުރާ ހަމައަކީ އަދި އަޅުގަނޑު ޢަމަލީގޮތުން ތަންފީޒުކުރާ ފަލްސަފާއަކީވެސް، ކޮންމެ ރައްޔިތަކީ ހަމަހަމަ ރައްޔިތެކޭ. އެހެންވީމާ، ހުރިހާ ރަށެއްގައިވެސް ތިބެގެން، އެންމެ މަތީ ފެންވަރެއްގެ ޚިދުމަތް ލިބޭނެގޮތެއް ހެދުން އެއީ، އަޅުގަނޑު ތަންފީޒުކުރަން މަސައްކަތްކުރާ ފަލްސަފާއަކީ. އަދި ޕޮލިސީއަކީ. ސިޔާސަތަކީ.
އެހެންވީމާ އެގޮތުން، އޭ.ޓީ.އެމް.ގެ ޚިދުމަތް ކޮންމެ ރަށެއްގައި ޤާއިމުކުރަމުން މިދަނީ. ދެން އެކަމުގެ މުހިންމުކަން މިގޮތަށް ހުންނަ ރަށްރަށުގައި އުޅޭ ރައްޔިތުންނަށް އޭގެ ވެލިއު، އޭގެ މުހިންމުކަން އިޙްސާސްވާވަރު، އެހެން މީހުންނަށް ނުވާތީ، ފަހަރެއްގައި މަލާމާތްވެސް ކޮށްފާނެ. އެކަންވެސް އެބަ ކުރޭ. އަޅުގަނޑަށް ލިބެނީ ފަޚުރެއް، އުފަލެއް، ހިތްހަމަޖެހުމެއް، ރައްޔިތުންނަށް މިކަހަލަ ކަންކަން ސަރުކާރުން ކޮށްދެވުނީމާ. އެހެންވީމާ، އައި.ޑީ.ކާޑު ދޫކުރުންވެސް، ކޮންމެ އަތޮޅެއްގައި މިކަން މި ޤާއިމުކުރީ އެހެންވެގެން. ޕާސްޕޯޓް ދޫކުރުންވެސް ޤާއިމުކުރެވިގެން މިދަނީ އެހެންވެގެން. ވަރަށް ބޮޑެތި ޚަރަދުތަކެއް އެބަ ސަލާމަތްވޭ. ޢާންމު ރައްޔިތުންގެ ޖީބަށް ލުއިތައް ލިބޭ އެބަ. ދަތުރުކުރަންޖެހޭ ކުރުން، ފާއިތުވާ ވަގުތުތައް، އެއާއެކީގައި ތަޙައްމަލު ކުރަންޖެހޭ އެކިކަހަލަ އިންކޮންވީނިއަންސްތައް، އުނދަގޫތައް. އެއިން ސަލާމަތްވޭ.
ހަމަ އެފަދައިން، އިތުރު އެތައް ކަންތައްތަކެއް ކޮންމެ ރަށެއްގައި، ކޮންމެ އަތޮޅެއްގައި ޤާއިމުކުރެވެމުން މިދަނީ. އެކަހަލަ ވަރަށް ގިނަ ކަންތައްތަކެއް އެބަ ކުރިއަށްދޭ. ކޮންމެ ކަމެއް އަޅުގަނޑު މިރޭ ތަފުޞީލުކޮށް ކިޔައިދޭކަށްނޫން. އެކަމަކު މި ދަންނަވާލީ، މިކަމުގައި އަޅުގަނޑުމެންގެ ވިސްނުން މިހުރިގޮތް.
އާދެ އެހެންވީމާ، މި ރަށުގެ، ފެލިދޫގެ ތަރައްޤީއަށްޓަކައި މިހިރަ މައިގަނޑު ކަންތައްތަކުގެ ތެރެއިން، ތަޢުލީމީ ދާއިރާ، ޞިއްޙީ ދާއިރާ، ކުޅިވަރުގެ ދާއިރާގެ މަސައްކަތްތައް މި އަހަރު ފެށިގެންދާ ދިޔުމުގެ ތެރެއިން، މި އަންނަ އަހަރު، މި ދެންނެވިހެން، ކުރީކޮޅު ބިން ހިއްކުމުގެ މަސައްކަތް ފެށިގެން މިދަނީ. އަދި އިތުރު ވަރަށް ގިނަ ކަންކަންވެސް އަޅުގަނޑުމެން ކުރާނަން. މިގޮތުން ބަލާއިރުގައި، ސީ އެމްބިއުލެންސްގެ ޚިދުމަތް އެއީ، ރާއްޖޭގައި މިހާރު ތަރައްޤީކުރަން ޖެހިފައި އޮތް ކަމެއް. ސީ އެމްބިއުލެންސްގެ ޚިދުމަތް ލިބޭ ބައެއް ތަންތަނުގައި. މިއަތޮޅަކު ނުލިބޭ އެހާ ރަނގަޅަކަށް. ނުލިބޭފަހަރު ގިނައީވެސް. މީގެ ގާތްގަނޑަކަށް ދެމަހެއްހާ ދުވަސް ކުރިން ކެބިނެޓުގައި މިކަމާ މަޝްވަރާކޮށް، ސިޔާސަތެއް ކަނޑައަޅައި، މި އަންނަ އަހަރަށް މި ފާސްކުރާ ބަޖެޓުގައި އެބަ ހިމަނަން. މި ސީ އެމްބިއުލެންސް ފްލީޓް ތަރައްޤީކުރަން. މިހާރު އޮތް އަދަދުގެ ތެރެއަށް، އިތުރު ސީ އެމްބިއުލެންސްތައް އިތުރުކުރަން. މި އަތޮޅުގަޔާއި އަދި ބައެއް އެހެން އަތޮޅުތަކުގައި ޤާއިމުކުރުމަށް، އިތުރުކުރަން، ފުރިހަމަކުރަން. އެހެންވީމާ، ކުރިއަށް އޮތް ދުވަސްތަކުގައި މީގެ ތަފްޞީލުތައް އަޅުގަނޑު ހާމަކުރާނަން. އެހެންނަމަވެސް، މިއަތޮޅަށް، މި ރަށަށް ޚާއްޞަކޮށް، މި އަތޮޅުގައި ދެންހުރި ރަށްތަކަށް ފަސޭހަކަމާއެކީގައި ސީ އެމްބިއުލެންސްގެ ޚިދުމަތް މީގެތެރެއިން ޤާއިމުވެގެންދާނެ. އަޅުގަނޑުމެން ބަޖެޓުގެ ތެރެއިން އެ މަސައްކަތް ފެށިގެންގޮސް، ޑެލިވަރ ކުރެވެމުންދާވަރަކަށް. މިކަހަލަ އެތައް ކަމެއް. އަޅުގަނޑުމެން މި މަސައްކަތް މިކުރަނީ، ލާމަރުކަޒީކޮށް ރައްޔިތުން ގާތުން، ރައްޔިތުންނަށް ޚިދުމަތް ދޭން. އެގޮތުން ކުރެވޭ ގިނަ ކަންތައްތަކެއް ކުރެވިގެން މިދަނީ.
އާދެ، އަޅުގަނޑުމެންގެ މި ފަލްސަފާއަކީ ތަރައްޤީގެ ފަލްސަފާ. އަޅުގަނޑު ރައްޔިތުންނަށްވީ މައިގަނޑު އެއް ވަޢުދަކީ، ހުރިހާ ރައްޔިތުންނަށް ހަމަހަމަގޮތެއްގައި ތަރައްޤީ ގެނެސްދިނުން. އެގޮތުން، ކޮންމެ ރަށެއްގައި އެތައް މަސައްކަތްތަކެއް، ވަޢުދުތަކެއް ވެގެން ފަށައިގެން މިދަނީ. އިރާދަކުރެއްވިއްޔާ މި އަހަރުގެ މި ބަޖެޓުގެ ތެރެއިން، މީގެތެރެއިން ގިނަ މަޝްރޫޢުތަކެއް ފެށިގެން މިދަނީ، މިގޮތަށް ހަމަ ކޮންމެ ރަށެއްގައި. އިރާދަކުރެއްވިއްޔާ މި ފެށޭ ކޮންމެ މަޝްރޫޢަކީ، ތަންފީޒުކޮށް ނިންމާނެ މަޝްރޫޢެއް. ފުރިހަމަކަމާއެކީ ޑެލިވަރ ކުރާނެ މަޝްރޫޢުތަކެއް. މި އަންނަ އަހަރު މިގޮތުން ބާކީހުރި އެތައް މަޝްރޫޢުތަކެއް ފެށިގެންދާނެ.
އަޅުގަނޑުމެން މި ހުރިހާ ކަމެއް މިކުރަނީ، އަޅުގަނޑުމެންނަށް ވާރުތަވެގެންދިޔަ، ވީރާނާކޮށްލައި، ހަލާކުކޮށްލައި، ނެތިގެންދަމުންދިޔަ އިޤްތިޞާދު އިތުރަށް ގޯސްވިޔަނުދީ، ރާއްޖެ ބަނގުރޫޓުވިޔަނުދީ ސަލާމަތްކުރުމާއެކީގައި، ފައިސާ ޗާޕުކުރުމަކާ ނުލައި، ރައްޔިތުންނަށް ކަންތައްތައް ކޮށްދިނުމުގެ ފަލްސަފާގެ ތެރެއިން. އެހެންވީމާ، ވަރަށްގިނަ ކަންކަން އެއްފަހަރާ ހާސިލުކުރަން އަޅުގަނޑުމެން މަސައްކަތް މިކުރަނީ. އިރާދަކުރެއްވިއްޔާ މީގެ ފޮނިމީރުކަން ރައްޔިތުންނަށް ފުރިހަމަކަމާއެކީ ލިބިގެންދާނެ.
އަޅުގަނޑުމެން ނިންމި އެއް ނިންމުން ރައްޔިތުންނަށްޓަކައި، ރައްޔިތުންގެ ޙައްޤުގައި ޓޫރިޒަމް ސެކްޓަރއިންނާއި އަދި ވަކިވަރަކަށްވުރެ ބޮޑު އަދަދަކުން އާމްދަނީ ލިބޭ ދާއިރާތަކުން، ކުންފުނިތަކުން ބޭންކަށް ވަކި އަދަދަކަށް ޑޮލަރު މާރުކުރަން މަޖުބޫރުކުރުމުގެ ސިޔާސަތު ނިންމައި، ޤާނޫނެއް ހަދައި، ތަންފީޒުކުރަން ފެށީވެސް ރައްޔިތުންނަށްޓަކައި. އޭގެ ފުރިހަމަކަންވެސް އެބަ ލިބޭ މިހާރު. އޭގެ ފުރިހަމަކަން ލިބޭގޮތަކީ، ވިޔަފާރިތަކަށް ބޭރުން ތަކެތި އިމްޕޯޓް ކުރުމަށްޓަކައި، ޓީޓީ ހެދުމަށް ކުރީގައި ޑޮލަރު ނުލިބޭ އަދަދަށް، އެތައްގުނައަކަށް އިތުރަށް އެބަ ދޫކުރޭ ބޭންކް ރޭޓުގައި. މީގެ ނަތީޖާއަކީ، ހެޔޮ އަގުގައި ތަކެތި ލިބިގެންދިޔުން. ދެން ބައެއް ފަރާތްތަކުން ސިޔާސީ ބޭނުމެއްގައި، ރައްޔިތުންނަށް އުނދަގޫތަކެއް ކުރިމަތިކުރުމަށް ބައެއް ކަންތައް ކުރިޔަސް، ސަރުކާރުން މި ފުރުޞަތެއް ނުދޭނަން. މީގެ ކުރިންވެސް އަޅުގަނޑުމެން ނުދެން އެ ފުރުޞަތެއް.
މޭވާއާއި ތަރުކާރީއާ، މި ތަކެތީގެ އަގުބޮޑުކުރަން ފެށީމަ، ސަރުކާރުން މިހާރު ނިންމާފައި މިވަނީ، އެސް.ޓީ.އޯ މެދުވެރިކޮށް، ރާއްޖޭގެ އެންމެ ގިނައިން ބޭނުންކުރާ ބާވަތްތަކުގެ ތެރެއިން 10 ބާވަތެއްގެ މޭވާއާއި، 10 ބާވަތެއްގެ ތަރުކާރީއާއި އަދި އޭގެއިތުރަށް، ބައެއް ތަކެތި، މުގާއި، ބިހާއި، ކާށްޓާ. ތަރުކާރީގެ ބާވަތްތަކުގެ ތެރޭގައި ހިމެނޭ 10 އެތީގެ ތެރޭގައި އަލުވި ހިމެނޭ. މި 23 ބާވަތް ދާއިމީގޮތެއްގައި ހޯލްސޭލްކޮށް، ބަލްކުކޮށް ރާއްޖެއަށް އިމްޕޯޓްކޮށް، ޑިސްޓްރިބިއުޓްކޮށް، ނޫނީވިއްޔާ ރާއްޖޭގެ ރައްޔިތުންނަށް ހެޔޮ އަގުގައި ލިބޭނެގޮތް، ރަނގަޅު ކޮލިޓީގައި ލިބޭނެގޮތް ޤާއިމުކުރަން. މިކަން މި ކުރަނީ، ރައްޔިތުންގެ ހެވާއި ލާބައަށްޓަކައި. ނަތީޖާއަކީ ކޮބައިތޯ؟ އިހަށްދުވަހު ބޭންކުން ޑޮލަރު ނުލިބިގެން ހަމަ އެއްވެސް ގޮތެއް ނެތިގެން، އަގުބޮޑުކުރި އޮރެންޖާއި އާފަލު، މިހާރު ތިރިވެގެން ހިނގައްޖެ ހަމަ. ކޮބައިތޯ އެހެންވީމާ އޭގެ މާނައަކީ؟ މީގެ ދެތިންދުވަސް ކުރިން ބޭންކުން ބޭންކް ރޭޓުގައި ޓީޓީ ހަދަން ޑޮލަރު ނުލިބުނު ނުލިބުން، ބޭންކް އޮފް މޯލްޑިވްސްއިން ރަނގަޅުކޮށްދިނީތޯ؟ ހަމަ އޭރުގައިވެސް ލިބެޔޭ ރަނގަޅަށް. އެ ވާހަކަ މި ދަންނަވަނީ. ސިޔާސީ ބޭނުމެއްގައި، އޯގަނައިޒް ގޮތެއްގައި، ގަސްތުގައި ބަޔަކު ރައްޔިތުންނަށް ދެރަ ދިނުމަށްޓަކައި ބައެއް ކަންތައްތައް އެބަ ކުރެއޭ. އެކަންކަމަކަށެއް އަޅުގަނޑުމެންނެއް ލޯމަރާލައިގެންނެއް ހަމަ އެހެންނެއް ނުތިބޭނަމޭ. ރައްޔިތުންނަށްޓަކައި ކުރަންޖެހުނު ކޮންމެ ކަމެއް ކުރަމުންދާނަމޭ. އެއީ، މިއީ ރައްޔިތުންގެ ސަރުކާރެކޭ. ރައްޔިތުންގެ ފަޅީގައި ތާއަބަދު އޮންނަ، ރައްޔިތުންގެ ގާތުން ކަންކަން އަޑުއަހައިގެން، ރައްޔިތުން ބޭނުންވާ ގޮތަށް ކަންކަން ކުރާ ސަރުކާރެކޭ. އެހެންވީމާ، މިހާރު އެކަންވެސް އެވަނީ ހާސިލުވެގެން ގޮސްފައި. ދެނެއް އެގޮތަކަށެއް ސިޔާސީ ބޭނުމެއްގައި ތަކެތީގެ އަގު ބޮޑެއް ނުކުރެވޭނެ. އެކަމެއް ކުރުމުގެ ފުރުޞަތެއް، މޭވާއާއި ތަރުކާރީއާއި، މި ދެންނެވި ބާވަތުގެ ތަކެތި ލިބިގެންނެއް ނުދާނެ. އެ ޔަޤީންކަން ރައްޔިތުންނަށް އަޅުގަނޑު އަރުވަން.
ހަމައެއާއެކީގައި، ބައެއް އެހެން ކަންތައްތައްވެސް މިކުރަނީ. އައިނު ހައްދަން ވަރަށް އަގުބޮޑު. އަޅުގަނޑުމެން ނިންމީ ސަރުކާރުގެ ހޮސްޕިޓަލުން އެކަން ކުރަން. މިހާރު ކުރީގެ 1000 ރުފިޔާ، 2000 ރުފިޔާއާ ހަމައަށް އަޅުގަނޑުމެން އައިނު ހިލޭ ހެއްދޭ ރޭންޖް ބޮޑުކުރީމާ، މިހާރު ޕްރައިވެޓް ސެކްޓަރއިންވެސް އެ އަގު ކުޑަކޮށްފި. އެހެންވީމާ، އަޅުގަނޑުމެން މިގެންދަނީ ރައްޔިތުންނަށް ހެޔޮގޮތުގައި ކަންތައްތައްވާނެ ގޮތަށް ކަންތައްތައް ކުރަމުން. އެހެންވީމާ، ތަރައްޤީ ހާސިލުކޮށްދީ، ރައްޔިތުންނަށް ލުއިވާނެގޮތަށް ކަންކަން ކުރަމުން، ޤައުމުގައި ހަމަޖެހުން ޤާއިމުކުރަމުން މިގެންދަނީ.
އަޅުގަނޑުވީ އަނެއް ވަޢުދަކީ ހަމަޖެހުން ޤާއިމުކޮށްދިނުން. ނިމިގެންމިދާ، ވޭތުވެގެންމިދާ ދެ އަހަރެއްހާ ދުވަހުގެ ތެރޭގައި، އެއްވެސް ރައްޔިތަކަށް ފެނިވަޑައިގެންފައެއް ނޯންނާނެ، ސިޔާސީ ބޭނުމެއްގައި އެއްވެސް ފަރާތަކާ ދޭތެރޭގައި މި ސަރުކާރުން ފިޔަވަޅެއް އަޅާފައި އޮއްވައެއް. ބަދަލެއް ހިފިތަނެއް. އެހެންތޯ ކުރިން އޮތީ؟ ޤައުމުގައި ހަމަނުޖެހުން ތާއަބަދު ތަކުރާރުވަމުން، ސައިކަލްއެއްގެ ގޮތުގައި ދިޔައީ ހަމަ ތަކުރާރުވަމުން. ހަމަޖެހުމެއް ނެތް. މިހާރު މީގެ އެއްވެސް ކަމެއް ނޯންނާނެ.
ސިޔާސީ ފަރާތްތަކުން ކިތަންމެ ވާހަކައެއްވެސް ހަމަ ދައްކަންވީ. ސިޔާސީގޮތުން ދައްކަން ބޭނުންވާ ވާހަކަތައްވެސް ދައްކަނީ. އަޅުގަނޑުމެންނެއް ފިޔަވަޅެއް ނާޅަން. އެ މީހަކީ ސިޔާސީ މީހަކަށްވެގެން ކޯޓަކަށްވެސް ނުގެންދަން. ކޯޓުތައް، ޝަރުޢީ ދާއިރާ އެއޮތީ މިނިވަންކޮށް. މި ސަރުކާރުންނެއް މިދިޔަ ދެ އަހަރެއްހާ ދުވަހު ސަރުކާރަކުންނެއް އަޅުގަނޑެއް އެއްވެސް މީހަކު، ސަރުކާރުގެ މަގާމެއްގައި ހުރި އެކަކުވެސް، ޝަރުޢީ ދާއިރާގެ އެއްވެސް ފަނޑިޔާރަކަށް ގުޅައި، ވަކި މީހަކު ކޯޓަށް ގެންނާކަށް، ގެނެސްފައި ހުރި މީހަކު ދޫކޮށްލާކަށް، ވަކިމީހަކަށް ވަކިކަހަލަ ޙުކުމެއް ކުރާކަށް، ނުކުރާކަށް، ބުނެފައި އޮތް އެއްވެސް އެއްޗެއް ނޯންނާނެ. ހަމަ ތިޔަބޭފުޅުންހެން އަޅުގަނޑަށްވެސް ނޫހުން ފެންނަނީ. މިވެނި މީހަކު ކޯޓަށް ހާޒިރުކުރަން ޗިޓު ފޮނުވައިފިއޭ. އެއީ، އަޅުގަނޑުމެން އެކަން ކުރާގޮތަކީ. އަޅުގަނޑުމެން ޖުޑީޝަރީ ދާއިރާއަކަށްވެސް، ޝަރުޢީ ދާއިރާއަކަށެއް ނުފޫޒެއް ނުފޯރުވަން.
އަޅުގަނޑު އިޢުލާނު ކުރިން، އަޅުގަނޑާ މަގާމު ހަވާލުވެގެންދިޔަ ވަގުތު، ރައްޔިތުންނާ ފުރަތަމަ މުޚާޠަބުކޮށް ދެއްކި ވާހަކައިގެ ތެރޭގައި، މި ހިނދުން ފެށިގެން ޝަރުޢީ ދާއިރާއަށް އަތްފޯރުވުން، އަތްބޭނުން ނިމުނިއްޔޭ. އެގޮތަށް ޢަމަލުކުރަމުން މިދަނީ. އޭގެ ބަދަލުގައި، ޝަރުޢީ ދާއިރާ މިނިވަންކުރަމުން މިދަނީ. އޭގެތެރެއިން އެންމެފަހުން މި ނިންމީ ކޮން ކަމެއްތޯ؟
އެންމެފަހުން މި ނިންމީ، މާލީގޮތުން މިނިވަންކޮށްދޭން. މި އަންނަ އަހަރަށް ބަޖެޓް ފާސްވެގެންދާއިރުގައި، ރާއްޖޭގެ ތާރީޚުގައި ފުރަތަމަ ފަހަރަށް، ޝަރުޢީ ދާއިރާ މާލީގޮތުން މިނިވަންވާނެ. ވަކި އެކައުންޓެއް ޤާއިމުކޮށްދީ، ބްލޮކް ގްރާންޓްގެ އުސޫލުން ޝަރުޢީ ދާއިރާއަށް ބަޖެޓް ދޫކުރަމުންދާނެ. އެ ޝަރުޢީ ދާއިރާގެ ކޯޓުތަކުން، އެބޭފުޅުންގެ ޚަރަދުތައް ބަލަހައްޓަމުންދާނީ އޭގެތެރެއިން. ފިނޭންސް މިނިސްޓްރީއަކުން އެހެން އޮފީސްތައްހެނެއް، ބަޖެޓެއް ކޮންޓްރޯލެއް ނުކުރާނެ. އެ އޮންނަ އުސޫލުން ލިބެމުންދާނެ. އޭގެ ސަބަބުން، އިދާރީގޮތުންވެސް ވަރަށް ބޮޑެތި ކުރިއެރުންތައް ލިބިގެންދާނެ. އެހެންވީމާ، އަޅުގަނޑުމެން މިގެންދަނީ ޤައުމުގެ ހަމަޖެހުން ޤާއިމުކުރުމަށްޓަކައި މިފަދަ ކަންތައްތައް ކުރަމުން.
އެހެންވީމާ، އެއްވެސްވަރަކަށް ސިޔާސީގޮތުން އެއްވެސް ފަރާތަކަށް ކުރަމުންދާނެ އެއްވެސް އުނދަގުލެއް، ދުއްތުރާއެއް ނެތް. ނުކުރަން އަޅުގަނޑުމެންނެއް. ބޭނުން ވާހަކައެއް ދައްކަމުންދާންވީ. އެހެންނަމަވެސް، މިއީ އިސްލާމީ ޤައުމެއް ކަމުގައިވާތީ، އަޅުގަނޑުމެން ގަބޫލުކުރާ ހަމަތަކެއް ހުރީތީ، އެ ހަމަތައް ހިފަހައްޓަންޖެހޭ، ހަމަޖެހުން ޤާއިމުކުރުމަށްޓަކައި.
އަޅުގަނޑުމެންގެ ކޮންމެ މީހަކީ އަބުރަކާއި ޢިއްޒަތެއް ލިބިގެންވާ މީހެއްކަން އަޅުގަނޑުމެން އެންމެން ގަބޫލުކުރަންޖެހޭ. މި ޤައުމުގައި ހަމަޖެހުން ޤާއިމުވެގެންދާނީ، އަޅުގަނޑުމެން ކޮންމެ މީހަކު އަނެކާއަށް އިޙްތިރާމު އަދާކުރަން ދަސްކުރި ދުވަހަކުން. އަޅުގަނޑުމެންގެ ކޮންމެ މީހެއްގެ އަބުރާއި ޢިއްޒަތް އޮތް ފަދައިން، ހަމަ އަނެކާގެވެސް އެވަރަށް އަބުރާއި ޢިއްޒަތް އޮތްކަން، އެއީ އިލާހީ ޤާނޫނުކަން، މަތިން ބާވައިލެއްވި ގޮތްކަން، ކީރިތި ޤުރްއާނުގައި ބަޔާންކޮށްފައި އޮތް ތެދު ޙަޤީޤަތްކަން އަޅުގަނޑުމެން ގަބޫލުކުރި ދުވަހަކުން.
އަޅުގަނޑުމެންނަށް އޮތް އޯޕަން ލައިސެންސެއް ނޫން، އަނެކާއާ ދޭތެރޭގައި ބަލައިލުމެއްނެތި ދޮގުހަދަމުން ދިޔުން. ތެދު ބެލުމެއް ނެތި. ތެދަކީ ކޮބައިތޯ ބެލުމެއްނެތި. މިކަން އަޅުގަނޑުމެންގެ ތެރޭގައި ރަނގަޅުކުރަންޖެހޭ، އަޅުގަނޑުމެންގެ ޤައުމުގައި ހަމަޖެހުން ގެންނަންޏާ. އެހެންވީމާ، ސިޔާސީ ފަރާތްތަކަށްވެސް، އަދި މީޑިއާގައި މަސައްކަތްކުރައްވާ ފަރާތްތައް ކަމުގައިވިޔަސް، އެއްވެސް ފަރާތަކަށް ލިބިގެންވާ ޙައްޤެއްނޫން، އަނެކާއާ ބޭހޭގޮތުން ނޫނީވިއްޔާ، އެއްވެސްކަމަކާ ބެހޭގޮތުން ޙަޤީޤަތެއް ނެތް ވާހަކަތައް ދެއްކުމަކީ. ޙަޤީޤަތް ބެލުމެއްނެތި، ވާހަކަތައް ދެއްކުމަކީ އަޅުގަނޑުމެންނަކަށް ފުރިހަމަ މުސްލިމުންނަށްވީތީވެސް، އޮތް ޙައްޤެއްނޫން. އެގޮތަކަށް، އެ ވާހަކައެއް ނުދެއްކޭނެ. އެހެންވީމާ، އެކަން އަޅުގަނޑުމެން ގަބޫލުކުރަންޖެހޭ.
މީޑިއާގައި މަސައްކަތްކުރާ ފަރާތްތަކަށްވެސް، ފުރިހަމަ މިނިވަންކަން ރާއްޖޭގައި އެބައޮތް، ތެދުބަހުން ވާހަކަ ދެއްކުމުގައި. ކަންކަމުގެ ޙަޤީޤަތް ރައްޔިތުންނަށް ގެނެސްދިނުމުގައި، ތަންމިނަށް، ފުޅާމިނަށް މިނިވަންކަން އެބައޮތް. އެއްވެސް ހިފެހެއްޓުމެއް ނެތް. އެއްވެސް ހިފެހެއްޓުމެއް ނެތް. ހުރިހާ ކަމެއްވެސް ރިޕޯޓްކުރަންވީ. ލިޔަންވީ. ބޭނުންވަރަކަށް ލިޔަންވީ. އެކަމަކު ދޮގު ވާހަކައެއް ނުލިޔެވޭނެ. އަނެކާއާ ބެހޭގޮތުންނެއް ޙަޤީޤަތް ބެލުމެއްނެތި ވާހަކަތަކެއް ނުލިޔެވޭނެ. އެއީ ދިވެހި ރައްޔިތުން ގަބޫލުކުރާ ހަމައެއްނޫން. މިއީ، މާތްވެގެންވާ އިސްލާމްދީނަށް ތަބާވާ، ސައްތައިންސައްތަ އިސްލާމީ ޤައުމެއް. އަޅުގަނޑުމެން ބޭނުމެއްނުވޭ، މިތަނުގައި ހަމަނުޖެހުން އަނެއްކާވެސް އިއާދަވެގެންދާކަށް.
އަޅުގަނޑުމެން ބޭނުންވަނީ ހަމަޖެހިގެން އުޅޭ، އެއްބައިވަންތަ، ވަރަށް އެކުވެރި، ކުލުނާއި ލޯބިން ފުރިގެންވާ މުޖުތަމަޢެއްގެ ގޮތުގައި މި ޤައުމު އޮންނަން. އަނެކާއަށް ރެސްޕެކްޓް ކުރާ، އިޙްތިރާމު އަދާކުރާ ޤައުމަކަށްވާން. އެކަން ނަގާލުމަކަށް، އެއްވެސް މީހަކަށް ޙައްޤެއް ނޯންނާނެ. އެހެންވީމާ، ހަދަންޖެހޭ ޤާނޫނުތައްވެސް ހަދާނެ. އެއީކީއެއް އެ މީހަކަށް އޮތް ޙައްޤެއް އަތުލުމެއްނޫން. މީޑިއާގައި މަސައްކަތްކުރާ ފަރާތްތަކަށްވެސް ޙައްޤު އޮންނާނެ. އެ ދާއިރާއިން ކުރަންޖެހޭ ކަންތައް ޒިންމާދާރުކަމާއެކީގައި ކުރުމަށް. މި ފަހުން ފާސްވެ، ޤާނޫނަކަށްވެގެންދިޔަ ޤާނޫނުގައި އޮތީ އެ ވާހަކަ އެކަނި. އެ ވާހަކަ އެކަނި އޮތީ. ތެދުބަހުން ބޭނުން އެއްޗެއް ލިޔެވޭނެއޭ. ރިޕޯޓް ކުރެވޭނެއޭ. އެކަމަކު ދޮގު ވާހަކަތަކެއް، ސާބިތު ނުކުރެވޭ ވާހަކަތަކެއް ނުލިޔެވޭނެއޭ. ސާބިތު ނުކުރެވޭ ވާހަކައެއް ލިޔަން އެ މީހަކު ޖެހޭނަމަވެސް، އޭގައި ބަޔާންކުރަން އެބަޖެހޭ، ތިމަންނައަކަށް މިއީ އަދި ސާބިތުވާ ކަމެއް ނޫނޭ. އަން ވެރިފައިޑޭ. މި ވެރިފައިއެއް ނުކުރެވެއޭ، ބަޔާންކުރަންޖެހޭ ލިޔާއިރުގައި. އެހެން އެ ޤާނޫނުގައި އޮތީ.
އަޅުގަނޑަކަށް އަދި ދިމައެއްނުވޭ، އިހަށްދުވަހު މި ތަޞްދީޤު ކުރެވިގެންދިޔަ ޤާނޫނު ކީ އެއްވެސް ނޫސްވެރިޔަކާ. އަދި ދިމައެއްނުވޭ. ހަމަ އަނެކަކު ބުނި ވާހަކައެއް ގަބޫލުކޮށްލައިގެން، ހަމަ މިދަނީ ކުރިއަށް. އެހެންވީމާ، އެއީކީއެއް ޒިންމާދާރު ގޮތެއްނޫން. މީގައި މިއޮތީ ދިވެހިބަހުން ލިޔެފައި މި ޤާނޫނުގައި. އެއްކޮޅުން އަނެއްކޮޅަށް ކިޔައިލީމާ ނުފެންނާނެ އެއްވެސްތާކުން، މިނިވަންކަން އަތުލާފައި އޮތްތަނެއް މީޑިއާގެ މިނިވަންކަމަށް.
މިނިވަންކަމެއްނޫން، ތިމާ ބޭނުންވާހާ ވާހަކައެއް ދެއްކުމަކީ ދޮގު ހަދައިގެން. އެ ޙަޤީޤަތް ބެލުމެއް ނެތި. އެކަކަށްވެސް އޮތް ޙައްޤެއްނޫން އެއީކީއެއް. ކޮންމެހެން މީޑިއާގައި އުޅޭކަށްވެސް ނުޖެހޭ. އަޅުގަނޑުމެން އެކަކަށްވެސް އޮތް ޙައްޤެއްނޫން، އަނެކާއާ ބެހޭގޮތުން ދޮގު ވާހަކަ ދެއްކުމަކީ. އެއީ، އަޅުގަނޑުމެންނަކީ ފުރަތަމަ ކަމަކަށް، މުސްލިމުންނަށްވީތީ އަޅުގަނޑުމެން ގަބޫލުކުރާ ހަމަ. ކީރިތި ޤުރްއާނުގައި އެއޮތީ. އީމާންކަން ފުރިހަމަވެގެންނުވޭ، ދޮގުހަދާނަމަ. ޙަޤީޤަތް ނުބަލައި ވާހަކަ ދައްކާނަމަ. ޚަބަރަކާއިގެން މީހަކު އައިސްފިއްޔާ، އޭގެ ތެދު ދޮގު ބަލާފައި ނޫނީވިއްޔާ، އެ ވާހަކަ ނުދައްކަންވެސް އެއޮތީ ޤުރްއާނުގައި. އެހެންވީމާ، މިއީ އަޅުގަނޑުމެން މުސްލިމުންނަށްވީތީވެސް ގަބޫލުކުރަންޖެހޭ ކަމެއް. އިންސާނުންނަށްވީތީވެސް ގަބޫލުކުރަންޖެހޭ ހަމަ. ތިމާއަކީ އިންސާނަކަށްވާއިރުގައި، އަނެކާއަކީވެސް އިންސާނެއް. ތިމާގެ އަބުރެއް އޮތިއްޔާ، އަނެކާގެވެސް އަބުރެއް އެބައޮތް. ތިމާގެ ޢާއިލާއާއި ރަޙުމަތްތެރިން ތިބިއްޔާ، އަނެކަކުގެވެސް އެބަތިބި. ކިތައް ޢާއިލާތޯ ހަލާކުވެ ރޫޅިގެންދިޔައީ، ޙަޤީޤަތެއް ބެލުމެއްނެތި ލިޔަމުންދާ ވާހަކަތަކުގެ ސަބަބުން.
އެހެންވީމާ، އަޅުގަނޑުމެން މުސްލިމުންނަށްވީތީ، އިސްލާމްދީނުގައި އައިސްފައި އޮތް ހަމަތައް ގަބޫލުކުރަންޖެހޭނެ. ކީރިތި ރަސޫލާ صـلّى الله علـيـه وسـلّم ޙަދީޘް ކުރައްވާފައިވެސް އޮންނަނީ މިގޮތަށް. ''މުސްލިމަކީ އޭނާގެ އަތާއި ދުލުގެ ނުބައިކަމުން އަނެއް މުސްލިމާ ސަލާމަތްވެގެންވާ މީހާއޭ.'' އަތާއި ދުލުގެ ނުބައިކަމުން އަނެއް މުސްލިމާ، އަނެއް އުޚުތު، އަޚް ސަލާމަތްވެގެންވާ މީހާއޭ. އެ ކީކޭތޯ އެއޮތީ؟ އަޅުގަނޑުމެން އެއްވެސް މީހަކަށް އޮތް ޙައްޤެއްނޫނޭ، ހަމަ ހިތަށް އަންނަހާ އެއްޗެއް ލިޔުމަކީ ޙަޤީޤަތް ނުބަލާ. އެހެންވީމާ، މި ކަން އެކަނި މި ޤާނޫނުގައި މިއޮތީ. އެކަމަކު ހަމަ ޙަޤީޤަތެއް ނުބަލައި، ސޯޝަލް މީޑިއާވެސް ބޭން ކުރަނިއްޔޭ، ޢާންމު ރައްޔިތުންގެ ސޯޝަލް މީޑިއާ އެކައުންޓްތައްވެސް މީގެތެރެއިން ތަޅުއެޅުވިގެންދަނީއޭ، ބަންދުކުރަނީއޭ ކިޔައިގެންވެސް ފިތުނަ ފަސާދަ އުފެއްދުން މިއޮތީ. ކީރިތި ޤުރްއާނުގައި އޮންނަނީ، ފިތުނަ ފަސާދަ އުފެއްދުމަކީ، ގަތުލު ކުރުމަށްވުރެ ނުބައިކަމެކޭ. އަޅުގަނޑުމެންނަކީ މުސްލިމުން. ދެން ޤުރްއާނަށްވެސް ގޮންޖަހާލާފައި ލިޔަންވީތޯ ހަމަ. ނުކުރެވޭނެ އެކަމެއް. މި ޤައުމަކު ނުކުރެވޭނެ އެކަމެއް. އެކަން ކުރަން ކޮންމެތާކުން ކޮންމެކަހަލަ ބަޔާނެއް ހިފައިގެންއަޔަސް، އަޅުގަނޑެއް ފަރުވާލެއް ނެތް އެކަމަކަށް. އަޅުގަނޑު މިހުރީ ﷲ ގަންދީ ހުވާކޮށްގެނޭ. ކޮންކަމަކަށް؟ އިސްލާމްދީނާ އެއްގޮތަށް މި ޤައުމުގައި ކަންކަން ކުރުމަށް. މާތްވެގެންވާ އިސްލާމްދީނުގެ ހަމަތަކާ އެއްގޮތަށް، ޤާނޫނުއަސާސީއާ އެއްގޮތަށް ދައުލަތް ހިންގަން އަޅުގަނޑަށް ހަވާލުކޮށްފައި ރައްޔިތުން އޮތީ. އެކަން ކުރުމުގައި އަޅުގަނޑު އިރާދަކުރެއްވީތީ، ވަރަށް ސާބިތުކަމާ އެކީގައި ކުރިއަށް މިދަނީ. ކުރިއަށްދާނީވެސް. އެކަމުގައި އަޅުގަނޑު އެންމެ ފިޔަވަޅެއްވެސް ފަހަތަކަށް ނާޅާނަން، އެހެން މަގަކުން ދާކަށެއް.
އެހެންވީމާ، މިގޮތުން އަޅުގަނޑުމެންގެ ޤައުމުގައި އޮންނަންޖެހޭ ހަމަތައް ޤާއިމުކުރުމަށްޓަކައި، ކުރެވޭ ކަންކަން މި ކުރެވެނީ. ޚިޔާލު ފާޅުކުރުމުގެ މިނިވަންކަން މިއޮތީ ހަމަ ތަންމިނަށް ފުޅަލަށް. ހަމަތަކެއް، އިސްލާމުންނަށްވީތީ މި އޮތް ހަމަތައް ފޮލޯކުރަންޖެހެނީ. އެއްގޮތަކަށްވެސް ނޫޅެ، އެއްވެސް މީހެއްގެ ސޯޝަލް މީޑިއާ ބޭންކުރާކަށް. ޒުވާނުންގެ އެކިކަހަލަ ޕްލެޓްފޯމްތައް މަނާކުރާކަށް. އެކަހަލަ އެތައް ވާހަކައެއް އެބަ ދައްކައޭ. އެތައް ވާހަކައެއް. މިކަހަލަ އެތައް ވާހަކައެއް މި ދައްކާ ދެއްކުން އެއީ، އެ ވާހަކަ ދައްކާ މީހުންގެ ނިކަމެތިކަން. ފިނޑިކަން. ނާޤާބިލުކަން. ޤައުމާމެދު ހެޔޮނޭދޭކަން.
އެހެންވީމާ، އެފަދަ ވާހަކަތައް ދައްކާ މީހުންނަށް އަޅުގަނޑު އެދެނީ، މި ޤާނޫނު އެއްކޮޅުން އަނެއްކޮޅަށް ކިޔާލަބަލާށޭ. ދިވެހިބަހުންނޭ ލިޔެފައި އޮތީ. އޭގެ އެންމެ ޞަފްޙާއަކުންވެސް ނުފެންނާނެ، އަޅުގަނޑު މި ދެންނެވި ވާހަކަތައް ފިޔަވައި، އެއްވެސް ވާހަކައެއް. އެހެންވީމާ، އަޅުގަނޑުމެން ކަންބޮޑުވާންޖެހޭ އެއްވެސް ކަމެއް ނެތް އެ ޤާނޫނަކު. އަޅުގަނޑުމެން ވާން އެބަޖެހޭ، ތެދު ޙަޤީޤަތް ހޯދައި ބަލައި، އެގޮތަށް ތެދު ޙަޤީޤަތް ހޯދައިގެން، ޙަޤީޤަތް ގަބޫލުކޮށްގެން ކުރިއަށްދާ މުޖުތަމަޢަކަށްވާން. އޭރުން، މި ޤައުމުގައި ހަމަޖެހުން ޤާއިމުވާނީ. އަދި ހަމަޖެހުން ޤާއިމުކުރަން ސަރުކާރުން ކިތަންމެ ކަމެއް ކުރިޔަކަސް އެކަމެއް ނުއެއްވާނެ. ސިކުނޑި ތަރައްޤީވެގެން ވާނީ. ސިކުނޑި ތަރައްޤީވެގެން ވާނީ. އެއީ، އަޅުގަނޑުމެން އަމިއްލައަށް ނިންމާ ނިންމުމެއް.
ސަރުކާރުން ކިތަންމެވަރަކަށްވެސް ހޮސްޕިޓަލާއި ސްކޫލާއި، ބިންހިއްކުމާ، އެތައްކަމެއް ކުރެވިދާނެ. އެކަމަކު ސިކުނޑިއެއް ތަރައްޤީއެއް ނުއެއްވެއޭ. މި ޖެހެނީ އަނެއް މީހާގެ ސިކުނޑިން ވިސްނަން. އެހެނެއްނޫނޭ އިސްލާމްދީނުގައި އޮތީކީ. ކޮންމެ މީހަކަށްވެސް އޮތް ޒިންމާއެއް، އެ މީހާގެ ސިކުނޑިން ވިސްނަން. އެ މީހާއަށް ދެއްވި ބުއްދިން ވިސްނަން. ބުއްދި ދެއްވީ، ކަމަކު. އެހެންނޫނީ، ބުއްދި ނުދެއްވާ ޖަނަވާރުންނެކޭ ތަފާތެއް ނެތެއްނޫންތޯ؟ އެ ކީއްވެތޯ މި ބުއްދި ބޭނުންނުކުރަން މިއުޅެނީ؟ ހަމަ މީހަކު ދައްކާ ވާހަކައެއް ނުޖެހޭ ގަބޫލުކުރާކަށް. ނުޖެހޭ ގަބޫލުކުރާކަށް.
އެހެންވީމާ، މި ޤައުމަކު ޤާނޫނުތައް މުގުރާފައި، ޤާނޫނުތަކާ ޚިލާފަށް ކަންކުރާނަމޭ ކިޔާފައި، ކުރެވޭނެ އެއްވެސް ކަމެއް ނޯންނާނެ. އެ ފުރުޞަތެއް ނުދޭނަން. ޤާނޫނުއަސާސީ ނަގަހައްޓަން އަޅުގަނޑަށް ރައްޔިތުން މަތިކުރީ. ޤާނޫނުއަސާސީން މަތިކުރަނީ. އަޅުގަނޑު ހުވާކުރީ. ރޫލް އޮފް ލޯ މި ޤައުމުގައި އެސްޓެބްލިޝް ކުރާނަން. ޤާނޫނުގެ ވެރިކަން މިތާނގައި އެސްޓެބްލިޝް ކުރާނަން. އެކަމުގައިވެސް އެންމެން ހަމަހަމަވާނެ. އެކަކަށްވެސް ގޮންޖަހާލާފައި، ޤާނޫނަކާ ޚިލާފަށް މިތާކު، ޤާނޫނަކަށް ތަބައެއްނުވާނަމޭ ބުނެފައި، އެއްވެސް ކަމެއް ކުރުމުގެ ފުރުޞަތެއް ނުދޭނަން. އެއީ، އަޅުގަނޑަށް އޮތް ފުރުޞަތެއް ނޫން. އަޅުގަނޑަށް، އަޅުގަނޑު ކޮށްގެންހުރި ހުވާގައި އޮތް ފުރުޞަތެއް ނޫން، އެ ފުރުޞަތު ދީގެން ހުރުމަކީ. މިތަނުގައި ބައިބައިވުން، ތަފާތުކުރުން ޤާއިމުކުރުން، އޭގެ މާނައަކީ. އެކަކަށް ވަކިގޮތެއް، އަނެކަކަށް ވަކިގޮތެއް. އޭނަ ޤާނޫނަށް ތަބާވާންވީ. އަނެކަކު ތަބާނުވާންވީ. މިއީ ޖަންގަލީގެ އުސޫލު. އެކަމެއް ކުރުމުގެ ފުރުޞަތެއް ނުދޭނަން އަޅުގަނޑެއް.
އެހެންވީމާ، އަޅުގަނޑު އިރާދަކުރެއްވިއްޔާ، މި ދައްކާ ވާހަކައެއް ދައްކަނީ، މި ދެއްކެނީ ކޮން ވާހަކައެއްކަން އެނގިހުރެ، ހިތުގެ އެންމެ ފުންމިނުން ގަބޫލުކޮށްގެން. ހިތުން އެންމެ ފުންމިނުން މީންކޮށްފައި ދައްކާ ވާހަކައެއް ދައްކަނީ. އަޅުގަނޑު އެދެން އަދި އަޅުގަނޑު ހަމަ ޔަޤީންކުރަން، ލޮބުވެތި ދިވެހި ރައްޔިތުން މިކަން ގަބޫލުކުރައްވާނެ ކަމަށް.
އަޅުގަނޑު އެދެނީ، އަޅުގަނޑުމެންނަކީ އަޅުގަނޑުމެންގެ އަމިއްލަ ސިކުނޑިން ވިސްނައި، ހެޔޮބަސްއަހައި، ހެޔޮބަސް ގަބޫލުކުރާ ބައެއް ކަމުގައި ވެގެންދިޔުން. އޭރުން، އިރާދަކުރެއްވިއްޔާ އަޅުގަނޑުމެންގެ ޤައުމުގެ ހަމަޖެހުން ޤާއިމުވެ، އަޅުގަނޑުމެންނަށް ތަރައްޤީ، ޙަޤީޤީ މާނައިގައި ހާސިލުވެގެންދާނެ. ސިކުނޑި ތަރައްޤީވެގެން، އެކަން ހާސިލުވެގެންދާނީ.
އަޅުގަނޑުގެ ދުޢާއަކީ، އަޅުގަނޑުމެން މި ކުރާ މަސައްކަތްތަކުގައި، اللهُ سُبْحَانَهُ وَتَعَالَى ބަރަކާތް ލައްވައި، އަޅުގަނޑުމެންނަކީ ހެޔޮބަސްއަހައި، ހެޔޮބަސް ގަބޫލުކުރާ ބަޔަކު ކަމުގައި اللهُ سُبْحَانَهُ وَتَعَالَى ލެއްވުން. އަޅުގަނޑުމެންގެ ޤައުމަށް އުފާފާގަތިކަމާއި، ހަމަޖެހުމާއި ތަރައްޤީ މިންވަރު ކުރެއްވުން. އާމީން!
وَمَا تَوْفِيقِي إِلَّا بِاللَّهِ عَلَيْهِ تَوَكَّلْتُ وَإِلَيْهِ أُنِيبُ.
وَالسَّلَامُ عَلَيْكُمْ وَرَحْمَةُ اللهِ وَبَرَكَاتُه.