بِسْمِ ٱللّٰهِ ٱلرَّحْمٰنِ ٱلرَّحِيمِ
اَلْحَمْدُ للَّهِ رَبِّ الْعاَلَمِينْ، وَالصَّلاَة وَالسَّلاَمُ عَلَى رَسُولِ ٱللَّهِ، وَعَلَى آلهِ وَصَحْبِهِ أَجْمَعِينْ.
ފުޅަދޫގެ ލޮބުވެތި ރައްޔިތުން، ކައުންސިލްގެ ރައީސް، ދާއިރާގެ ޢިއްޒަތްތެރި މަޖިލިސް މެންބަރު، ކައުންސިލަރުންނާއި މުއައްސަސާތަކުގެ ވެރިން، މި ރަށުގެ ޚިދުމަތްތެރި އިސް ރަށްވެހިން، ވަޑައިގެން ތިއްބެވި އެންމެހައި ޢިއްޒަތްތެރިން، މި ޖަލްސާ، ދުރާއި ގާތުން ބައްލަވަމުން ގެންދަވާ އަދި އަޑުއައްސަވަމުން ގެންދަވާ ލޮބުވެތި އެންމެހައި ރައްޔިތުން؛
السَّلامُ عَلَيْكُم ورَحْمَةُ اللهِ وَبَرَكاتُهُ.
މިއަދުގެ ހަވީރުގެ ވަގުތު އަޅުގަނޑުމެންނަށް މި ރަށަށް އާދެވުމުން، ތިޔަބޭފުޅުން އަޅުގަނޑުމެންނަށް ވިދާޅުވި ހޫނު މަރުޙަބާއަށްޓަކައި، ފުޅަދޫގެ ލޮބުވެތި އެންމެހައި ރައްޔިތުންނަށް، އަޅުގަނޑުގެ ހިތުގެ އެންމެ ފުންމިނުން ވަރަށް ބޮޑަށް ޝުކުރު ދަންނަވަން.
މި ރަށުގެ ތަރައްޤީއަށް ބޭނުންވެފައިވާ ހުރިހާ މަސައްކަތްތަކެއް ކޮށްދިނުމަށް ކުރަންޖެހޭ އެންމެހާ ތައްޔާރީތަކުގެ ކަންކަން ވަރަށް ބާރު ސްޕީޑްގައި މިހާތަނަށް އަޅުގަނޑުމެންނަށް ކުރިއަށް ގެންދެވިފައިވާތީ، އިރާދަކުރެއްވިއްޔާ، ދެން ކުރިއަށް އޮންނާނީ ޢަމަލީގޮތުން މި މަސައްކަތްތައް ތަންފީޒުކުރުމުގެ، ނޫނީވިއްޔާ ކުރިއަށް ގެންދިޔުމުގެ މަރުޙަލާ. މި ދަތުރު އަޅުގަނޑު އެންމެ ބޮޑަށް ކުރަން ބޭނުންވި އެއް ސަބަބަކީވެސް މިކަމުގެ ޔަޤީންކަންދީ، ތިޔަބޭފުޅުންނަށް އެކަމުގެ މަޢުލޫމާތު ޙިއްޞާކުރުން. ތިޔަބޭފުޅުންގެ އަރިހަށްއައިސް، ތިޔަބޭފުޅުންނާއި، ރައްޔިތުންނާ ބައްދަލުކޮށް، ރައްޔިތުން ބޭނުންވާ ކަންކަން ވަރަށް ސާފުކޮށް ވިދާޅުވުމުގެ ފުރުޞަތު ތިޔަބޭފުޅުންނަށް އަރުވައި، ރައްޔިތުން ބޭނުންވާގޮތަށް ކަންތައްތައް ގެންދިޔުމަށްޓަކައި.
އާދެ، އެންމެ ބޮޑަށް ދަތިވެފައިވާ ކަންކަމުގެ ތެރޭގައި، މި ރަށުގައި ފެށިފައިވާ، އަދި ކުރިއަށް ގެންދިޔުމަށް ވަރަށް ގިނަ ދަތިތައް ކުރިމަތިވެފައި އޮތް ފެނާއި ނަރުދަމާގެ މަޝްރޫޢު ހިމެނޭ. މި ރަށުގެ ރައްޔިތުންނަށް ބޭނުންވާ އެކިއެކި ކަންކަމަށް ބަލާއިރުގައި، ފެނާއި ނަރުދަމާގެ މަޝްރޫޢު އަވަހަށް ނިންމުމަކީ، ރަށަށް ވަރަށް މުހިންމު ކަމެއް. އާންމު ދިރިއުޅުމުގެ ބޭނުމުގައިވެސް، އަދި ރަށުގެ ތަރައްޤީގައި ކުރިއަށްހުރި ކަންކަމުގައި، އަދި މިހާރު ޓޫރިޒަމްގެ ދާއިރާއިން ކުރިއަށްދިޔުމުގައިވެސް މިއީ، ވަރަށް މުހިންމު ކަމެއްކަން އަޅުގަނޑުމެން ގަބޫލުކުރަން.
އެހެންވީމާ، ވަރަށް އަވަހަށް ޢަމަލީގޮތުން މަސައްކަތް ފެށިގެންދާނެ. މިހާރު އެމް.ޑަބްލިޔޫ.އެސް.ސީ.އާ އެކީގައި އެވަނީ އެގްރިމެންޓް ހެދިފައި. ތަކެތި ގެނެވި، ޢަމަލީ މަސައްކަތް ފެށުމަށްވަނީ ތައްޔާރުވެފައި. މީހުން ހޯދުމުގައި ދަތިތަކެއް ދިމާވި. މި ރަށުގެ އާބާދީގައި މީހުން މަދުވުމާ އެކީގައިވެސް ދަތިތައް ދިމާވާނެ. މިހާރު މި ރަށުން ބޭރުން އެހެން ތަންތަނުން މުވައްޒަފުން ހޯދައިގެންވިޔަސް މަސައްކަތް ފެށުމަށް އެދަނީ ތައްޔާރުވަމުން.
އެހެންވީމާ، އިރާދަކުރެއްވިއްޔާ މި މަހުގެ ތެރޭގައި، މި މަޝްރޫޢުގެ މަސައްކަތްތައް ފަށައި، ވަރަށް އިސްކަމެއްދީގެން، ބާރުމިނުގައި ކުރިއަށް ގެންގޮސް މި މަޝްރޫޢު ނިންމާނެ ކަމުގެ ޔަޤީންކަން އަޅުގަނޑު ތިޔަބޭފުޅުންނަށް އަރުވަން. އޭރުން އިރާދަކުރެއްވިއްޔާ، އަޅުގަނޑު މި ދެންނެވި ފަދައިން، ތިޔަބޭފުޅުންނަށް ކުރިމަތިވެފައިވާ ދަތިކަން އިރާދަކުރެއްވިއްޔާ ފިލުވައިލެވުނީ.
މީގެ އިތުރަށްވެސް، ރަށުގައި ކުރިއަށް ގެންދަންހުރި ވަރަށް ގިނަ މަޝްރޫޢުތައް އެބަހުރި. ރަށުގައި މިހާރު ޓޫރިޒަމް ފުޅާވެފައިވާ ގޮތަށް ބަލާއިރުގައި، ރަށުގެ އެކިއެކި ޚިދުމަތްތައް ދިނުމަށް ގެންނަ، ނޫނީ އަންނަ މުވައްޒަފުން ބޭތިއްބުމަށް ވަރަށް ބޮޑު ދަތިތައް ކުރިމަތިވޭ. އެއީ، ޓީޗަރުން ކަމުގައިވިޔަސް، ހެލްތު ސެންޓަރަށް ގެންނަ މުވައްޒަފުން ކަމުގައިވިޔަސް، އަދި ޖުމްލަކޮށް، ހުރިހާ ދާއިރާއަކަށް ގެންނަ މުވައްޒަފުން ކަމުގައިވިޔަސް. އެހެންވީމާ، ކައުންސިލަށް އަދި މުއައްސަސާތަކަށް މި ދިމާވެފައިވާ ދަތި ފިލުވައިލުމަށް މަސައްކަތްކުރުމަކީވެސް އަޅުގަނޑު ގަބޫލުކުރަނީ ސަރުކާރުން އިސްކަމެއް ދޭންޖެހޭނެ ކަމެއްކަމަށް.
އަޅުގަނޑު ފަށަމުންވެސް ދެންނެވިން، އަޅުގަނޑު ރައްޔިތުންގެ ގާތަށް މި އަންނަނީ، ރައްޔިތުން އެދޭ ކަންކަން ގާތުން އަޑުއަހައި، ރައްޔިތުން ބޭނުންވާގޮތަށް ކަންކަން ގެންގޮސްދިނުމުގެ ބޭނުމުގައި ކަމަށް. މިރަށަށް ވަރަށް މުހިންމުވޭ، މިކަމަށް ހައްލެއް އައުން. މި ރަށުގައި ކަންކަން ކުރިއަށް ގެންދިޔުމަށް ހުރި ދަތިތަކަށް ބަލާއިރުގައި، ރައްޔިތުންނަށް ވަރަށް މުހިންމުވޭ، ރަށުގައި ޤާއިމުވެފައި ތިބޭ، ބޭރުންއައިސް ތިބޭ މުވައްޒަފުން، މި ދެންނެވި ޚިދުމަތްތައް ދިނުމުގެ މުއައްސަސާތަކަށް ބޭނުންވާ މުވައްޒަފުން ތިބޭނެ އެކޮމޮޑޭޝަން ބްލޮކެއް ސަރުކާރުން އަޅައިދިނުން. މިއީ، މި އަހަރުގެ ބަޖެޓުގައި އަޅުގަނޑުމެން ޕްލޭންކޮށްފައި އޮތް ކަމެއްނޫން.
އެހެންވީމާ، އިރާދަކުރެއްވިއްޔާ، މި އަންނަ އަހަރަށް އަޅުގަނޑުމެން ފާސްކުރާ ބަޖެޓުގެ ތެރޭގައި، މި މަޝްރޫޢު ހިމަނައިދޭނަން. ހިމަނައި، މި އަންނަ އަހަރު މި މަޝްރޫޢު ކުރިއަށް ގެންގޮސްދޭނަން. އެކަމުގެ ޔަޤީންކަން ދެން. އޭރުން ބޮޑުއަގުގައި ތަންތަން ކުއްޔަށް ނަގައިގެން، އެ ކުރަންޖެހޭ ކަންކަމުގައި ދެކޮޅުނުޖެހޭ މައްސަލައަށް ހައްލެއްއައިސް، ރަށުގައި ރަނގަޅު ފެންވަރުގެ މުވައްޒަފުން ބޭތިއްބުމުގައި ތިޔަބޭފުޅުންނަށް ކައުންސިލަށް، އަދި މުއައްސަސާތަކަށް ފަސޭހަތައް ވެގެންދާނެ. ސްކޫލަށްވެސް، ހެލްތު ސެންޓަރަށްވެސް، ކައުންސިލަށްވެސް. ޖުމްލަކޮށް، ހުރިހާ މުއައްސަސާތަކަށް.
ހަމައެއާއެކީގައި، ދެންހުރި ކަންކަމަށް ބަލާއިރުގައި، ހެލްތު ދާއިރާއަށް، ޞިއްޙީ ދާއިރާއަށްވެސް ވަރަށް މުހިންމު ކަންތައްތައް ކޮށްދޭން ޖެހިފައިވޭ. އަޅުގަނޑު ރިޔާސީ އިންތިޚާބުގައިވެސް ވަޢުދުވެފައި ވާނެ، މިކަމާ ގުޅޭގޮތުން ތަރައްޤީގެ މަޝްރޫޢު ކުރިއަށް ގެންދިޔުމަށް. ލެބޯރެޓަރީގެ ޚިދުމަތް ޤާއިމުކުރުމަކީ، ހުރިހާ ރަށެއްގައިވެސް އެ ރަށެއްގެ އާބާދީއާއި، އަދި ތަރައްޤީގެ ޕޮޓެންޝަލް އޮތްގޮތަށް ބަލާއިރުގައި، ނިސްބަތުން އަޅުގަނޑުމެން ކުރާނެ ކަމެއްކަމަށް ދަންނަވައި، އަޅުގަނޑު އޮންނާނީ ސިޔާސަތު އޭރު އިޢުލާނުކޮށްފައި. މި ރަށުގައި ޞިއްޙީ މަރުކަޒުގެ ޖާގަ، މިހާރުގެ ގޯތީގެ ތެރޭގައި އޮތް އެންމެ ބޮޑުމިނަކަށް ފެތޭގޮތަށް ޑިޒައިނެއް ހަދައިގެން، ޢިމާރާތެއް އަޅައިދީ، އެތަނުގައި ލެބޯރެޓަރީއާއި، ދެންވެސް ހުރި ޚިދުމަތްތައް ޤާއިމުކުރުމުގެ ކަންކަން ކުރިއަށް ގެންދިޔުމަށްޓަކައި، އިރާދަކުރެއްވިއްޔާ ފަންނީ މަސައްކަތްތައް ވަރަށް އަވަހަށް ނިންމާލަދޭނަން. ނިންމައި، އިޢުލާނުކުރެވި، ބަޔަކު ހޯދައިގެން، މި އަހަރުގެ ތެރޭގައި އެ މަޝްރޫޢު ފަށައިދޭނަން.
އެ މަޝްރޫޢު ނިމުމުން އިރާދަކުރެއްވިއްޔާ، ވަރަށް ބޮޑެތި ފަސޭހަތައްވާނެ. މި ރަށަކީވެސް އާބާދީގެ ނިސްބަތުން ބަލައިފިއްޔާ، ތެލަސީމިއާ ޕޭޝަންޓުންގެ ޕަސެންޓޭޖް ކޮންމެވެސްވަރަކަށް މަތި ރަށެއް. އަދި އެހެން ބަލިތަކަށްވެސް ޚިދުމަތްތައް ފޯރުކޮށްދޭންޖެހޭ ރަށެއް މިއީ. އެހެންވީމާ، ލެބޯރެޓަރީގެ ޚިދުމަތް ޤާއިމުވެގެން ދިޔުމުން، މި ދެންނެވި ގޮތަށް، ތެލެސީމިއާ ބަލި އަދި އެހެން ކަންކަމުގައިވެސް ލެބޯރެޓަރީއަށް ބޭނުންވާ ކަންކަން ހަމަޖެހި، އަދި ފަރުވާދިނުމުގެ ކަންކަންވެސް ފަހިވެގެންދާނެ.
އާދެ ހަމައެއާއެކީގައި، ދެންހުރި ކަންކަމުގެ ތެރެއިން ބަލާއިރުގައި، ސްކޫލްގެ ދާއިރާއަށް، ނޫނީ ތަޢުލީމީ ދާއިރާއިން ކުރިއަށްހުރި ކަންކަމަށްވެސް، އަޅުގަނޑުމެން އިރާދަކުރެއްވިއްޔާ ވަރަށް ސަމާލުކަންދީގެން، މަޝްރޫޢު ކުރިއަށް ގެންގޮސްދޭނަން.
އެއާއެކީގައި، ކުޅިވަރުގެ ދާއިރާއިން، ކުޅިވަރުގެ ދާއިރާ ތަރައްޤީކުރުމަށްޓަކައި، ކޮންމެ ރަށެއްގައިވެސް ޤާއިމުކުރަން ނިންމާފައި ހުރި މަޝްރޫޢުތައް، މި ރަށުގައިވެސް ކުރިޔަށް ގެންދަން އަޅުގަނޑުމެން އޮންނާނީ ކަނޑައަޅާފައި. މި އަހަރު ތެރޭގައި ކުރިޔަށްދާނެ ބައެއް މަޝްރޫޢުތައް މީގެތެރޭގައި ހިމެނޭނެ. އެއީ، ޔޫތު ސެންޓަރު، ކުރީގައި ކިޔާގޮތުން. މިހާރު ފިޓްނަސް އެންޑް ރިކްރިއޭޝަން ސެންޓަރު. އެ މަޝްރޫޢުގައި އަޅާ މަރުކަޒު، އެއީ ޒުވާނުން އިންޑޯ ކުޅިވަރުތައް ކުޅުމަށް، ހުރިހާ ކަމެއް ހަމަޖެހިފައި ހުންނަ، ޒުވާނުންނަށް ވަރަށް ބޭނުންތެރި މަރުކަޒަކަށް ވެގެންދާނެ. އެހެންވީމާ، ފިޓްނަސް ރިކްރިއޭޝަން ސެންޓަރު އެޅުމުގެ ޢަމަލީ މަސައްކަތް ފެށުމަށް، މިހާރު ތައްޔާރީތައް ވަމުން އެދަނީ. އިރާދަކުރެއްވިއްޔާ އެ މަޝްރޫޢުވެސް މި އަހަރު ތެރޭގައި، މި ރަށުގައި ފެށިގެންދާނެ.
އަދި ހަމައެއާއެކީގައި، ވޮލީބޯޅަ ކުޅުމުގައި ވަރަށް ޝައުޤުވެރިކަން ބޮޑު ރަށެއް މި ރަށަކީ. ވޮލީކޯޓު އެޅުމަށްޓަކައި، މި އަހަރުގެ ބަޖެޓުގައި އަދި ހިމެނިފައެއް ނެތް. އެހެންވީމާ އެއީ، މި އަންނަ އަހަރަށް އަޅުގަނޑުމެން ބަޖެޓަ ފާސްކުރާއިރުގައި، ކުޅިވަރުގެ ދާއިރާއިން، މި ރަށުގައި އަޅުގަނޑުމެން ކުރިއަށް ގެންދާނެ މަޝްރޫޢެއް. އިރާދަކުރެއްވިއްޔާ އެކަން މި އަންނަ އަހަރު، މި ރަށުގައި ވީހާވެސް ކުރީކޮޅު ފަށައިގެން، ކުރިއަށްގެންގޮސްދޭނެ ކަމުގެ ޔަޤީންކަން އަރުވަން.
އާދެ، އަދިވެސް ޖުމްލަކޮށް ކުޅިވަރުގެ ދާއިރާއަށް އަޅުގަނޑުމެން ވަރަށް އިސްކަންދީގެން މަސައްކަތް ކޮށްދޭނަން. މިހާރު އޮތް ފުޓްސަލް ދަނޑު އެއީ، ވަރަށް ބޮޑަށް ތަރައްޤީކުރަން ޖެހިފައިވާ ދަނޑެއް. އަދި އެ ދަނޑު އޮތް ލޮކޭޝަނަށްވުރެ ރަނގަޅު ތަނެއް، ކައުންސިލުން ހަމަޖައްސައިދީފިނަމަ، އަޅުގަނޑަށް ޔަޤީން، ކޮށްދެއްވާނެކަން. މިހާރަށްވުރެ ރަނގަޅު ފެންވަރުގައި، ފުރިހަމަ ފުޓްސަލް ދަނޑެއް، ހުރިހާ ކަމެއް ފުރިހަމަވެފައިވާ ފުޓްސަލް ދަނޑެއް، އަޅުގަނޑުމެން އަޅައިދޭނަން. ކައުންސިލުން ބިން ހަމަޖެހުނުހާ އަވަހަކަށް، އަޅުގަނޑުމެން މި އަހަރު ތެރޭގައި އެ މަޝްރޫޢު ކުރިއަށް ގެންގޮސްދޭނަން.
އާދެ، ދެންހުރި މަޝްރޫޢުތަކަށް ބަލާއިރުގައިވެސް، މި ރަށުގެ ތަރައްޤީއަށް ބޭނުންވާ ހުރިހާ ކަމެއްގައިވެސް ތަރުތީބު ކުރެވިގެން، އަޅުގަނޑުމެން މަސައްކަތްތައް އިރާދަކުރެއްވިއްޔާ ކުރިއަށް ގެންގޮސްދޭނަން.
އާދެ، ރަށުގެ ތަރައްޤީގައި މިހާރު އެންމެ ބޮޑު ދައުރެއް މި އަދާކުރަނީ، ޓޫރިޒަމް ދާއިރާ. ޓޫރިޒަމް ވަރަށް ބޮޑަށް ފުޅާވެފައިވާ ރަށެއް މިއީ. އެހެންވީމާ، ސަރުކާރުގެ ސިޔާސަތަކަށް ވާނީ، ޓޫރިޒަމް ފުޅާކުރުމަށް، ރައްޔިތުންނަށް ފަސޭހަތައް ފޯރުކޮށްދިނުން. ރަށުގެ ރައްޔިތުން ވަރަށް ބޮޑަށް އެދޭ، ކައުންސިލުންވެސް ވަރަށް ބޮޑަށް ހުށަހަޅައި އަދި ރައްޔިތުން ވަރަށް ބޮޑަށް އެދޭ ކަމެއް، މި ރަށާ ވަރަށް ކައިރީގައި އޮންނަ އިންނަފުށި. އެ ރަށް މިހާރު އެއްގޮތަކަށްވެސް ބެލެހެއްޓިގެން ނުދާތީ، ވަރަށް ބޮޑަށް ކުނި ގިނަވެ، ނުބެލެހެއްޓި މި އޮންނަ މައްސަލައަށް ޙައްލެއް ގެނެސް. އަދި އެ ރަށް ރަނގަޅަށް ބެލެހެއްޓި، އެ ރަށުން އެކަށީގެންވާ އާމްދަނީއެއް ރަށަށް، ކައުންސިލަށް ލިބޭނެގޮތަށް، ރަށަށް ފައިދާވާ ގޮތަށް، ލިބޭނެގޮތެއް ހަމަޖެހިގެން ދިޔުމަކީ. އެހެންވީމާ، އިރާދަކުރެއްވިއްޔާ، ރަނގަޅު މެނޭޖްމަންޓް ޕްލޭނެއް، ކައުންސިލާއި ޓޫރިޒަމް އެންޑް އެންވަޔަރަންމަންޓް މިނިސްޓްރީއާ ދޭތެރޭގައި ހެދި، އެ ޕްލޭނާ އެއްގޮތްވާ ގޮތުގެ މަތިން، އެ ޕްލޭން، ރަނގަޅު މެނޭޖްމަންޓް ޕްލޭނަކާ އެކީގައި، އިންނަފުށި މި ރަށުގެ ކައުންސިލާ އަޅުގަނޑުމެން ހަވާލުކުރާނަން. ދެން، އިންނަފުށިން ލިބޭ އާމްދަނީ، މި ދެންނެވި ރަނގަޅު މެނޭޖްމަންޓް ޕްލޭނެއްގެ ތެރެއިން، ތަފުސީލުތައް ހިމެނޭނެ. ބަލަހައްޓާނެ ގޮތާއި، އެއިން އާމްދަނީ ލިބޭނެގޮތާއި، ކައުންސިލަށް އޭގެ އާމްދަނީ ލިބޭނެ މިންވަރާއި، އިންސައްތައާއި، އޭގެތެރެއިން ދައުލަތަށް، މާލިއްޔާއަށް އެއިން ލިބޭ އިންސައްތައަކީ ކޮބައިތޯއާއި، ކިހާވަރެއްކަމާ ޖަމާކުރަންޖެހޭނީ، މި ތަފުސީލުތައް އަންނާނެ. އެހެންވީމާ، މާ ލަސްތަކެއްނުވެ، މި ދަތުރަށްފަހު އެ މަސައްކަތް ކުރިއަށްދާނެ. އިރާދަކުރެއްވިއްޔާ، ދާދި އަވަހަށް މިކަން ކޮށްދޭނަން.
އާދެ، މިސްކިތެއް ބިނާކުރުން އެއީ، މި އަންނަ އަހަރު ބަޖެޓަށްލާން އަޅުގަނޑު ނިންމާފައިވާ ކަމެއް. މި އަންނަ އަހަރަށް ފާސްކުރާ ބަޖެޓް ތެރޭގައި ހިމަނައިގެން، މި ރަށުގައި އާ މިސްކިތެއްވެސް އިރާދަކުރެއްވިއްޔާ އަޅައިދޭނަން.
އާދެ، މިހާރު ގާތްގަނޑަކަށް މި ދަންނަވާލެވުނީ، އަޅުގަނޑު ވަޢުދުވެފައިވާ ކަންކަމާއި، އޭގެއިތުރަށްވެސް ރައްޔިތުން ބޭނުންވާ ހުރިހާ ކަމެއް. ޖުމްލަކޮށް އަޅުގަނޑު ދަންނަވާލަން ބޭނުންވަނީ، ފެށިއިރުވެސް ދެންނެވި ފަދައިން، އަޅުގަނޑުމެންގެ ހުރިހާވެސް ޝައުޤުވެރިކަމެއް މިހިރީ، ފުޅަދޫގެ ރައްޔިތުން ބޭނުންވާ ގޮތަށް، ރައްޔިތުން އެދޭ އަމާޒަށް ތަރައްޤީ ގެންގޮސްދިނުން. އެކަމުގައި މިސަރުކާރު، ވަރަށް ސާބިތުކަމާއެކީގައި، ރައްޔިތުން ތިޔަ ދެއްވާ އެއްބާރުލެއްވުމުގެ ނަތީޖާއެއްގެ ގޮތުން ދާނީ ކުރިއަށް. މި ދެންނެވި ގޮތަށް، އަޅުގަނޑުމެން އިރާދަކުރެއްވިއްޔާ މަޝްރޫޢުތައް ކުރިއަށް ގެންދާނަން. އެންމެ ބޮޑު މައްސަލައަކީ، ފެނާއި ނަރުދަމާ. އެއީ ބޮޑު މަޝްރޫޢެއް. ގިނަ މަސައްކަތް ކުރަންވެސްޖެހޭ މަޝްރޫޢެއް. މި ދެންނެވިހެން ފެށިގެން، ބާރު ސްޕީޑްގައި ދާނެ. ދެންހުރި މަޝްރޫޢުތައް ނިސްބަތުން ކުޑަ. އިރާދަކުރެއްވިއްޔާ ނިމޭލެއްވެސް އަވަސްވާނެ.
އެހެންވީމާ، އަޅުގަނޑު މި ދެންނެވި ގޮތަށް، ހުރިހާ ކަމެއްވެސް ބާރު ސްޕީޑްގައި ގެންގޮސްދޭނަން. އިރާދަކުރެއްވިއްޔާ އޭގެ ފުރިހަމަ ނަފާ، ތިޔަބޭފުޅުންނަށް ލިބިގެންދާނެ.
އަދިވެސް އެއްފަހަރު، ވަރަށް ބޮޑަށް ޝުކުރު ދަންނަވަން. އަޅުގަނޑު އަދިވެސް އުންމީދުކުރަން، މާ ލަސްތަކެއްނުވެ، އަނެއްކާވެސް މި ރަށަށް އައުމަށް، ތިޔަބޭފުޅުންނާ އެކީގައި މި ހިތްގައިމު މާޙައުލުގައި މިގޮތަށް ވަގުތުކޮޅެއް ހޭދަކޮށްލަން. އެކަމަކު ދެން، އަޅުގަނޑު އަންނަން ގަސްދުކުރަނީ، މި ދެންނެވި މަޝްރޫޢުތަކުގެ ތެރެއިން، ގިނަ ކަންކަމެއް ނިމިގެން، އެކަން ފާހަގަކުރަން. އެ އުންމީދާ އެކީގައި، އަޅުގަނޑު ވަކިވެލަން.
އަޅުގަނޑުގެ ދުޢާއަކީ، އަޅުގަނޑުމެން މިކުރާ މަސައްކަތްތަކުގައި، اللهُ سُبْحَانَهُ وَتَعَالَى ބަރަކާތް ލެއްވުން. އާމީން!
وَمَا تَوْفِيقِي إِلَّا بِاللَّهِ عَلَيْهِ تَوَكَّلْتُ وَإِلَيْهِ أُنِيبُ.
وَالسَّلَامُ عَلَيْكُمْ وَرَحْمَةُ اللهِ وَبَرَكَاتُه.