بِسْمِ ٱللّٰهِ ٱلرَّحْمٰنِ ٱلرَّحِيمِ
اَلْحَمْدُ للَّهِ رَبِّ الْعاَلَمِينْ، وَالصَّلاَة وَالسَّلاَمُ عَلَى رَسُولِ ٱللَّهِ، وَعَلَى آلهِ وَصَحْبِهِ أَجْمَعِينْ.
ފެހެންދޫގެ ލޮބުވެތި އެންމެހައި ރައްޔިތުން، ކައުންސިލް މެންބަރުން، ދާއިރާގެ ޢިއްޒަތްތެރި މަޖިލިސް މެންބަރު، ރަށުގެ ޚިދުމަތްތެރި އިސް ރަށްވެހިން، ރަށުގެ މުއައްސަސާތަކުގެ ވެރިން، ވަޑައިގެން ތިއްބެވި އެންމެހައި ޢިއްޒަތްތެރިން، މި ޖަލްސާ ބައްލަވަމުން، އަޑުއައްސަވަމުން ގެންދަވާ ލޮބުވެތި އެންމެހައި ރައްޔިތުން؛
السَّلامُ عَلَيْكُم ورَحْمَةُ اللهِ وَبَرَكاتُهُ.
މި ރަށަށް އަޅުގަނޑުމެންނަށް އާދެވުމުން، ތިޔަބޭފުޅުން ވަޑައިގެން ވިދާޅުވި ހޫނު މަރުޙަބާއަށްޓަކައި، ފެހެންދޫގެ ލޮބުވެތި ހުރިހާ ރައްޔިތުންނަށް، އަޅުގަނޑުގެ ހިތުގެ އެންމެ ފުންމިނުން ވަރަށް ބޮޑަށް ޝުކުރު ދަންނަވަން.
އަޅުގަނޑުމެން މަސައްކަތް ކުރަމުން މިދަނީ، އަޅުގަނޑު ރިޔާސީ އިންތިޚާބުގައި މި ރަށަށް އައިސް، ތިޔަބޭފުޅުންނާ މަޝްވަރާކުރެވި، ތިޔަބޭފުޅުން އެދިވަޑައިގެންނެވި ކަންކަން ކޮށްދިނުމަށް ވެފައިވާ ވަޢުދުތައް ފުއްދުމަށް.
މިގޮތުން، މީގެތެރެއިން ވަރަށް ގިނަ ކަންކަން ފެށޭ ހިސާބަށް ގެނެވި އަދި ކުރިޔަށް އޮތް ދުވަސްތަކުގައި، ޢަމަލީގޮތުން ގިނަ މަސައްކަތްތަކެއް ފެންނާނެ. ދެން މީގެތެރެއިން، ހަމަ ޔަޤީނުންވެސް އެންމެ މުހިންމީ، ދެންމެ ޢިއްޒަތްތެރި މެންބަރު ފާހަގަކުރެއްވި ފަދައިން، އަދި ކައުންސިލާއި، މުއައްސަސާތަކާ އެކީގައި ބޭއްވުނު ބައްދަލުވުމުގައިވެސް ފާހަގަކުރެވިގެންދިޔަ ފަދައިން، މި ރަށުގައި ފެށިފައި އޮތް ފެނާއި ނަރުދަމާގެ މަޝްރޫޢު ކުރިޔަށް ގެންގޮސް ނިންމާލުން. މި މަޝްރޫޢު ކުރީގައި ހަވާލުކޮށްފައި އޮތް ފަރާތަށް އެކީގައި ނުގެންދެވޭތީ، އަޅުގަނޑުމެން އެމް.ޑަބްލިޔޫ.އެސް.ސީ.އާ އެކީގައި ވާނީ ސޮއިކޮށްފައި. އެމް.ޑަބްލިޔޫ.އެސް.ސީ.އިން މިހާރު ތަކެތި ގެނެސް، މަސައްކަތް ފެށުމުގެ ހުރިހާ ތައްޔާރީތަކެއް ވެފައި އެވަނީ. މަސައްކަތް ކުރާނެ މަސައްކަތްތެރިން ހޯދުމުގެ މަސައްކަތުގައި، ތަންކޮޅެއް ގިނަދުވަސް ވެއްޖެ. މިރަށު ތެރެއިން މީހުން ހޯދުމަކީ، ތަންކޮޅެއް އާބާދީ ކުޑަވީމާ، ދަތިކަމަކަށް ވަނީ. އަޅުގަނޑު މިހާރު ހުއްދަ ދީފައި ވާނެ، ބޭރު މީހުން ހޯދައިގެންވިޔަސް، އަވަހަށް މަސައްކަތް ފަށަން. އަޅުގަނޑު ޔަޤީންކަންދެން، އިރާދަކުރެއްވިއްޔާ ވަރަށް އަވަހަށް ޢަމަލީގޮތުން މި ދެ މަޝްރޫޢު ނިންމުމުގެ މަސައްކަތް ފެށިގެންދާނެ ކަމުގެ. އަދި ވަރަށް ޚާއްޞަ އިސްކަމެއްދީގެން، މި މަސައްކަތް ވަރަށް ބާރު ސްޕީޑްގައި ގެންގޮސް ނިންމާލައިދިނުމަކީ، އަޅުގަނޑު ވަރަށް ބޮޑަށް ޔަޤީންކުރާނެ ކަމެއް. އެކަމުގެ ޔަޤީންކަން ފެހެންދޫގެ ލޮބުވެތި ރައްޔިތުންނަށް އަޅުގަނޑު ދެން.
ހަމައެއާއެކީގައި، ވަރަށް ގިނަ އެހެން މަޝްރޫޢުތައް ކުރިޔަށް ގެންދިޔުމަށްވެސް އަޅުގަނޑު ވާނީ ރިޔާސީ އިންތިޚާބުގައި ވަޢުދުވެފައި. އަޅުގަނޑުގެ މައިގަނޑު ސިޔާސަތަކި، ރަށުގެ ރައްޔިތުންނަށް ބޭނުންވާ ކަންކަން، އެ ރަށެއްގެ އާބާދީއަށް ބެލުމެއްނެތި، އެ ރަށެއްގެ ރައްޔިތުންނަށް ހުރިހާ ކަމެއްގައިވެސް، ސަރުކާރުން ކަންކަން ކޮށްދިނުން. ރަށުގެ ރައްޔިތުންނަކީ، ކޮންމެ ރަށެއްގައި ތިއްބަސް، އެއީ އަޅުގަނޑުގެ ކުރިމަތީގައި ހަމަހަމަ ރައްޔިތުން ކަމުގައި އަޅުގަނޑު ގަބޫލުކުރަން. އެހެންވީމާ، އަޅުގަނޑު ވާނީ ރިޔާސީ އިންތިޚާބުގައި ވަރަށް ގިނަ ކަންކަން، މި ރަށުގައި ކުރިން ނުކޮށްދެވިފައި ހުރި އެތައް ކަމެއް ކުރުމަށް ވަޢުދުވެފައި. އެގޮތުން އިރާދަކުރެއްވިއްޔާ، ވަރަށް ގިނަ ކަންކަން ފެށުމަށް މިހާރު މިވަނީ ތައްޔާރުވެފައި.
މިގޮތުން ބަލާއިރުގައި، ތަޢުލީމީ ދާއިރާއިން އަޅުގަނޑުމެން ކުރިޔަށް ގެންދަން ކަންތައްތަކެއް ކަނޑައަޅާފައި ވާނެ. އެޑިޔުކޭޝަން މިނިސްޓްރީން އެގެންދަނީ، ވަރަށް ބުރަ މަސައްކަތްތަކެއް ކުރަމުން އެކަމުގައި. މި ރަށުގައި ޤާއިމުވެ ތިބޭނެ ޓީޗަރުން ލިބޭތޯ ވަރަށް މަސައްކަތް ކުރަމުން އެބަދޭ. އެކަމުގައި ރަށުގެ ރައްޔިތުންނަށް އަދި ސްކޫލަށް ކޮށްދެވޭނެ ކަމެއްވާނަމަ، ސަރުކާރުގެ ސިޔާސަތަކީ، ހަމަ ހުރިހާ ކަމެއް، އެންމެ އިސްކަމެއްދީގެން ކޮށްދީ، މި ރަށުގައި ގްރޭޑް 6 ން މަތީގެ ކުދިންނަށް ކިޔަވައިދިނުމުގައި، މި ބޭނުންވާ ޓީޗަރުން ހޯދުމުގައި، ޚާއްޞަ އިސްތިސްނާއެއް ގޮތުގައި އިސްކަންދީގެން، އެކަން ފަހިކޮށްދިނުން.
ސަރުކާރުން މިއޮތީ ފުރިހަމަ އެއްބާރުލުންދީގެން، އަދި އަޅުގަނޑުގެ ވަޢުދު ފުއްދުމަށްޓަކައި ކުރަންޖެހުނު ކޮންމެ ކަމެއް އެކަމުގައި ކުރުމަށް ތައްޔާރަށް. އެހެންވީމާ، އަޅުގަނޑުމެންނަށް ބޭނުންވަނީ، އެކަމުގައި ޝައުޤުވެރިކަން ފާޅުކޮށްގެން، މި ރަށުގައި ޤާއިމުވެ ތިބުމަށް ބޭނުންވާނެ ޓީޗަރުން ހޯދަން. އަދި ޓީޗަރެއް ނެތީވިއްޔާ، އަޅުގަނޑުމެން ރަށުގެ ކުދިންނަށް ބޭނުންވާ ތަޢުލީމު ފޯރުކޮށްދިނުމަށް ބޭނުންވާ ފެންވަރަށް ޓީޗަރ ޓްރޭނިންގ ދޭންވެސް މިތިބީ ތައްޔާރަށް. އެހެންވީމާ، އެ ވަޢުދު އިރާދަކުރެއްވިއްޔާ، އަޅުގަނޑުމެން ފުއްދަން މިތިބީ ތައްޔާރަށް. އަޅުގަނޑުމެން އެންމެން ގުޅިގެން މިކަމުގައި މަސައްކަތްތަކެއް ކޮށްލުމަކީ، އަޅުގަނޑު ހިތުން މިހާރު އަޅުގަނޑުމެން ކުރަންވީ ކަންތައް. އިރާދަކުރެއްވިއްޔާ، އަޅުގަނޑުމެން އެންމެންނަށް އެކުގައި މިކަމުގައި މަސައްކަތްތައް ކުރެވި، މި ވަޢުދު އަޅުގަނޑުމެންނަށް ފުއްދިގެންދާނެ. ސަރުކާރުގެ ފުރިހަމަ އެއްބާރުލުން މިކަމަށް ދޭނަން.
ދެން، ޞިއްޙީ ދާއިރާއަށް ވެފައިވާ ވަޢުދު ފުއްދުމަށްޓަކައި، މިހާރު އަޅުގަނޑުމެން ވާނީ އިޢުލާނުކޮށްފައި. ޞިއްޙީ މަރުކަޒު ތަރައްޤީ ކުރުމަށްޓަކައި މަސައްކަތްތަކެއް ކުރަން. އާ އެކްސްޓެންޝަނެއް ޤާއިމުކުރުމާއި، ބޭނުންވާ އެކިކަހަލަ ވަސީލަތްތައް، ލެބޯރެޓަރީ ޚިދުމަތް ހިމެނޭގޮތަށް ފުރިހަމަކުރުމަށް، މި ރަށުގެ އާބާދީއަށް ބޭނުންވާ މިންވަރަށް. އަދި ރަށުގައި ކުރެވޭ އިޤްތިޞާދީ މަސައްކަތްތަކަށް، ނޫނީވިއްޔާ ޓޫރިޒަމް ދާއިރާއިން ކުރެވޭ ކަންކަމާ، ހުރިހާ ކަމަކަށްވެސް މި ރަށަށް ބޭނުންވާ ޞިއްޙީ ޚިދުމަތް ޤާއިމުކޮށްދިނުމަށް، އެ މަޝްރޫޢު މިހާރު އޮތީ އިޢުލާނު ކުރެވިފައި. އިރާދަކުރެއްވިއްޔާ މި އަހަރުގެ ތެރޭގައި، މި މަސައްކަތް ޢަމަލީގޮތުން މި ރަށުގައި ފެށިގެންދާނެ.
ކުޅިވަރުގެ ދާއިރާއިން އަޅުގަނޑުމެން ކުރިއަށް ގެންދަންހުރި ކަންތައްތައް ދަންނަވާލާނަން. ކުޅިވަރުގެ ދާއިރާއިން ފުޓްބޯޅަ ދަނޑެއް، ފުލް ސައިޒުގެ ފުޓްބޯޅަ ދަނޑެއް، ލައިޓްޖެހުމާ އެކީގައި، ހުރިހާ ކަމެއް ފުރިހަމަވެފައިވާ ފުޓްބޯޅަ ދަނޑެއް ހަދައިދިނުމާއި، އަދި މި ރަށުގައި އެޅިފައިވާ ފުޓްސަލް ދަނޑުގެ ޕިޗު އާކޮށްދިނުމާއި، އަދި ވޮލީ ކޯޓެއް އަޅައިދިނުމާއި، އަދި ފިޓްނަސް އެންޑް ރިކްރިއޭޝަން ސެންޓަރެއް ޤާއިމުކޮށްދިނުމާ، މި ހަތަރު މަޝްރޫޢު އިރާދަކުރެއްވިއްޔާ އަޅުގަނޑުމެން، މި އަހަރު މި ރަށުގައި ފަށައިދޭނަން.
ހަމައެއާއެކީގައި، އައުޓްޑޯ ޖިމެއް ޤާއިމުކުރުންވެސް އެބައޮތް. އެ މަސައްކަތްވެސް އިރާދަކުރެއްވިއްޔާ ކުރިއަށްދާނެ. އަދި އަޅުގަނޑު ވަޢުދުވީ، ކުޑަކުދިންގެ ޕާކް ހަދައިދިނުންވެސް އެބައޮތް. އެ މަސައްކަތްވެސް މި އަހަރު މި ރަށުގައި ފެށިގެންދާނެ. މިއީ ހުސް އަޅުގަނޑު ވެފައިވާ ވަޢުދު. ބައެއް ކަންކަން ވަޢުދަށްވުރެ އިތުރަށްވެސް ހުންނާނެ. އެހެންވީމާ، މި ހުރިހާ ކަމެއް އިރާދަކުރެއްވިއްޔާ އަޅުގަނޑުމެން ކުރިއަށް ގެންދާނަން.
ދެން އަޅުގަނޑު ވަޢުދުވެފައި އޮންނާނެ، މިސްކިތެއް އަޅަން. މިސްކިތް ޤާއިމުކުރަން އަޅުގަނޑުމެން މި އަންނަ އަހަރުގެ ބަޖެޓަށް މިހާރު ޕްލޭންކޮށްފައި މިއޮތީ. މި އަންނަ އަހަރުގެ ބަޖެޓުގެ ތެރެއިން އިރާދަކުރެއްވިއްޔާ މި ރަށުގައި އަޅުގަނޑުމެން މިސްކިތެއް އަޅައިދޭނަން.
އާދެ، އެހެންވީމާ، ޖުމްލަކޮށް މިއީ އަޅުގަނޑު ދަންނަވާލަން ބޭނުންވާ ވާހަކަތަކަކީ. ދެން ބަނދަރު، ނޫނީވިއްޔާ ޖެޓީގެ މި ދިމާވެފައިވާ މައްސަލަ ޙައްލުކުރުންވެސް އެބައޮތް. ރަށްގިރުމުގެ މައްސަލަ ޙައްލުކުރުންވެސް އެބައޮތް. އެހެންވީމާ، މިއީ ތަންކޮޅެއް ބަޖެޓް ބޮޑުކޮށް ހިނގާ މަސައްކަތްތަކެއް. އެހެންނަމަވެސް، އެއީވެސް އަޅުގަނޑު ވަޢުދުގައި އޮތް ކަމެއް ކަމުގައިވާތީ، އެ މަޝްރޫޢުވެސް ޕްލޭން ކުރެވިފައިވަނީ. އިރާދަކުރެއްވިއްޔާ އަޅުގަނޑުމެން ޕްލޭންކުރަނީ، އެންމެ ލަސްވެގެން މި އަންނަ އަހަރު ބަޖެޓަށްލައިގެން، މިއަންނަ އަހަރު އެކަން ޙައްލުކޮށްދިނުމާ އެކީގައި، ރަށްގިރުމުގެ މައްސަލައަށްވެސް ޙައްލެއް ގެނައުމުގެ މަޝްރޫޢު ކުރިއަށް ގެންދަން. އިރާދަކުރެއްވިއްޔާ އެގޮތަށް ގެންދާނަން.
އާދެ، އެހެންވީމާ، އަޅުގަނޑުވީ ހުރިހާ ވަޢުދެއްގެ ކަންތައް މި ދަންނަވާލެވުނީ. ކުރިއަށްގެންދަން ނިންމާފައިވާ ގޮތް. އަދި އެގޮތަށް ގެންދާނެކަމުގެ ޔަޤީންކަން އަޅުގަނޑު މިދިނީ. އަޅުގަނޑު އޭރުވެސް ދެންނެވިން، އޭރަކީ ރިޔާސީ އިންތިޚާބުގައި މިތަނަށް އައިސް ބޭއްވި ބައްދަލުވުން. މި ރަށަށް އައިސް ބޭއްވި ބައްދަލުވުން. އެގޮތަށް އަޅުގަނޑުމެން މިހާރުވެސް ކުރިއަށްދާން މިތިބީ ނިންމައިގެން. އަދި ޕްލޭންކޮށް، ހުރިހާ ކަމެއް ތައްޔާރުކޮށްގެން. އެގޮތަށް ތަންފީޒުވެސް ކުރަމުންދާނަން.
އަޅުގަނޑު ރައްޔިތުންގެ ގާތަށް އައިސް، މިހެން ދަންނަވާ ކަންކަމަކީ، ހެޔޮ ނިޔަތުގައި އިޚްލާޞްތެރި ތެދުވެރި ނިޔަތުގައި ކުރުމަށް ޢަޒުމް ކަނޑައަޅައިގެން، ކުރިއަށް ގެންދިޔުމަށް ނިންމައިގެންވާ ވަޢުދު. އެހެންވީމާ، މިހާރު މި ފެންނަނީ، އިރާދަކުރެއްވީތީ އަޅުގަނޑުމެންނަށް މިދިޔަ ދުވަސްތަކުގައި އަޅުގަނޑުމެންގެ ރާއްޖޭގެ އިޤްތިޞާދު އޮތް ހާލަތުން އަރައިގަތުމަށްޓަކައި ކުރެވިގެންދިޔަ ކަންކަމާއި، އަދި މިހާރުވެސް ކުރަމުންދާ ކަންކަމާ އެކީގައި، ތަރައްޤީގެ މަޝްރޫޢުތައް، އަޅުގަނޑު ވަޢުދުތައް ފުއްދުން ތަރުތީބުކުރެވިގެން، ފެށިގެންދާތަން.
އިރާދަކުރެއްވިއްޔާ ކުރިއަށް އޮތް މަސްތަކުގައި، ހަމަ މިގޮތަށް ރާއްޖޭގެ ހުރިހާ ކަންކޮޅެއްގައި، ވަރަށް ގިނަ މަޝްރޫޢުތައް ފެށޭނެ. އަދި ނިމުމުގެ މަރުހަލާއަށްވެސް ދާނެ. މި ރަށުގައި މިއަދު އޭ.ޓީ.އެމް.ވެސް މި ބެހެއްޓުނީ. އަދި ޕޮލިސް ޚިދުމަތްވެސް ފެށިގެން މިދިޔައީ. ޕޮލިސް ޚިދުމަތް ދިނުމަށްޓަކައި، ޢިމާރާތުގެ މަސައްކަތް ފެށިގެންދިޔައީ. އެގޮތަށް ހުރިހާ ކަމެއް ކުރިއަށްދާނެ. އެންމެ ކުޑަ ރަށުގައިވެސް އަޅުގަނޑުގެ ސިޔާސަތަކީ، މިހިރަ ހުރިހާ ކަންކަމެއް ކުރުން. ކޮންމެ ރަށެއްގައިވެސް ބޭންކިންގ ނިޒާމުގެ ތެރެއިން ޚިދުމަތްދިނުން އެއީ، އަޅުގަނޑު ވީ ވަޢުދެއް. ކޮންމެ ރަށެއްގައިވެސް ފުލުހުންގެ ޚިދުމަތް، ޤާއިމުވެތިބޭ ފުލުހުންގެ މަރުކަޒެއް ހުރެގެން، އޮފީހެއް، ޕޯސްޓެއް ނަމަވެސް ހުރެގެން ދިނުން އެއީ، އަޅުގަނޑުވީ ވަޢުދު. އެހެންވީމާ، މިގޮތަށް ހުރިހާ ރަށެއްގައި، މިއީ ކޮންމެ ރަށެއްގައި ހުންނަންޖެހޭނެ ކަމަށް، އެންމެ ކުދިކުދި އާބާދީތައް މި ރަށްގޮތަށްވެސް ހުންނަންޖެހޭނެ ކަމަށް އަޅުގަނޑު ވަޢުދުވެ، ރިޔާސީ ބަޔާނުގައި، މި އަހަރުގެ ރިޔާސީ ބަޔާނުގައިވެސް އަޅުގަނޑު އިޢުލާނުކޮށްފައި ވާނެ. އެހެންވީމާ، އެހާ ޔަޤީންކަން ބޮޑުކޮށް އަޅުގަނޑު މިކަންކަން ކުރަމުން މިދަނީ. އިރާދަކުރެއްވިއްޔާ އެގޮތަށް ގެންގޮސް ނިންމައިދޭނަން.
އެހެންވީމާ، އަދިވެސް އެއްފަހަރު، ފެހެންދޫގެ ރައްޔިތުންނަށް ވަރަށްބޮޑަށް ޝުކުރު ދަންނަވަން. އަދި މި ދެންނެވި ގިނަ ކަންކަން، މި އަހަރު، ނޫނީ މި އަންނަ އަހަރުގެ ތެރޭގައި ނިންމައިލެވި، އިރާދަކުރެއްވިއްޔާ ތިޔަބޭފުޅުންނާ ހަމައަށް އަޅުގަނޑު އައިސް ބައްދަލުކޮށްލަން ވަރަށް އުންމީދުކުރާ ވާހަކަ ދަންނަވަމުން ވަކިވެލާނަން. އަދިވެސް އެއްފަހަރު، ވަރަށް ބޮޑަށް ޝުކުރިއްޔާ.
އަޅުގަނޑުގެ ދުޢާއަކީ، އަޅުގަނޑުމެން މިކުރާ މަސައްކަތްތަކުގައި، اللهُ سُبْحَانَهُ وَتَعَالَى ކާމިޔާބީ މިންވަރު ކުރެއްވުން. އާމީން!
وَمَا تَوْفِيقِي إِلَّا بِاللَّهِ عَلَيْهِ تَوَكَّلْتُ وَإِلَيْهِ أُنِيبُ.
وَالسَّلَامُ عَلَيْكُمْ وَرَحْمَةُ اللهِ وَبَرَكَاتُه.