بِسْمِ ٱللّٰهِ ٱلرَّحْمٰنِ ٱلرَّحِيمِ
اَلْحَمْدُ للَّهِ رَبِّ الْعاَلَمِينْ، وَالصَّلاَة وَالسَّلاَمُ عَلَى رَسُولِ ٱللَّهِ، وَعَلَى آلهِ وَصَحْبِهِ أَجْمَعِينْ.
ގޮއިދޫގެ ލޮބުވެތި އެންމެހައި ރައްޔިތުން، ކައުންސިލްގެ ރައީސް، ދާއިރާގެ ޢިއްޒަތްތެރި މަޖިލިސް މެންބަރު، ރަށުގެ އެންމެހައި މުއައްސަސާތަކުގެ ވެރިން، ރަށުގެ ޚިދުމަތްތެރި އިސް ރަށްވެހިން، އަދި ވަޑައިގެން ތިއްބެވި އެންމެހައި ޢިއްޒަތްތެރިން، މި ޖަލްސާ، ދުރާއިގާތުން ބައްލަވަމުން ގެންދަވާ، އަޑުއައްސަވަމުން ގެންދަވާ ލޮބުވެތި އެންމެހައި ރައްޔިތުން؛
السَّلامُ عَلَيْكُم ورَحْمَةُ اللهِ وَبَرَكاتُهُ.
އެންމެ ފުރަތަމަވެސް އަޅުގަނޑު ތިޔަބޭފުޅުންނަށް ވަރަށް ބޮޑަށް ޝުކުރު ދަންނަވަން، އަޅުގަނޑުމެން މި ރަށަށް އައުމުން ތިޔަބޭފުޅުން ވަޑައިގެން، ވިދާޅުވި ހޫނު މަރުޙަބާއަށްޓަކައި ވަރަށް ބޮޑަށް ޝުކުރިއްޔާ.
މި ރަށުގެ ތަރައްޤީއަށްޓަކައި އަޅުގަނޑު ރިޔާސީ އިންތިޚާބުގައި، ވަޢުދުތަކެއްވިން.އެ ވަޢުދުތައް ފުއްދުމުގެ ޢަމަލީ މަސައްކަތް މިހާރު މިވަނީ ފެށިފައި. އަޅުގަނޑު ޖުމްލަ 12 ވަޢުދެއް މިރަށަށްވެފައި ވާނެ. އެ ހުރިހާ ވަޢުދުތަކެއްވެސް އިރާދަކުރެއްވިއްޔާ، ފުރިހަމައަށް ފުއްދައިދޭނެކަމުގެ ޔަޤީންކަން އަޅުގަނޑު ތިޔަބޭފުޅުންނަށް އަރުވަން. މީގެތެރެއިން މިހާރުވެސް ބައެއް ކަންކަން ފެށިފައިވަނީ އަދި ފެށިގެންދަނީ.
ސީ ޕްލޭންގެ ޚިދުމަތް އެއީ އަޅުގަނޑު ވީ ވަޢުދެއް. މިއަދު އޭ.ޓީ.އެމް.ގެ ޚިދުމަތް ފެށުން، އެއީ ވީ ވަޢުދެއް. އަދި ބާކީ 10 ވަޢުދު މިއޮތީ. މި ކަންކަން ކުރިއަށްދާގޮތް، ރޭވިފައިވާގޮތް، އަޅުގަނޑު ދަންނަވާލަން ގަސްދުކުރަން.
ބަނދަރުގެ މަސައްކަތް ކުރާނެކަމަށް، ބަނދަރު ބޮޑުކޮށްދިނުން، ރަށަށް ބޭނުންވާ ފެންވަރުގެ ބަނދަރެއް ހެދުން. އެއީ އަޅުގަނޑު ތިޔަބޭފުޅުންނަށްވީ އެއް ވަޢުދު. މިހާރު މި މަސައްކަތް ބަޔަކާ ހަވާލުކުރުމަށްޓަކައި ކުރަންޖެހޭ މަސައްކަތް ދަނީ ކުރިއަށް. ޓެންޑަރ ޕްރޮސެސް، ނޫނީވިއްޔާ ބަޔަކާ އެވޯޑު ކުރުމުގެ މަރުޙަލާގައި މިހާރު މި އޮތީ. އިރާދަކުރެއްވިއްޔާ މާލަސްތަކެއްނުވެ، ކުރިއަށް މިއޮތް މަސްދުވަހުގެ ތެރޭގައި، ޓެންޑަރިންގ ޕްރޮސެސް ކުރިއަށް ގެންގޮސް، މި އަހަރުގެ ތެރޭގައި އިރާދަކުރެއްވިއްޔާ ޢަމަލީގޮތުން މި މަސައްކަތް މި ރަށުގައި ފަށައިދޭނަން.
ދެން އެ މަސައްކަތް ނިމުމުގެ ކުރިން، ރަށްގިރުމުގެ މައްސަލައަށް ހައްލު ގެނެސްދިނުން، ގޮނޑުދޮށް ހިމާޔަތްކުރުމުގެ މަސައްކަތް، މި ކަންވެސް އެއީ އަޅުގަނޑު ވީ ވަޢުދެއް. އެ މަސައްކަތްވެސް އެއީ، މި އަންނަ އަހަރުގެ ތެރޭގައި ވަކި ހިސާބެއްގައި ފެށޭނެ ކަމެއް. އެހެންވީމާ، އެ ވަޢުދު ފުއްދުން، މި ދެންނެވި ގޮތަށް ޕްލޭން ކުރެވިފައިވަނީ.
ދެން ސްކޫލްގެ ވަޢުދު. ސްކޫލަށް ޖާގަ އިތުރުކޮށްދިނުން. ވަސީލަތް އިތުރުކޮށްދިނުން. އެއީ، އަޅުގަނޑު ވެފައި އޮންނާނެ ވަޢުދެއް. ވެފައި އޮތް ވަޢުދެއް. މި މަސައްކަތް މިހާރު ދެ ބަޔަކަށް ބެހިފައިވަނީ. ފެށިފައި އޮތް މަޝްރޫޢެއް ނިންމުމާއި، އަދި ސްކޫލަށް ރަނގަޅު ފެންވަރުގެ ހޯލެއް، މަލްޓި-ޕަރޕަސް ހޯލެއް ހެދުމާ ދެ ކަންތައް. މީގެ ތެރެއިން ފެށިފައިވާ، ނިންމަންޖެހޭ މަޝްރޫޢު ނިންމުމުގެ ކަންތައް އަޅުގަނޑުމެންވާނީ، ފެނަކައާ ހަވާލުކޮށްފައި. ދެން އެ މަސައްކަތް ދާދިއަވަހަށް ޢަމަލީގޮތުން ފެށިގެންގޮސް، ކުރިއަށްގޮސް ނިންމައިދޭނަން. އަދި އޭގެއިތުރަށް، މި އަންނަ އަހަރުގެ ތެރޭގައި، މި އަންނަ އަހަރަށް ފާސްކުރާ ބަޖެޓުގެ ތެރޭގައި، މަލްޓި-ޕަރޕަސް ހޯލް ހިމަނައި، އަހަރުގެ ކުރީކޮޅު އިރާދަކުރެއްވިއްޔާ، އެ ހޯލުގެ މަސައްކަތްވެސް މި ސްކޫލުގައި ކުރިއަށް ގެންގޮސްދޭނަން. އެހެންވީމާ، އެ ވަޢުދު އަޅުގަނޑު މި ދެންނެވި ގޮތަށް، ސްކޫލަށް ޖާގަ އިތުރުކޮށްދިނުމާއި، ވަސީލަތް ހަމަކޮށްދިނުމުގެ ކަންކަން އިރާދަކުރެއްވިއްޔާ، އަޅުގަނޑު ވަޢުދުވީގޮތަށް ތިޔަބޭފުޅުންނަށް ފުއްދައިދޭނަން.
ދެން ހަމައެއާއެކީގައި އަޅުގަނޑު ވެފައި އޮންނާނެ ވަޢުދެއް، މި ރަށުގެ އިންޖީނުގޭގެ މައްސަލަ، ޚިދުމަތް ރަނގަޅުކުރުން. ނޫނީވިއްޔާ، އެއާ ގުޅިފައިވާ ފެންވަރު ރަނގަޅުކުރުމަށް ކުރަންހުރި ހުރިހާ ކަމެއް. އިތުރުކުރަންޖެހޭ ކޭބަލް އެޅުމާއި، އެކި ދިމަދިމާއަށް އިތުރުކުރަންޖެހޭ ޖާގަ، ޓޫރިޒަމްގެ ކަންކަމަށް އަދި ގޯތި ދޫކުރި ސަރަޙައްދަށް، މިހެންގޮސް މުޅި މައްސަލަ، ކަރަންޓާ ގުޅިފައިވާ، ކަރަންޓުގެ ނިޒާމާ ގުޅޭ މައްސަލަތައް ހައްލުކޮށްދިނުމުގެ ވަޢުދު. އިރާދަކުރެއްވިއްޔާ، މި އަހަރުގެ ތެރޭގައި މި ހުރިހާ ކަމެއް ހައްލުކޮށްދިނުމުގެ ވަށައިޖެހޭ މަޝްރޫޢެއް މި ރަށުގައި ކުރިއަށް ގެންދަން ޢަމަލީގޮތުން ފަށާނަން. އެއީ، އެ ވަޢުދު.
ދެން މިއޮތީ، ހެލްތު ސެންޓަރާ ބެހޭ ވަޢުދު. މިހާރު މިދާ މަރުޙަލާއަކީ، ބަޔަކާ ހަވާލުކުރުމުގެ މަރުޙަލާ. އިރާދަކުރެއްވިއްޔާ ވަރަށް ފުރިހަމަ ޞިއްޙީ މަރުކަޒެއް ހެދުމަށް އަޅުގަނޑު މިވަނީ ކަނޑައަޅާފައި. އޭގެތެރޭގައި، މި އަހަރު ބައެއް މުވައްޒަފުން އިތުރުކުރެވިގެން މިދަނީ. އަދި އޭގެއިތުރަށް، މި ދެންނެވި މަޝްރޫޢު މި އަހަރުގެ މިހާރުމިދާ ޓެންޑަރިންގ މަރުޙަލާގެ ތެރެއިން، އޭގެތެރޭގައި، މި ސްކޯޕްގެ ތެރޭގައި، ހުރިހާ ކަމެއް އަޅުގަނޑުމެން ހިމަނާފައި ވާނެ. ލެބޯރެޓަރީ، ޕަބްލިކް ހެލްތް ޔުނިޓް، ވޯޑް، ޕްރައިވެޓް ރޫމް، ޕްރޮސީޖަރ ރޫމް، ހުރިހާ ތަނެއް. އަދި އިތުރު ކަންކަންވެސް ހިމަނައިގެން، ވަރަށް ފުރިހަމަ ހެލްތް ސެންޓަރެއް އެޅުމުގެ މަސައްކަތް، މި އަހަރު ތެރޭގައި ޢަމަލީގޮތުން ފަށާނަން.
ދެން މިއޮތީ، ކުޅިވަރާ ބެހޭ ވަޢުދުތައް. ފުޓްބޯޅަ ދަނޑެއް ތަރައްޤީ ކުރުން. ފުޓްބޯޅަ ދަނޑު އެޅުމަށްޓަކައިވެސް، މިހާރު މިވަނީ އިޢުލާނު ކުރުމާ ހަމައަށް ގެންދެވިފައި. މި ކަންކަން މި ހިސާބަށް ގެނެވެނީ، ވަރަށް ގިނަ މަސައްކަތް ކޮށްގެން. އަޅުގަނޑުމެންގެ ބަޖެޓުގެ ތެރެއިން އަދި އިޤުތިޞާދީ ގޮތުން އަޅުގަނޑުމެން މެނޭޖްކުރަންޖެހޭ ކަންކަން މެނޭޖްކުރަމުން، އެކި ރަށްރަށުގައި ހުރިހާ ވަޢުދެއް ފުއްދުމަށް ތަރުތީބު ކުރަމުން މިގެންދަނީ. އެހެންވީމާ، ފުޓްބޯޅަ ދަނޑު ތަރައްޤީ ކުރުމަށްޓަކައި، އެއީ ހަމަ ހުރިހާ ކަމެއް ހިމެނޭ ގޮތަށް، ލައިޓް ޖެހުމާ އެކީގައި. ހަމަ ފުލް ސްކޯޕް ފުޓްބޯޅަ ދަނޑެއް ތަރައްޤީކުރުމަށް. މިހާރު އަޅުގަނޑުމެން ބަޔަކާ ހަވާލުކުރުމުގެ މަސައްކަތް މިވަނީ ފެށިފައި. ޓެންޑަރިންގ މަރުޙަލާ. އެހެންވީމާ، ކުރިޔަށް އޮތް ދެތިންމަސް ތެރޭގައި އެންމެ ލަސްވެގެން، ޢަމަލީގޮތުން މި ރަށުގައި، ދަނޑުގެ މަސައްކަތް ފަށާނަން.
ދެން، އަޅުގަނޑު ވަޢުދުވެފައި އޮންނާނީ، ޔޫތު ސެންޓަރެއް އެޅުމަށް. މިހާރު އަޅުގަނޑުމެން ކިޔަނީ، ފިޓްނަސް އެންޑް ރިކްރިއޭޝަން ސެންޓަރު. މި މަސައްކަތްވެސް މިހާރު ބަޔަކާ ހަވާލުކުރުމުގައި އޮތީ. ސަރުކާރުގެ ކުންފުންޏަކާ މި ހަވާލުކުރަނީ. ހަވާލުކޮށްގެން، ދެން ހިނގާނީ، ޢަމަލީގޮތުން ފަށަންޖެހޭ މަރުޙަލާގެ މަސައްކަތް. އެހެންވީމާ، ޔޫތު ސެންޓަރު އެޅުމުގެ މަސައްކަތްވެސް މި ރަށުގައި އިރާދަކުރެއްވިއްޔާ، މި އަހަރުގެ ތެރޭގައި ޢަމަލީގޮތުން ފެށިގެންދާނެ. އެ މަސައްކަތްވެސް އިރާދަކުރެއްވީތީ އެވަނީ ހަމަޖެހިފައި. އެވާހަކަވެސް ތިޔަބޭފުޅުންނަށް ދަންނަވަން.
އާދެ، ދެން އަޅުގަނޑު ވަޢުދުވެފައި އޮންނާނެ، ރަށުތެރެއިން، ފަޅުތެރޭގައި ރިޒޯޓެއް ތަރައްޤީ ކުރުމަށް ބަޔަކާ ހަވާލުކުރުމަށް. އެކަން އަޅުގަނޑުމެން އިޢުލާނުކޮށް، ބަޔަކު ހޯދައި، މިހާރު ބިޑް އެވޯޑް ކޮށްފައި ވާނީ. ދެން، މި މަސް ނިމުމުގެ ކުރީގައި، އެ ރިޒޯޓު ތަރައްޤީ ކުރުމަށް ސޮއިކުރުމަށްވެސް ވަނީ ހަމަޖެހިފައި. އެވާހަކަވެސް ދަންނަވާލަން.
ދެން ވެފައި އޮތް ވަޢުދަކީ، އިކޯ ޓޫރިޒަމްގެ ވަޢުދު. އެކަންވެސް އިރާދަކުރެއްވިއްޔާ މި އަހަރުގެ ތެރޭގައި އަޅުގަނޑުމެން، ބަޔަކާ ހަވާލުކުރާނަން.
އެހެންވީމާ، ހުރިހާ ވަޢުދެއް މި އަހަރުގެ ތެރޭގައި، ޢަމަލީގޮތުން މި ރަށުގައި ކުރިޔަށްދާނެ. އެ ވާހަކަ ދަންނަވާލަން މިއައީ އަސްލުގައި. އެހެންވީމާ، އިރާދަކުރެއްވިއްޔާ ތިޔަބޭފުޅުންނަށް އަޅުގަނޑު ވީ ހުރިހާ ވަޢުދެއް ފުރިހަމައަށް ޑެލިވަރކޮށް، ނިންމައިދޭނެ ކަމުގެ ޔަޤީންކަން ތިޔަބޭފުޅުންނަށް އަނެއްކާވެސް އަރުވަން. މިކަމުގައި ރައްޔިތުން ދެއްވާ އެއްބާރުލެއްވުމަށް، ކައުންސިލުން، ދާއިރާގެ މެންބަރު، ހުރިހާ ބޭފުޅުން ތިޔަ ދެއްވާ އެއްބާރުލެއްވުމަށް ވަރަށް ބޮޑަށް ޝުކުރު ދަންނަވަން. އިރާދަކުރެއްވިއްޔާ، މި ކަންކަން މިގޮތުގައި ކުރިޔަށް ގެންދެވޭނެ.
މިހާރު އަޅުގަނޑުމެން ވާނީ ގޯތިދޭންވެސް ނިންމާފައި. ގޯތި ދޫކުރުމަކީ، މި ރަށަށް އެންމެ ބޮޑުވެފައިވާ އެއް މައްސަލަ ކަމަށްވާތީ، އެކަންވެސް ޙައްލުކޮށްދީފައި، ސަރުކާރުން ދޭންޖެހޭ ހުއްދަ، މިހާރު ލޭންޑް ޔޫސް ޕްލޭންގައި ޖާގައޮތް އެންމެ މެކްސިމަމް ޖާގައަށް ވާވަރަށް ގޯތިދޭން ހުއްދަ ދީފިން. އެ ގޯތިތައް ދެން ކައުންސިލުން ވަރަށް އަވަހަށް ދޫކުރަން ފަށާނެ. އެހެންވީމާ، އެ ގޯތިތައް ދިނީމަ، އަޅުގަނޑަށް ގަބޫލުކުރެވޭ ގޮތުގައި، މިހާރު ގޯތި ބޭނުންވާ ގާތްގަނޑަކަށް ހުރިހާ އެންމެންނަށް އެކަން ހަމަޖެހޭނެ. އަނެއްކާވެސް ލޭންޑް ޔޫސް ޕްލޭން ރިވައިޒް ކޮށްފައި، ފާސްކޮށްފައި ފޮނުވީމާ، އަނެއްކާވެސް އިތުރަށް ބޭނުންވަންޏާ އަޅުގަނޑުމެން ހަމަޖައްސައިދޭނަން. އެހެންވީމާ، މިހާރު އެވަނީ ގޯތީގެ މައްސަލަވެސް، ގޯތި ދޫކުރުމަށް ސަރުކާރުން ބޭނުންވާ ހުއްދަވެސް އަޅުގަނޑުމެން ދީފައި. އެ ވާހަކަވެސް އަޅުގަނޑު ދަންނަވާލަން.
އާދެ އެހެންވީމާ، އިރާދަކުރެއްވިއްޔާ މި ދެންނެވި ހުރިހާ މަސައްކަތްތަކެއް މިގޮތުގައި ކުރިޔަށްދާނެ. އަޅުގަނޑު އުންމީދުކުރަނީ، މި ކަންކަމުން ގޮއިދޫގެ ރައްޔިތުން އުންމީދުކުރާ ގޮތަށް، ރަށުގެ ކަންކަން މިގޮތަށް ފުރިހަމަވެގެން ދިޔުމުން، ތިޔަބޭފުޅުންނަށް އޭގެ ނަފާ ލިބިގެންދާނެ ކަމަށް. ސަރުކާރު އަބަދުވެސް އޮންނާނީ ތިޔަބޭފުޅުންނާ އެކީގައި. ރައްޔިތުންނާ އެކީގައި، ރައްޔިތުން ބޭނުންވާ ކަންކަން، ރައްޔިތުން ގާތަށް އައިސް، އަޑުއަހައިގެން، ރައްޔިތުން ބޭނުންވާ އަމާޒަށް މި ސަރުކާރު މަސައްކަތް ކުރަމުންދާނީ.
އެހެންވީމާ، އަދިވެސް އެއްފަހަރު، ވަރަށް ބޮޑަށް ޝުކުރު ދަންނަވަން. ދެން އަޅުގަނޑު ވަރަށް އުންމީދުކުރަން، އަނެއްކާވެސް އަންނަން. ދެން އަންނަން އަނެއްކާވެސް ބޭނުންވަނީ، ދެންމެ މި ދަންނަވާލި ލިސްޓުގައި ހުރި ގިނަ ކަންކަން ނިމިގެން، ތިޔަބޭފުޅުން އެކަމުގެ އުފާ ފާޅުކުރައްވާއިރު، އެކަމުގައި ބައިވެރިވާން. އެ އުންމީދާ އެކީގައި، އަޅުގަނޑު މިވަގުތު ތިޔަބޭފުޅުންނާ ވަކިވެލާނަން.
އަޅުގަނޑުގެ ދުޢާއަކީ، އަޅުގަނޑުމެން ކުރާ މަސައްކަތްތަކުގައި، اللهُ سُبْحَانَهُ وَتَعَالَى ބަރަކާތް ލެއްވުން. އާމީން!
وَمَا تَوْفِيقِي إِلَّا بِاللَّهِ عَلَيْهِ تَوَكَّلْتُ وَإِلَيْهِ أُنِيبُ.
وَالسَّلَامُ عَلَيْكُمْ وَرَحْمَةُ اللهِ وَبَرَكَاتُه.