بِسْمِ ٱللّٰهِ ٱلرَّحْمٰنِ ٱلرَّحِيمِ
اَلْحَمْدُ للَّهِ رَبِّ الْعاَلَمِينْ، وَالصَّلاَة وَالسَّلاَمُ عَلَى رَسُولِ ٱللَّهِ، وَعَلَى آلهِ وَصَحْبِهِ أَجْمَعِينْ.
ތުޅާދޫގެ ލޮބުވެތި އެންމެހައި ރައްޔިތުން، ކައުންސިލްގެ ރައީސް، ދާއިރާގެ ޢިއްޒަތްތެރި މަޖިލިސް މެންބަރު، ކައުންސިލްގެ މެންބަރުން، އަދި މި ރަށުގެ ހުރިހާ މުއައްސަސާތަކުގެ ވެރިން، ރަށުގެ ލޮބުވެތި ޚިދުމަތްތެރި އިސް ރަށްވެހިން، ވަޑައިގެން ތިއްބެވި އެންމެހައި ޢިއްޒަތްތެރިން، މި ޖަލްސާ، ދުރާއި ގާތުން އަޑުއައްސަވާ، ބައްލަވާ ލޮބުވެތި ހުރިހާ ރައްޔިތުން؛
السَّلامُ عَلَيْكُم ورَحْمَةُ اللهِ وَبَرَكاتُهُ.
އަޅުގަނޑުމެންނަށް މިއަދު މި ރަށަށް އާދެވުނު ވަގުތު، ތިޔަބޭފުޅުން ވަޑައިގެން ވިދާޅުވި ހޫނު މަރުޙަބާއަށްޓަކައި، ތުޅާދޫގެ ލޮބުވެތި ހުރިހާ ރައްޔިތުންނަށް، އަޅުގަނޑުގެ ހިތުގެ އެންމެ ފުންމިނުން، ވަރަށް ބޮޑަށް ޝުކުރު ދަންނަވަން.
އާދެ، މި ރަށުގެ ތަރައްޤީއަށް ރިޔާސީ އިންތިޚާބުގައި، އަޅުގަނޑު ވަރަށް މުހިންމު ވަޢުދުތަކެއްވިން. އެ ވަޢުދުތައް ފުއްދުމަކީ، އަޅުގަނޑުގެ އެންމެ މުހިންމު ޒިންމާ އަދި މަސްއޫލިއްޔަތު. އަޅުގަނޑު ވާ ވަޢުދުތައް ފުއްދުމަށް އިރާދަކުރެއްވީތީ، ވަރަށް އަމާނާތްތެރިކަމާ އެކީގައި، އިޚްލާޞްތެރިކަމާ އެކީގައި، ސަމާލުކަންދީގެން، މުޅި ސަރުކާރު މަސައްކަތް ކުރަމުންދަނީ. އެކި ވަޢުދުތައް ފުއްދުމުގެ މަސައްކަތް ފެށިގެންދަނީ، އެކި ދުވަސްވަރު، އެކަމަށް ބޭނުންވާ އެކިކަހަލަ ކަންތައްތައް ފަހިކުރެވިގެން، ތަރުތީބު ކުރެވިގެން ދިޔުމުން. މިގޮތުން ބަލާއިރު، މި ރަށުގެ ތަރައްޤީއަށް އެންމެ މުހިންމު މަޝްރޫޢުގައި، މިއަދު އަޅުގަނޑުމެންނަށް ސޮއިކުރެވޭ ހިސާބަށް މި ގެންދެވުނީ.
އާދެ، މި މަޝްރޫޢަކީ، އެއަރޕޯޓުގެ މަޝްރޫޢަކީ، ފައިސާގެ ގޮތުން ފުދޭވަރެއްގެ ގިނަ ކަންތައްތަކެއް ތަރުތީބުކޮށްގެން ފެށޭވަރުގެ މަޝްރޫޢަކަށްވާތީ، ވަގުތުކޮޅެއް ނެގީ. އަޅުގަނޑު މިއަދު އެންމެ ފުރަތަމަވެސް މިކަމާ ގުޅޭގޮތުން ދަންނަވަން އޮތް ވާހަކައަކީ، ތިޔަބޭފުޅުންނަށް އަޅުގަނޑު ދޭ ފުރިހަމަ ޔަޤީންކަން. އިރާދަކުރެއްވީތީ، މިއަދު މި ފެށޭ އެއަރޕޯޓުގެ މަޝްރޫޢު ހުއްޓުމެއްނެތި، ބާރު ސްޕީޑުގައި ގެންގޮސް، ފުރިހަމައަށް ނިންމައިދޭނެ ކަމުގެ ޔަޤީންކަން.
ދެން އެއާއެކީގައި، އަޅުގަނޑު ދެތިން ކަމެއް ދަންނަވާލާނަން. އަޅުގަނޑުމެން މަޝްރޫޢު މި ފެށީ، މިދިޔަ ސަރުކާރުން މިކަމަށް ހަދާފައި އޭރުގައި އޮތް ކައުންސިލާ އެކީގައި، ރައްޔިތުން، އަޅުގަނޑު ގަބޫލުކުރަނީ، އުސޫލެއްގެ ގޮތުން ކައުންސިލަކުން ކަމެއް ކުރާނަމަ، ރައްޔިތުންގެ ސޭ، ނޫނީވިއްޔާ ޙިއްޞާ، މަޝްވަރާ ހޯދާނެ ކަމަށް. މިދިޔަ ސަރުކާރުން އޭރުގައި އޮތް ކައުންސިލާ އެކީގައި ހަދާފައި، ފާސްކޮށްފައި އޮތް ކޮންސެޕްޓްގެ ދަށުން ހަދާފައި އޮތް އީ.އައި.އޭ.އަށް ބިނާކޮށްފައި މި މަޝްރޫޢު އަޅުގަނޑުމެން މިފެށީ. މިކަން މި ދަންނަވާލަން ޖެހުނީ، ބައެއް އޮޅުންތައް، މިސްއަންޑަރސްޓޭންޑިންގސް ކޮންމެވެސްވަރަކަށް ހުރިކަން، އަޅުގަނޑަށް މިއަދު ކުރިން އޮތް ކައުންސިލް އަދި ޑަބްލިޔު.ޑީ.ސީ. އަދި މުއައްސަސާތަކުގެ ވެރިންގެ ބައްދަލުވުމުން ފާހަގަވެގެން ދިޔައީމަ. އޭރުގައި ފާސްކޮށްފައި އޮތް، އީ.އައި.އޭ.އަށް މަސައްކަތް މިފެށީ. ދެން އެހެންނަމަވެސް، އަޅުގަނޑު ބަދަލުތަކެއް ގެންނާނެ ވާހަކަ ދަންނަވަންވެގެން މިވާހަކަ މި ދެންނެވީ. އެ އީ.އައި.އޭ.ގައި މިއޮތީ، ފަޅުތެރެއިން ވެލި ނަގައިގެން، ކަޓަރ ސަކްޝަން، ޑްރެޖިން ކޮންސެޕްޓުގައި މަސައްކަތްކުރާ ގޮތަށް، އީ.އައި.އޭ. ފާސްކޮށްފައި. ރަށަށް ބޭނުންވާ ބިން ހިއްކުމާއި، އެއަރޕޯޓް ބިން ހިއްކުން، ދެ ކަންތައްވެސް މިއޮތީ އެގޮތަށް. އެ މެތަޑް ބޭނުންކުރާ ގޮތަށް ފާސްކޮށްފައި.
އަޅުގަނޑުމެން މިއަދު މަސައްކަތް މި ފަށަނީ، އެ އީ.އައި.އޭ.އަށް ބިނާކޮށްފައި. އެހެންނަމަވެސް، އަދި މި މަޝްރޫޢު އަޅުގަނޑުމެން މިއޮތީ، ގާތްގަނޑަކަށް 600 އެއްހާ ދުވަސް ހޭދަވާ މަޝްރޫޢެއް ގޮތަށް. އަޅުގަނޑުމެން ގެންނާނެ ބަދަލަކީ، މަޝްރޫޢު މިހާރު މި ފެށިގެންދާ ދިޔުމުގެ ތެރޭގައި، މި ފަޅުން ބޭރުން އެހެން ތާކުން ވެލި ނަގައިގެން، ހޮޕަރ ޑްރެޖިންގ އެއީ، ފަޅުތެރެއިން ކަޓަރ ސަކްޝަން ނުޖައްސައި، ހޮޕަރ ޑްރެޖަރ ބޭނުންކޮށްގެން ކުރާގޮތަށް ބަދަލުކުރުން. އެގޮތަށް އިރާދަކުރެއްވިއްޔާ، ބަދަލުކޮށްދޭނަން. އޭގެ ނަތީޖާއަކަށް ވާނީ، ފަޅުތެރެއިން ވެލި ނެގުން ހުއްޓުމަކަށް އައުމާއި، މަޝްރޫޢު އެތައް ތަނަކުން އަވަސްވެގެން ދިޔުން. ދެ ކަންތައް ހާސިލުވާނެ. އެކަން އަޅުގަނޑުމެން ކުރާނެ ވާހަކަ ތިޔަބޭފުޅުންނަށް ދަންނަވާލަން.
އެހެންވީމާ، އެއްގޮތަކަށްވެސް ހީނުކުރައްވާތި، ހަމަ އެ އޮތްގޮތަށް ދާގޮތަށްގޮސް ދެން ހަމަ ދާނީއޭ، ގޮސް މިގޮތަށް ނިމޭނީއޭ. ނޫން! އިރާދަކުރެއްވިއްޔާ، ދެންމެ މި ދެންނެވި ބަދަލު ގެންނާނަން.
އެހެންވީމާ، އެމް.ޓީ.ސީ.ސީ.އިން އެގްރިމަންޓުގައި މިއޮތްގޮތަށް، އީ.އައި.އޭ.ގައި އޮތްގޮތަށް މިއަދު މަސައްކަތް ފެށިނަމަވެސް، ހަމަ އާ އެމެންޑްމަންޓެއް އީ.އައި.އޭ.އަށް އާ ބަދަލެއް، ނޫނީވިއްޔާ އިޞްލާޙެއްލާނަން، ހޮޕަރ ޑްރެޖިންގއިން މަސައްކަތް ކުރާގޮތަށް. ބަދަލުކޮށްފައި، އަވަސްވެސް ވާނެ. އަދި ތިޔަބޭފުޅުންގެ އެ ފަޅުތެރެއިން ވެލި ނެގުމުގެ ކަންބޮޑުވުންވެސް ދާނެ. އެހެންވީމާ، އިރާދަކުރެއްވިއްޔާ އެ މަޝްރޫޢު އެގޮތަށް ހުއްޓުމެއްނެތި ކުރިޔަށްދާނެ. ބާރު ސްޕީޑުގައި ބިން ހިއްކައި ނިމި، އަދި ރަންވޭ، ދެންހުރި ހުރިހާ ކަމެއް ދާގޮތަށް، މިއަދު މި ސޮއިކުރެވުނު ގޮތަށް ދާނެ.
އާދެ، މީގެ ދެތިން ދުވަސް ކުރިން އަޅުގަނޑުމެން ސޮއިކޮށްފައި އޮންނާނެ، އާރު.ޑީ.ސީ.އާ އެކީގައި މަގު ހެދުމުގެ މަޝްރޫޢުވެސް. އެ މަޝްރޫޢުވެސް އިރާދަކުރެއްވިއްޔާ ފެށިގެންދާނެ. އެވެސް އެއީ ރިޔާސީ އިންތިޚާބުގައި، ތިޔަބޭފުޅުންނަށް އަޅުގަނޑު ވެފައި އޮތް ވަޢުދެއް. އެހެންވީމާ، މަގު ހެދުންވެސް އިރާދަކުރެއްވިއްޔާ، ވަރަށް އަވަހަށް ފެށި، ތިޔަބޭފުޅުންނަށް އެ މަޝްރޫޢުވެސް ކާމިޔާބުކަމާ އެކީގައި، އަޅުގަނޑުމެން ނިންމައިދޭނެ ކަމުގެ ޔަޤީންކަން އަރުވަން.
މި ރަށުގައި އަޅުގަނޑު ވީ އަނެއް މުހިންމު އެއް ވަޢުދަކީ، ގެދޮރުގެ ވަޢުދު. ދެން، މީގައިވެސް އެބައުޅޭ ދެތިން ކަމެއް ފާހަގަކޮށްލަންޖެހޭ. މިދިޔަ ސަރުކާރުގައި ފެށިފައި އޮތް މަޝްރޫޢެއް، ހަވާލުކުރުމުގައި ވަރަށް ގިނަ މައްސަލަ ދިމާވެއްޖެ. އެންމެފަހުން ކޯޓު ޙުކުމެއްވެސް މިއޮތީ އައިސްފައި. އެހެންވީމާ، ވަކިގޮތަކަށް މިއޮތީ މިހާރު ކޯޓުގެ ޙުކުމަށް ތަބަޢަވުމުގެ ގޮތުން، ކައުންސިލަށްވެސް، މިނިސްޓްރީއަށްވެސް މާބޮޑު ކަމެއް ކުރެވޭ ގޮތަކަށް ނޫން. އަޅުގަނޑު ވަޢުދުވެފައި އޮންނާނެ، މި ސަރުކާރުން އާ މަޝްރޫޢެއް ފަށާނެ ވާހަކަ. އެގޮތުން 100 ހައުސިންގ ޔުނިޓު، އެޅުމަށްޓަކައި މިހާރު ޓެންޑަރިންގގެ އިނީޝިއަލް ޕްރީ ކޮލިފިކޭޝަން ސްޓޭޖުގެ ތެރެއިން ހުޅުވައިލެވި، ބަޔަކު ކުރިމަތިވެސްލާފައި އެބައޮތް. އެހެންވީމާ، އެ މަރުޙަލާ ނިމުނީމާ ދެން، އަގު ހުށަހެޅުމަށް އަޅުގަނޑުމެން ހުޅުވަލާނަން. މާނައަކީ، އާ އިތުރު 100 ހައުސިންގ ޔުނިޓު، ފްލެޓު މަޝްރޫޢު، އާ 100 ފްލެޓު މަޝްރޫޢު އެޅުމުގެ މަސައްކަތް ކުރުމަށް ބަޔަކު ހޯދުމާއި، އެގްރީމަންޓް ހެދުމުގެ މަރުޙަލާ މިހާރު އޮތީ ފެށިފައޭ.
އިރާދަކުރެއްވިއްޔާ މާލަސްތަކެއްނުވެ މިރަށުގައި އިތުރު ސަތޭކަ ހައުސިންގ ޔުނިޓުގެ މަޝްރޫޢު ފަށައިދޭނަން. ދެން މި މަޝްރޫޢުގެ ދަށުން ލިބޭ ޔުނިޓުތައް، ލިބޭ ފަރާތްތައް ކަނޑައަޅާނީ ރަށުގެ ރައްޔިތުން. މާނައަކީ، ރަށުގެ ރައްޔިތުންގެ ޚިޔާލާއި މަޝްވަރާއާ އެކީގައި، މި ރަށުގެ ހާލަތަށް ރިޢާޔަތްކޮށް، ކައުންސިލުން ކަނޑައަޅާ، ދާއިރާގެ ޢިއްޒަތްތެރި މަޖިލިސް މެންބަރުގެވެސް ލަފައާ އެކީގައި ކައުންސިލުން ކަނޑައަޅާ މިންގަނޑެއް، މިނިސްޓްރީއަށް ހުށަހެޅީމަ، ޤާނޫނާއި ޤަވާއިދު ތަންދޭގޮތަކަށް އެކަން އޮތިއްޔާ އަޅުގަނޑުމެން އެޕްރޫވް ކުރާނަން. އެއީ، އަޅުގަނޑުމެންގެ ސިޔާސަތަކީވެސް. ހުރިހާ ރަށެއްގައިވެސް. އެ ލޯކަލިޓީއެއްގައި އެ ރަށެއްގައި ހާލަތު އޮތްގޮތް، އެ ރަށެއްގެ ގެދޮރު ދިނުމުގައި، އޮންނަންވާނީ ރިފްލެކްޓް ކުރެވިފައި. ނޫނީވިއްޔާ، ފެންނަން އޮންނަންވާނީ، މިންގަނޑު ހެދިފައި އޮންނަންވާނީ. އެގޮތަށް ކަމަށް އަޅުގަނޑު ގަބޫލުކުރަނީ.
އެހެންވީމާ، މިރަށުންވެސް ހުށަހަޅާ ޕޮއިންޓްދޭ ނިޒާމު، ނޫނީވިއްޔާ މިންގަނޑު، އަޅުގަނޑުމެން ބަލައިގަންނާނަން، ޤާނޫނަކާ ޚިލާފު ނުވަންޏާ. ނޫނީވިއްޔާ ގެޒެޓުކުރެވިފައި ހުންނަ ގަވާއިދަކާ ޚިލާފުނުވާހާ ހިނދަކު. އެހެންވީމާ، މި ދެންނެވި މަޝްރޫޢު ފަށާއިރުގައި، އަޅުގަނޑު އުންމީދުކުރަނީ، މިހާރު މައްސަލަޖެހިގެން މިއުޅޭ ހާލަތު، ދެން ދިމާނުވާނެ ގޮތަށް ގެންދެވޭނެ ކަމަށް. އެހެންވީމާ، އެކަން އެގޮތަށް ގެންދާނެ ވާހަކަ ދަންނަވާލަން.
ދެން ހަމަ އެއާއެކީގައި، އަޅުގަނޑު ފާހަގަކޮށްލަން ބޭނުން، މި ރަށުގައި ޞިއްޙީ ދާއިރާއަށް ތަރައްޤީ ގެނައުމަށްޓަކައި، އަޅުގަނޑުވީ ވަޢުދު ފުއްދުމުގެ ގޮތުން، މިހާރު ހިނގަމުންދާ މަޝްރޫޢު ކުރިއަށްދާއިރުގައި، އަދި އޭގެ އިތުރަށްވެސް، ގިނަ ކަންތައްތަކެއް އަޅުގަނޑުމެން ކުރާނެ ވާހަކަ. މި ރަށަކީ އަޅުގަނޑުމެންގެ މި ސަރަޙައްދީ ތަރައްޤީގައި މި އަތޮޅުގައި، ދެވަނައަށް އެންމެ އިސްކަންދޭ ތަރައްޤީގެ ނާރެސް. އެހެންވީމާ، މިރަށަށް ބޭނުންވާ ޞިއްޙީ ޚިދުމަތް، މި ރަށުގައި ތިބެގެން، ސްޕެޝަލިޓީ ޚިދުމަތް ލިބޭނެ ބައެއް ދާއިރާތައް ހުންނަންޖެހޭ ކަމަށް އަޅުގަނޑުމެން ވާނީ ކަނޑައަޅާފައި. އެހެންވީމާ، އޭގެތެރޭގައި ކުޑަކުދިންނާއި، އަންހެނުންނަށް ޚާއްޞަ ޑޮކްޓަރުން މި ރަށުގައި ތިބޭގޮތަށް އަޅުގަނޑުމެންވާނީ ނިންމާފައި.
އަޅުގަނޑުމެން މަސައްކަތް ކުރަމުންދާނަން، ވީހާވެސް އަވަހަކަށް މި ރަށުގައި ސްޓޭޝަން ކުރަން ޑޮކްޓަރުން ފޮނުވޭތޯ. އެހެންވީމާ، އިރާދަކުރެއްވިއްޔާ، އެކަންވެސް ކުރިއަށްއޮތްތާ ހަމަޖެހޭނެކަން ތިޔަބޭފުޅުންނަށް ދަންނަވާލަން. އަދި ހަމައެއާއެކީގައި، ޖުމްލަކޮށް ޞިއްޙީ ދާއިރާ ތަރައްޤީކުރުމަށް، މި އަންނަ އަހަރު ބަޖެޓުގެ ތެރެއިން ހިމަނައިގެން އިތުރު މުވައްޒަފުން ހޯދައިދިނުމާއި، ވަސީލަތް ފުރިހަމަކޮށްދިނުމާއި، މި ކަންކަން އެބައޮތް ރޭވިފައި.
ދެން ހަމަ އެގޮތަށް، ސްކޫލަށްވެސް ބޭނުންވާ އޮފީސް ބިލްޑިންގއެއް އަޅައިދިނުމާއި، މި ކަންކަން އަޅުގަނޑުމެން ކުރިއަށް ގެންދާނަން. އެހެންވީމާ، ޖުމުލަކޮށް މި ރަށުގެ ތަރައްޤީގައި މިހިރަ މައިގަނޑު ދާއިރާތައް، ކުރިއަށް ގެންދިއުމަށް އަޅުގަނޑުމެން މިއޮތީ މިގޮތަށް ވަރަށް ބޮޑު ސަމާލުކަމެއް ދީފައި.
ދެން ކުޅިވަރުގެ ދާއިރާއިން އަޅުގަނޑު ފާހަގަކޮށްލަން، އަންހެން ބޭފުޅުންނަށް ވަރަށް ޚާއްޞަ ކުޅިވަރެއްގެ ގޮތުގައި ފާހަގަކުރެވޭ، އަދި މިރަށުގެ އަންހެން ބޭފުޅުން ވަރަށް ބޮޑަށް އެދޭ ކަމެއް، ހޭންޑްބޯލް ކޯޓެއް އެޅުން. އެ މަޝްރޫޢު އިރާދަކުރެއްވިއްޔާ އަޅުގަނޑުމެން ފަށާނަން ވަރަށް އަވަހަށް. އަދި އޭގެ އިތުރަށް، ފުޓްސަލް ދަނޑުގެ ސައިޒު ބޮޑުކޮށްދިނުމަށްޓަކައި، ބޮޑު ސައިޒުގެ އާ ފުޓްސަލް ދަނޑެއް މިރަށުގައި އެޅުމުގެ މަސައްކަތްވެސް އިރާދަކުރެއްވިއްޔާ ކުރިއަށް ގެންދާނަން. އެހެންވީމާ، ހޭންޑްބޯލް ކޯޓަކާއި، ބޮޑު ފުޓްސަލް ދަނޑެއްގެ މަޝްރޫޢު ކުރިއަށް އޮތް ތާނގައި، މި އަހަރުގެ ތެރޭގައި ފަށައިދޭނަން.
އާދެ، އަޅުގަނޑު އަދިވެސް ދެތިން ކަމެއް ފާހަގަކޮށްލާނަން. ގެދޮރުގެ ވާހަކައިގައި އަޅުގަނޑު އެއް ވާހަކަ އަދި ފާހަގަކޮށްލަން ބޭނުން. މި ރަށުން އަމިއްލައަށް ކުރީގައި ހިއްކާފައިވާ 119 ގޯއްޗެއްވޭ. މި ގޯތިތައް އަމިއްލަ ކުރެވޭނެގޮތް ހެދުމަކީ، އެ ގޯތިތައް ހިއްކި ފަރާތްތަކުން ވަރަށް ބޮޑަށް އެދޭ ކަމެއް. އަދި އަޅުގަނޑު ގަބޫލުކުރާގޮތުގައި، ހަމަ ވަރަށް ޖާއިޒުވެސް ކަމެއް. މާލޭގައިވެސް އެކަން ކޮށްފައިވަނީ ކުރީގައި. ތަންކޮޅެއް ކުރީގައި މާލޭގައިވެސް އަމިއްލައަށް ގޯތި ހިއްކާފައި އެބަހުރި. ހިއްކައިގެން އަމިއްލަވެސް ކޮށްދީފައި އެބަހުރި އެތައް ގޯއްޗެއް. އެއީ ނުކޮށް އޮތް ކަމެއްނޫން ރާއްޖޭގައި.
އެހެންވީމާ، އަޅުގަނޑު އެ 119 ގޯތީގެ ވެރިންނަށް މިއަދު ދޭ ޔަޤީންކަމަކީ، އެކަން އަޅުގަނޑުމެން ކޮށްދޭނަމޭ. ހައުސިންގ މިނިސްޓްރީއާ ގުޅިގެން، ތިޔަބޭފުޅުން އަދި ކަމާބެހޭ އެހެން ވުޒާރާތަކާއި، މުއައްސަސާތަކާ ގުޅިގެން، އެކަން ކައުންސިލުން ކުރިއަށް ގެންދަންވީ. އިރާދަކުރެއްވިއްޔާ ސަރުކާރުގެ ފުރިހަމަ އެއްބާރުލުން އެކަމަށްދޭނަން. އެކަން އިރާދަކުރެއްވިއްޔާ ހަމަޖެހިގެންދާނެ.
އާދެ، މިކަން ފާހަގަކޮށްލާފައި، އަދި އަޅުގަނޑު ދަންނަވާލަން ބޭނުން، އަޅުގަނޑު ރިޔާސީ އިންތިޚާބުގައި ވީ ވަޢުދެއް ޕިކްނިކް ދިޔުމަށްޓަކައި، ކައިރިން ރަށެއް ހަމަޖައްސައިދިނުމުގެ ވަޢުދު. މި ވެސް އަޅުގަނޑުގެ ރިޔާސީ ވަޢުދެއް. މިކަމަށް ތިޔަބޭފުޅުން ބޭނުންވަނީ އެނބޫދޫ. މިރަށް، މި ވެފައި އޮންނަގޮތަކީ، ޓޫރިޒަމް ޑިވެލޮޕަރއަކަށް މި އޮންނަނީ، 21 އަހަރަށް ކުއްޔަށްދީފައި. ދީފައި އޮތް މުއްދަތު މި ހަމަވަނީ، 2035އަށް ކަމަށް އަޅުގަނޑަށް ޓޫރިޒަމް މިނިސްޓަރ މަޢުލޫމާތު ދެނީ. އަޅުގަނޑު ދަންނަވައިފިން މިހާރު، ޤާނޫނާއި ޤަވާޢިދުތަކުގެ ތެރެއިން، އުސޫލުގެ ތެރެއިން، އެބޭފުޅުންގެ އަތުން އެރަށް ވަކިކޮށްދެއްވާށޭ. ދައުލަތަށް ގެއްލުންނުވާގޮތަށް. ދައުލަތަށް ގެއްލުންނުވާ ބަދަލަކާ އެކީގައި، އެބޭފުޅުންނަށް އެހެން ރަށެއް، ނޫނީވިއްޔާ އެހެން ގޮތެއް ހަމަޖައްސަންޖެހެންޏާ، އެއީ ދެން ބައްލަވާށޭ، އެކަން އޮންނަ ގޮތެއް. ބައްލަވާފައި، އެ ރަށް ފްރީ ކުރައްވާށޭ. ކޮށްފައި، މި ރަށުގެ ރައްޔިތުން އެދޭގޮތަށް، އަޅުގަނޑުގެ ރިޔާސީ ވަޢުދު ފުދޭގޮތަށް، ތިޔަބޭފުޅުންނަށް އިރާދަކުރެއްވިއްޔާ އެނބޫދޫ ހަވާލުކޮށްދޭނަން. އެހެންވީމާ، މިހާރު ޓޫރިޒަމް މިނިސްޓަރާއި، އެޓަރނީ ޖެނެރަލްގެ އަތްޕުޅުގައި އެކަން އެ އޮތީ. އެކަން އިރާދަކުރެއްވިއްޔާ އެ ދެ ބޭފުޅުން ނިންމަވައިދެއްވާނެ.
އާދެ، އަޅުގަނޑު ޖުމްލަކޮށް މި ވާހަކަތައް މި ދަންނަވާލީ، އެހެން މަޝްރޫޢުތަކުގެ ވާހަކަ ނުދައްކާކަށް ނޫން. ޖުމްލަކޮށް ހުރިހާ ދާއިރާއަކުން މި ރަށުގެ ތަރައްޤީއަށްޓަކައި، ކުރަންހުރި މަސައްކަތްތަކުގައި، އަޅުގަނޑު ވީ ވަޢުދުތައް ފުއްދައި، އަދި އިތުރު ކަންކަންވެސް ތިޔަބޭފުޅުންނަށް ކޮށްދިނުމަށްޓަކައި. މީގެ ކުރިން އޮތް ބައްދަލުވުމުގައި ވަރަށް ފުޅާ ދާއިރާއެއްގައި ކައުންސިލްގެ ރައީސާއި، ކައުންސިލް މެންބަރުން، އެކިއެކި މުއައްސަސާތަކުގެ ވެރިން، ދާއިރާގެ މެންބަރު، ހުރިހާ ބޭފުޅުންވެސްވަނީ ވަރަށް ތަފްސީލުކޮށް އެ ކަންކަންވެސް ހިއްސާ ކުރައްވާފައި. އަދި އަޅުގަނޑު ރިޔާސީ އިންތިޚާބުގައިވީ ވަޢުދުތައް، ހަމަ ވަރަށް ސާފުކޮށް އަޅުގަނޑަށް އެނގޭ.
އެހެންވީމާ، ތުޅާދޫގެ ރައްޔިތުންގެ ތަރައްޤީއަށްޓަކައި، އަޅުގަނޑުމެން ވެފައިވާ ހުރިހާ ވަޢުދެއް ފުއްދުމާ އެކީގައި، ތިޔަބޭފުޅުންގެ އުންމީދުތަކުގައި، ޙަޤީޤީ ކުލަ ޖައްސައިދިނުމުގެ ކަންކަން ކުރިއަށް އޮތް ތާނގައި، ބާރު ސްޕީޑުގައި ކުރިއަށްދާނެކަމުގެ ޔަޤީންކަން ދެމުން އަޅުގަނޑު ވަކިވެލަން.
އަޅުގަނޑުގެ ދުޢާއަކީ، އަޅުގަނޑުމެން މިކުރާ މަސައްކަތްތަކުގައި، اللهُ سُبْحَانَهُ وَتَعَالَى ބަރަކާތް ލެއްވުން. އާމީން!
وَمَا تَوْفِيقِي إِلَّا بِاللَّهِ عَلَيْهِ تَوَكَّلْتُ وَإِلَيْهِ أُنِيبُ.
وَالسَّلَامُ عَلَيْكُمْ وَرَحْمَةُ اللهِ وَبَرَكَاتُه.