بِسْمِ ٱللّٰهِ ٱلرَّحْمٰنِ ٱلرَّحِيمِ
اَلْحَمْدُ للَّهِ رَبِّ الْعاَلَمِينْ، وَالصَّلاَة وَالسَّلاَمُ عَلَى رَسُولِ ٱللَّهِ، وَعَلَى آلهِ وَصَحْبِهِ أَجْمَعِينْ.
އޭދަފުށީގެ ލޮބުވެތި އެންމެހައި ރައްޔިތުން، ކައުންސިލްގެ ރައީސް، ދާއިރާގެ ޢިއްޒަތްތެރި މަޖިލިސް މެންބަރު އަޙްމަދު ސަލީމް، ކައުންސިލްގެ މެންބަރުން އަދި މުއައްސަސާތަކުގެ ވެރިން، ރަށުގެ ޚިދުމަތްތެރި އިސް ރަށްވެހިން، ވަޑައިގެން ތިއްބެވި އެންމެހައި ޢިއްޒަތްތެރިން، އަދި މި ޖަލްސާ ދުރާއިގާތުން ބައްލަވަމުން ގެންދަވާ، އަޑުއައްސަވަމުން ގެންދަވާ ލޮބުވެތި އެންމެހައި ރައްޔިތުން؛
السَّلامُ عَلَيْكُم ورَحْمَةُ اللهِ وَبَرَكاتُهُ.
މިއަދު ހަވީރުގެ ވަގުތުގައި އަޅުގަނޑުމެންނަށް މި ރަށަށް އާދެވުނުއިރު، ތިޔަބޭފުޅުން ވަޑައިގެން، ވިދާޅުވި ހޫނު މަރުޙަބާއަށްޓަކައި، އަޅުގަނޑުގެ ހިތުގެ އެންމެ ފުންމިނުން އޭދަފުށީގެ ލޮބުވެތި ހުރިހާ ރައްޔިތުންނަށް ވަރަށް ބޮޑަށް ޝުކުރު ދަންނަވަން.
މި ރަށުން އަޅުގަނޑަށް ކޮންމެ ފަހަރަކުވެސް މިވަރުގެ ވަރުގަދަ މަރުޙަބާއެއް ވިދާޅުވޭ. ރިޔާސީ އިންތިޚާބުގެ ތެރޭގައި އައިއިރުވެސް. މިދިޔަ އަހަރުވެސް. މި އަހަރުވެސް. ސަލީމް ވިދާޅުވެއްޖެ، އަޅުގަނޑު ކޮންމެ އަހަރަކު އަންނަންޖެހޭނެ ކަމަށް. އެހެންވީމާ، އެކަމާ އަޅުގަނޑު ވިސްނާނަން.
އާދެ، އަޅުގަނޑު ރިޔާސީ އިންތިޚާބުގައި މެނިފެސްޓޯއެއް އިޢުލާނު ކުރިން. އެ މެނިފެސްޓޯގައި މިހާރު، އަދި މެދު ރާސްތާގައި، އަދި ދުރު ރާސްތާގައި ރާއްޖޭގެ ތަރައްޤީ އޮންނަންވާނެ ގޮތުގެ، ވަރަށް ސާފު ތަޞައްވުރެއް ބަޔާންކޮށްފައި އޮންނާނެ. އަދި އިޢުލާނު ކުރިން. އަދި ކެމްޕެއިން ތެރޭގައި، އެކި ފަހަރުމަތިން ރައްޔިތުންނަށް ކިޔައިދިނިން. ރައްޔިތުން އެކަން ބަލައިގަތީ. އަދި އެއަށް ވޯޓުދެއްވީ.
އޭގެތެރޭގައި، މި ހިމެނެނީ، ރާއްޖޭގެ އެކި ސަރަޙައްދުތައް ތަރައްޤީކުރުމާއި، އެކިއެކި ރަށްރަށުގައި ވަކި ފެންވަރަކަށް، ތަރައްޤީގެ ވަކިކަހަލަ ކަންކަން ހިންގުމާއި، މިފަދަ ސަރަޙައްދީ ތަރައްޤީގެ ކަންތައްތައްވެސް. އެގޮތުން، އޭރުގައި، އަޅުގަނޑު އިޢުލާނުކުރީ އަރބަން ސެންޓަރުތައް ހެދުމާއި، މީގެތެރޭގައި އެއް ރަށެއްގެ ގޮތުގައި މި ރަށް ހެދުން. މި މަސައްކަތްވާނީ ފަށާފައި، އަޅުގަނޑުމެން އެންމެ ކުރީކޮޅުން. ދައުރުގެ އެންމެ ފުރަތަމަ ދުވަސްވަރުން ފެށިގެން. އެހެންނަމަވެސް، ފުރަތަމަ އަހަރު މުޅި ރާއްޖޭގައިވެސް ތަރައްޤީގެ ކަންކަން ގެންދިޔުމުގައި ކުރިމަތިވި ދަތިކަން މިރަށަށްވެސް ކުރިމަތިވި. ގެންދަންވާ ސްޕީޑްގައި ގެންދިޔުމުގައި. ގިނަ ކަންކަން އޭގައި ހުރި. ދެންމެ ސަލީމްވެސް އެ ފާހަގަކުރެއްވީ އިޤްތިޞާދީ ގޮތުން އަޅުގަނޑުމެންނަށް ވާރުތަވި ކަންކަން. ވަރަށް ބޮޑު ދަރަންޏަކާ އެކީގައި، އަދި ގިނަ މައްސަލަތަކެއް ހުރި. ދެން އެއްގޮތަކަށްވެސް މިގަޑީގައި ތަފްޞީލަށް ދާކަށް ބޭނުމެއް ނެތް. އިޤްތިޞާދު އޮތީ ވަރަށް ނާޒުކު ހާލަތުގައި. ދެން މިހެންގޮސް، އޭރުގެ އެ މަޖިލީހުން ބަޖެޓް ހަދާފައި ދިންއިރުގައި އޮތްގޮތުން، ހަމަ އެއްވެސް މަޝްރޫޢެއް އޮތީކީ އަޅުގަނޑު ވަޢުދުވެފައި ހުރިގޮތަށް ގެންދެވޭކަހަލަ ގޮތަކަށްނޫން. ހަމަ އެ ބޭފުޅުން ގަސްދުގައި، ސިޔާސީ ބޭނުމުގައި ފާސްކުރެއްވީ. އެކަންވެސް އަޅުގަނޑު އޮންނާނީ، ކުރިން ތިޔަބޭފުޅުންނާ ބައްދަލުވިފަހަރު އެ ވާހަކަ ދަންނަވާފައި. އަދި ހުރިހާ ރަށެއްގައިވެސް އެ ވާހަކަ ދެއްކިން.
އެހެންވީމާ، ފުރަތަމަ އަހަރު ގެންދެވުނީ އެހާ ރަނގަޅަށް އަޅުގަނޑުމެން ބޭނުންވާ ސްޕީޑަކު ނޫން. އިޤްތިޞާދީ ގިނަ ކަންކަން ޙައްލުކުރަމުން މިއަދާ ހަމައަށް މި އާދެވުނީ. އިރާދަކުރެއްވީތީ މިހާރު ވަރަށް ހަލުވި ސްޕީޑްގައި ކަންތައްތައް ކުރިއަށް ގެންދެވޭގޮތަށް، އަޅުގަނޑުމެންނަށް އިޤްތިޞާދީ ކަންކަން ރަނގަޅު ކުރަމުން މިވަނީ ގެނެވިފައި.
އާދެ، މި ރަށަށް އަޅުގަނޑުވީ ހުރިހާ ވަޢުދެއް ހަނދާން އެބަހުރި. އޭގެތެރޭގައި، އެންމެ މުހިންމު ކަމަކީ، ގެދޮރުގެ ވަޢުދު. މިއީ މުޅި ރާއްޖޭގެ ހުރިހާ ރައްޔިތުންނަށްވެސް އަޅުގަނޑުވީ އެންމެ މުހިންމު ވަޢުދު. ތަރައްޤީގެ ދާއިރާއިން އެންމެ މުހިންމު ވަޢުދު.
އަޅުގަނޑުމެން ސޮއިކޮށްފައިވާނެ ބޭރުފަރާތަކާ އެކީގައި، މި ރަށުގައި 1000 ހައުސިންގ ޔުނިޓުގެ މަޝްރޫޢެއް. އެކަމަށްޓަކައި ވަރަށް ގިނަ މަސައްކަތްތަކެއް ކުރެވެމުން ގޮސްފައިވޭ. އަޅުގަނޑު ތިޔަބޭފުޅުންނަށް މިރޭ ދޭން ބޭނުންވާ އެންމެ މުހިންމު މެސެޖަކީ، އަދި ޔަޤީންކަމަކީ، މި މަޝްރޫޢުގެ ޢަމަލީ މަސައްކަތް މި އަހަރުގެ ތެރޭގައި ފަށައި، އިރާދަކުރެއްވިއްޔާ މި މަޝްރޫޢު އަޅުގަނޑުމެން ސޮއިކުރިގޮތަށް، މި ދައުރުގެ ތެރޭގައި ތިޔަބޭފުޅުންނަށް އަޅުގަނޑުމެން ފޯރުކޮށްދޭން ނިންމާފައި އޮތްކަމުގެ ޔަޤީންކަން. އެހެންވީމާ، އެކަމުގެ ޔަޤީންކަން އަޅުގަނޑު ދެން.
އެހެންވީމާ، 1000 ހައުސިންގ ޔުނިޓުގެ މަޝްރޫޢު އަޅުގަނޑުމެން މި އަހަރުގެ ތެރޭގައި ފަށާނަން. ފަށާއިރުގައި އަޅުގަނޑުމެން އެކި ބައިބަޔަށް، ބެޗުބެޗަށް، ނޫނީވިއްޔާ، ފޭސްތަކަކަށް ބަހާލަންވެސް ޖެހިދާނެ. އެހެންނަމަވެސް، އެ 1000 ހައުސިންގ ޔުނިޓުގެ މަޝްރޫޢު ހަމަ މި އަހަރުގެ ތެރޭގައި އަޅުގަނޑުމެން ފަށާނަން. އެއީ، އެންމެ މުހިންމު ކަމަކީ. މި ރަށުގެ ރައްޔިތުންނާއި، އަދި މި ރަށަށް އާބާދީއާއި ތަރައްޤީ އެއްފަސްކުރުމުގެ ސިޔާސަތުގެ ތެރެއިން، އަންނަން ބޭނުންވާނެ ފަރާތްތަކާއި، އެކިއެކި ބޭނުންތަކަށް، ކިޔެވުމަށާއި، އެކި ކަންކަމަށް، އިޤްތިޞާދީ މަސައްކަތްތަކާއި ކަންކަމަށް މިރަށުގައި ޤާއިމުވެތިބެން ބޭނުންވާ ފަރާތްތަކާއި، މިހެންގޮސް ހުރިހާ ފަރާތްތަކަށް މިއީ ވަރަށް މުހިންމު، ހަމަ 100 ޕަސެންޓް ފީޒިބަލް މަޝްރޫޢެއް.
އެހެންވީމާ، މި މަޝްރޫޢަކީ ދެމެހެއްޓެނިވި ތަރައްޤީގެ ސިޔާސަތުގެ ދަށުން، އަޅުގަނޑު ކުރިން ދެންނެވި މެދު ރާސްތާ، ދުރު ރާސްތާގެ ރާއްޖޭގެ ތަރައްޤީގެ ސިޔާސަތަށްވެސް ހަމަ ވަރަށް މުހިންމު މަޝްރޫޢެއް. ދެންހުރި އާރބަން ސެންޓަރުތަކަށްވެސް އަޅުގަނޑު ހުންނާނީ މިގޮތަށް ބިޔަ ބޮޑެތި މަޝްރޫޢުތައް ކަނޑައަޅާފައި. ރާއްޖެ 2040އާ ހަމައަށް ދާންވާއިރަށް ތަރައްޤީވެފައިވާ ޤައުމުތަކުގެ، ޑިވެލޮޕްޑް ނޭޝަނެއްގެ ގޮތުގައި، އެ ފެންވަރަށް ތަރައްޤީކުރަން ބަލާއިރުގައި މިއީ ކޮންމެހެން ކުރަންޖެހޭ ކަންކަން. އެހެންވީމާ، ދުރު ރާސްތާއަކަށް އަޅުގަނޑުމެން މަސައްކަތް ފަށާފައި މިވަނީ. ވަރަށް ސީރިއަސް ތަރައްޤީގެ މަސައްކަތްތަކެއް.
އިންތިޚާބުގެ ތެރޭގައި، އަޅުގަނޑު ރައްޔިތުންނަށް ދެންނެވިން، އަޅުގަނޑު ބޭނުންވަނީ ވަރަށް ސީރިއަސްކޮށް މަސައްކަތްކުރާށޭ. އަޅުގަނޑުމެންނާ ރައްޔިތުން ހަވާލުކޮށްފިއްޔާ މަސައްކަތް ކުރާނީ އެ މަގުންނޭ. އެގޮތުން މިދެންނެވި ކަންކަން މިވަނީ ފެށިފައި.
މިރޭ އަޅުގަނޑުމެން މި ސޮއިކުރި ހޮސްޕިޓަލްގެ މަޝްރޫޢަކީވެސް ހަމަ އެބޭނުމުގައި ކުރާ ކަމެއް. މި ހޮސްޕިޓަލް މި ރަށުގައި ޤާއިމުވެގެންދިޔައިމާ، އިރާދަކުރެއްވިއްޔާ، އިތުރު އެތައް ޚިދުމަތްތަކަކާ އެކީގައި ފުރިހަމަވެގެން އެދަނީ. އާރބަން ސެންޓަރެއްގެ ގޮތުގައި ޤާއިމުވެގެންދާ، ތަރައްޤީ ކުރެވިގެންދާ ތަންތާނގައި ހުންނަންޖެހޭ ފެންވަރުގައި އޭރުން މި ރަށުގައި ޞިއްޙީ ޚިދުމަތް ފުރިހަމަވެގެންދާނެ. މާދަމާ އަޅުގަނޑުމެން މެމޮގްރަފީ ފެށިޔަސް، އަދި އެހެން ބައެއް ޚިދުމަތްތައް މިހާރު ހުރި ޢިމާރާތުގެ ތެރޭގައި ފެށުނުކަމުގައިވިޔަސް، ޖާގައެއް ނެތް. އެހެންވީމާ، މި ޢިމާރާތް އަޅުގަނޑުމެން އަޅަންޖެހޭ. މިއީ އެގޮތުން އަޅުގަނޑުމެން ފަށާ ކަމެއް.
ހަމައެއާއެކީގައި، އަޅުގަނޑުވީ އަނެއް ވަޢުދު، އަޅުގަނޑު މި ސޮއިކުރި ޤައުމީ ޔުނިވަރސިޓީގެ ކެމްޕަސްގެ ކަންތައްވެސް މިއީ، އަޅުގަނޑު ރިޔާސީ އިންތިޚާބުގައިވީ ވަޢުދެއް. މިއީ ތަޢުލީމީ ރަށެއް. އަދި ތަޢުލީމީ ފުރުޞަތު ވަރަށް ފުޅާކުރެވެން އެބައޮތް މި ރަށުގައި. އެގޮތުން، ނެޝަނަލް ޔުނިވަރސިޓީގެ ކެމްޕަސްއެއް މިތާ ޤާއިމުކޮށްގެން އެ ބިނާކުރެވެނީ، ރާއްޖޭގެ ތަރައްޤީއަށް ވަރަށް މުހިންމު ސިކުނޑިތަކެއް. އެހެންވީމާ، އެ ރައްޔިތުން، އެ ޒުވާނުން މިރަށަށް އައިސް، މި ރަށުގެ ރައްޔިތުންނާއި، މި ރަށަށް ހިޖުރަކުރާ ރައްޔިތުންނާއި، މި ބޭނުމުގައި އަންނަ ރައްޔިތުންނަށް މިއީ ވަރަށް މުހިންމު ކަމެއް. އެހެންވީމާ، ވަރަށް މުހިންމު ދެ މަޝްރޫޢުގައި އަޅުގަނޑުމެން މި ތަނުގައި މި ސޮއިކުރީ.
އަޅުގަނޑުމެން ކުރިއަށްގެންދަން، އަޅުގަނޑުމެންގެ ވަޢުދުގެ ތެރޭގައި ހުރި ކިތަންމެ ކަމެއް އެބަހުރި މިހާރު ފެށުމުގެ މަރުޙަލާގައި ހުރި ކަންތައްތައް. މަގުހެދުމުގެ މަޝްރޫޢުގެ ދެވަނަ ފިޔަވަހި ފެށުމަށް އެވަނީ ތައްޔާރުވެފައި. އެއީވެސް އަޅުގަނޑުވީ ވަޢުދެއް. އެ މަޝްރޫޢު ކުރިއަށްގެންގޮސް ނިމޭއިރުގައި އިރާދަކުރެއްވިއްޔާ، އަޅުގަނޑު ވަޢުދުވީގޮތަށް މިރަށުގެ ހުރިހާ މަގެއް ހެދިގެންދާނެ. އެ ޔަޤީންކަން ތިޔަބޭފުޅުންނަށް އަޅުގަނޑު އަރުވަން.
ބަނދަރުގެ މަސައްކަތްވެސް އެދަނީ ކުރިއަށް. އެވެސް އަޅުގަނޑުވީ ވަޢުދެއް. ގާތްގަނޑަކަށް ހަމަސްދުވަހުގެ ތެރޭގައި ނިންމާލެވޭނެ ކަމަށް މިނިސްޓަރު އަދި ކުންފުނީގެ އެމް.ޑީ. ދެ ބޭފުޅުންވެސް އެބަ ވިދާޅުވޭ. އެހެންވީމާ، މި ވަޢުދުވެސް އިރާދަކުރެއްވިއްޔާ އެދަނީ ފުދެމުން.
އަދި ހަމައެއާއެކީގައި ކުޅިވަރުގެ ދާއިރާއިން، މި ރަށަށް ވަރަށް ގިނަ ކަންތައްތަކެއް އަޅުގަނޑު ކުރަން ނިންމާފައިވާނެ. އެންމެ މުހިންމު ކަމަކީ، އިންޑޯ ކުޅިވަރުތައް ކުޅެވޭގޮތަށް، ސްޕޯޓްސް ކޮމްޕްލެކްސްއެއް، އެކި ކުޅިވަރުތައް ކުޅެވޭ އިންޑޯ މަލްޓި ސްޕޯރޓްސް ކޮމްޕްލެކްސްއެއް ޤާއިމުކުރުން. އެކަން ކުރަން އަޅުގަނޑުމެންވާނީ ނިންމާފައި. އެ މަޝްރޫޢުގެ ޢަމަލީ މަސައްކަތްވެސް އިރާދަކުރެއްވިއްޔާ، މި އަހަރުގެ ތެރޭގައި ފެށިގެންދާނެ. އޭރުން ތިޔަބޭފުޅުންނަށް އެކިކަހަލަ ކުޅިވަރުތައް، އިންޑޯ ސްޕޯޓްސް އެކި ކުޅިވަރުތައް ކުޅެވޭނެ، ވަރަށް ފުރިހަމަ ފެސިލިޓީސް ހުންނާނެ. އަޅުގަނޑުމެން ނިންމާފައިވަނީ މުޅި ރާއްޖޭގައިވެސް ގާތްގަނޑަކަށް ފަސްވަރަކަށް ރަށުގައި މީގެ ކޮމްޕްލެކްސްތައް ޤާއިމުކުރަން. އޭގެ ތެރެއިން އެއް ރަށް މިއީ. ގާތްގަނޑަކަށް 1200 މީހުންނަށް، ސްޕެކްޓޭޓަރުންނަށް ބަލަންވެސް ތިބެވޭނެ. ޗޭންޖިންގ ރޫމްތައް، ހުރިހާ އެއްޗެއްވެސް ހިމެނޭ، ވަރަށް ފުރިހަމަ ސްޓޭޓް އޮފް ދަ އާޓް އިންޑޯ މަލްޓި ސްޕޯޓްސް ކޮމްޕްލެކްސްއެއް އެއީ. އެ މަޝްރޫޢު އިރާދަކުރެއްވިއްޔާ މި އަހަރު ފަށާނަން.
އެހެންވީމާ، މި ރަށަކީ މިހާރުވެސް ވަރަށް ރަނގަޅު އިންފްރާސްޓްރަކްޗަރ ޤާއިމުވެފައި އޮތް ރަށެއް. އެކަމަކު، އެތައް ގުނައަކުން އިތުރުވެގެންދާނެ. އަރބަން ސެންޓަރެއްގައި ހުންނަންޖެހޭ ފެންވަރަށް އެތައް ހަރުފަތަކުން ކުޅިވަރުގެ ޚިދުމަތް، ކުޅިވަރުގެ ފެސިލިޓީޒްތައް، ވަސީލަތްތައް އިތުރުވެގެންދާނެ މަޝްރޫއަކަށް އިރާދަކުރެއްވިއްޔާ މި މަޝްރޫޢު ވާނެ. އެހެންވީމާ، އެ މަޝްރޫޢު އިރާދަކުރެއްވިއްޔާ މި އަހަރުގެ ތެރޭގައި ޢަމަލީގޮތުން ފަށައި، ބާރު ސްޕީޑްގައި ގޮސް ނިންމާލަދޭނެކަމުގެ ޔަޤީންކަންވެސް ތިޔަބޭފުޅުންނަށް އަޅުގަނޑު އަރުވަން.
ހަމައެއާއެކީގައި، އަޅުގަނޑު ވަޢުދުވިން، ކޮންވެންޝަން ސެންޓަރެއް ހަދަންވެސް ރިޔާސީ އިންތިޚާބުގައި. އަޅުގަނޑު ހަނދާނެއްނުނެތޭ އިނގޭތޯ އެއްވެސް ވަޢުދެއް. ލިޔެފައި ހުންނާނެ. އެއަށް އަޅުގަނޑުމެން މިދަނީ ރެޔާއި ދުވާލު މަސައްކަތް ކުރަމުން. ސަރުކާރުގެ މުޅި ޓީމުގެ މަސައްކަތަކީ، އަޅުގަނޑު ވެފައިހުރި ވަޢުދު ފުއްދަން މަސައްކަތްކުރުން. ރެޔާއި ދުވާލު ހަމަ ލިޓްރަލީ، ލަފްޒީ މާނައިގައި ހަމަ ރެޔާއި ދުވާލު ދަނީ މަސައްކަތްކުރަމުން. އެހެންވީމާ، އެގޮތުން ކޮންވެންޝަން ސެންޓަރުގެ މަސައްކަތްވެސް އޮންނާނެ. އެހެންނަމަވެސް، މި އަހަރު ފަށާގޮތަކަށް އަދި ހަމަޖެހިފައެއް ނޯންނާނެ. މި އަންނަ އަހަރު އަޅުގަނޑު މިގޮތަށް ރިޔާސީ އިންތިޚާބުގައި ވަޢުދުވެފައި ހުރި ރަށްތަކުގައި ކޮންވެންޝަން ސެންޓަރު އެޅުމުގެ މަސައްކަތް ފަށާނެ. އޭގެތެރޭގައި މިރަށްވެސް ހިމެނޭ. އެއީވެސް ވަރަށް ގިނަ ފައިދާތައް މި ރަށަށް ވާނެ ކަމެއް. ޓޫރިޒަމްގެ ބޭނުމަށް ބެލިކަމަށްވިޔަސް، އެ ކަމަށްޓަކައި ކޮންވެންޝަން ސެންޓަރުގައި އެކިކަހަލަ އިވެންޓްސްތައް ބޭއްވުމާއި، އަދި އެހެނިހެން ކަންކަމަށް ބަލާއިރުވެސް، ރަށަށް އިޤްތިޞާދީ ފައިދާ ނުހަނު ބޮޑުވާނެ ކަމެއް. އެހެންވީމާ، އެ ވަޢުދު ފުއްދުމަށް އަޅުގަނޑު ނިންމާފައިވާ ގޮތް މި ދަންނަވާލީ. މި އަންނަ އަހަރު އެ މަސައްކަތް ފަށަން އަޅުގަނޑުމެން ވާނީ ނިންމާފައި.
އާދެ، ހަމައެއާއެކީގައި، ބޭންކިންގ ޚިދުމަތްވެސް ވަރަށް ރަނގަޅަށް ޤާއިމުވެފައިވާ ރަށެއް މިއީ. އެހެންނަމަވެސް، އަދި އިތުރު ކަންކަން ބޭނުންވޭ. ކުރަންޖެހޭ. އެގޮތުން، މި އަހަރުގެ ތެރޭގައި އިރާދަކުރެއްވިއްޔާ، ޔޫ.އެސް. ޑޮލަރުގެ އޭ.ޓީ.އެމް.ގެ ޚިދުމަތް މި ރަށުގައި ޤާއިމުކޮށްދޭނަން. އާދެ، އަޅުގަނޑު ވަޢުދުވެފައި ވާނެ، ރާއްޖޭގެ ހުރިހާ ރަށެއްގައި އޭ.ޓީ.އެމް.ގެ ޚިދުމަތް ޤާއިމުކުރަން. ބީ.އެމް.އެލް.ގެ ފަރާތުން އެކަން އަޅުގަނޑުމެންނަށް އެ ކޮށްދެއްވަނީ. ބީ.އެމް.އެލް.ގެ ސީ.އީ.އޯ. އަދި ޗެއަރމަން އަދި މުޅި ޓީމަށް އަޅުގަނޑު ވަރަށް ބޮޑަށް ޝުކުރު ދަންނަވަން. އަޅުގަނޑުގެ މި ވަޢުދު ފުއްދައިދިނުމަށްޓަކައި، އެ ކޮށްދެއްވާ މަސައްކަތަށް. އޭގެތެރެއިން ބައެއް ރަށްރަށުގައި ބްރާންޗް މި ހުޅުވަނީ. އަޅުގަނޑު ވަޢުދުވެފައި ހުންނާނެ ރަށްތަކުގައި، ބައެއް ރަށްތަކުގައި ޑޮލަރު އޭ.ޓީ.އެމް. މި ޤާއިމުކުރަނީ. އެހެންވީމާ، އެ ގޮތުން މި ރަށުގައި މި ދެންނެވި އޭ.ޓީ.އެމް. ޤާއިމުވާނީ.
އާދެ، ރަށުގެ ކަރަންޓް، ނޫނީވިއްޔާ މި ޕަވަރ، ޔުޓިލިޓީޒް، ކަރަންޓާ ގުޅިފައިވާ، ފެނާއި ގުޅިފައިވާ ޔުޓިލިޓީޒްގެ ފެންވަރު މަތިކުރުމަށްޓަކައިވެސް އަޅުގަނޑުމެން ވަރަށްބޮޑަށް އިންވެސްޓް ކުރާނަން. ވަރަށްބޮޑަށް އިންވެސްޓް ކުރާނަން މި އަހަރުގެ ތެރޭގައިވެސް، އަދި މި އަންނަ އަހަރުވެސް. އަދި މީގެތެރޭގައި އަލަށް މި ގޯތި މި ދޫކުރެވޭ ސަރަޙައްދަށް ބޭނުންވާ އެކްސްޓެންޝަންވެސް ހިމެނޭނެ. އެގޮތުން، އަރބަން ސެންޓަރެއްގެ ގޮތުގައި ކަނޑައެޅިފައި މިވާ 7 ރަށަށް ވަރަށް މުހިންމު އިސްކަން އަޅުގަނޑު މިދެނީ ދެމެހެއްޓެނިވި ތަރައްޤީގެ ސިޔާސަތުގެ ތެރެއިން. އެހެންވީމާ، މި ރަށަށް ބޭނުންވާ ހުރިހާ ކަމެއް މި ދެންނެވި ދާއިރާއިންވެސް ހަމަޖެހޭނެ.
ހިއްކި ބިންތަކުގައި، ދެންމެ ކައުންސިލްގެ ރައީސްވެސް ފާހަގަކުރެއްވި، އެއްވެސް ކަމެއް ނުކުރެވި ގިނަ ރަށްތަކުގައި މިހިރީ. ހަމަ ހިއްކިފައި އޮތީ. އެކަންވާނީ އެހެން. އެއީ، ސަބަބަކީ، ގޯއްޗެއް ދިނަސް، ވިޔަފާރިއެއް ފަށަން އުޅުނަސް، ކަރަންޓެއް، ފެނެއް، ނޫނީވިއްޔާ އެއްވެސް ޚިދުމަތެއް ނެތް ޤާއިމުކުރެވިފައެއް. ނަރުދަމާއެއް އެކައްޗެއްވެސް. މިއީ އެތައް އަހަރެއްވެފައި އޮތް މައްސަލައެއް. މި ރަށުގެ ބިން ހިއްކިތާވެސް މިހާރު އެތައް އަހަރެއް މިވީ. އަދި މިގޮތަށް ބިން ހިއްކާފައި އެބަހުރި، އެތައް ރަށެއްގައި. މިގޮތަށް އެތައް އަހަރެއްވެފައި. ހަމަ ނަމެއްގައި، ބޭނުމެއް ނެތް ގޮތުގައި މިއޮތީ.
އަޅުގަނޑުމެން މި އަންނަ އަހަރަށް ބަޖެޓް މި ހަދަނީ، މިކަމަށް ޚާއްޞަ ޕްރޮގްރާމެއް ހިމަނައިގެން. މި އަންނަ އަހަރުގެ ބަޖެޓް ހަދާއިރުގައި، ޚާއްޞަ ނިއު ޕޮލިސީ އިނީޝިއޭޓިވް ޕްރޮގްރާމެއް އެބަ ހިމަނަން. ހިއްކާފައި ހުރި ބިންތަކަށް ބޭނުންވާ ޔުޓިލިޓީޒް ޤާއިމުކޮށްދިނުމާއި، އިންފްރާސްޓްރަކްޗަރ ޤާއިމުކޮށްދިނުމުގެ މަޝްރޫޢެއް ހިމަނާފައި. އޭގެތެރޭގައި، އެންމެ އިސްކަންދޭނީ އާބާދީއާއި ތަރައްޤީ އެއްފަސްކުރެވޭނެ ރަށްތަކަށް. ދެން އާބާދީ ބޮޑެތި ރަށްތަކަށް. މިގޮތަށްގޮސް ތަރުތީބުކުރެވިގެންދާނެ. އޭގެތެރޭގައި، މިރަށަށް އެންމެ ބޮޑު އިސްކަމެއްދީގެން، މި އަހަރުވެސް އަޅުގަނޑުމެންނަށް މީގެތެރެއިން، ފެށެން އޮތް ބައެއް، ފޭސްއެއް ފެށެންއޮތްތޯ ބަލާފައި، ފަށަން މަސައްކަތްކުރާނަން. ހަމަޔަޤީނުންވެސް މި އަންނަ އަހަރަށް މި ކަނޑައަޅާ ބަޖެޓުގެ ތެރޭގައި ހިމެނޭނެ، މި ދެންނެވި ގޮތަށް، ހިއްކި ބިންތަކަށް ބޭނުންވާ ފެން، ކަރަންޓް، ނަރުދަމާ، މަގު ހިމެނޭގޮތަށް ވަރަށް ބިޔަ ބޮޑު ޕްރޮގްރާމެއް، މި ދެންނެވި ގޮތަށް ހިންގުމަށްޓަކައި. އޭގެތެރޭގައި ވަރަށް ގިނަ ރަށްތަކެއް ކަވަރ ކުރެވިގެންދާނެ. އެހެންވީމާ، އެކަންވެސް އޮތީ އެގޮތަށް ކުރިއަށްގެންދަން ކަނޑައެޅިފައި.
އާދެ، އެހެންވީމާ، ޖުމްލަކޮށް އަޅުގަނޑު މި ދަންނަވާލީ. ދެން އަޅުގަނޑުވީ ވަޢުދެއް، ކައުންސިލާއި އެމް.ޓީ.ސީ.ސީ.އާ ގުޅިގެން ސަރުކާރުގެ ވަރަށްބޮޑު ޙިއްޞާއެއް އޮވެގެން މިހާރު އެ ފެށިގެން އެދަނީ، އާރޓިފިޝަލް ބީޗުގެ ކަންތައް. ކައުންސިލްގެ ބަޖެޓުންވެސް ފުދޭވަރެއްގެ ބޮޑު ޚަރަދެއް އެއަށް އެބަ ކުރައްވާ. 4.8 މިލިއަން ރުފިޔާ. އަދި އެމް.ޓީ.ސީ.ސީ.އިން ސަރުކާރުން އެއަށް ޚަރަދުކޮށްގެން، ބާކީބައި ހަމަޖައްސައިގެން، އެ ވަޢުދު ފުއްދުމުގެ މަސައްކަތްވެސް ފެށިގެން އެދަނީ.
އާދެ، ޖުމްލަކޮށް، އަޅުގަނޑުވީ ހުރިހާ ވަޢުދެއްގެ މަސައްކަތް މިވަނީ ފެށިފައި. އަދި ފެށުމަށް ރޭވިފައިވާ ގޮތް މި ދެންނެވީ. މާއްޑޫ ތިޔަބޭފުޅުންނާ އަޅުގަނޑު ހަވާލުކުރީ މި ރަށުގެ ބައެއްގެ ގޮތުގައި. އެކަމަކު އެ ރަށް އެބަޖެހޭ އަދި ބޭނުންކުރެވޭ ގޮތް ހަދަން. އެހެންވީމާ، އެއީ އަޅުގަނޑުމެން ދެން އަންނަ އަހަރެއްގެ ތެރޭގައި، ބަޖެޓުގެ ތެރެއިން މަސައްކަތް ރާވައިލެވޭނެ އެއް ކަންތަކަށް ވާނެ. މިގޮތަށް އަޅުގަނޑުމެން ބައެއް އެހެން ފަޅުރަށްތައް އެބަ ހަވާލުކުރަން. އިޤްތިޞާދީ އަދި އެކިކަހަލަ ބޭނުންތަކަށް. އެހެންވީމާ، ތަރުތީބުކޮށްލެވިގެން މިކަހަލަ ކަންތައްތައް ކުރިޔަށް ގެންދެވޭނީ. އަޅުގަނޑުމެންގެ އިޤްތިޞާދު އޮތް ޙާލަތު އަޅުގަނޑު އަބަދުވެސް ހަނދާން ބަހައްޓަން. އެކަންކަން ރަނގަޅުކުރަމުން، ބޭރުގެ ދަރަނިތައް ދައްކަމުން، ޑިފޯލްޓް ނުވެ، ފައިސާ ޗާޕްނުކޮށް، އަޅުގަނޑުމެންގެ މިހުރިހާ ކަމެއް މެނޭޖް މި ކުރަނީ. އެހެންވީމާ، އިރާދަކުރެއްވިއްޔާ މިގޮތަށް ހުރިހާ ކަމެއް ގެންދެވޭނެ. އާދެ، އަޅުގަނޑު މި ދަންނަވާލި ހުރިހާ ކަމެއް އެއީ، އަޅުގަނޑު ރިޔާސީ އިންތިޚާބުގައި ވެފައިވާ ހުރިހާ ވަޢުދެއް، އެއްކޮށް ކަވަރު ވެގެންދާ ކަންތައްތައް.
އާދެ އެހެންވީމާ، އޭދަފުށީގެ ރައްޔިތުންނަށް އަޅުގަނޑު ދޭ ޔަޤީންކަމަކީ، މި ދެންނެވި ގޮތަށް، މި ރަށުގެ ތަރައްޤީއަށްޓަކައި، އަޅުގަނޑު ވެފައިހުރި ހުރިހާ ވަޢުދެއް، ފުރިހަމައަށް ފުރިހަމަކޮށްދޭނެ ކަމުގެ ޔަޤީންކަން.
އާދެ، މި ޖަލްސާ ރާއްޖޭގެ ވަރަށް ގިނަ ރައްޔިތުން ބައްލަވާނެ. ލައިވްކޮށް ދައްކާ ޖަލްސާއެއްވީމާ. އަޅުގަނޑު ބައެއް އެހެން ރަށްތަކަށްވެސް ޝާމިލްވާ ބައެއް ކަންތައް، މި މައުޟޫޢުގެ ތެރެއިން، ތަރައްޤީގެ މައުޟޫޢުގެ ތެރެއިން ދަންނަވާލަން ގަސްދުކުރަން. އެއީ، ވަރަށްގިނަފަހަރު މިހެން ކުރެވޭ މަސައްކަތްތައް، ކިތަންމެ ސާފުކަން ބޮޑުކޮށް ފެންނަން އޮތްނަމަވެސް، ޙަޤީޤަތް އޮޅުވައިލުމަށް ބައެއް ފަރާތްތަކުން މަސައްކަތް ކުރަމުންދޭ. އަޅުގަނޑު ރިޔާސީ ބަޔާނުގައި، މި އަހަރުގެ ފެބުރުވަރީ މަހު، ރައްޔިތުންގެ މަޖިލީހަށް އަޅުގަނޑު ހުށަހެޅި، އިއްވި ރިޔާސީ ބަޔާނުގައި، ތަރައްޤީގެ މަސައްކަތްތައް ގެންދާނެ ގޮތް ވަރަށް ތަފުޞީލުކޮށް ކިޔައިދިނިން، ހުށަހެޅިން. އެ ރިޔާސީ ބަޔާނަކީ، ޤާނޫނީގޮތުން އަޅުގަނޑުގެ މައްޗަށް ލާޒިމުވާ ހަމައެކަނި ބަޔާން. މިވެނި ކަންތައްތަކެއް ކުރާނެތޯ، ނުކުރާނެތޯ ބަޔާންކުރަން އޮންނަ. އަދި އޭގައި ބުނާގޮތަކަށް ކަންކަން ކުރަން ލާޒިމުވާ ބަޔާނެއް. އެހެންވީމާ، އެ ބަޔާނުގައިވާގޮތަށް އަޅުގަނޑު މި ހުރިހާ މަސައްކަތްތަކެއް މިގެންދަނީ. އަޅުގަނޑުމެން ދެ އަހަރު ދުވަހަށް ބަހާލައިގެން، ވަރަށް ގިނަ ކަންތައްތަކެއް، ރާއްޖޭގެ ހުރިހާ ރަށެއްގައި ކުރަން ފަށާނެ ކަމަށް، އަދި ވީހާވެސް ގިނަ ކަންތައްތަކެއް ނިންމާނެ ކަމަށް، އަޅުގަނޑު ވާނީ އެ ބަޔާނުގައި އިޢުލާނުކޮށްފައި. އަޅުގަނޑު ރިޔާސީ އިންތިޚާބުގައި ވެފައިވާ، ވަރަށް ގިނަ ވަޢުދުތައް އޭގެތެރެއިން ކަވަރުވާނެ.
މި އަހަރާއި މި އަންނަ އަހަރާ، ދެ އަހަރު ދުވަހުގެ ތެރެއިން، ރާއްޖޭގެ ހުރިހާ ރަށެއްގައި، މީގެތެރެއިން ފާހަގަކުރާ ކަމަށްވަންޏާ، ފުލުހުންގެ ޚިދުމަތް ޤާއިމުނުކުރެވި ހުރި ހުރިހާ ރަށެއް ހިމެނޭހެން، މި އަހަރުގެ ތެރޭގައި، ހުރިހާ ރަށެއްގައި ފުލުހުންގެ ޚިދުމަތް ޤާއިމުކުރުމުގެ މަސައްކަތް ފެށޭނެ. އަދި މި އަހަރާއި، މި އަންނަ އަހަރު ތެރޭގައ، މި ހުރިހާ މަޝްރޫޢުތަކެއް ނިމޭނެ. ހަމަ އެގޮތަށް، ހުރިހާ ރަށެއްގައި، މި ދެ އަހަރު ތެރޭގައި ކުރިއަށް ގެންދެވޭ މަޝްރޫޢުތަކަކީ، ކޮންމެ ރަށެއްގައި އައުޓްޑޯ ޖިމެއް ޤާއިމުކުރުމާއި، ކޮންމެ ރަށެއްގައި ފިޓްނަސް އެންޑް ރިކްރިއޭޝަން ސެންޓަރެއް ޤާއިމުކުރުމާއި، ކުޑަކުދިންގެ ޕާކެއް ޤާއިމުކުރުމާއި، ކޮންމެ ރަށެއްގައި ވޭސްޓް މެނޭޖްމަންޓް ސެންޓަރެއް ހަދައި، މި އަހަރު ތެރޭގައި ފަށައި، އެ ކަންތައްތައް ނިންމުމާއި، ކޮންމެ ރަށެއްގައި ފެނާއި ނަރުދަމާގެ މަޝްރޫޢުތައް ނިންމުމާއި، ކޮންމެ ރަށެއްގައި ބަނދަރުގެ މަޝްރޫޢޫތައް ކުރިޔަށް ގެންދިޔުމާއި، އަދި ކޮންމެ ރަށަކަށް ބޭނުންވާ ލެބޯރެޓަރީ ޚިދުމަތް ހިމެނޭހެން، ހެލްތް ސެންޓަރުގެ މަސައްކަތް ކުރިޔަށް ގެންދިޔުމާއި، ކޮންމެ ރަށެއްގެ ސްކޫލް އިންފްރާސްޓްރަކްޗަރގެ މަޝްރޫޢު ފެށުމާއި އަދި އޭ.ޓީ.އެމް.ގެ މަސައްކަތް މި އަހަރު ތެރޭގައި ނިންމުން.
މި އަހަރުގެ ނިޔަލަށް ކުރަން ނިންމާފައި ހުރި، ރިޔާސީ ބަޔާނުގައި އަޅުގަނޑު ބަޔާންކުރި ބައެއް ކަންތައްތައް މިއީ. މާނައަކީ، މި އަހަރާއި މި އަންނަ އަހަރު ތެރޭގައި، ރާއްޖޭގެ ކޮންމެ ރަށެއްގައި، މި ދެންނެވި ހުރިހާ ކަމެއް ޤާއިމުކުރުމުގެ މަސައްކަތް ކުރެވޭނޭ. އަދި ގިނަ ރަށްތަކެއްގައި ނިމޭނޭ. ނިމުނީމާ، އެ ހާސިލުވަނީ، ރައްޔިތުންނަށް ޙަޤީޤީ ބާރުވެރިކަން. ރައްޔިތުން އަބަދު ދަތުރުފަތުރު ކޮށްގެން މާލެއަށް، ނޫނީވިއްޔާ ކޮންމެވެސް އެހެން ތަނަކަށް ދާކަށް ނުޖެހޭނެ. އަދި ބައެއް ތަންތަނުގައި، އަތޮޅުތަކަށް ބަހާލައިގެންވެސް، ކޮންމެ އަތޮޅެއްގައި އަދި ބައެއް އަތޮޅުތަކުގައި، އެކި ރަށްތަކުގައި ކުރާނެ ކަންތައްވެސް ހިމެނޭނެ. މިސާލަކަށް، މި ރަށުގައި މި ފެށެނީ މާދަމާ ޕާސްޕޯޓުގެ ޚިދުމަތް. ކޮންމެ އަތޮޅެއްގައި މަދުވެގެން އެއް ރަށުގައި، މަދުވެގެން އެއް ރަށުގައި، ރަށުގައި ހުރެގެން ޕާސްޕޯޓް ލިބޭގޮތް މި ޤާއިމުކުރަނީ، މި އަހަރު ތެރޭގައި. އައި.ޑީ.ކާޑު. ޚިދުމަތް، މިގޮތަށް އެތައް ކަމެއް. އާރު.ޓީ.އެލް.ގެ ޚިދުމަތް، ހުރިހާ އަތޮޅެއް، މި އަހަރު ނިމޭއިރަށް ކަވަރުކުރަން އަޅުގަނޑު ނިންމާފައި ވާނީ. ރިޔާސީ ބަޔާނުގައި އިޢުލާނުކުރިން. އެ މަސައްކަތްވެސް އެދަނީ ކުރިޔަށް.
ކޮންމެ އަތޮޅެއްގައި، ޕަބްލިކް ވަރކްސްގެ މަރުކަޒެއް ޤާއިމުކުރުން އެއީ ވަރަށް މުހިންމު ކަމަކަށްވޭ. އެއީ، ކުދިކުދި ކަންކަން ކޮށްލަން، ބޮޑު ޚަރަދެއް ކުރަންޖެހޭ ޖެހުން އެބަ ނިމުމަކަށް އާދޭ، ކޮންމެ އަތޮޅެއްގައި ޕަބްލިކް ވަރކްސް މަރުކަޒެއް ޤާއިމުކުރެވުނީމާ. މަގުހަދާލުން، ބަނދަރު ފުންކުރުން. މިހެންގޮސް ގިނަ ކަންތައްތައް ކުރެވޭނެ. އެހެންވީމާ، ޕަބްލިކް ވަރކްސް މަރުކަޒު ޤާއިމުކުރުމަށް ނިންމީ. ކޮންމެ އަތޮޅެއްގައި މަދުވެގެން އެއް ރަށުގައި، އެސް.ޓީ.އޯ. ރޭޓުގައި ތެޔޮ ލިބޭނެ ފިއުލް ސްޓޭޝަނެއް ހެދުން. ޚާއްޞަކޮށް، މަސްވެރިންނަށް އަދި ޖުމްލަކޮށް އެންމެންނަށްވެސް ފައިދާވާ ކަމެއް. އެ މަޝްރޫޢު މި އަހަރު ތެރޭގައި ބޮޑުބައި، މި އަންނަ އަހަރު ފެބުރުވަރީ، މާރިޗު، އެހާ ހިސާބަށްދާއިރު އެކީގައި ނިމޭނެ. ކޮންމެ އަތޮޅެއްގައި އެސް.ޓީ.އޯ. ފިއުލް ސްޓޭޝަން ޤާއިމުކުރުން. ކޮންމެ އަތޮޅެއްގައި މަދުވެގެން، އެއް ހޮސްޕިޓަލުގައި އެންމެ ފެންވަރު ރަނގަޅުކޮށް ޑެންޓަލް ޚިދުމަތް ލިބޭނެގޮތް ޤާއިމުކުރުމަށް އަޅުގަނޑު ނިންމާފައި ވާނެ. އެންމެ ފެންވަރު ރަނގަޅުކޮށް، މަދުވެގެން އެއް ހޮސްޕިޓަލުގައި. އެހެންވީމާ، މި އަތޮޅުގައި މި ރަށުގައި ޤާއިމުކުރެވިގެންދާނެ އެ ފެންވަރުގައި. ދެން ހަމަ ގިނަ އެހެން ކަންތައްތައް އެބަ ހިމެނޭ. ޑަޔަލިސިސް ޚިދުމަތް، ތެލަސީމިއާ ޚިދުމަތް، މިހެންގޮސް ވަރަށް ގިނަ ކަންތައްތައް.
އެހެންވީމާ، ލާމަރުކަޒު ކުރެވިގެން، ރައްޔިތުންނާ ހިސާބަށް، ދެ އަހަރު ދުވަހަށް ބަހާލެވިގެން މި އަންނަނީ ވަރަށް ގިނަ ކަންތައްތައް. އަދި އަޅުގަނޑު ދެންމެ ބަޔާންނުކުރާ ގިނަ ކަންތައްތައްވެސް ހުންނާނެ އިނގޭތޯ.
އެހެންވީމާ، ރައްޔިތުންނަށް ވަރަށް ސާފުކޮށް ފެނިވަޑައިގަންނަވާނެ، މިކަންކަން ވަމުންދާތަން. ވަރަށް ސާފުކޮށް. މި އަހަރު ތެރޭގައި މީގެތެރެއިން ބައެއް ކަންތައް މި ފެށެނީ. މި އަންނަ އަހަރު ތެރޭގައި، މީގެތެރެއިން ބައެއް ކަންތައް ފެށޭނެ. ދެ އަހަރަށް ބަހާލެވިގެން. އެހެންވީމާ، މި ދެންނެވި ބީދައިން، ރާއްޖޭގެ ރައްޔިތުންނަށް، މިދިޔަ ޒަމާންތަކުގައި ނުކޮށްދީ ހުރި، ނުކޮށްދެވިފައި ހުރި، އެތައް ޚިދުމަތްތަކެއް މި ޤާއިމުކޮށްދެނީ. އެއީ، އަޅުގަނޑު އަބަދުވެސް ގަބޫލުކުރާ ޙަޤީޤަތް، އެކަމުގެ ތެރޭގައި ހިމެނޭތީ. އެއީ، ކޮންމެ ރައްޔިތަކު އަޅުގަނޑަށް ހަމަހަމަވާތީ. ކޮންމެ ދިވެހި ރައްޔިތަކު އަޅުގަނޑަށް ހަމަހަމަވީމާ. އެއީ، އެންމެ ކުޑަ ރަށުގައި ހުރި ރައްޔިތަކަށްވިޔަސް، އެންމެ ބޮޑު ސިޓީއެއްގައި ހުރި ރައްޔިތަކަށްވިޔަސް އަޅުގަނޑަށް ހަމަހަމަވީމާ. އެއީ ކޮންމެ ރައްޔިތަކަށްވެސް، އެ ރައްޔިތަކު ދިރިއުޅެން ގަސްދުކުރާ ތަނެއްގައި، އެ ރައްޔިތަކަށް މި ޚިދުމަތްތައް ލިބޭނެގޮތް، ސަރުކާރުން ޤާއިމުކުރަންޖެހޭނެ ކަމަށް އަޅުގަނޑު ގަބޫލުކުރާތީ.
އެހެންވީމާ، މި ދެންނެވި ގޮތަށް އިރާދަކުރެއްވިއްޔާ، ރާއްޖޭގެ ތަރައްޤީގެ ކަންތައްތައް އަޅުގަނޑުމެން ކުރިޔަށް ގެންދަމުން މިދަނީ. އިރާދަކުރެއްވިއްޔާ އެގޮތަށް ގެންދާނަން. އެގޮތަށް ގެންގޮސް، މި ދެންނެވި ޕްލޭނާ އެއްގޮތަށް ރައްޔިތުންނަށް ކަންކަން ހާސިލުކޮށްދެވިގެން ދާނެ.
އާދެ، އަޅުގަނޑު އެދެނީ ރައްޔިތުން ކިބައިން، މިކަންކަމައިގެން އަޅުގަނޑުމެން އެންމެން އެއް ވިސްނުމެއްގައި، ޤައުމީ ވިސްނުމެއްގައި ކުރިޔަށްދާން. ކައުންސިލްތަކުގެ ކިބައިންވެސް އަޅުގަނޑު އެދެނީ، ޤައުމީ ވިސްނުމެއްގައި ކުރިޔަށްދާން. ހުރިހާ ކައުންސިލްތަކަކީ، ސިޔާސީ ވިސްނުމެއްގައި، އެއް ވިސްނުމެއްގައި ތިބި ބައެއް ނޫން. އެހެންނަމަވެސް، ތަރައްޤީގެ ވިސްނުން އެއްގޮތް ވާންޖެހޭނެ. ތަރައްޤީގެ ވިސްނުމުގައި، އެ ކައުންސިލްތައް ހޮވިފައިވަނީ، ރައްޔިތުންނަށް ޚިދުމަތް ކުރަންކަން ހަނދާން ބަހައްޓަންޖެހޭ. ސަރުކާރަށް އެއްބާރުލުން ދިނުމަކީ، ކައުންސިލަށް ލާޒިމުކަމެއް. ވެރިކަން ހިންގުމުގެ ނިޒާމުގެ ތެރޭގައި ހިމެނޭ ބައެއް، ކައުންސިލްތަކަކީ. މުނިސިޕަލް ޚިދުމަތް ދިނުމުގެ މަސައްކަތް ހަވާލުވެފައި އޮންނަ ބައެއް.
އެހެންވީމާ، ކައުންސިލްތައްވެސް މަސައްކަތް ކުރަންޖެހޭނީ، ސަރުކާރުން ކަނޑައަޅާފައިވާ ސިޔާސަތުތައް ތަންފީޒުކުރެވޭ ގޮތަށް. ސަރުކާރުން ބަޖެޓް ފާސްކޮށްފައި، ބަޖެޓް ދިނީމާ، އެ ބަޖެޓް ޚަރަދުކުރަންޖެހޭނެ. ޒިންމާދާރުކޮށް ޚަރަދުކުރަންޖެހޭނެ. އަޅުގަނޑަށް މިއަދު ލިބުނު ހިސާބު، ފިނޭންސް މިނިސްޓަރ ދެއްވި ހިސާބަކީ، ގާތްގަނޑަކަށް 2.2 ބިލިއަން ރުފިޔާ، ބްލޮކް ގްރާންޓްގެ ގޮތުގައި، މިދިޔަ އަހަރު ރާއްޖޭގެ ހުރިހާ ކައުންސިލަކަށް ފިނޭންސް މިނިސްޓްރީން ދޫކުރި. 2.2 ބިލިއަން ރުފިޔާ. އުޞޫލެއްގެ މަތިން، ކޮންމެ ކައުންސިލެއްވެސް، އެ ކައުންސިލަކަށް ދިފައިވާ ބްލޮކް ގްރާންޓް ހޭދަކުރަންޖެހޭނެ، ރައްޔިތުންނަށް ޚިދުމަތް ކުރުމަށް، މުނިސިޕަލް ޚިދުމަތް ދޭން. އަހަރު ނިމުނުއިރުގައި ހޭދަނުކޮށް، ރާއްޖޭގެ ހުރިހާ ކައުންސިލްތަކެއްގެ އެކައުންޓުގައި ބާކީ އެބަހުއްޓޭ، 1.4 ބިލިއަން ރުފިޔާ ބަހައްޓާފައި. 2.2 ބިލިއަން ދިނީ، އަހަރު ނިމުނުއިރުގައި ޚަރަދުނުކޮށް ބާކީ އެބަހުރި، ހުރިހާ ކައުންސިލެއްގެ އެކައުންޓް އެއްކޮށްލީމާ، 1.4 ބިލިއަން. މި ފައިސާ މި ދެނީ، މިއީ ބްލޮކް ގްރާންޓް، މި ފައިސާ ކައުންސިލްތަކަށް މި ދެނީ ޚިދުމަތްތައް ފޯރުކޮށްދޭން. މުނިސިޕަލް ޚިދުމަތް ކުރަން މިދެނީ. އެހެންވީމާ، އެ ފައިސާ ޚަރަދުކުރުމަކީ، ކައުންސިލަށް ލާޒިމު ކަމެއް، ރައްޔިތުންނަށް ކަންކަން ކޮށްދޭން. މަގުމަތީގެ އެކިކަހަލަ ކަންތައް، ދެންގޮސް، ޖުމްލަކޮށް ޤާނޫނުގައި ބުނާ މުނިސިޕަލް ހުރިހާ ކަމެއް ކުރަން. އެ ރަށަކަށް އެ ދޫކުރާ ބަޖެޓުން އެންމެ ފެންވަރު ރަނގަޅުކޮށް ކުރެވެން ހުރި އެންމެ ރަނގަޅަކަށް ކުރުމަށް ފައިސާ ދޫކުރަނީ. އެކަމަކު އަހަރު ނިމުނުއިރު މިހިރީ، މީގެ ދެބައިކުޅަ އެއްބައި ހޭދަނުކޮށް. ދެން މިއިން، ބައެއް ރަށްރަށުގެ ކައުންސިލްތައް ހަމަ އޮތްގޮތަށް، މިދަނީ ތަޖުރިބާ ދަތުރުގައި. މިއަދު އެހެން ޖަލްސާއެއްގައި އަޅުގަނޑު މި ވާހަކަ ދެންނެވިން. ތަޖުރިބާގެ ދަތުރު ކިޔާފައި މިދަނީ، ރާއްޖެއިން ބޭރުގެ އެހެން ޤައުމަކަށް. ރާއްޖޭގެ މި ކައުންސިލް މާޙައުލަށް، ރައްޔިތުންނަށް ފައިދާވާ ކަހަލަ އެއްވެސް ކަމެއް ތަޖުރިބާ ނުކުރެވޭނެ ކަހަލަ ޤައުމުތަކަށް، ތަޖުރިބާ ދަތުރުތަކުގައި. ހަމަ އެއްކަލަ ފައިސާ ޚަރަދުކޮށްފައި. ނޫނީވިއްޔާ، އެކަހަލަ ބޭކާރު ބައެއް ޚަރަދު. މިހެން ނަހައްދަވާ! މިހެން ނަހައްދަވާ! ރައްޔިތުންނަށް ޚަރަދުކުރުމަށް މި ދޫކުރާ ފައިސާ، ޒިންމާދާރުކަމާއެކީގައި، ބޭނުންކުރަން އެބަޖެހޭ. ބަޖެޓް ފާސްކޮށްފައި، ބަޖެޓުން މި ދޫކުރާ ފައިސާއަކީ، ޤާނޫނީގޮތުން ކައުންސިލްތަކަށް ދޫކުރާ އެއްޗެއް. އެ ފައިސާ ޖެހޭނެ ޚަރަދުކުރަން، ކައުންސިލްތަކުން ރައްޔިތުންނަށް ޚިދުމަތްކުރަން. މި ބާކީކޮށްގެން ވާ ފައިދާއެއް ނެތޭ. އެ އިންވެސްޓެއްވެސް ކުރަނީކީނޫން ރައްޔިތުންނަށް ފައިދާވާ ގޮތަކަށް. ކަމަކަށް އިންވެސްޓް ކުރާ ނަމަވެސް ރަނގަޅު.
އެހެންވީމާ، މިކަހަލަ ކަންކަން އެބަޖެހޭ ރައްޔިތުން ދެނެގަންނަން. ރައްޔިތުންގެ ވިސްނުމަށް އަޅުގަނޑު މިކަން މި ދަންނަވާލީ. ވިސްނައިވަޑައިގަތުމަށް. ކައުންސިލްތަކުން މިކަމަށް ވިސްނައިވަޑައިގަތުމަށް އަޅުގަނޑު މި ވާހަކަ މި ދެންނެވީ. މި އަހަރުވެސް ޓްރެންޑް މިގޮތަށް އަދި ކޮންޓިނިއު ވަނީ. މި އޮގަސްޓަށް މިއައީ. މިހާރުވެސް، މި އަހަރަށް ދޫކުރި ބްލޮކް ގްރާންޓުގެ ތެރެއިންވެސް، ފުދޭވަރެއްގެ ބޮޑު އިންސައްތައެއް ހަމަ ސޭވްކުރަމުން އަންނަނީ. އެކަމަކު ކުރަން އުޅޭ ކަމެއް ބަޔާނެއްނުކުރޭ. އެ ސޭވްކުރުމުގެ ބޭނުމެއް އޮންނަންވާނެ ދޮގެއްތޯ. އެހެންވީމާ، އެއީއެއްނޫން އެކަން ކުރަންޖެހޭނެ ގޮތަކީ. ރައްޔިތުންނަށް ފައިދާވާގޮތަށް ކަންކަން ކުރަންޖެހޭނީ.
ލާމަރުކަޒީ ޤާނޫނަކީ އަޅުގަނޑަށް ވަރަށް ފަރިތަ އެއްޗެއް. އަޅުގަނޑުވެސް މިއީ ކައުންސިލެއް ހިންގަން، މާލޭގެ ކައުންސިލް ހިންގަން އަޅުގަނޑާ ރައްޔިތުން ހަވާލުކުރި. އެހެންވީމާ، އަޅުގަނޑަށް ވަރަށް ފަރިތަ، ލާމަރުކަޒީ ޤާނޫނު. އެ ޤާނޫނުގެ އެއް ޗެޕްޓަރ އޮންނާނެ، އާންމު ޚިދުމަތްތައް. ކަރަންޓް، ފެން، ދެން މިހެންގޮސް ކުނި، މި އެއްޗެހި މެނޭޖްކުރުމުގެ ކަންކަމަކީ، ޙަޤީޤަތުގައި ކައުންސިލްގެ ވާޖިބެއް. ދެން، ކައުންސިލުން ނުކުރަންޏާ، ނޫނީވިއްޔާ ސަރުކާރުން ކަނޑައަޅާފައި އޮންނަ ސިޔާސަތަކުންވެސް، މިސާލަކަށް، އެންމެ ގިނައިން މި އޮންނަނީ ފެނަކަ. ތަރޑް ޕާޓީއަކަށް ފެނަކަ ވާނީ. ވާއިރުގައި ކައުންސިލުން ޖެހޭނެ އެގްރިމަންޓެއް ހަދައިގެން، ފެނަކަ ލައްވައި، ނޫނީވިއްޔާ ސްޓެލްކޯވިޔަސް، އެމް.ޑަބްލިޔު.އެސް.ސީ.ވިޔަސް، އެބަޔަކު ލައްވައި މި ފެނާއި، ކަރަންޓާއި، ނަރުދަމާގެ ޚިދުމަތް ދޭން. މާނައަކީ، ކައުންސިލްގެ ޒިންމާ އޮތް ކަމެކޭ މިއީ. އެއްކަލަ ބްލޮކް ގްރާންޓް ސޭވްކޮށްފައި، މި ބެހެއްޓުމުގެ ބޭނުމެއް ނެތެއްނޫންތޯ. މިސާލަކަށް ދަންނަވަންޏާ، އެ ސޭވްކުރި ފައިސާއިން، ޤާނޫނީގޮތުން ކައުންސިލަށް މި ޒިންމާވާ، އާންމު ޚިދުމަތް ދިނުމަށްޓަކައި، އިންޖީނުގެތަކަށް ހޭދަކުރާނަމަވެސް އެންމެ ރަނގަޅު ނޫންތޯ. އެހެންވީމާ، ވަރަށް ސާފުކޮށް ޤާނޫނު އޮއްވައި، ޤާނޫނު އެއްފަރާތް ކޮށްފައި، މި ޚަރަދުތައް ނުކޮށް، މި ޒިންމާ އަދާނުކޮށް، ބައެއް ކައުންސިލްތަކުން މިކުރާ ކަންކަމަކީ، އެއްގޮތަކަށްވެސް ޒިންމާދާރު ކަންކަމެއްނޫން.
އެހެންވީމާ، އަޅުގަނޑު މިކަން މިއަދު މި ފާހަގަކޮށްލީ، ކުރިއަށް އޮތް ދުވަސްތަކުގައިވެސް ކައުންސިލްތަކުން، އެ ކައުންސިލްތަކުގެ ޒިންމާތައް، ޤާނޫނުގައި ވަރަށް ސާފުކޮށް ބަޔާންކޮށްފައި އޮތްގޮތަށް، ކުރުމަށް ހިތްވަރު ދިނުމުގެ ގޮތުން. އެގޮތަށް ކަންކަން ކުރާނަމަ ވަރަށް ރަނގަޅުވާނެ. އާދެ، އަޅުގަނޑު މި ވާހަކަ ދަންނަވާލާފައި، އަޅުގަނޑު ނިންމާލަން ގަސްދުކުރަން.
އަޅުގަނޑު އެދެނީ، ރާއްޖޭގެ ތަރައްޤީއަށްޓަކައި ކުރެވޭ މަސައްކަތްތަކުގައި، އެންމެންވެސް އެއް ވާހަކައެއް ދައްކަން. އެއްގޮތަކަށް ވާހަކަ ދައްކަން. ޚިޔާލު ތަފާތުވާ ކަންކަމުގައިވެސް ޤައުމީ ވިސްނުން އިސްކުރަން. ރައްޔިތުން އިސްކުރަން. ޤައުމު އިސްކުރަން. ޤައުމު އިސްކޮށްގެން މަސައްކަތް ކުރާނަމަ، އެއިން ނުކުންނާނީ، ހެޔޮ ނަތީޖާ. ސަރުކާރުން މަސައްކަތް ކުރަމުންދާނީ، މި ސަރުކާރު މަސައްކަތް ކުރާނީ، ހަމަ ޔަޤީނުންވެސް ރައްޔިތުންގެ ފަޅީގައި އޮވެގެން. ރައްޔިތުން އަޅުގަނޑަށް މުހިންމީ. ކޮންމެ ރައްޔިތަކުވެސް އަޅުގަނޑަށް ހަމަހަމަ. އެހެންވީމާ، ރައްޔިތުން ގާތަށް ސަރުކާރުގެ ވަޒީރުންނާއި، ކުނފުނިތަކުގެ ވެރިންނާ އެކީގައި. ދާއިރާތަކުގެ މަޖިލިސް މެންބަރުންނާ އެކީގައި އަޅުގަނޑު މި އަންނަނީ، ރައްޔިތުން ކައިރީގައި ކަންކަން އަހައިގެން، އޮޅުންފިލުވައިގެން، ރައްޔިތުން ބޭނުންވާ ކަންކަން އަޅުގަނޑުމެންނަށް ފޯރުކޮށްދީގެން، ރައްޔިތުންގެ ފަޅީގައި އޮވެގެން، ރައްޔިތުންނަށްޓަކައި ޚިދުމަތް ކުރުމަށް. އެހެންވީމާ، އެގޮތަށް މި މަސައްކަތް ކުރުމުން ނުކުންނަ ނަތީޖާ މާ ރަނގަޅުވާނެ.
އާދެ، އަދިވެސް އެއްފަހަރު، އޭދަފުށީގެ ލޮބުވެތި ރައްޔިތުންނަށް ވަރަށް ބޮޑަށް ޝުކުރު ދަންނަވަން. ތިޔަބޭފުޅުން ތިޔަ ދެއްވާ ތަރުޙީބަށާއި، ދެއްވާ ތާއީދަށާއި، ދެއްވާ އެއްބާރުލެއްވުމަށް. މި ރަށުގެ ތަރައްޤީއަކީ، ސަރުކާރުގެ ސިޔާސަތުގައި ވަރަށް މުހިންމު މަގާމެއް ހާސިލުކޮށްފައިވާ ކަމެއް. އެއީ، މުޅި ރާއްޖޭގެ ތަރައްޤީގެ ސިޔާސަތުގައި، އަޅުގަނޑުމެންނަށް އެކަން މުހިންމު ކަމުގައި އަޅުގަނޑަށް ފުރިހަމައަށް ގަބޫލުކުރެވޭތީ، އެކަން އެގޮތަށް ކުރަން ނިންމާފައިވާ ކަމެއް. އެހެންވީމާ، އިރާދަކުރެއްވިއްޔާ އެގޮތަށް އަޅުގަނޑުމެން ކުރިޔަށް ގެންދާނަން ތިޔަބޭފުޅުންގެ ފުރިހަމަ އެއްބާރުލެއްވުމާ އެކީގައި.
އާދެ، އަޅުގަނޑުގެ ދުޢާއަކީ، އަޅުގަނޑުމެން މިކުރާ މަސައްކަތްތަކުގައި، اللهُ سُبْحَانَهُ وَتَعَالَى ބަރަކާތް ލެއްވުން. ރާއްޖޭގެ ތަރައްޤީ ފުރިހަމަގޮތުގައި ހާސިލުކޮށްދިނުމުގައި އަޅުގަނޑުމެންނަށް ހެޔޮތައުފީޤު މިންވަރު ކުރައްވާށި! އާމީން.
وَمَا تَوْفِيقِي إِلَّا بِاللَّهِ عَلَيْهِ تَوَكَّلْتُ وَإِلَيْهِ أُنِيبُ.
وَالسَّلَامُ عَلَيْكُمْ وَرَحْمَةُ اللهِ وَبَرَكَاتُه.