بِسْمِ ٱللّٰهِ ٱلرَّحْمٰنِ ٱلرَّحِيمِ
اَلْحَمْدُ للَّهِ رَبِّ الْعاَلَمِينْ، وَالصَّلاَة وَالسَّلاَمُ عَلَى رَسُولِ ٱللَّهِ، وَعَلَى آلهِ وَصَحْبِهِ أَجْمَعِينْ.
ކެންދޫގެ ލޮބުވެތި ހުރިހާ ރައްޔިތުން، ކައުންސިލްގެ ރައީސް، ރަށުގެ ހުރިހާ މުއައްސަސާތަކުގެ ވެރިން، ރަށުގެ ޚިދުމަތްތެރި އިސް ރަށްވެހިން، ވަޑައިގެން ތިއްބެވި އެންމެހައި ޢިއްޒަތްތެރިން، މި ޖަލްސާ އަޑުއައްސަވަމުން ގެންދަވާ އަދި ބައްލަވަމުން ގެންދަވާ ލޮބުވެތި އެންމެހައި ރައްޔިތުން؛
السَّلامُ عَلَيْكُم ورَحْمَةُ اللهِ وَبَرَكاتُهُ.
އާދެ، ތިޔަބޭފުޅުން ވަޑައިގެން، އަޅުގަނޑުމެންނަށް ވިދާޅުވި ހޫނު މަރުޙަބާއަށްޓަކައި، ކެންދޫގެ ލޮބުވެތި ހުރިހާ ރައްޔިތުންނަށް، އަޅުގަނޑުގެ ހިތުގެ އެންމެ ފުންމިނުން ޝުކުރު ދަންނަވަން. ވަރަށް ބޮޑަށް ޝުކުރިއްޔާ!
މި ރަށަށް މި އާދެވުނީ، ޖައްސަޖައްސައިގެން ތިންވަނަ އަހަރު. ފުރަތަމަ 2023ގައި ރިޔާސީ އިންތިޚާބުގެ ކެމްޕެއިންގައި، ދެން މިދިޔަ އަހަރު، ދެން މި އަހަރު. މި އަހަރުގެ މި ދަތުރުގައި މީގެކުރިންދިޔަ ދެފަހަރު ކުރެވުނު ދަތުރުގެ ނަތީޖާގެ ކުރިއެރުން، އިރާދަކުރެއްވިއްޔާ އަޅުގަނޑުމެން މި ފޯރުކޮށްދެނީ. މިއަދު ދެންމެ، އަޅުގަނޑުމެން ތިން މަޝްރޫޢެއް އެކުގައި، އެއް އެގްރިމަންޓެއްގައި މި ސޮއިކުރީ. އަޅުގަނޑު ރިޔާސީ އިންތިޚާބުގައި އޭރުގައި ވީ ވަޢުދުތަކުގެ ތެރޭގައި ހިމެނޭ ތިން ކަމެއް. ބިން ހިއްކުމާއި، ބަނދަރުގެ މަޝްރޫޢާއި، އަދި ގޮނޑުދޮށް ހިމާޔަތްކުރުމުގެ މަސައްކަތް. މި ތިން މަސައްކަތް ކުރުމަށް އަޅުގަނޑުމެން މިއަދު މި ހަވާލުކުރީ. އިރާދަކުރެއްވިއްޔާ މިއަދު މި ސޮއިކުރެވުނު ގޮތަށް، ވަރަށް އިސްކަންދެވިގެން، އެ މަސައްކަތްތައް ޢަމަލީގޮތުން ކުރެވިގެންދާނެ. އަދި އޭގެ ހެޔޮ ނަތީޖާ، ތިޔަބޭފުޅުންނަށް ފެނިގެންދާނެ. އެކަމަށްޓަކައި ތިޔަބޭފުޅުންނަށް އަޅުގަނޑު ވަރަށް ބޮޑަށް މަރުޙަބާ ދަންނަވަން.
ހަމައެއާއެކީގައި، ނިންމައި، މިއަދު މި ހުޅުވިގެން މިދަނީ މި ރަށަށް ވަރަށް މުހިންމު ޚިދުމަތްތަކެއް. އެއީ، ފެނާއި ނަރުދަމާގެ ޚިދުމަތް. އެކަމަށްޓަކައިވެސް ތިޔަބޭފުޅުންނަށް މި މުނާސަބަތުގައި މަރުޙަބާ ދަންނަވަން.
އަޅުގަނޑުމެން ރިޔާސީ އިންތިޚާބުގައި ވީ ވަޢުދެއް ފުއްދުމަށް މިހާރު ސޮއިވެސް ކޮށްފިން. ފެނާއި ނަރުދަމާ ނިމުނީމަ ކުރެވޭނެ ކަމެއް އެއީ، މަގު ހެދުން. އަޅުގަނޑު ވަޢުދުވެފައި އޮތް ކަމެއް. އެކަން ކުރުމަށްޓަކައި ސޮއިކުރުމަށް ތައްޔާރުވަމުން މިދަނީ. މިހާރު އެކަމުގެ ޓެންޑަރިންގ ޕްރޮސެސް އެބަ ކުރިޔަށްދޭ. އެ މަސައްކަތްވެސް ޢަމަލީގޮތުން ފެށުމަށްޓަކައި އަޅުގަނޑުމެން ވަރަށް އަވަހަށް ސޮއިކުރާނަން. ސޮއިކޮށްގެން، އެ މަސައްކަތްވެސް ކުރިޔަށްދާނެ ކަމުގެ ޔަޤީންކަން ދެން.
ދެން، ބިން ހިއްކައި ނިމުނީމަ ކުރަންހުރި ކަންކަންވެސް އަދި ހުންނާނެ، މި ރަށަށް ވަރަށް މުހިންމު. އަޅުގަނޑު ވަޢުދުވެފައި އޮންނާނެ ގެދޮރުގެ މައްސަލަ ޙައްލުކުރަން. އެހެންވީމާ، އެއީ އަދި ކުރިޔަށް އޮތް ކަމެއް. އަޅުގަނޑުމެން މި އަންނަ އަހަރަށްވެސް ވަރަށް މުހިންމު އިސްކަމެއްދީގެން ބަޖެޓް ހަދާއިރުގައި، މިގޮތަށް ހުންނަ ގެދޮރުގެ މައްސަލަތަކަށް، ޚާއްޞަކޮށް، އަޅުގަނޑު ވަޢުދުވެފައި ހުރި ގެދޮރުގެ މައްސަލަތައް ޙައްލުކުރަން، ބަޖެޓުގައި ހިމަނަން އެބަ. އާ މަޝްރޫޢުތައް. އެހެންވީމާ، އިރާދަކުރެއްވިއްޔާ، އަޅުގަނޑު އެ ވަޢުދުވެސް، ތިޔަބޭފުޅުންނަށް ފުއްދައިދޭނެ ކަމުގެ ޔަޤީންކަން އަރުވަން.
އަޅުގަނޑު ވަޢުދުވިން، އޭ.ޓީ.އެމް.ގެ ޚިދުމަތް ޤާާއިމުކޮށްދޭނެ ކަމަށް. އެއީ ދެން، މިއަދު މި އަތޮޅުގެ ހުރިހާ ރަށެއްގައި މި ދަތުރުގައި އެ ޚިދުމަތް އެބަ ހުޅުވޭ. މި އަހަރު ތެރޭގައި ހުރިހާ ރަށެއްގައި އޭ.ޓީ.އެމް. ޚިދުމަތް ހުޅުވިގެން އެބަދޭ. އެހެންވީމާ، އެ ވަޢުދުވެސް އެ ފުދިގެންދަނީ.
ހަމައެއާއެކީގައި، ދެންހުރި ވަޢުދުތައްވެސް. ޞިއްޙީ ދާއިރާއިންވެސް އަޅުގަނޑު ވަޢުދުތަކެއްވިން. އަދި ތަޢުލީމީ ދާއިރާއިންވެސް. ޚާއްޞަކޮށް، ކުޅިވަރުގެ ދާއިރާއިން.
މިއީ، ވަރަށް ގިނަ ޒުވާނުން ދިރިއުޅޭ ރަށެއް. ކުޅިވަރުގެ ކަންކަމުން، ނޫނީވިއްޔާ ފެސިލިޓީޒްތަކުން، ވަސީލަތްތަކުން މި ރަށުގެ ރައްޔިތުން، ޒުވާނުން ފުދޭވަރަކަށް ބޮޑަށް މަޙުރޫމްވެފައިވާ ތަން އަޅުގަނޑަށް ފެނޭ. އެހެންވީމާ، ރިޔާސީ އިންތިޚާބުގައި އަޅުގަނޑު ޖުމްލަކޮށް ވަޢުދުވިން، ޒުވާނުންނަށް ބޭނުންވާ ކުޅިވަރުގެ ވަސީލަތްތައް ޤާއިމުކޮށްދޭނެ ކަމަށް. އެހާވެސް މުހިންމު ކަމެއްވީމާ، އަޅުގަނޑުމެން 2023ގެ ޑިސެންބަރުގައި، އެއް މަޝްރޫޢުގައި ސޮއިކުރިން. ދެން، މިދިޔައީ ވަރަށް ދުވަސް. އެހެންނަމަވެސް، މިނިސްޓްރީއަށް ބޭނުންވާ ބިން ލިބުމުގައި، ލިބުނު ތަނުގެ ގޮތުން، އެ ތަނުގައި އިމާރާތެއް ހުރެ، މިކަހަލަ ވަރަށް ގިނަ ކަންތައްތައް ވެގެން، އެ މަސައްކަތް ނުފެށި ވަރަށް ދުވަސްވެގެންދިޔަ. މިނިސްޓްރީއަށް އެކަހަލަ ހުރަހެއް ނެތްގޮތަށް، އިމާރާތެއް ނެތްގޮތަށް ބިމެއް އެ ދުވަހުވެސް ދިންނަމަ، އަޅުގަނޑަށް ހަމަ ޔަޤީން، މިދިޔަ އަހަރު ތެރޭގައި އެ މަޝްރޫޢު ނިންމޭނެ. ދެން އެހެންނަމަވެސް، މިހާރު ކުރިޔަށް ދެވޭގޮތްވެފައި ވަނީ.
ދެންވެސް، ފުޓްބޯޅަ ދަނޑާ ގުޅިފައި ހުރި ވަޢުދުތަކެއް އަޅުގަނޑު ވެފައި އޮންނާނީ. ފުޓްބޯޅަ ދަނޑާބެހޭ ވަޢުދުތަކެއްވީން. އެ ކަންކަމާއި، ފިޓްނަސް އެންޑް ރިކްރިއޭޝަން ސެންޓަރު އެޅުމުގެ މަސައްކަތްތަކާއި، އައުޓްޑޯ ޖިމާއި، މިއީ ހުސް އަޅުގަނޑު ކުރަން ނިންމާފައި ހުރި ކަންތައްތައް. މި ދެންނެވި، ކުޅިވަރާ ބެހޭ ހުރިހާ ކަންކަން، އަޅުގަނޑުމެން މިކަންކަން މިހާރު ޢަމަލީގޮތުން ފެށުމަށްޓަކައި، ސަރުކާރުގެ އެކި ކުންފުނިތަކާ ހަވާލުކުރުމުގެ ކަންކަން ނިމިފައި އެވަނީ. ކެންދޫގެ ލޮބުވެތި ރައްޔިތުންނަށް ބޭނުންވާ، ކުޅިވަރުގެ އެކިއެކި ވަސީލަތްތައް، މި ދެންނެވި ކަހަލަ ހުރިހާ ކޯޓުތަކެއް، މި ރަށުގައި ޤާއިމުކުރުމުގެ ޢަމަލީ މަސައްކަތް، މި އަހަރު ތެރޭގައި ދާދި އަވަހަށް އަޅުގަނޑުމެން ފަށާނެކަމުގެ ޔަޤީންކަން ތިޔަބޭފުޅުންނަށް އަރުވަން.
މިދިޔަ ދުވަސްތަކުގައި މި ދިމާވި ހުރަސްތައް، ދެން ދިމާނުވާނެ ކަމަށް އަޅުގަނޑު ދެކެން. އެކި ސަބަބުތަކާހެދި ހުރަސްތައް ދިމާވެއްޖެ. ދެން އެ ތަފްޞީލަށް އަޅުގަނޑު ދިޔުމަކީ، އަޅުގަނޑު ގަބޫލުކުރާ ގޮތުގައި، އަޅުގަނޑު ކޮންމެހެން ނުދިޔަޔަސް، ތިޔަބޭފުޅުންނަށް ވިސްނިވަޑައިގަންނަވާނެ ކަންކަން. އަޅުގަނޑު ޔަޤީންކުރަނީ، ރައްޔިތުންނަށް ބޭނުންވާ ކަންކަމުގައި، ހުރިހާ އެންމެންވެސް އެކައްޗެއް ކިޔަންޖެހޭނެ ކަމަށް. އަދި އެގޮތަށް ކުރިޔަށް އޮތް ތާނގައި ހުރިހާ އެންމެންވެސް އެއް ވާހަކައެއް، އެއްގޮތަކަށް ދައްކާނެ ކަމަށް. އެގޮތަށް ވާހަކަ ދެކެވޭނަމަ، ނޫނީވިއްޔާ އެއްބާރުލުން ލިބޭނަމަ، އަޅުގަނޑު ރައްޔިތުންނަށްޓަކައި ވީ ވަޢުދުތައް ފުއްދުމުގައި، ވަރަށް ބާރު ސްޕީޑްގައި ކަންކަން ގެންދެވޭނެ. ބައެއް ރަށްރަށުގައި، ވަރަށް ފަސޭހައިން މިކަހަލަ ކަންކަން ވެފައި އެބަހުރި. ބިންތައް ވަރަށް ފަސޭހައިން ލިބޭ. އިމާރާތް ކުރަން ލިބޭ ބިން. ދަނޑު ހައްދަން ބިން ލިބޭ. ލިބޭއިރުގައި އޮންނަނީ ހުސްކޮށް. އެހެންނަމަވެސް، ބައެއް ރަށްރަށުގައި މިވަނީ އެހެންނެއްނޫން. އެކަހަލަ ބައެއް ކަންކަން އެބަވޭ. މަޝްރޫޢުތައް ހިންގަން ބައެއްފަހަރު މި އޮންނަނީ، ކައުންސިލާ ފައިސާ ހަވާލުކުރާގޮތަށް، ބައެއް މަޝްރޫޢުތައް ޑިޒައިން ކުރެވިފައި. ފައިސާ ދިނީމާ، ބައެއް ރަށްރަށުގެ ކައުންސިލްތަކުން ވަރަށް ބާރަށް މަސައްކަތް ކުރިޔަށް ގެންދޭ. އަދި ބައެއް ރަށްރަށުގައި އެ މަސައްކަތްތައް ކުރިއަކަށްނުދޭ. ތަފާތުތަކެއް އެބަހުރި، އެކި ރަށްރަށުގައި އެކިގޮތަށް.
އެހެންވީމާ، އަޅުގަނޑު އުންމީދުކުރަނީ، ހުރިހާ ރަށެއްގައިވެސް، މިގޮތަށް ހުންނަ ކަންކަން، ރައްޔިތުންނަށްޓަކައި އެންމެން ގުޅިގެން، އެއްބާރުމިނެއްގައި، އެއްވާނެއްގައި ކުރައްވާނެ ކަމަށް. އެގޮތަށްދާނަމަ ހަމަ ޔަޤީނުންވެސް މަސައްކަތްތައް ވަރަށް ފަސޭހައިން ކުރެވޭނެ.
އެހެންވީމާ، އެއީ އަޅުގަނޑު ވަރަށް އިލްތިމާސްކުރާ ކަމެއް. ހުރިހާ ރަށްރަށެއްގެވެސް ކައުންސިލްތަކުން އެގޮތަށް މަސައްކަތް ކުރުމުގައި އެއްބާރުލުން ދިނުމަށް. އިރާދަކުރެއްވިއްޔާ މި ރަށުގައިވެސް އަޅުގަނޑުމެން ކުރިއަށް އޮތްތަނުގައި، މި ދެންނެވި ގޮތަށް، ހުރިހާ ކަމެއް ގެންދާނަން. ދެންމެ ތިން މަޝްރޫޢު އެއްކޮށްލައިގެން ސޮއިކުރެވުނު މަޝްރޫޢާއި، އަދި މި ދެންނެވިހެން މަގުހެދުމުގެ މަސައްކަތްތަކާއި، އަދި ކުޅިވަރާ ގުޅިފައި ހުރި ހުރިހާ މަޝްރޫޢުތައް ކުރިއަށް ގެންދެވޭނެ. އަދި އެއާއެކީގައި، އިރާދަކުރެއްވިއްޔާ، އަޅުގަނޑުމެން ޞިއްޙީ ދާއިރާ ކުރިއެރުވުމަށްޓަކައި، އެއީ ވަސީލަތުގެ ގޮތުން، ހިއުމަން ރިސޯސަސް، އަދި އެކިކަހަލަ ވަސީލަތްތައް ފޯރުކޮށްދިނުމުގެ ގޮތުން އެބަހުރި، ކުރަން ބޭނުންވާ ކަންތައްތައް. އެ ކަންކަންވެސް ކުރިއަށް ގެންދަން އޮންނާނީ ނިންމާފައި. އަދި މި ރަށުގައި މަޑުޖެހިފައި ހުރި، އެކިކަހަލަ މައްސަލަތައް ދިމާވެފައި ހުރި ކަންކަން އެބަހުރި. މިސްކިތުގެ މަޝްރޫޢު ކަހަލަ. މިހެންހުރި ހުރިހާ ކަމެއް ކުރިއަށް ގެންދިޔުމުގައި ސަރުކާރުގެ ފުރިހަމަ އެއްބާރުލުން ލިބޭނެ.
އަޅުގަނޑުމެން ބޭނުންވަނީ، ކެންދޫގެ ރައްޔިތުންގެ ތަރައްޤީއަށް އަޅުގަނޑު ވެފައިހުރި ހުރިހާ ވަޢުދެއް، މި ރަށުގައި ވެފައިހުރި ހުރިހާ ވަޢުދެއް ފުރިހަމަކުރަން، އަޅުގަނޑު އެބައޮތް 10 ވަޢުދުވެފައި. ލިސްޓްކޮށްފައި މި ހުންނަނީ ވަޢުދުތައް. މި ހުރިހާ ވަޢުދެއް ފުރިހަމައަށް ތިޔަބޭފުޅުންނަށް ހާސިލުކޮށްދޭން އަޅުގަނޑު ބޭނުން. އަދި އެއަށްވުރެ ގިނަ ކަންކަންވެސް ކޮށްދޭން ބޭނުންވޭ.
އެހެންވީމާ، މިކަންކަން ކޮށްދިނުމުގައި އަޅުގަނޑުމެން ތިބޭނީ ރައްޔިތުންނާ އެކީގައި. އަޅުގަނޑު ރަށްރަށަށް މި އަންނަނީ ރައްޔިތުންނާ އެކީގައި، މަސައްކަތް ކުރުމުގެ ބޭނުމުގައި. އަޅުގަނޑު އެއްގޮތަކަށްވެސް ކުރާހިތްވާ ކަމެއްނޫން، މަޖުބޫރުކޮށްގެން، ކައުންސިލް މާލެ ގެންގޮސްގެން، ރައީސް އޮފީހުގެ ތެރޭގައި ބައިތިއްބާކަށް. އަޅުގަނޑާއި، ވަޒީރުންނާއި، އެމް.ޑީންނާ މި އަންނަނީ، ރައްޔިތުން ގާތަށް. ރައްޔިތުންގެ ގާތަށްއައިސް، ރައްޔިތުންނާ މިގޮތަށް ބައްދަލު މިކުރަނީ. ކައުންސިލާ ބައްދަލުކުރަނީ. ހުރިހާ މުއައްސަސާއަކާ އަޅުގަނޑުމެން އައިސް މި ބައްދަލުކުރަނީ. މިހާރު ބައެއް ރަށްރަށަށް ދެވަނަ ބުރަށް ގޮސް މި ބައްދަލުކުރަނީ.
އެހެންވީމާ، އަޅުގަނޑުމެންގެ އަދި އަޅުގަނޑުގެ ފަލްސަފާއަކީ، އަދި ގަބޫލުކުރާ ހަމައަކީވެސް ލާމަރުކަޒީކޮށް ރައްޔިތުންނަށް ޚިދުމަތް ދިނުން. ލާމަރުކަޒީކޮށް ޚިދުމަތްދިނުން އެއީ، އަޅުގަނޑު ހިތުގެ އަޑިން ފުރިހަމައަށް ގަބޫލުކުރާ ކަމެއް. އަދި އަޅުގަނޑު އެކަމުގައި، ވަރަށް ފުޅާ ދާއިރާއެއްގައި އުޅެފައި ހުރި ކަމެއް އެއީ މާލޭގައި. އެހެންވީމާ، އަޅުގަނޑަށް އެނގޭ، ލާމަރުކަޒީ ނިޒާމުގެ މުހިންމުކަމާއި، އޭގެ ފައިދާއާއި، އެކަން ކުރެވޭނެގޮތާއި، އެކަމުގައި ސަރުކާރުތަކުންވިޔަސް، އަދި އެކި ދިމަދިމާއިން ހުރަސްތައް ކުރިމަތިކުރާގޮތާއި، ކުރާ ހުރަސްތައް ގިރާކުރަން ކުރާނެ ކަންކަން. ދެން ލާމަރުކަޒީ ނިޒާމުގެ ހުރިހާ ދިމާއެއްގައި އުޅެވިފައި ހުރި މީހެއް އަޅުގަނޑަކީ. އެހެންވީމާ، ލާމަރުކަޒީ ނިޒާމުގެ ތެރެއިން، ކަންކަން ވާންވީގޮތް އަޅުގަނޑަށް ވަރަށް ރަނގަޅަށް އެނގޭ.
އަދި ބައެއް ކައުންސިލްތަކުން، ޒިންމާދާރުކަން ކުޑަކޮށް، ބްލޮކް ގްރާންޓްގެ ގޮތުގައިދޭ ފައިސާއާއި، އަދި އާމްދަނީގެ ގޮތުގައި، ހަމަ އެއޮންނަ އުސޫލުތެރެއިން ހޯދާ ފައިސާވެސް ބޭނުންކުރާގޮތް އެބަ ފެނޭ. އަޅުގަނޑަށް އެނގޭ. މިއީ މި ރަށާ ކޮންމެހެން ބެހޭކަމެއްނޫން. މި ރަށާ ގުޅުމެއްވެސް އޮތް ވާހަކައެއްނޫން. އެހެންނަމަވެސް، ރާއްޖޭގެ ހުރިހާ ރައްޔިތުން ބަލާ ޖަލްސާއެއްވީމާ ދަންނަވާލަނީ، މި މައުޟޫޢުގެ ތެރެއިން ވާހަކަ ދެއްކޭތީ. މުޅި ކައުންސިލް އޮތްގޮތަށް، ރަށު ކައުންސިލް އެކަންޏެއްނޫނޭ، އަތޮޅު ކައުންސިލްތައްވެސް. މުޅި ކައުންސިލް އޮތްގޮތަށް ތަޖުރިބާގެ ދަތުރު ކިޔާފައި، އެއްވެސް ރަށެއްގެ ރައްޔިތަކަށް، ނޫނީ އަތޮޅަކަށް ފައިދާނުވާނެ، ފައިދާއެއް ނުހޯދޭނެ ތަންތަނަށް، ޤައުމުތަކަށް ބައެއް ކައުންސިލްތަކުން އެބަދޭ، ބްލޮކް ގްރާންޓްގެ ގޮތުގައި މިދޭ ފައިސާ ބޭނުންކޮށްގެން. ނޫނީ އާމްދަނީގެ ގޮތުގައި، ތިޔަ ހޯއްދަވާ ފައިސާ ބޭނުންކޮށްގެން. އެއީ ޒިންމާދާރު ގޮތެއްނޫން.
ކައުންސިލްތަކަށް ބްލޮކް ގްރާންޓް މި ދެނީ، އަދި ޤާނޫނުން އެ ފުރުޞަތުދީގެން، އާމްދަނީ ހޯދަން ފުރުޞަތު މިދެނީ، ރަށުގައި ކުރަން ހުންނަ މުނިސިޕަލް ޚިދުމަތް ކުރަން. އަދި ރަށަށް ބޭނުންވާ ކަންކަމަށް އިންވެސްޓް ކުރުމަށާއި، އެކި ކަންކަމަށް އާމްދަނީ ހޯދަން. މުޅި ޓީމު އޮތްގޮތަށް އެކި ޤައުމުތަކަށް އެބަދޭ މިހާރުވެސް. މިއަދުވެސް އަޅުގަނޑު ނޫހުން ކިޔިން އިނގޭތޯ. ތިޔަބޭފުޅުންވެސް ނޫސް ބައްލަވައިލެއްވީމާ ފެނިވަޑައިގަންނަވާނެ. މިއަދުގެ ހެޑްލައިނެއްގައިވެސް އެބައޮތް، ކޮންމެވެސް އަތޮޅެއްގެ އަތޮޅު ކައުންސިލް، މުޅި އަތޮޅު ކައުންސިލް އޮތްގޮތަށް ބޭރަށް ވަޑައިގެންފި، ތަޖުރިބާ ހޯއްދަވަން. ދެން ކީއްކުރަންތޯ؟ މިހާރު ދައުރު މި ނިމެނީ. އަޅުގަނޑު ދެކޭގޮތުގައި، ދެން ތަޖުރިބާ ކުރިން ހޯއްދަވައިގެން ތިއްބަވަންވާނީ.
އެހެންވީމާ، މިކަހަލަ ކަންތަކެއްނޫން ކައުންސިލްތަކުން ކުރާނީކީ. ލާމަރުކަޒީ ނިޒާމަކީ އެއަށްވުރެ މާ ސީރިއަސް ނިޒާމެއް. ރައްޔިތުންނަށް ވަރަށް މުހިންމު ނިޒާމެއް. އެ ނިޒާމުގެ ތެރެއިން، ކަންކަން ކުރަންވާނީ އިޚްލާޞްތެރިކޮށް، ޒިންމާދާރުކޮށް. ކޮންމެ ޕާޓީއަކުން އިންތިޚާބުވެފައި ހުއްޓަސް، ރައްޔިތުންނަށް ހަމަހަމަކަމާ އެކީގައި، އެ އޮންނަ ސަރުކާރަކާ އެކީގައި، ޕްރޮފެޝަނަލްކޮށް މަސައްކަތް ކުރަންޖެހޭނެ. ލިބޭ ފައިސާއެއް ޒިންމާދާރުކަމާ އެކީގައި ބޭނުންކުރަންޖެހޭނެ. ޤާނޫނުގައި އަކުރުން ހާއިން ގޮސް ޗަވިޔަންޏާ ހަމައަށޭވެސް ދެންނެވިދާނެ. ވަރަށް ގިނަ އަކުރުތައް އެހުރީ، ކައުންސިލްގެ ޒިންމާތައް ބަޔާންކޮށްފައި. ބާރުތަކާއި ޒިންމާތައް. އެކަންކަން ކުރަން ފައިސާ ޚަރަދުކުރަންޖެހޭނީ. އެ ކަންކަން ނުކުރާ އެތައް ކައުންސިލެއް އެބަހުރި. ބޭކާރުގޮތުގައި އެކިއެކި ކަންކަން ކުރަމުންދަނީ.
އެހެންވީމާ، މިކަންކަން ހަމަމަގަށް އެޅުވުމަކީ، މިކަންކަމަށް ނުގަވާއިދުން ފައިސާ ބޭނުންކުރުމަށް އޮންނަ މަގުތައް ބަންދުކޮށް، ސީދާ ރައްޔިތުން ބާރުވެރިކުރުވުމަކީ، ޙަޤީޤަތުގައި ލާމަރުކަޒީ ނިޒާމު ޗެމްޕިއަން ކުރުމަކީ. އެހެންވީމާ، ބައެއް ކައުންސިލްތަކުން ލޯކަލް އޮތޯރިޓީ ކުންފުނިތައް ހަދައިގެން، ބައެއް ރަށްރަށުގައި ކުދިކުދި ވިޔަފާރިތައް، އާންމު ރައްޔިތުން ކުރަމުންދާ ވިޔަފާރިތަކަށް، އެ ކުންފުނިތަކުން ވަންނަ ވަނުން ހުއްޓުވަންވެސް އަޅުގަނޑުމެން މި އުޅެނީ. ރައްޔިތުން ބާރުވެރިކުރުވަން. ކިހިނެއް މިވަނީ؟ ކައުންސިލުން ލޯކަލް އޮތޯރިޓީ ކުންފުނި ހަދައިގެން، އެއްކަލަ އާންމު ރައްޔިތުން ކުރާ ވިޔަފާރީގެ ތެރެއަށްވަނީމަ، ކިހިނެއް އެ ރައްޔިތުންނަށް ވާނީ؟ އެ ރައްޔިތުންގެ ވިޔަފާރި ގެއްލޭނީ.
އެހެންވީމާ، އާންމު ރައްޔިތުން ރަށުގައި ކުރާ ވިޔަފާރީގެ ތެރެއަށް، ކައުންސިލްގެ ކުންފުނި ނުވަންނަގޮތަށް މި ބަދަލުކުރަނީ. އެއަށްވުރެ ފުޅާ، ބޮޑެތި ވިޔަފާރިތައް، ކައުންސިލް ކުންފުނިން ކުރަންވީ. އެއީ، މި ގެނައި އިޞްލާޙަކީ. އާންމު ރައްޔިތުން ކުރާ ކުދިކުދި ސްމޯލް، މީޑިއަމް ކުންފުނިތަކުން ކުރާ، އެސް.އެމް.އީ.ތަކުން ކުރާ ވިޔަފާރީގެ ތެރެއަށް ކައުންސިލް ކުންފުނިތަކުން، ނޫނީވިއްޔާ ލޯކަލް އޮތޯރިޓީ ކުންފުނިން ނުވަންނާށޭ، މިގެނައި އިޞްލާޙުގައި މި ދަންނަވަނީ. އިހަށްދުވަހު މަޖިލީހުން އެ ފާސްކުރި އިޞްލާޙުގައި އޮންނާނެ.
އެހެންވީމާ، ޙަޤީޤީ މާނައިގައި ރައްޔިތުން ބާރުވެރިކުރުވުމަށާއި، ލާމަރުކަޒީ ނިޒާމު ޗެމްޕިއަން ކުރަން، އަޅުގަނޑުމެން މަސައްކަތް މި ކުރަނީ. އެހެންވީމާ، މި ސަރުކާރު ދެމިއޮންނާނީ، ރައްޔިތުންނާ އެކީގައި. ރައްޔިތުންގެ ފަޅީގައި. ރައްޔިތުންނާ ގާތުން، ރައްޔިތުން އެދޭ އަމާޒަށް މަސައްކަތްކުރަމުން މި ސަރުކާރުން ދާނީ. މިއަދާ ހަމައަށްވެސް މިއައީ އެގޮތަށް. އިރާދަކުރެއްވިއްޔާ ކުރިއަށް އޮތްތަނުގައިވެސް އަޅުގަނޑުމެން ގެންދާނީ އެގޮތަށް.
އަދިވެސް އެއްފަހަރު، ކެންދޫގެ ރައްޔިތުން ތިޔަ ދެއްވާ އެއްބާރުލެއްވުމަށް ވަރަށްބޮޑަށް ޝުކުރު ދަންނަވަން. އިރާދަކުރެއްވިއްޔާ، މިއަދު މި ފެށުނު މަޝްރޫޢުތަކާއި، ދެންމެ އަޅުގަނޑު މި ދެންނެވި ގޮތަށް، އެކަންކަން ކުރިއަށްދާނެ. އަދި އިތުރު ކަންކަންވެސް އިރާދަކުރެއްވިއްޔާ، ރައްޔިތުން ބޭނުންވާ ކަންކަން، ރައްޔިތުންގެ ގާތުން އަޑުއަހައިގެން، އަޅުގަނޑުމެން ކުރިއަށް ގެންގޮސްދޭނަން. ހަތަރުވަނަ ފަހަރަކަށް ތިޔަބޭފުޅުންގެ ގާތަށް މާލަސްނުކޮށް އައުމުގެ އުންމީދުގައި އަޅުގަނޑު ވަކިވެލަން.
އަޅުގަނޑުގެ ދުޢާއަކީ، އަޅުގަނޑުމެން އެންމެން މިކުރާ މަސައްކަތްތަކުގައި، اللهُ سُبْحَانَهُ وَتَعَالَى ބަރަކާތް ލެއްވުން. އާމީން!
وَمَا تَوْفِيقِي إِلَّا بِاللَّهِ عَلَيْهِ تَوَكَّلْتُ وَإِلَيْهِ أُنِيبُ.
وَالسَّلَامُ عَلَيْكُمْ وَرَحْمَةُ اللهِ وَبَرَكَاتُه.