بِسْمِ ٱللّٰهِ ٱلرَّحْمٰنِ ٱلرَّحِيمِ
اَلْحَمْدُ للَّهِ رَبِّ الْعاَلَمِينْ، وَالصَّلاَة وَالسَّلاَمُ عَلَى رَسُولِ ٱللَّهِ، وَعَلَى آلهِ وَصَحْبِهِ أَجْمَعِينْ.
ކަމަދޫގެ ލޮބުވެތި އެންމެހައި ރައްޔިތުން، ކައުންސިލްގެ ރައީސް، އަދި ވަޑައިގެން ތިއްބެވި އެންމެހައި ޢިއްޒަތްތެރިން، ރަށުގެ މުއައްސަސާތަކުގެ ވެރިން، އަދި ރަށުގެ ޚިދުމަތްތެރި އިސް ރަށްވެހިން، މި ޖަލްސާ ބައްލަވާ، އަޑުއައްސަވާ ލޮބުވެތި އެންމެހައި ރައްޔިތުން؛
السَّلامُ عَلَيْكُم ورَحْمَةُ اللهِ وَبَرَكاتُهُ.
މިއަދު އަޅުގަނޑު މި ފެށި، މި އަތޮޅުގެ ދަތުރުގައި، އެންމެ ފުރަތަމަ މި ރަށަށް މި އާދެވުނީ. ހެނދުނުގެ ވަގުތު ތިޔަބޭފުޅުން ނުކުމެވަޑައިގެން، އަޅުގަނޑުމެންނަށް ވިދާޅުވި ހޫނު މަރުޙަބާއަށްޓަކައި، ކަމަދޫގެ ލޮބުވެތި ހުރިހާ ރައްޔިތުންނަށް، އަޅުގަނޑުގެ ހިތުގެ އަޑިން ވަރަށް ބޮޑަށް ޝުކުރު ދަންނަވަން. ވަރަށް ބޮޑަށް ޝުކުރިއްޔާ!
މިއަދު ތިޔަބޭފުޅުން ގާތަށް މިއައީ، ތިޔަބޭފުޅުންނާ ގުޅިފައިވާ ކަންކަމުގައި ވާހަކަދައްކައި، ތިޔަބޭފުޅުންނަށް ބޭނުންވާ ކަންކަން، ބާރު ސްޕީޑްގައި ކުރިއަށް ގެންދިޔުމަށްޓަކައި، ތިޔަބޭފުޅުންގެ ކަންކަން ފެށުމަށްޓަކައި އަދި ކުރިއަށް ގެންދެވޭނެ ގޮތްތައް ފަހިކުރުމަށްޓަކައި.
ދާދި ދެންމެއަކު އަޅުގަނޑުމެން މި ސޮއިކުރީ، އޭގެތެރެއިން ބައެއް އެއްބަސްވުންތަކުގައި. މި ޖަލްސާ ބޭއްވޭ ސްކޫލް މިއީ ވަރަށް ބޮޑަށް ޖާގަ ކުޑަވެފައިވާ، ވަސީލަތުގެ ގޮތުން ވަރަށް ބޮޑަށް ތަރައްޤީކުރަން ޖެހިފައިވާ ތަނެއް. މި ސްކޫލްގެ، މިއަދު މި ސޮއިކުރެވުނު ސްކޫލް އާ އިމާރާތް، ވަސީލަތުގެ ގޮތުންނާއި، ޖާގައިގެ ގޮތުން ކަމަދުއަށް ބޭނުންވާ ހުރިހާ ކަމެއް ފުރިހަމަވާ ފެންވަރުގައި، އިރާދަކުރެއްވިއްޔާ ހަދައިދޭނެ ކަމުގެ ޔަޤީންކަން އަޅުގަނޑު ދެން.
އާދެ، ހަމައެއާއެކީގައި، ސީޕްލޭންގެ ޚިދުމަތް ފެށިގެން ދިޔުމަކީ، ލޯކަލް ޓޫރިޒަމް މިހާބޮޑަށް ތަރައްޤީވެފައިވާ އަދި ވަރަށް ބޮޑަށް ތަރައްޤީ ކުރުމުގެ މަސައްކަތް ބާރު ސްޕީޑްގައި ކުރިއަށްދާ ރަށަކަށްވާއިރުގައި، އިޤްތިޞާދީ ވަރަށްބޮޑު ފައިދާއެއް މި ރަށަށް ކުރާނެ ކަމެއް. އެކަމަށްޓަކައި ރަށުގެ ހުރިހާ ރައްޔިތުންނަށް ވަރަށް ބޮޑަށް މަރުޙަބާ ދަންނަވަން. އަދި މިކަމުގައި އައިލެންޑް އޭވިއޭޝަނާއި، ހޯކްސްއާ އެކީގައި މި ސޮއިކުރެވުނު އެއްބަސްވުން ސޮއިކުރެވިގެން ދިޔުމުން، އެ ދެ މުއައްސަސާގެ ވެރިންނަށްވެސް ވަރަށް ބޮޑަށް ޝުކުރު ދަންނަވަން.
އާދެ އިރާދަކުރެއްވިއްޔާ، މި ރަށުގެ އިޤްތިޞާދީ ތަރައްޤީއަށްޓަކައި، އަޅުގަނޑުމެން ވަރަށް ބޮޑު ސަމާލުކަމެއް ދެން. މީގެކުރިން، މި އަތޮޅަށް ތަރައްޤީ އައުމުގައި ކަމަދޫ އޮންނަނީ، ލިސްޓުގެ ތަންކޮޅެއް ފަހަތުގައި. އިރާދަކުރެއްވިއްޔާ އެ ތަފާތުކުރުން ނައްތާލައި، ހަމަހަމަކަމާއެކީގައި ތަރައްޤީ ގެނެސްދިނުމުގެ ސިޔާސަތެއް، އަޅުގަނޑުމެން ތަންފީޒު ކޮށްދޭނަން.
މިގޮތުން ބަލާއިރުގައި، ޞިއްޙީ ދާއިރާ ތަރައްޤީކުރުމަކީ، ތިޔަބޭފުޅުންނަށް ވަރަށް މުހިންމު ކަމަކަށްވޭ. ރަށުގެ ރައްޔިތުންނަށް ބޭނުންވާ ދުޅަހެޔޮކަން ޤާއިމުކުރުމަށްޓަކައި، އަދި އިޤްތިޞާދީ ގޮތުން މި ކުރިއަރައިގެންދާ ދިޔުމުގައި، ލޯކަލް ޓޫރިޒަމްގެ ތެރެއިންވެސް، ރަށަށް އެބަ ބޭނުންވޭ، ރަނގަޅު ފެންވަރުގައި ޞިއްޙީ ޚިދުމަތް ދެވެން. އަދި ދެވޭ ވަގުތު އިތުރުކުރަންވެސް. އެހެންވީމާ، ކުރިއަށް އޮތް ކުޑަދުވަސްކޮޅެއްގެ ތެރޭގައި، އަޅުގަނޑުމެން މި ރަށުގައި، މި ދެންނެވި ގޮތަށް، ޞިއްޙީ މަރުކަޒުގެ ފެންވަރު ރަނގަޅު ކުރުމަށްޓަކައި، ސްކޫލްގެ މަޝްރޫޢުގައި މި ސޮއިކުރެވުނު ގޮތަށް، ވަސީލަތުގެ ގޮތުންނާއި، ޖާގައިގެ ގޮތުން މިކަން ޙައްލުކޮށް، އަދި އެއާއެކީގައި ދެން، ވަސީލަތާއި ޖާގަ އިތުރުވީމަ، ޚިދުމަތް ދިނުން 16 ގަޑިއިރަށްވެސް ބަދަލުކުރުމާ އެކީގައި، މުޅި މައްސަލަ ޙައްލުކުރުމުގެ މަސައްކަތް އަޅުގަނޑުމެން ފަށައިދޭނަން. އުންމީދުކުރަނީ، މި އަންނަ މަހުގެ ތެރޭގައި، ސެޕްޓެންބަރު މަހުގެ ތެރޭގައި، އަޅުގަނޑުމެންނަށް ބަޔަކާ އެކީގައި އެގްރީމަންޓް އެންމެ ލަސްވެގެން ހެދޭނެކަމަށް. އެހެންވީމާ، ދެ މަހެއްހާ ދުވަހުގެ ތެރޭގައި މޮބިލައިޒް ކުރެވި، މި އަހަރުގެ ފަހުކޮޅަށް ދާއިރުގައި، އިރާދަކުރެއްވިއްޔާ މި އަހަރުގެ ތެރޭގައި، އެހެންގޮތަކަށް ދަންނަވަންޏާ، ޢަމަލީ މަސައްކަތް މި ޞިއްޙީ މަރުކަޒުގެ މަސައްކަތް ފެށޭނެ ކަމަށް.
އާދެ، އަޅުގަނޑު ރިޔާސީ އިންތިޚާބުގައި މި ރަށަށް ވީ ވަޢުދުތަކުގެ ތެރެއިން، ދެން ހިމެނޭ ކަމެއް ކުޅިވަރުގެ ދާއިރާއަކީވެސް. ފުޓްބޯޅަ ދަނޑުގެ މަސައްކަތުގެ ބައެއް ކަންތައް ކުރެވިފައި، އެހެންނަމަވެސް، ޓާރފް އެޅުމުގެ މަސައްކަތް ނުކުރެވޭ. ވަރަށް ގިނަ ރަށްތަކުގައި ހަމަ މިދެންނެވި ޙާލަތުގައި މިއޮތީ މިހާރު. އަޅުގަނޑުމެން މިހާރު ވާނީ، މި ދެންނެވި ގޮތަށް ހުރި ހުރިހާ ރަށަކަށް ބޭނުންވާ މެޓީރިއަލް ގެނައުމަށް ބަޔަކާ ހަވާލުކޮށްފައި. އެސް.ޓީ.އޯ. މެދުވެރިކޮށް އެކަން ކުރިއަށްދާނެ. ސްޕޯޓްސް މިނިސްޓްރީއާއި، ކަމާބެހޭ ކުންފުނިތަކާ އެކީގައި މި ކުރެވޭ މަސައްކަތުން. މި ރަށުގައި މިހާރު ކުރަން މިއޮތީ، ފުޓްބޯޅަ ދަނޑުގައި ޓާރފްގެ މަސައްކަތް ނިންމުން. ޒުވާނުންނަށް، ކުޅިވަރު ކުޅޭ ފަރާތްތަކަށް ވަރަށް މުހިންމު ކަމެއް. އަޅުގަނޑު ވީ ވަޢުދެއް. އެހެންވީމާ، އެކަންވެސް އެއޮތީ ހަމަޖެހިފައި.
ދެން ޓާރފް ގެނެވުނުހާ އަވަހަކަށް އެކަން ނިމިގެންދާނެ. މިހާރުވަނީ ހުރިހާ ކަމެއް ކުރެވި، އޯޑަރ ޕްލޭސް ކުރެވިފައި. އިރާދަކުރެއްވީތީ އެކަން އެދަނީ ހަމަޖެހެމުން. އެހެންވީމާ، ކުޅިވަރުގެ ކަންތަކަށް އަޅުގަނޑުވީ ވަޢުދުވެސް މި އަހަރުގެ ތެރޭގައި، ފުރިހަމަކޮށް ނިންމައިދިނުމަށްޓަކައި ވަރަށް މަސައްކަތްކުރަން. އިރާދަކުރެއްވިއްޔާ، ހަމަ އެގޮތަށް އެކަން ހަމަޖައްސައިދެވޭނެ ކަމަށް އަޅުގަނޑު ތިޔަބޭފުޅުންނަށް ދަންނަވާލަން.
އާދެ، ދެން އަޅުގަނޑު ފާހަގަކޮށްލަން ބޭނުން، މި ރަށުގައި އަޅުގަނޑުމެން މަގުހެދުމަށްވެސް ވަނީ ނިންމާފައި. އެހެންނަމަވެސް، ބައެއް އެހެން ރަށްތަކާ ޚިލާފަށް، އަދި އަޅުގަނޑު ހަމަ ތާއީދުވެސްކުރާ ކަމެއް. ކޮންމެހެން މާ ހާޑް ސަރފެސްއެއް ގޮތަށް ތާރުއެޅުން، ގާ އަތުރައިގެން ކޮންމެހެން މަގުތައް ހެދުމަކީ، މާ މުހިންމު ކަމެއްނޫން. އަދި އެހާ ރަނގަޅު ކަމެއްވެސްނޫން. ޚާއްޞަކޮށް، މިގޮތަށް ވަރަށް ގިނަ ޓޫރިޒަމް ގެސްޓްހައުސްތައް ޑިވެލޮޕްވަމުން އަންނަ، ޓޫރިޒަމް ވަރަށް ބޮޑަށް ފުޅާވެގެން އަންނަ ރަށްރަށުގައި، ވީހާވެސް ބޮޑަކަށް ރަށުގެ ނެޗުރަލް ބިއުޓީ، ނޫނީ ޤުދުރަތީ ރީތިކަން، ބެލެހެއްޓޭގޮތަކަށް، ނޫނީވިއްޔާ، ނެތިގެންނުދާގޮތަށް މަގުހެދުމަކީ މުހިންމު ކަމެއް.
ރައްޔިތުން ބޭނުންވާގޮތަކަށް އަޅުގަނޑުމެން ކުރިއަށްގެންދާނީ. ރައްޔިތުން ބޭނުންވަނީ، މަގުތައް ރީތިކޮށް ބާއްވާފައި، އެހެންނަމަވެސް، ފެން ބަރާބަރަށް ހިނދޭ، ޑްރެއިނޭޖް ނިޒާމެއްގެ ތެރެއިން މަގުތައް ދެމެހެއްޓުން ކަމުގައި ވާކަމަށްވަންޏާ، އެ ކޮންސެޕްޓްގައި އެކަން ކުރިއަށްދާނީ. ކޮންމެގޮތެއްވިޔަސް، ރަށުގެ ރައްޔިތުން އެގޮތަށް މަގުހަދަން ބޭނުންވާ ކަމަށްވާނަމަ، މި ދެންނެވި ގޮތަށް އެކަންދާނީ. ކައުންސިލުން މިއަދުގެ ބައްދަލުވުމުގައި، ކައުންސިލްގެ ރައީސް ވިދާޅުވިގޮތަށް. އަދި ކުރިއަށް އޮތްތާ އަޅުގަނޑުމެން އޭގެ ފައިނަލް ކުރުމުގެ ކަންތައް ކުރިއަށްގެންދާނީ.
އެހެންވީމާ، ރައްޔިތުން ބޭނުންވާގޮތަށް، މި ދެންނެވިހެން، އިޤްތިޞާދީ ގޮތުން ރަށަށް އިތުރު ކުރިއެރުމެއް ލިބޭގޮތަށް، މަގު ހެދުމުގެ ކަންތައްވެސް އަޅުގަނޑުމެން ގެންދާނަން. އެހެންވީމާ، އެކަންވެސް އެވަނީ ކުރުމަށްޓަކައި ބަޖެޓުގެ ތެރެއިން ހަމަޖެހި، އަދި ބަޔަކާ ހަވާލުކުރުމުގެ މަރުޙަލާއަށް މިހާރު ގޮސްފައި. އެހެންވީމާ، އެކަންވެސް އެގޮތަށް ކުރިއަށް ގެންގޮސްދޭނަން.
ދެން އޮތީ އަޅުގަނޑުމެން އެމް.ޓީ.ސީ.ސީ.އާ ހަވާލުކޮށްފައި ހުރި ބައެއް ކަންތައް. އޭގެ ތެރޭގައި މިވަނީ މިސާލަކަށް ދަންނަވަންޏާ، ބަނދަރުގައި މިހާރު ނިންމުމަށްޓަކައި ކުރަން ހުރި ބައެއް ކަންތައްތައް އެބަހުރި. މިހާރު ދިމާވާ ބައެއް މައްސަލަތައް ޙައްލުކުރެވިގެން، އެކަން ނިމިގެންދާނީ. ބަނދަރު ހެދުމުގައި ހުރި ތިޔަބޭފުޅުންގެ ކަންބޮޑުވުންތައް އިރާދަކުރެއްވިއްޔާ ޙައްލުކޮށްދޭނަން. ބަނދަރު ނިންމުމުގެ ތެރެއިން. އަދި އެއާއެކީގައި، ގިރާ ސަރަޙައްދު ހިމާޔަތްކުރުމަށްޓަކައި ބޮޑުހިލަ ގެނެސްގެން، އެކަންވެސް ނިންމުން އެބައޮތް ކުރިއަށް.
އެހެންވީމާ، އަޅުގަނޑުމެންގެ ކުރިއަށް އޮތް ދުވަސްތަކަކީ، މިހެން ހުރި، ފެށިފައި ހުރި، އަދި ރަށުގެ ތަރައްޤީއަށްޓަކައި ރައްޔިތުންނަށް ދަތިވާ ކަންކަމުގައި، މިހެން ހުރި ބޮޑެތި މަޝްރޫޢުތައްވެސް ވަރަށް ރަނގަޅަށް ތަރުތީބުކުރެވިގެން ހިނގާނެ ދުވަސްތަކެއް. އެހެންވީމާ، މި ރަށަށް ބޭނުންވެފައި ހުރި މި ދެންނެވި ކަންކަންވެސް ދާދި އަވަހަށް ޢަމަލީގޮތުން ފެށި، ތަކެތި ގެނެވި، ބޮޑުހިލަ ކަމަށްވަންޏާ ބޮޑުހިލަ، އަދި ދެން ހުރި ކަންކަންވެސް، ތަކެތި ގެނެވިގެން ކުރިއަށްދާނެ.
އެހެންވީމާ، ކަމަދޫގެ ރައްޔިތުންގެ ކަންބޮޑުވުންތަކަށް ނިމުމެއް ގެނެސްދީ، ޢަމަލީގޮތުން ރަށުގައި މި ދެންނެވި ކަންކަން، ވަރަށް ފުރިހަމައަށް ހިނގާތަން، ޔަޤީންކަމާ އެކީގައިވެސް ފެންނާނެކަމުގެ އުފާވެރި ޚަބަރު ތިޔަބޭފުޅުންނަށް އަޅުގަނޑު ދެން.
ހަމައެއާއެކީގައި އަދިވެސް އެބަހުރި ބައެއް ކަންކަން އިނގޭތޯ. އިރާދަކުރެއްވިއްޔާ މި އަންނަ އަހަރުގެ ބަޖެޓުގެ ތެރޭގައި، ހިމަނައިގެން، މި ރަށުގައި އާ މިސްކިތެއް އެޅުމަށްވެސް އަޅުގަނޑުމެންވާނީ ނިންމާފައި. އެކަންވެސް ކުރިއަށް ގެންދާނަން. މި އަންނަ އަހަރު އެކަން ކުރިއަށްދާނީ. އަދިވެސް އިތުރު ބައެއް ކަންކަން އެބަހުރި ކުރިއަށް ގެންދަން.
އަޅުގަނޑު މަސައްކަތް ކުރާނަން، މި ރަށުގައި މިހާބޮޑަށް ލޯކަލް ޓޫރިޒަމް ކުރިއަށްދާތީ. ޕިކްނިކްދާނެ ވަސީލަތެއް ނެތް، ތަނެއް ނެތް. ކައިރީގައި އޮތް ފަޅުރަށެއް ހަމަޖެއްސޭތޯ އެކަމުގެ މަސައްކަތް އަޅުގަނޑުމެން ފަށާނަން. އެހެންވީމާ، މިހެން ވަރަށް ފުޅާ ދާއިރާއެއްގައި މި ރަށުގެ ތަރައްޤީއަށްޓަކައި، މި ބާކީ ކުރެވިފައި އޮތް ޗާޓުން އެއްކިބާކުރެވިފައި މިއޮތްހާ ދުވަހު އޮތް އޮތުން ނިމުމަކަށް ގެނެސް، ތިޔަބޭފުޅުންނާ ގާތުން، ތިޔަބޭފުޅުންނަށް ބޭނުންވާ ކަންކަން ކޮށްދިނުމުގައި އަޅުގަނޑުމެން ވަރަށް ގާތުން މަސައްކަތްކޮށްގެން ކުރިއަށް ގެންދާނެ ވާހަކަ ދަންނަވަން. އެ ޔަޤީންކަމާއި، އެ ހިތްހަމަޖެހުން ތިޔަބޭފުޅުންނަށް ދިނުން އަޅުގަނޑުގެ މި ދަތުރުގެ ބޭނުމަކީވެސް. އެހެންވީމާ، އެ ޔަޤީންކަން، އަދި އެ ހިތްހަމަޖެހުން ތިޔަބޭފުޅުންނަށް އަޅުގަނޑު ގެނެސްދީ، އިރާދަކުރެއްވިއްޔާ ޢަމަލީގޮތުން އެކަން އަޅުގަނޑުމެން ދައްކައިދޭނަން.
އާދެ، އަޅުގަނޑު މި ފާހަގަކޮށްލި ކަންކަން އިރާދަކުރެއްވިއްޔާ ކުރިއަށް އޮތް ދުވަސްތަކުގައި، މި ދެންނެވި މަގުން އަޅުގަނޑުމެން ކުރިއަށް ގެންދާނަން.
އަދިވެސް އެއްފަހަރު، ތިޔަބޭފުޅުންނަށް ވަރަށް ބޮޑަށް ޝުކުރު ދަންނަވަން. ކުރިއަށް އޮތް ތަނުގައި، މި ކަންކަމުގެ ތެރެއިން، ގިނަ ކަންކަން ނިންމާލެވި، އަނެއްކާވެސް ތިޔަބޭފުޅުންގެ ގާތަށް އައިސް، މިކަހަލަ ބައްދަލުވުމެއްގައި ބައްދަލުވުމުގެ އުންމީދު ކުރަން.
އަޅުގަނޑުގެ ދުޢާއަކީ، ކަމަދޫގެ ރައްޔިތުންގެ ތަރައްޤީ، ޢަމަލީގޮތުން ދާދިއަވަހަށް އަޅުގަނޑުމެންނަށް ހާސިލުކޮށްދެވުން. އަދި މުޅި ރާއްޖޭގެ ތަރައްޤީއަށްޓަކައިވެސް މިކުރާ ކަންކަމުގައި ޢަމަލީގޮތުން ކަންކަން ފުރިހަމަވެގެންދިޔުން. އާމީން.
وَمَا تَوْفِيقِي إِلَّا بِاللَّهِ عَلَيْهِ تَوَكَّلْتُ وَإِلَيْهِ أُنِيبُ.
وَالسَّلَامُ عَلَيْكُمْ وَرَحْمَةُ اللهِ وَبَرَكَاتُه.