بِسْمِ ٱللّٰهِ ٱلرَّحْمٰنِ ٱلرَّحِيمِ
اَلْحَمْدُ للَّهِ رَبِّ الْعاَلَمِينْ، وَالصَّلاَة وَالسَّلاَمُ عَلَى رَسُولِ ٱللَّهِ، وَعَلَى آلهِ وَصَحْبِهِ أَجْمَعِينْ.
ކެނދިކުޅުދޫގެ ލޮބުވެތި އެންމެހައި ރައްޔިތުން، ކައުންސިލްގެ ރައީސް، ދާއިރާގެ ޢިއްޒަތްތެރި މަޖިލިސް މެންބަރު، ރަށުގެ އިސް ރަށްވެހިން، މުއައްސަސާތަކުގެ ވެރިން، އަދި ވަޑައިގެން ތިއްބެވި އެންމެހައި ބޭފުޅުން، އަޅުގަނޑާ އެކީގައި ވަފުދުގައި ދަތުރުކުރައްވަމުންގެންދަވާ ހުރިހާ ވަޒީރުންނާއި، ކުންފުނިތަކުގެ ވެރިންނާއި، ޢިއްޒަތްތެރި މަޖިލިސް މެންބަރުން، މި ޖަލްސާ ބައްލަވާ، އަޑުއައްސަވާ ލޮބުވެތި އެންމެހައި ރައްޔިތުން؛
السَّلامُ عَلَيْكُم ورَحْمَةُ اللهِ وَبَرَكاتُهُ.
އާދެ، މިއަދު އަޅުގަނޑުމެން މި ރަށަށް އައި ވަގުތު ތިޔަބޭފުޅުން ވިދާޅުވި ހޫނު މަރުޙަބާއަށްޓަކައި، އަޅުގަނޑުގެ ހިތުގެ އެންމެ ފުންމިނުން ލޮބުވެތި ހުރިހާ ރައްޔިތުންނަށް ވަރަށް ބޮޑަށް ޝުކުރު ދަންނަވަން. ވަރަށް ބޮޑަށް ޝުކުރިއްޔާ!
މިއަދު، އާދެ، އަޅުގަނޑު ދަންނަވާލަން ބޭނުންވަނީ، މައިގަނޑުގޮތެއްގައި ހަމަ ޔަޤީންކަން ދިނުމުގެ ވާހަކަ. އެއީ، ރައްޔިތުންނަށް އަޅުގަނޑު ރިޔާސީ އިންތިޚާބުގައި ވީ ވަޢުދުތައް ވަރަށް ގާތުން ފުއްދުމުގައި، ސަރުކާރުން ސަމާލުކަންދޭކަމުގެ ޔަޤީންކަން. އެއިން އެއް ވަޢުދު އިރާދަކުރެއްވީތީ މިއަދު ފުދި، ފެށިގެން އެ ދިޔައީ. ބަހުގެ ޚިދުމަތް. އެ ޚިދުމަތް އިރާދަކުރެއްވިއްޔާ މެދުނުކެނޑި އަދި އިތުރަށް ތަރައްޤީ ކުރުމަކީ އަޅުގަނޑުގެ ވިސްނުން. މާނައަކީ، ދެ ބަސް ގެނެސްގެން މި ފެށުނީ. އަޅުގަނޑުމެން މަސައްކަތްކުރާނީ، ކުރިޔަށްއޮތް ތަނުގައި އިތުރުވެސްކުރަން. ފްލީޓަށް ބަސް އިތުރުކުރަން. އެހެންވީމާ، އިރާދަކުރެއްވީތީ މިއަދު މި ފެށުނު ޚިދުމަތަކީ، ރައްޔިތުން އެދޭގޮތަށް، ސްކޫލް ކުދިންނާ، އާންމުކޮށް ހުރިހާ ރައްޔިތުންވެސް އެދޭގޮތަށް، ޚިދުމަތް ލިބިގެންދާނެ ކަމަކަށްވާނެކަމަށް އަޅުގަނޑު ގަބޫލުކުރަން. އާދެ، މިއަދު މި ފެށިގެންދިޔަ އާރު.ޓީ.އެލް. ބަސް ސަރވިސްގެ މުނާސަބަތުގައި، ތިޔަ ލޮބުވެތި ހުރިހާ ރައްޔިތުންނަށް މަރުޙަބާ ދަންނަވަން.
މިއަދު އާދެ، މިކަން ފެށިގެން ގޮސް އަދި އިތުރު ކަންތައްތައްވެސް އިރާދަކުރެއްވިއްޔާ، ކުރިޔަށް ހުރި ދުވަސްތަކުގައި ފުރިހަމަވެގެންދާނެ. އަޅުގަނޑުމެން މި ރަށުގައި ފެށިފައި ހުރި މަސައްކަތް އަދި ފަށަންޖެހިފައި ހުރި މަސައްކަތްތައް، ވަރަށް ގާތުން މި ދެންނެވިހެން މިދަނީ ބަލަމުން.
ސްކޫލް މަޝްރޫޢަށް ބަލާއިރުގައިވެސް، އެ މަޝްރޫޢުވެސް އިރާދަކުރެއްވިއްޔާ ބާރު ސްޕީޑުގައި ގެންގޮސް ނިންމާލެވޭ ހިސާބުގައި މިހާރު އެއޮތީ. އަޅުގަނޑަށް ލިބިފައި އޮތް މަޢުލޫމާތުގައި، އެއްވެސް ކަހަލަ އިޝޫއެއް، މައްސަލައެއްނެތި، އިރާދަކުރެއްވިއްޔާ ދެތިން މަސް ތެރޭގައި ނިމިގެންދާނެ.
އަދި ހަމައެއާއެކީގައި، ޞިއްޙީ މަރުކަޒަށްވެސް މުވައްޒަފުން އިތުރުކުރުމުގެ ހުއްދަ މިހާރުވެސް ދީފިން. ހުއްދަ ދީގެން، ދެތިން މުވައްޒަފުން ނެގިއްޖެ. އަދިވެސް އިތުރަށް މުވައްޒަފުން ނަގަން ބޭނުންވާތީ، ކޮންމެހެންވެސް 24 ގަޑިއިރު މިހާރު މި ހިންގާއިރުގައި، އެ ބޭނުންވާ އަދަދަށް ޚިދުމަތް ދިނުމުގައި ބޭނުންވާ ކަންތައްތައް ކޮށްދިނުމަކީ، އަޅުގަނޑުމެން ސަމާލުކަންދޭނެ ކަމެއް. އަދި، މިކަހަލަ ރަށެއްގައި އެމްބިއުލެންސްގެ ޚިދުމަތް ލިބިގެންދާ މިންވަރު އިތުރުކުރުމަކީ ހަމަ ޒަރޫރީ ކަމެއް. މިހާރު އޮތް އެމްބިއުލެންސުން ހަމަ ޔަޤީނުންވެސް ނުފުދޭ. އަޅުގަނޑުމެން ކުރިޔަށް އޮތް ތަނުގައި އިރާދަކުރެއްވިއްޔާ އެމްބިއުލެންސް އިތުރުކުރާނަން. އެހެންވީމާ، ޖުމްލަކޮށް، ޞިއްޙީ ދާއިރާ ވަރުގަދަކުރުމާއި، ޚިދުމަތް ވަރުގަދަކުރުމާއި، ކުރަންހުރި މިޒާތުގެ ކަންތައްތައް، ވަރަށް ސަމާލުކަންދީގެން ކޮށްދޭނެކަމުގެ ޔަޤީންކަން ތިޔަބޭފުޅުންނަށް އަޅުގަނޑު ދެން.
އާދެ ހަމައެއާއެކީގައި، ކުޅިވަރުގެ ދާއިރާއިންވެސް މަސައްކަތްތަކެއް ކުރެވިގެންދާނެ. ކުޅިވަރުގެ ދާއިރާއިންވެސް އަޅުގަނޑުވާނީ ގިނަ ކަންތައްތަކެއް ކުރާނެ ކަމަށް ދަންނަވާފައި. ފިޓްނަސް ރިކްރިއޭޝަން ސެންޓަރު ހެދުމާ، އަދި މިކަހަލަ ކަންތައްތައް. އަދި އޭގެއިތުރަށް، ހަލާކުވެފައި އޮތް ފުޓްސަލް ދަނޑު ހަދައިދިނުމާއި، ޖުމްލަކޮށް ޒުވާނުންނަށް، ޖުމްލަކޮށް ކުޅިވަރު ކުޅޭ ހުރިހާ ފަރާތްތަކަށް، ކުޅިވަރުގެ ވަސީލަތްތައް ހަމަޖައްސައިދިނުން. ފިޓްނަސް ސެންޓަރުގެ މަސައްކަތް އަދި އިރާދަކުރެއްވިއްޔާ ކުރިޔަށް އޮތް ތަނުގައި މި ދެންނެވި ފަދައިން، ފުޓްސަލް ދަނޑު އަލުން ހަދައިދިނުމާ، މިފަދަ ކަންތައްތައް އަޅުގަނޑުމެން ކުރާނަން.
ހަމައެއާއެކީގައި، މިހާރު ނިމުމަކާ ހަމައަށް ގޮސް، ގިނަ ދުވަސްތަކެއް ވެފައިވާ، ފެނާއި ނަރުދަމާގެ މަޝްރޫޢު ނިންމާލުމަށް ބޭނުންވާ ފައިސާވެސް މިހާރު އެ ފަރާތަށް ދީ ނިމިފައި ވަނީ. އެހެންވީމާ، ބާކީހުރި މަސައްކަތްތައްވެސް މައްސަލަތަކެއް ދިމާނުވެ، ދެން ކުރިޔަށް އޮތް ދެ މަހެއްހާ ދުވަހުގެ ތެރޭގައި ނިމޭނެކަމަށް އަޅުގަނޑަށް މަޢުލޫމާތު ލިބިފައިވޭ. މަގު ހެދުމުގެ މަސައްކަތްވެސް އިރާދަކުރެއްވިއްޔާ، މިހާރު ދެން އީ.އައި.އޭ.ވެސް ފާސްވެ، ހުރިހާ ކަމެއް ނިމިފައި އޮތީމަ، ޢަމަލީ ސްޓޭޖަށް މިހާރު އެވަނީ ގޮސްފައި.
ދާދި އަވަހަށް ޢަމަލީގޮތުން މަގުގެ މަސައްކަތްތައް ހިނގައިގަންނާނެ. އެހެންވީމާ، ޖުމްލަކޮށް މިކަހަލަ ބޮޑެތި މަސައްކަތްތައް އަޅުގަނޑުމެން ވަރަށް ސަމާލުކަންދީގެން މި ރަށުގައި ކުރިއަށް ގެންދާނަން.
އާދެ، މި ހުރިހާ ކަމެއްގެ އިތުރަށް، އެންމެ މުހިންމު އެއްކަމަކަށްވާނެ، އާމްދަނީ އިތުރުކުރުމަށްޓަކައި، ރަށުގެ ރައްޔިތުން ކުރަމުންދާ މަސައްކަތްތަކަށް މަގުފަހިކޮށްދިނުން. ޓޫރިޒަމް، އިކޯ ޓޫރިޒަމްގެ ދާއިރާއިން، ރަށަށް އާމްދަނީ އިތުރުކުރުމަކީ، ސަރުކާރުގެ ވަރަށް މުހިންމު ސިޔާސަތެއް. އަދި އަޅުގަނޑުގެ ވަޢުދެއް. ވަޢުދުތަކުގެ ތެރޭގައި އަޅުގަނޑު ވާނެ އެ ވާހަކަ ބަޔާންކޮށްފައި.
އެހެންވީމާ، އެކަމުގައި އަޅުގަނޑު ހަމަ ވަރަށް ގާތުން ތިޔަބޭފުޅުންނާ އެކީގައި، ސަރުކާރުގެ ކަމާބެހޭ ވުޒާރާއިން މަސައްކަތްކުރަމުން އެ ގެންދަނީ. ޚާއްޞަކޮށް، ދާއިރާގެ ޢިއްޒަތްތެރި މަޖިލިސް މެންބަރު ވަރަށް ގިނަ މަސައްކަތްތައް ކުރައްވާ. ކައުންސިލުންވެސް އެ ކަންތައް ހުށަހަޅުއްވާފައި ވަނީ. އެހެންވީމާ، މިއަދުގެ ބައްދަލުވުމުގައިވެސް، ކުރިން އޮތް ބައްދަލުވުމުގައިވެސް، އެ ވާހަކަތައް ދެކެވުނު.
އެހެންވީމާ، ޖުމުލަކޮށް ރައްޔިތުން ބޭނުންވާ ކަންތައް، އަޅުގަނޑު ރިޔާސީ އިންތިޚާބުގައި ވަޢުދުވީގޮތަށް ކޮށްދިނުމުގައި، މަގުފަހިކުރުމުގެ ކަންތައްތައް އެބަ ކުރަން. އިރާދަކުރެއްވިއްޔާ، މި ރަށުގައި މި އޮތް ނެޗްރަލް ބިއުޓީ، މެންގްރޫވް އައިލެންޑްގެ ގޮތުގައި، ތަރައްޤީކުރެއްވުމުގައި ތިޔަ ކުރައްވާ މަސައްކަތް، ބްރޭންޑްކޮށްގެން ކުރާ މަސައްކަތަށް، ސަރުކާރުގެ ފަރާތުން އަޅުގަނޑު ދޭން ބޭނުންވާ ޔަޤީންކަމަކީ، އީޖާބީ ގޮތެއްގައި، ޕޮޒިޓިވްކޮށް، އަޅުގަނޑުމެން މަސައްކަތްކޮށްދޭނަމޭ. ރައްޔިތުން ތިޔަ އެދިވަޑައިގަންނަވާ ކޮންސެޕްޓްގައި މި ރަށުގައި އިކޯ ޓޫރިޒަމް ކުރިއަށް ގެންދިޔުމަށް އިރާދަކުރެއްވިއްޔާ އަޅުގަނޑުމެން ކޮންމެވެސް މަގެއް ފަހިކޮށްދޭނަމޭ. އެ ޔަޤީންކަން އަޅުގަނޑު ދެން.
އެހެންވީމާ، އިރާދަކުރެއްވިއްޔާ އެކަމަށް އަޅުގަނޑުމެން ގޮތްތަކެއް ހޯދާނަން އެއީ، މިހެން މި ދަންނަވަނީ، މީގެ ފައިދާ ހަމަ ރާއްޖޭގެ އެހެން ރަށްރަށުގައިވެސް، މިގޮތަށް މި ކަހަލަ ނެޗްރަލް އެންވަޔަރަންމަންޓް ހުރި ރަށްރަށަށް ބޭނުންވާނެތީ. އެހެންވީމާ، ހުރިހާ ކަމަކަށްވެސް ވިސްނައިގެން މި ކުރަނީ. ހުރިހާ ރައްޔިތުންނަކީވެސް ހަމަހަމަ ރައްޔިތުން. ހުރިހާ ރަށެއްގައިވެސް އުޅެނީ ދިވެހި ރައްޔިތުން. އެހެންވީމާ، ސަރުކާރުން ކަމެއް ކޮށްދޭއިރުގައި އެ ހުރިހާ ކަމެއް ބަލަންޖެހޭނެ.
އެހެންވީމާ، މި ރަށުގެ ރައްޔިތުން ބޭނުންވާ މި ކަމުގައި އަޅުގަނޑުމެން މަސައްކަތް ކޮށްދީ، އިރާދަކުރެއްވިއްޔާ ރަނގަޅު ގޮތެއް ހޯދައިދޭނަން. މި ދެންނެވި ކަންތައް މިހެން އޮތްކަން ދަންނަވާލަން އަޅުގަނޑު ބޭނުންވީ.
ހަމަ އެއާއެކީގައި، ދެންވެސް ޖުމްލަކޮށް، ކުރަންހުރި ތަރައްޤީގެ ހުރިހާ މަސައްކަތްތައް މި އަހަރުގެ ތެރޭގައި، މި ދެންނެވި ކަންކަމާއި، މި އަންނަ އަހަރަށް އަޅުގަނޑުމެން ތާވަލުކޮށްފައި ހުރި ކަންކަން ކުރިއަށް ގެންދާނަން. ކެނދިކުޅުދޫގެ ރައްޔިތުންގެ ތަރައްޤީއަށްޓަކައި ސަރުކާރުން ވަރަށް ސަމާލުކަންދީގެން، އަޅުގަނޑު ވެފައިވާ ހުރިހާ ވަޢުދެއް ފުއްދުމަކީ، އިރާދަކުރެއްވިއްޔާ ހަމަ ޔަގީނުންވެސް ކޮށްދޭނެ ކަމެއް. މި އަހަރާއި މި އަންނަ އަހަރާ ދެ އަހަރުގެ ތެރެއިން ރައްޔިތުންނަށް އަޅުގަނޑު މި ރަށުގައި ވެފައިވާ ހުރިހާ ވަޢުދެއް ފުއްދައިދިނުމަކީ، ނޫނީވިއްޔާ ފަށައިގަތުން، ފަށައިގަނެގެން ގެންގޮސް ދެން ނިންމާލުމަކީ ސަރުކާރުންކުރާ މަސައްކަތަކީ. ހުރިހާ ވަޢުދެއް ފުއްދުމަކީ، އަޅުގަނޑުގެ ޢަޒުމް.
ޖުމްލަކޮށް ރާއްޖޭގެ ހުރިހާ ރަށެއްގައިވެސް އެއީ، އަޅުގަނޑުގެ ޕްލޭނަކީ. މި އަހަރުގެ ތެރޭގައި، ވަރަށް ގިނަ ރަށުގައި ޢަމަލީ މަސައްކަތް ފެށިގެން މިދަނީ. އަދި ކުރިއަށް އޮތް ފަސްމަސް ދުވަހުގެ ތެރޭގައި، ހަމަސް ތެރޭގައި، ވަރަށް ގިނަ މަސައްކަތް ފެށޭނެ. ދެން އަންނަ އަހަރު، 2026ގައި ބާކީހުރި ހުރިހާ ވަޢުދެއްގެ ޢަމަލީ މަސައްކަތް ފެށޭނެ. އެއީ، ދެ އަހަރަށް އަޅުގަނޑު ޕްލޭން ކޮށްފައި މިއޮތީ. ޢަމަލީގޮތުން އަޅުގަނޑު ވަޢުދުވެފައި ހުރި ހުރިހާ މަސައްކަތްތަކެއް، ހުރިހާ ރަށެއްގައި ފެށުން. އެގޮތަށް ދެ އަހަރުގެ ބަޖެޓް އަޅުގަނޑުމެން ޕްލޭން މި ކުރަނީ. ދެން އެ މަސައްކަތްތައް ފެށި، ދެން އޮންނާނީ 2027ގައި އަދި 2028އާ އެކީގައި ނިންމާލުމުގެ މަސައްކަތް. ނުނިމިހުރި ކަންތައްތައް ނިންމާލުން.
އެހެންވީމާ، ވަރަށް ޕްލޭން ކުރެވިގެން، އިޤްތިޞާދީގޮތުން އަޅުގަނޑުމެންނަށް ދިމާވެފައި ހުރި ދަތިތަކުން އަރައިގަތުމާއި، ދަރަންޏެއް ދެއްކުމުގައި، އެއްވެސްކަހަލަ ދަތިތަކެއް ދިމާނުވާގޮތަށް ޕްލޭންކުރުމާ އެކީގައި، ރައްޔިތުންނަށް އަޅުގަނޑު ވެފައިހުރި މިކަހަލަ ވަޢުދުތައް ފުއްދުމުގެ ކަންކަން މި ތަރުތީބުކުރަނީ. އިރާދަކުރެއްވިއްޔާ، އޭގެ ހެޔޮ ފޮނިމީރުކަން ރައްޔިތުންނަށް ލިބޭނެ. އެ ފުރިހަމަ ޔަޤީންކަން އަޅުގަނޑު ތިޔަބޭފުޅުންނަށް އަރުވަން.
އާދެ، އިރާދަކުރެއްވިއްޔާ ރައްޔިތުންނަށްޓަކައި އަޅުގަނޑުމެން ތިޔަ ލޮބުވެތި ރައްޔިތުންނާ ގާތުން، މި ކުރާ މަސައްކަތްތައް ކާމިޔާބުވެގެންދާނެ. އެކަމުގައި ﷲގެ ހެޔޮ ތައުފީޤު ދެއްވުން އެދި ދުޢާކުރަން.
އާދެ، އަޅުގަނޑު ވަރަށް އުފާވޭ ތިޔަބޭފުޅުންނާ މިގޮތަށް ދެވަނަ ފަހަރަށް ބައްދަލުވެގެންދިޔައިމާ. އިރާދަކުރެއްވިއްޔާ އަނެއްކާވެސް ތިންވަނަ ފަހަރަކު ބައްދަލުކުރަން އަންނަން ބޭނުން. އަންނައިރު އަދި އިތުރު ކަންކަން ފުރިހަމަވެގެން، އެ ކަންކަން ނިމުން ފާހަގަކުރުމަށް އައުމުގެ އުންމީދުގައި، އަޅުގަނޑު މިއަދު ތިޔަބޭފުޅުންނާ ވަކިވެލާނަން.
އަޅުގަނޑުގެ ދުޢާއަކީ، އަޅުގަނޑުމެން މިކުރާ މަސައްކަތްތަކުގައި اللهُ سُبْحَانَهُ وَتَعَالَى ބަރަކާތް ލައްވައި، ދިވެހިރާއްޖޭގެ ތަރައްޤީއަށް އަލިމަގެއް، އަލި އުޖާލާ ދުވަސްތަކެއް އަޅުގަނޑުމެންނަށް މިންވަރުކުރެއްވުން.
وَالسَّلَامُ عَلَيْكُمْ وَرَحْمَةُ اللهِ وَبَرَكَاتُه.