بســم اللّـه الرّحمـن الرّحيــم
الحمـد لِلّـه ربِّ العـالمـين، والصّـلاة والسّلام علـى خاتم الأنبياء وسيِّد المرسلين، وعلـى آلـه وأصـحابه أجمـعـين.
އާދެ، މިރޭގެ މި އުފާވެރި ޙަފްލާގައި އަޅުގަނޑުގެ އެންމެ ފުރަތަމަ ވާޖިބަކީ، މިއަހަރުގެ ޒުވާނުންގެ ދުވަހުގެ މުނާސަބަތުގައި، ރާއްޖޭގެ ލޮބުވެތި ޒުވާނުންނަށް އަޅުގަނޑުގެ ހިތުގެ އިޚްލާޞްތެރިކަމާއި ލޯތްބާއެކީގައި، ތަހުނިޔާއާއި މުބާރަކްބާދީ ފޮނުވުން. ހަމަ އެއާއެކީގައި، އަޅުގަނޑުމެންގެ ޒުވާނުންގެ ތަރައްޤީއާއި ކުޅިވަރާބެހޭ ދާއިރާގެ އިސްބޭފުޅެއްގެ ގޮތުގައި ޙަރަކާތްތެރިވެވަޑައިގަންނަވަމުން ގެންދަވާ، މިނިސްޓަރ އޮފް ޔޫތު ޑިވެލޮޕްމަންޓް އެންޑް ސްޕޯޓްސް ޑޮކްޓަރ މުޙައްމަދު ޒާހިރު ޙުސައިނަށާއި، އެ މިނިސްޓްރީގެ ވެރިންނަށާއި، މުވައްޒަފުންނަށްވެސް ދުވަހުގެ ހެޔޮއެދުމާއި ތަހުނިޔާ ރައްދުކުރަން. މީގެއިތުރުން، ރާއްޖޭގެ އެކި ކަންކޮޅުތަކުގައި، ޒުވާނުންނާބެހޭ އެކިކަންކަމުގައި ޙަރަކާތްތެރިވެވަޑައިގަންނަވާ، ހުރިހާ ކްލަބް ޖަމްޢިއްޔާތަކަށާއި، އެހެނިހެން ފަރާތްތަކަށްވެސް މިއަދުގެ މުނާސަބަތުގައި އާދެ، 2004 ވަނަ އަހަރުގެ ޒުވާނުންގެ ދުވަހުގެ މުނާސަބަތުގައި އިޚްލާޞްތެރި ތަހުނިޔާއާއި މުބާރަކްބާދީ ދަންނަވަން.
މިރޭގެ މި އުފާވެރި ހިތްގައިމު ބައްދަލުވުމުގައި، މި އަހަރުގެ ޒުވާނުންގެ ޤައުމީ އިނާމު ދެންމެ އެ ޙާޞިލްކުރެއްވި ހުރިހާ ބޭފުޅުންނަށް އަޅުގަނޑު ވަރަށް އިޚްލާޞްތެރިކަމާއެކު ތަހުނިޔާ ދަންނަވަން. އާދެ، އެ ހުރިހާ ބޭފުޅުންވެސް ދިވެހި ޒުވާނުންނަށްޓަކައި އެ ކޮށްދެއްވަނީ ވަރަށްބޮޑެތި ޚިދުމަތްތަކެއް. އަދި އެ ޚިދުމަތްތަކުގައި އެ ބޭފުޅުން ދެމިތިއްބެވުމަކީ ޝައްކެއްނެތްގޮތުގައި، ދިވެހި ޒުވާނުންނަށާއި ދިވެހި ޤައުމަށް ވަރަށްބޮޑަށް ފައިދާކުރާނެ ކަމެއް. އެހެންކަމުން، އެ ބޭފުޅުން، އެ ބޭފުޅުންގެ މަސައްކަތްޕުޅުގައި ކުރިޔަށް ވަޑައިގަތުމަށް އަޅުގަނޑު ހިތްވަރު އަރުވަން. ހަމަ އެއާއެކީގައި، މިރޭ އިނާމު ލިބިވަޑައިގެންނެވި ބޭފުޅުން ނޫނަސް، ރާއްޖޭގައި ޒުވާނުންގެ ތަރައްޤީއަށާއި، ޒުވާނުންގެ ކުރިއެރުމަށް މަސައްކަތްކުރައްވާ ވަރަށްގިނަ ފަރާތްތަކެއްވާތީ، އެ ހުރިހާ ބޭފުޅުންނާއި ފަރާތްތަކުންވެސް އެ ކުރައްވާ މަސައްކަތްތަކުގައި ސާބިތުކަމާއެކު ކުރިޔަށް ވަޑައިގަތުމަށް އަޅުގަނޑު ހިތްވަރު އަރުވަން.
އާދެ، މި އަހަރުގެ ޒުވާނުންގެ ދުވަސް ރަސްމީގޮތުން މި ފާހަގަކުރެވެނީ މި ރަށުގައި. ހައްދުންމަތީ ފޮނަދޫގައި. އެހެންކަމުން، މިކަމަށްޓަކައި މި ރަށް ތައްޔާރުކުރެއްވުމުގައި މި ރަށުގެ ވެރިންނާއި، އަދި މި އަތޮޅުގެ ޢިއްޒަތްތެރި އަތޮޅުވެރިންނާއި، އަދި މި ރަށުގެ ކޮމިޓީތަކުގެ މެންބަރުންނާއި، އަދި އަވަށްއަވަށުގެ ބޭފުޅުންނާއި، ޒުވާނުންނާއި، ޢާންމު ރައްޔިތުން ވަރަށް ބޮޑެތި މަސައްކަތްތަކެއް ކުރައްވާފައިވާ ކަމަށް، ދެންމެ މިނިސްޓަރުގެ ވާހަކަފުޅުގައި ވިދާޅުވެއްޖެ. އަދި އަޅުގަނޑު މިތަނަށް އައުމުން، އޭނާ އެ ވިދާޅުވި ބަހުގެ ތެދުކަން އަޅުގަނޑަށް ވަރަށް ރަނގަޅަށް ފެނިގެން ހިނގައްޖެ. އެހެންވީމާ، މި އަތޮޅުގެ ރައްޔިތުންނާއި، މި އަތޮޅުގެ ވެރިން މިއަދަށްޓަކައި މި ރަށް ތައްޔާރުކުރައްވާފައިވާލެއް ފުރިހަމަކަމަށްޓަކައި، އެ ހުރިހާ ބޭފުޅުންނަށްވެސް އަޅުގަނޑު ހިތުގެ އެންމެ ފުންމިނުން ޝުކުރު ދަންނަވަން.
އާދެ، އަޅުގަނޑު ރާއްޖޭގެ ބައެއް އަތޮޅުތަކަށް މިކުރާ ދަތުރުގައި، ކޮޅުމަޑުލުގެ ބައެއް ރަށްރަށަށް ދިޔުމަށްފަހު މިއަދު އަޅުގަނޑު މިއައީ ހައްދުންމައްޗަށް. ހައްދުންމައްޗަށް އައުމާއެކީގައި، ހައްދުންމަތީގެ ރައްޔިތުންގެ ފަރާތުން އަޅުގަނޑަށް ވިދާޅުވި މަރުޙަބާއަށްޓަކައި، ރައްޔިތުންނަށް ޝުކުރު ދަންނަވަން އަޅުގަނޑު ބޭނުން. އާދެ، ޚާއްޞަކޮށް، މި އަތޮޅުގެ ޢިއްޒަތްތެރި އަތޮޅުވެރިޔާ އަލްފާޟިލް މޫސާ އަލީ ކަލޭފާނާއި އަދި އޭނާގެ ބެއްލެވުމުގެ ދަށުން އަތޮޅުއޮފީހުގައި ޙަރަކާތްތެރިވެވަޑައިގަންނަވާ ހުރިހާ މުވައްޒަފުންނާއި، ރަށްރަށުގެ ވެރިންނާއި، ރަށްރަށުގެ ކޮމިޓީތަކުގެ މެންބަރުންނާއި، ޒުވާނުންނާއި، ކިޔަވާކުދިންނާއި، ޢާންމު ރައްޔިތުން މިއަދު އަޅުގަނޑަށް މަރުޙަބާ ވިދާޅުވުމުގައި ވަރަށް ބޮޑަށް ޙަރަކާތްތެރިވެވަޑައިގެންފައިވާ ތަން އަޅުގަނޑަށް ފެނިފައި އޮތުމާއެކީގައި، ވަރަށް އުފަލާއެކު އެ ހުރިހާ ބޭފުޅުންނަށް އަޅުގަނޑު ޝުކުރު ދަންނަވަން.
އާދެ، ޒުވާނުންގެ ދުވަހުގެ މުނާސަބަތުގައި ބާއްވާ ރަސްމީ ޙަފްލާގައި، ޒުވާނުންނާ ބެހޭގޮތުން އެއްޗެއް ބުނުމަކީ އަޅުގަނޑުހިތުން ވަރަށް މުނާސިބު ކަމެއް.
އާދެ، އަޅުގަނޑު މިރޭ ޒުވާނުންނާ ބެހޭގޮތުން ދަންނަވާލަން ބޭނުންވާ އެންމެ މުހިންމު ވާހަކައަކީ، ޒުވާނުންނަކީ ޤައުމުގެ އާރާއި ބާރޭ ދަންނަވާލުން. އާދެ، މިއީ އަޅުގަނޑުހިތުން، އަޅުގަނޑުމެންގެ ތެރެއިން ހަމަ ކޮންމެ މީހަކުވެސް ޤަބޫލުކުރާނެ ޙަޤީޤަތެއް. ޤައުމަށް ބޭނުންވާނީ ޒުވާނުންގެ ހޫނު ލެޔާއި ތާޒާ ޚިޔާލު. ޒުވާނުންގެ ކެރުމާއި، ސާބިތުކަމާއި ޢަޒުމް. އާދެ، އަޅުގަނޑު މިހެން މި ދަންނަވަނީ، ފަހަރެއްގައިވެސް ހަރުމީހުންނާއި މުސްކުޅިންނަށް ބޭއިންޞާފުގެ ބަހެއް ބުނުމުގެ ގޮތަކުންނޫން. ޝައްކެއްނެތް، އަޅުގަނޑުމެންގެ ތެރޭގައި ދިރިއުޅެމުންދާ، ޒުވާން ނޫން މީހުން، އާދެ، ޒުވާނުންގެ މަރްޙަލާއަށްވުރެ ޢުމުރުގެ ގޮތުން ކުރިޔަށް ގޮސްފައިވާ މީހުން، ހަރުމީހުން، މުސްކުޅިން، މި މީހުންނަކީވެސް ޤައުމަށް ވަރަށް ބޭނުންތެރި ބައެއް. އެއީ، ހަރުމީހުންގެ ތަޖުރިބާއާއި ދުރުވިސްނުމަކީ، އެއާނުލައި އެއްވެސް ޤައުމަކަށް ކުރިޔަށް ފިޔަވަޅެއް އެޅޭނެ އެއްޗެއްނޫން. ޤައުމަށް ބޭނުންވަނީ ޤައުމުގައި ހިމެނޭ އެންމެންގެ ވިސްނުމާއި، ފިކުރާއި، ޚިޔާލާއި، މަސައްކަތް. އެހެންވީމާ، ޒުވާނުންގެ ހޫނު ލެޔާއި، ތާޒާ ޚިޔާލަށް ބޭނުންވާ ފަދައިން، ހަރުމީހުންނާއި މުސްކުޅިންގެ ދުރުވިސްނުމާއި، ތަޖުރިބާއަށްވެސް ޤައުމު ބޭނުންވޭ. މި ހުރިހާ ފަރާތެއް ގުޅިގެން އެކަށީގެންވާ ގޮތުގައި ޤައުމު ތަރައްޤީވަމުންދާނީ، އަދި ތަރައްޤީގެ މަސައްކަތުގައި ކާމިޔާބުކަމާއެކު އެ މަސައްކަތް ކުރިޔަށް ގެންދެވޭނީ.
އާދެ، އެހެންނަމަވެސް، މި މުނާސަބަތަކީ ޒުވާނުންގެ މުނާސަބަތެއް ކަމަށްވާތީ، ޒުވާނުންގެ ދައުރާ ބެހޭގޮތުން އެއްޗެއް ބުނުމަކީ، އަޅުގަނޑު ދެކޭގޮތުގައި ހަމަ އެންމެ ރަނގަޅު ކަމެއް. އެގޮތުން، އަޅުގަނޑު މި ދެންނެވީ ޒުވާނުންނަކީ ޤައުމުގެ އާރާއި ބާރު ކަމުގައި.
އާދެ، ދިވެހި ޤައުމު މިއަދު ބޭނުންވަނީ، ތަރައްޤީގެ ލަނޑުދަނޑިތައް ޙާޞިލްކުރުމުގައި ތަފާތު އެކި ދާއިރާތަކުން ޤައުމަށް ޚިދުމަތްކުރާނެ ހީވާގި، މުރާލި މުވާޠިނުންތަކެއް. އޭގެތެރޭގައި، ޒުވާނުންގެ ޙިއްޞާއަކީ ވަރަށް ބޮޑު އެއްޗެއް.
ޒުވާނުންނާ ބެހޭ، ސަރުކާރުގެ ސިޔާސަތު މިހާރުވާނީ އިޢުލާނުކޮށްފައި. އާދެ، އެ ސިޔާސަތަކީ، ޒުވާނުންނަށް އަބަދުވެސް ތަފާތު ދާއިރާތަކުން ކުރިޔަށްދިޔުމުގެ މަގު ތަނަވަސްކޮށްދީ، ތަޢުލީމާއި ވަޒީފާގެ ފުރުޞަތުތައް ހޯދައިދިނުން. އެހެންކަމުން، ކުރިޔަށް އޮތް ތާނގައި، ޒުވާނުންނަށް ތަޢުލީމާއި ވަޒީފާގެ އިތުރު ފުރުޞަތުތައް ހޯދައިދިނުމަށް ސަރުކާރުން ވަރަށްބޮޑަށް މަސައްކަތްކުރަމުން ގެންދާނެކަމުގެ ޔަޤީންކަން، އަޅުގަނޑު މިއަދުގެ ޒުވާނުންނަށް އަރުވަން.
އާދެ، މި ރޮނގުން މިހާރުވެސް ވަނީ ވަރަށްގިނަ ފިޔަވަޅުތަކެއް އެޅިފައި. އޭގެތެރޭގައި، މަތީ ތަޢުލީމާއި ތަމްރީނުގެ ފުރުޞަތު އިތުރުކުރުމަށްޓަކައި، ޑިޕާޓްމަންޓް އޮފް ހަޔަރ އެޑިއުކޭޝަން އެންޑް ޓްރޭނިންގގެ ނަމުގައި މިދިޔަ އަހަރު ވަނީ އާ ޑިޕާޓްމަންޓެއް އުފައްދާފައި. އަދި ތަމްރީނު ދިނުމާއި ހުނަރުވެރިކަން ތަރައްޤީކުރުމަށް އެހީވެދޭ، ޤައުމީ ފަންޑެއް މި އަހަރުގެ ތެރޭގައި ހުޅުވޭނެ ވާހަކަ އަޅުގަނޑު ވާނީ އިހަކަށްދުވަހުގެ ރިޔާސީބަޔާނުގައި ބުނެފައި. ހަމަ އޭގެއިތުރުން، 12 އަތޮޅެއްގެ އަތޮޅު ތަޢުލީމީ މަރުކަޒުގަޔާއި، 8 ރަށެއްގެ 8 ސްކޫލެއްގައި އެޑްވާންސްޑް ލެވެލަށް ކިޔަވައިދިނުމުގެ ފުރުޞަތު މި އަހަރު ހުޅުވޭނެ ކަމަށްވެސް އަޅުގަނޑުވާނީ، ރިޔާސީބަޔާނުގައި ހާމަކޮށްފައި. މިކަންކަމަކީ ޝައްކެއްނެތްގޮތުގައި، ޒުވާނުންގެ ތަރައްޤީއާއި ކުރިއެރުމަށް ވަރަށްބޮޑެތި އެހީތަކެއް ވެދޭނެ ކަންތައްތަކެއް. މީގެއިތުރުން، ރާއްޖޭގައި ތަޢުލީމާއި ހުނަރުވެރިކަން ތަރައްޤީކުރުމަށް ސަރުކާރުން ކުރަންޖެހޭ އެހެން މަސައްކަތްތައްވެސް މިގެންދަނީ ކުރަމުން. އަދި ކުރިޔަށް އޮތް ތާނގައި އިރާދަކުރެއްވިއްޔާ، މި ދެންނެވި ކަންތައްތަކުގެ އިތުރު ކަންތައްތައްވެސް ކުރެވެމުންދާނެ.
އާދެ، މިއާ ގުޅިގެން ދަންނަވާލަން ބޭނުންވަނީ، ރާއްޖެއަށް މިވަގުތު ކުރިމަތިވެފައިވާ އެންމެބޮޑު މައްސަލައަކީ، މަސްތުވާތަކެތީގެ މައްސަލަ ކަމުގައި. އާދެ، ފަހަރެއްގައިވެސް އަޅުގަނޑު އެހެން މި ދަންނަވަނީ އެއީ، ޒުވާނުންނާ މާ ޚާއްޞަ ގުޅުމެއްހުރި މައްސަލައެކޭ ބުނުމުގެ ބޭނުމެއްގައެއް ނޫން. އެހެންނަމަވެސް، ހިތާމައަކީ މަސްތުވާތަކެތީގެ ވަބާގައި ޖެހިގެން، އެކަމުގެ ގެއްލުން ލިބޭ މީހުންގެ ތެރެއިން ވަރަށްބޮޑު ނިސްބަތަކީ ޒުވާނުން ކަމުގައިވާކަން. އެކަމުގެ ގެއްލުމާއި، އެކަމުން ލިބޭ ހިތާމަ ޙިއްޞާކުރަން މި ޖެހެނީ އެ ޒުވާނުންނާއި، އެ ޒުވާނުންގެ ޢާއިލާތަކުން.
އާދެ، އެއްވެސް ޙާލެއްގައި ބަޔަކަށް އަދަބު ދިނުމަކީ، ސަރުކާރުން ކުރަން ބޭނުންވާ ކަމެއްނޫން. އަދަބު ދިނުމަކީ، މަޖުބޫރުން ކުރަންޖެހިފައި އޮންނަ ކަމެއް. އާދެ، އެއީ އިޞްލާޙު ކުރުމަށްޓަކައި، ޤައުމާއި މުޖުތަމަޢުގެ އިޞްލާޙަށްޓަކައި ކޮންމެ ޤައުމެއްގައިވެސް ހެދިފައިވާ ޤާނޫނުތަކަކާއި ޤަވާޢިދުތަކެއް ހުރޭ. އެ ޤާނޫނުތަކާއި ޤަވާޢިދުތަކަށް ޙުރްމަތްތެރިކޮށްހިތުމަކީ އެންމެންގެ ސަލާމަތަށްޓަކައި، މުޖުތަމަޢުން ކުރަންޖެހޭނެ ކަމެއް. އެންމެންވެސް ކުރަންޖެހޭނެ ކަމެއް. އެހެންވީމާ، ކޮންމެ ސަބަބެއް ދިމާވެގެން ނަމަވެސް، ޤާނޫނާ ޚިލާފަށް ޢަމަލުކުރާ މީހުންނާ ދޭތެރޭގައި، ކޮންމެ ޤައުމެއްގައިވެސް އޮންނަނީ ޤާނޫނީ ފިޔަވަޅު އަޅަންޖެހިފައި. އެގޮތުން، ދިވެހިރާއްޖޭގައިވެސް މަސްތުވާތަކެތި ބޭނުންކުރާ މީހުންނާ ދޭތެރޭގައި، އަދި ޚާއްޞަކޮށް، މަސްތުވާތަކެތި އެތެރެކޮށް، އެކަމުގެ ވިޔަފާރިކުރާ މީހުންނާ ދޭތެރޭގައި ހަރުކަށި ފިޔަވަޅު އަޅަންޖެހެނީ. އެއީ، ދުނިޔޭގެ ހުރިހާ ތަނެއްގައިވެސް އެކަން ކުރާގޮތް. އެކަން ނުކޮށް ފަރުޖެއްސޭކަށްނޯވޭ.
އެހެންނަމަވެސް، އަޅުގަނޑު ދަންނަވަން މިއުޅޭ ވާހަކައަކީ، އެއްވެސް މީހަކަށް އަދަބު ދިނުމަކީ ސަރުކާރުން ބޭނުންވާ ކަމެއް ނޫނޭ. އެއްވެސް މީހެއް، އެއްވެސް އަދަބެއްގެ ޙުކުމުގައި ގިނަދުވަހު ހުރުމަކީވެސް ބޭނުންވާ ކަމެއް ނޫނޭ. ސަރުކާރުން ބޭނުންވަނީ، އެންމެންނަށްވެސް ހަމަޖެހޭ، ބާއްޖަވެރި، އުފާވެރި ދިރިއުޅުމެއް ހޯދައިދޭން. އެހެންނަމަވެސް، މި ދެންނެވި ކަހަލަ ހަމަޖެހޭ އުފާވެރި ދިރިއުޅުމެއް ހޯދުމަށް ހުރަސްއެޅޭ ކަންތައްތަކެއް، ނުވަތަ ހުރަސްއަޅާ ބަޔަކު، ކޮންމެ މުޖުތަމަޢެއްގައިވެސް އުޅޭ. އެހެންވީމާ، އެ ކަންތައްތައް ނައްތާލުމަށްޓަކައި މަސައްކަތްކުރުމަކީ، މުޅި މުޖުތަމަޢުގެ ހެވާއި ލާބަޔާއި މަންފާއަށްޓަކައި ކޮންމެ ޤައުމަކުންވެސް ކުރާ އަދި ކުރަންޖެހޭ ކަމެއް.
އެގޮތުން، މަސްތުވާތަކެއްޗާ ދެކޮޅަށް ހިންގޭ ޤައުމީ ކެމްޕެއިނެއް ހިންގުމަށް ސަރުކާރުން މިހާރުވަނީ ގަސްތުކޮށްފައި. ހަމައެކަނި ގަސްތުކޮށްފައެއް ނޫން. އެ ކެމްޕެއިންގެ މަސައްކަތް މިހާރުވަނީ ފެށިފައި. މަސްތުވާތަކެތީގެ ވަބާއިން ދިވެހި ޤައުމު ސަލާމަތް ކުރުމަށްޓަކައި މި ކެމްޕެއިން މި ހިންގެނީ. މި ކެމްޕެއިން ހިންގުމުގައި، ރާއްޖޭގެ ހުރިހާ ޒުވާނުންގެ އެހީތެރިކަމާއި އެއްބާރުލުން ސަރުކާރަށް ވަރަށްބޮޑަށް ބޭނުންވޭ.
އާދެ، އަޅުގަނޑުގެ ވާހަކަކޮޅު ނިންމާލެވެން އަންނަނީ، އަދި އިތުރު އެއްވާހަކަ ދަންނަވާލާފައި. އާދެ، އެއީ އަޅުގަނޑުމެންގެ ރާއްޖޭގެ ތަރައްޤީއަށް ވަރަށްބޮޑެތި މަސައްކަތްތަކެއް ކުރެވެމުންދާ ވާހަކަ. ސަރުކާރުންވެސް ވަރަށް މުހިންމު މަޝްރޫޢުތަކެއް ހިންގަމުން އެބަ ގެންދޭ. ހަމަ އެއާއެކީގައި، އަމިއްލަ ފަރާތްތަކުންވެސް ރާއްޖޭގެ ތަރައްޤީއާއި، ރާއްޖޭގެ ކުރިއެރުމަށްޓަކައި ވަރަށްބޮޑެތި މަސައްކަތްތަކެއް ހިންގަވަމުން ގެންދަވާ. އޭގެތެރޭގައި، އަޅުގަނޑުމެންގެ އިޤްތިޞާދީ ދާއިރާގެ ތަފާތު މަސައްކަތްތައް ހިމެނޭ. ފަތުރުވެރިކަމުގެ ދާއިރާގެ މަސައްކަތްތައް، ވިޔަފާރީގެ ދާއިރާގެ މަސައްކަތްތައް، ހުނަރުވެރިކަން ތަރައްޤީކުރުމުގެ މަސައްކަތްތައް، މަސައްކަތްތެރިކަން ކުރިއަރުވައި ތަރައްޤީކުރުމުގެ މަސައްކަތްތައް. މިބާވަތުގެ ވަރަށްގިނަ ކަންތައްތަކެއް ސަރުކާރާއި، އަމިއްލަ ފަރާތްތަކުން ކުރަމުން އެބަގެންދޭ.
މި ކަންތައްތަކުގެ ހެޔޮ ނަތީޖާވެސް މިދަނީ ފެންނަމުން. އެހެންނަމަވެސް، ތަރައްޤީއަކީ ހުއްޓުމެއް އަންނާނެ އެއްޗެއް ނޫން. އެއް މަރްޙަލާއަކަށް ދެވުމަށްފަހުގައި، އެ މަރްޙަލާ ކަޑައްތުކޮށްފައި، ދެންއޮތް މަރްޙަލާއަކަށް ދާންޖެހޭ ކަމެއް. އެހެންވީމާ، އަޅުގަނޑުމެންގެ ޤައުމުގެ ތަރައްޤީގައި މި މަސައްކަތްތައް އިތުރަށް ކުރިޔަށް ގެންދަން އެބަޖެހޭ. ސަރުކާރުންވެސް އިތުރު މަސައްކަތް ކުރަން އެބަޖެހޭ. އަދި އަމިއްލަ ފަރާތްތަކުންވެސް އިތުރު މަސައްކަތް ކުރަން އެބަޖެހޭ.
އަޅުގަނޑުމެން ސަރުކާރުގެ ފަރާތުން މި ކުރާ މަސައްކަތްތަކުގައި، ސަރުކާރުގެ ހުރިހާ ވަޒީރުންވެސް ޢަމަލީގޮތުން ވަރަށް އިޚްލާޞްތެރިކަމާއެކު އެ މަސައްކަތުގައި ބައިވެރިވެވަޑައިގެންދެއްވާ. އެހެންވީމާ، ރާއްޖޭގެ ހުރިހާ ވަޒީރުންނަށް، މި ފުރުޞަތުގައި އަޅުގަނޑު ޝުކުރު ދަންނަވާލަން ބޭނުން. އަދި ޚާއްޞަކޮށް، އަޅުގަނޑުމެން މިތިބީ މިހާރު، ރާއްޖޭގެ އަތޮޅެއްގައި ކަމަށްވާތީ، ރާއްޖޭގެ އަތޮޅުތައް ކުރިއަރުވައި ތަރައްޤީ ކުރެއްވުމަށްޓަކައި، މިނިސްޓަރ އޮފް އެޓޮލްސް ޑިވެލޮޕްމަންޓް އަލްއުސްތާޛު ޢަބްދުﷲ ޙަމީދު ކެނޑިނޭޅި ކުރައްވާ މަސައްކަތްޕުޅުތަކުގެ އަގުވަޒަންކޮށް، އެ މަނިކުފާނަށް އަޅުގަނޑު ވަރަށް ޚާއްޞަ ޝުކުރެއް ދަންނަވަން. ހަމަ އެފަދައިން، ޒުވާނުންގެ ކަންތައްތައް ތަރައްޤީކޮށް ކުރިއެރުވުމަށްޓަކައި، ޒުވާނުންގެ ތަރައްޤީއާއި ކުޅިވަރާބެހޭ ވަޒީރު ޑޮކްޓަރ މުޙަންމަދު ޒާހިރު ޙުސައިން ކުރައްވާ މަސައްކަތްޕުޅުތަކަށްޓަކައި، އެ މަނިކުފާނަށްވެސް އަޅުގަނޑު ވަރަށް އިޚްލާޞްތެރިކަމާއެކު ޝުކުރު ދަންނަވަން. އާދެ، ޒާހިރު ޙުސައިން މިކަމުގައި ވަރަށް ޚާއްޞަ ޝައުޤުވެރިކަމެއް ބަހައްޓަވާ. ފަހަރެއްގައި އެއީ، އޭނާއަކީވެސް ޒުވާނަކަށްވީތީ އެހެންވަނީ ކަމަށްވެސް ވެދާނެ. އެހެންނަމަވެސް، އަޅުގަނޑުމެންނަށް މި ފެންނަނީ އޭނާ ކުރައްވާ މަސައްކަތްތަކުގެ ނަތީޖާއާއި، އޭގެ މޭވާ، ރާއްޖޭގެ ވަރަށްގިނަ ޒުވާނުންނަށް ލިބެމުންދަނިކޮށް. އެހެންވީމާ، އެކަމަށްޓަކައި އަޅުގަނޑު ވަރަށްބޮޑަށް އުފާކޮށް، ޒާހިރު ޙުސައިނަށާއި، އޭނާގެ ބެއްލެވުމުގެ ދަށުން އެ މިނިސްޓްރީ ހިންގަވާ ވެރިންނަށާއި، އަދި ޒުވާނުންގެ ކަންތައްތަކުގައި ޙަރަކާތްތެރިވެވަޑައިގަންނަވާ ހުރިހާ ބޭފުޅުންނަށްވެސް އަޅުގަނޑު މިރޭ ޝުކުރު ދަންނަވަން ބޭނުން.
އާދެ، ޒުވާނުންގެ ދުވަހުގެ ރަސްމީ އިޙްތިފާލުގައި މިރޭ ބައިވެރިވުމަކީ، އަޅުގަނޑަށް ލިބުނު ވަރަށްބޮޑު އުފަލެއް. އަޅުގަނޑުގެ ވަގުތު ތަންދިން މިންވަރަކުން ޒުވާނުންގެ ދުވަހުގެ ރަސްމީ އިޙްތިފާލުތަކުގައި މި އަންނަނީ ބައިވެރިވަމުން. ހަނދުމަފުޅު ހުންނާނެފަދައިން، 1999 ވަނަ އަހަރު މި އިޙްތިފާލު އޮތީ ހއ. ދިއްދޫގައި. އެތަނަށް ދިޔުމުގެ އުފަލާއި ޝަރަފް އަޅުގަނޑަށް ލިބުނު. އަދި ޒުވާނުންނާ ބައްދަލުކޮށް، މުޚާޠަބުކޮށް، އަޅުގަނޑަށް ފެނުނު ޚިޔާލުތަކެއް ދަންނަވާލުމުގެ އުފާވެސް އަޅުގަނޑަށް ލިބުނު.
އެހެންވީމާ، މިރޭވެސް އެފަދަ މަތިވެރި އުފަލެއް އަޅުގަނޑަށް އިޙްސާސްވާތީ، މިރޭ މިތަނަށްއައިސް މި ޙަފްލާގައި ބައިވެރިވުމަށް އަޅުގަނޑަށް ދަޢުވަތު ދެއްވި ކަމަށްޓަކައި، މިނިސްޓަރ އޮފް ޔޫތު ޑިވެލޮޕްމަންޓް އެންޑް ސްޕޯޓްސް ޑޮކްޓަރ މުޙަންމަދު ޒާހިރު ޙުސައިނަށާއި، އެ މިނިސްޓްރީގެ ވެރިންނަށް އަޅުގަނޑު އިޚްލާޞްތެރިކަމާއެކު ޝުކުރު ދަންނަވަން.
އާދެ، އަޅުގަނޑުގެ ދުޢާއަކީ، اللّـه سبحـانـه وتعـالى އަޅުގަނޑުމެންނަށް އަބަދުވެސް ހެޔޮވިސްނުމާއި، ހިތްވަރާއި، ސާބިތުކަން ދެއްވުން. މާތްވެގެންވާ އިސްލާމްދީނުގެ ސާފުސީދާ ތެދުމަގުގައި ފައިތިލަ ސާބިތުކޮށްގެން ކުރިއަށްދިޔުމުގެ ތައުފީޤު އެންމެހާ ދިވެހިންނަށް ދެއްވުން. ހަމައެހެންމެ، އަޅުގަނޑުމެންގެ ޤައުމުގެ ތަރައްޤީގައި ޙަރަކާތްތެރިވާ ހުރިހާ ފަރާތްތަކަކުން އެ ކުރައްވާ މަސައްކަތްތަކުގައި އެކަލާނގެ ބަރަކާތްލެއްވުން. އޭގެއިތުރުން، ދެން ހަމައެއާއެކީގައި، ދިވެހި ޤައުމުގެ ޒުވާނުން އެއްދުވަހުން އަނެއްދުވަހަށް ތަރައްޤީވެ، އެ މީހުންގެ ފަރާތުން ޤައުމަށާއި މުޖްތަމަޢަށް ލިބޭ ފައިދާތައް އިތުރުވެގެންދިޔުމަކީ ޝައްކެއްނެތްގޮތުގައި، އަޅުގަނޑުމެން އެންމެން އެދޭ ކަމަކަށްވާތީ، އެކަމުގައިވެސް މާތްﷲގެ ހެޔޮ ތައުފީޤު އަޅުގަނޑުމެން އެދެން.
والسّــلام عليــكم ورحـمــة اللّـه وبـركاتـه.