بِسْمِ ٱللّٰهِ ٱلرَّحْمٰنِ ٱلرَّحِيمِ
اَلْحَمْدُ للَّهِ رَبِّ الْعاَلَمِينْ، وَالصَّلاَة وَالسَّلاَمُ عَلَى رَسُولِ ٱللَّهِ وَعَلَى آلهِ وَصَحْبِهِ أَجْمَعِينْ.
އުލިގަމު ކައުންސިލްގެ ރައީސް އަދި ކައުންސިލަރުންނާއި، ޑަބްލިޔު.ޑީ.ސީ.އާއި، މުއައްސަސާތަކުގެ ވެރިން، ދާއިރާގެ ޢިއްޒަތްތެރި މަޖިލިސް މެންބަރު، މި ރަށުގެ ޚިދުމަތްތެރި އިސް ރަށްވެހިން، އަދި ސްކޫލް ދަރިވަރުންނާއި، ރަށުގެ ލޮބުވެތި އެންމެހައި ރައްޔިތުން، އަޅުގަނޑާ އެކުގައި ދަތުރުކުރަމުންދާ، ވަފުދުގެ އެންމެހައި ވަޒީރުންނާއި، ކުންފުނިތަކުގެ ވެރިންނާއި، ޢިއްޒަތްތެރި މަޖިލިސް މެންބަރުން، މި ޖަލްސާ ބައްލަވަމުން ގެންދަވާ އަދި އަޑުއައްސަވަމުން ގެންދަވާ ލޮބުވެތި އެންމެހައި ރައްޔިތުން؛
السَّلامُ عَلَيْكُم ورَحْمَةُ اللهِ وَبَرَكاتُهُ.
އާދެ، މި ދަތުރުގައި، މި ރަށަށް އަޅުގަނޑުމެންނަށް އާދެވުމުން ތިޔަބޭފުޅުން ވަޑައިގެން، ވިދާޅުވި ހޫނު މަރުޙަބާއަށްޓަކައި، އަޅުގަނޑުގެ ހިތުގެ އެންމެ ފުންމިނުން ތިޔަބޭފުޅުންނަށް ވަރަށް ބޮޑަށް ޝުކުރު ދަންނަވަން. ވަރަށް ބޮޑަށް ޝުކުރިއްޔާ!
އާދެ، އަޅުގަނޑު ކޮންމެ ރަށެއްގައިވެސް ރައްޔިތުންނާ ބައްދަލުކުރުމުގެ ކުރިން، ކައުންސިލް އަދި މުއައްސަސާތަކާ އެކީގައި ބައްދަލުވުން ބާއްވަން. އަދި އަޅުގަނޑާ އެކީގައި، ރަށުގެ ތަރައްޤީއާ ގުޅިފައިވާ އެކި ދާއިރާތަކުގެ ވަޒީރުންނާއި، ކުންފުނިތަކުގެ ވެރިން ބައިވެރިކޮށް، ރަށުގެ ތަރައްޤީއަށް ހުންނަ ކަންކަމުގައި، ކުރަންޖެހިފައި ހުރި ކަންކަމުގައި، ވާހަކަ ދައްކައި، މަޝްވަރާ ކުރަން. އާދެ، އެގޮތުން، މި ރަށުގެވެސް މިހިރަ ކަންކަމާ ބެހޭގޮތުން، އަޅުގަނޑުމެން ވާނީ މިއަދު ވާހަކަ ދައްކައި، ކަންކަމުގައި މަޝްވަރާތައް ކޮށްފައި.
މި އަހަރުގެ ބަޖެޓުގެ ތެރެއިން، މިގޮތަށް މި ރަށުގައި ކުރަންހުރި ގިނަ ކަންތައްތަކެއް ކޮށްދިނުމަށް އަޅުގަނޑު ވާނީ ކަނޑައަޅައި، ޕްލޭންކޮށް ނިންމާފައި. އެގޮތުން ބަލާއިރުގައި، އެންމެ މުހިންމު ކަމަކަށް އަޅުގަނޑަށް ގަބޫލުކުރެވޭ ގޮތުގައި، ރައްޔިތުންގެ ކިބައިން، ރައްޔިތުން އެދިވަޑައިގަންނަވާ އެންމެ ބޮޑު ކަމަކަށް އޮތީ، ޞިއްޙީ ޚިދުމަތުގެ ކަންތައް. ޞިއްޙީ މަރުކަޒުގެ ޖާގައާއި، އަދި އެތަނުގެ ޙާލަތާއި، އަދި ވަސީލަތްތަކާއި، މި ހުރިހާ ކަމެއް، ވަރަށް އާދައިގެ ގޮތަކަށް ކުޑަކޮށް ހުރީ. އަޅުގަނޑު މި ދަތުރުގައި އެންމެ މުހިންމު ވާހަކައެއް ގޮތުގައި ތިޔަބޭފުޅުންނަށް ދަންނަވާލަން އޮތް ވާހަކައަކީ، އިރާދަކުރެއްވިއްޔާ މިކަން ނިމުމަކަށް ގެނެސްދީ، މި ޙާލަތު ބަދަލުކޮށްދީ، އިރާދަކުރެއްވިއްޔާ މި ރަށުގައި، ރަނގަޅު ފެންވަރުގެ ޞިއްޙީ މަރުކަޒެއް އެޅުމުގެ މަސައްކަތް ވަރަށް އަވަހަށް ފަށާނެ ވާހަކަ. އެގޮތުން، އެމް.ޓީ.ސީ.ސީ.އާ އެކީގައި ވަރަށް އަވަހަށް ސޮއިކޮށް، ވީހާވެސް އަވަހަކަށް މޮބިލައިޒް ކުރެވި، މަސައްކަތްތައް ފަށާނަން. އާދެ، އަޅުގަނޑު އުންމީދު ކުރަނީ، ޢަމަލީ މަސައްކަތް ރަމަޟާން މަސް ނިމޭ ހިސާބުން ފެށިގެން ދާނެ ކަމަށް. އެހެންވީމާ، އެ މަސައްކަތް އެގޮތަށް ފެށިގެން، ބާރު ސްޕީޑުގައި ކުރިއަށް ގެންދެވޭނެ.
ހަމަ އެއާއެކީގައި، އެހެނިހެން ދާއިރާތަކަށްވެސް ދިމާވެފައި ހުރި ދަތިތައް ޙައްލުކޮށްދިނުމުގެ ކަންކަން އަޅުގަނޑުމެން ކުރާނަން. ބޮޑެތި މަޝްރޫޢުތަކަށް ބަލާއިރުގައި، ބަނދަރުގެ މަސައްކަތް އެބަ ހިނގާ، ތަންކޮޅެއް ލަސްކޮށްވިޔަސް އެބަ ހިނގާ. އެ މައްސަލަ ޙައްލުކުރާއިރުގައި، މި ރަށުގައި މިހާރު އޮތް ޖާގަ، ބަނދަރުގައި އޮތް ޖާގައިގެ ތެރޭގައިވެސް އެބަހުރި، ޙައްލުކުރަން ޖެހިފައި ހުރި ކަންކަން. ޚާއްޞަކޮށް، އެއްގަމު ތޮށި. އެއްގަމު ތޮށީގެ ޙާލަތު ވަރަށް ދަށް. އަޅުގަނޑު އެމް.ޓީ.ސީ.ސީ.ގައި މިއަދު، ދަންނަވާފައި އޮންނާނެ، ބަނދަރުގައި މިހާރު ހިނގާ އެކްސްޓެންޝަން މަސައްކަތްތައް ނިންމާފައި، މިހާރުގެ ބަނދަރުގެ އެއްގަމު ތޮށިވެސް ނިންމާފައި ކަމަށް މަސައްކަތް ނިންމާލަންވާނީ. އެހެންވީމާ، އެގޮތަށް އެކަން ކުރިއަށްދާނީ.
އާދެ، ކުނި މެނޭޖް ކުރުމަކީ، މި އަހަރުގެ ނިޔަލަށް މުޅި ރާއްޖޭގައި އެކީގައި ޙައްލުކުރަން އަޅުގަނޑުމެން ނިންމާފައި އޮތް ކަމެއް. މިކަމުގެ އެކިކަހަލަ މައްސަލަ، އެކި ރަށްރަށުގައި ހުރީ. މި ރަށުގައި މިއޮތީ، މި އަތޮޅުގެ ގިނަ ރަށްތަކުގައި އޮތް މައްސަލައެއް. ދެން އެކަން އަޅުގަނޑު މިއައީ، ކޮންމެ ރަށެއްގައިވެސް ދަންނަވަމުން. މިދިޔަ ސަރުކާރުން އޮތީ، ހަމަޖެހިފައި އޮތް ބޭރުގެ ފަންޑެއްގެ ތެރެއިން ބަޔަކު ހޮވައި، 21 ރަށެއްގެ މަސައްކަތް ޙަވާލުކޮށްފައި. އޭގެތެރޭގައި، މި ރަށްވެސް ހިމެނޭ. ދެން މިހާރު އެކަން އަޅުގަނޑުމެން ސޯޓްއައުޓްކޮށް، އިރާދަކުރެއްވިއްޔާ ޢަމަލީ މަސައްކަތް އަޅުގަނޑުމެން ފަށާނަން. އެ ކުންފުނި އަތުން ނަގައި، އެހެން ބަޔަކާ ޙަވާލުކޮށްގެންވިޔަސް، އެ އޮންނަ އުޞޫލުގެ ތެރެއިން. ކޮންމެގޮތެއްވިޔަސް، ބޭރުގެ ފަންޑެޑް ޕްރޮޖެކްޓެއްވީމާ، ސަރުކާރުން ފޮލޯކުރަންޖެހޭ، އެ އޮންނަ އިންޓަރނޭޝަނަލް ޕްރޮކިއުމަންޓް ގައިޑްލައިންތަކެއް. ކޮންމެގޮތެއްވިޔަސް، އެ މަޝްރޫޢު ކުރިއަށް ގެންދިޔުން އެއީ، ވަރަށް މުހިންމު ކަމެއް. އެހެންވީމާ، ކުނި މެނޭޖް ކުރުމުގެ ސެންޓަރުގެ ޢަމަލީ މަސައްކަތާ ހިސާބަށް، މާލަސްތަކެއްނުވެ އަޅުގަނޑުމެން ވާޞިލުކޮށްދޭނަން. އިރާދަކުރެއްވިއްޔާ އެކަން އެގޮތަށް އަޅުގަނޑުމެން ކުރިއަށް ގެންދާނަން.
ދެން، ބަލައިލާއިރުގައި ކުޅިވަރުގެ ދާއިރާގައި، މި އަހަރުގެ ތެރޭގައި ވަރަށް ގިނަ މަސައްކަތްތަކެއް ކުރަން އަޅުގަނޑު ބަޖެޓުގައި ވާނީ ކަނޑައަޅާފައި. މި ރަށަށް ބަލާއިރުގައި، މި ރަށުގައި ބޮޑު ފުޓްބޯޅަ ދަނޑުގެ މަސައްކަތް، ބަޔަކާ ހަވާލުކުރެވިގެން ހިނގާ މަސައްކަތެއް. ނިމޭއިރުގައި އެ މަޝްރޫޢަކު ނެތް، މުޅި ދަނޑަށް ބޭނުންވާ ހުރިހާ ކަމެއް ހިމެނިފައެއް. މިދިޔަ ސަރުކާރުން ގިނައިން ދަނޑުތައް ޙަވާލުކޮށްފައި ހުރީ މިކަހަލަ ގޮތަކަށް. ދަނޑުގެ ޓާރފްއެޅުން ކޮންމެވެސް ބަޔަކަށް، ފެންސުޖެހުން އެހެން ބަޔަކަށް، ލައިޓް ހަރުކުރުން އެހެން ބަޔަކަށް. މިހެންގޮސް ބައިބަޔަށް ބަހާލާފައި ހުރުމުގެ ސަބަބުން، އެއްވެސް މަޝްރޫޢެއް އެކީގައި، ދާގޮތަށްގޮސް ނިންމޭކަހަލަ ގޮތަކަށް ނޫން އޮތީކީ. އަޅުގަނޑުމެން މިހާރު ވާނީ، އެކަމަށްވެސް ސިޔާސަތެއް ކަނޑައަޅާފައި. ދަނޑެއްވިއްޔާ، ޙަވާލުކުރެވޭ ބަޔަކު ހުރިހާ ކަމެއް ކޮށް ނިންމާގޮތަށް. އޭރުން ދަނޑުގެ ޓާރފްއެޅުން ކަމުގައިވިޔަސް، ވަށާފާރު ރާނައި، ފެންސު ޖެހުން ކަމުގައިވިޔަސް، ލައިޓް ހަރުކުރުން ކަމުގައިވިޔަސް، ރޮސްޓްރަމް ހެދުން ކަމުގައިވިޔަސް، އެ ހުންނަންޖެހޭ ހުރިހާ ކަމެއް އެކީގައި ނިމޭގޮތަށް، ފުލް ޕްރޮޖެކްޓް ހަވާލުކުރުން. ދެން އޮތްތާނގައި، ކުރިއަށް އޮތްތާ، މި އަހަރު ތެރޭގައި އަޅުގަނޑުމެން މަޝްރޫޢުތައް ހަވާލުކުރާނީ. މިގޮތަށް، މިހެން ހިނގަހިނގާ ހުރި މަޝްރޫޢުތަކުގައިވެސް، އަޅުގަނޑުމެން މި ބައިތައް އިތުރުކުރާނަން.
އެހެންވީމާ، މި ރަށުގައި ތިޔަބޭފުޅުންގެ މި ދަނޑު ނިމޭއިރުގައި، ފެންސު ޖެހިގެންދާނެ، އަދި ލައިޓްވެސް ހަރުކުރެވިގެންދާނެ. އެކަމަކު އެ މަސައްކަތް އެހެން ބަޔަކާ އަޅުގަނޑުމެން ޙަވާލުކުރަން ޖެހޭނީ. މިހާރު ހަދަމުންދާ ކުންފުނި ލައްވައެއް ނުކުރެވޭނެ. އެހެންވީމާ، މި ރަށަށް މޮބިލައިޒް ވެފައި އޮތް، ސަރުކާރުގެ ކުންފުންޏެއް މެދުވެރިކޮށް، އެއީ، އެމް.ޓީ.ސީ.ސީ. މިވަގުތު މިތާއޮތީ. އެހެންވީމާ، އެމް.ޓީ.ސީ.ސީ. މެދުވެރިކޮށް، ސަރުކާރުގެ ނިޒާމުގެ ތެރެއިން އަޅުގަނޑުމެން އެކަން ހަމަޖައްސާނަން.
ސަރުކާރުން މިހާރު ނިންމާފައި މިއޮތީ، ސަރުކާރުގެ ކޮންމެވެސް ކުންފުންޏެއް، ސަރުކާރުގެ ޙިއްޞާ އޮންނަ، ނޫނީވިއްޔާ ހަންޑްރެޑް ޕަސެންޓް ސަރުކާރުގެ ކުންފުންޏެއް، ރަށެއްގައި މޮބިލައިޒް ކުރެވިފައި އޮވެއްޖިއްޔާ، އެފަރާތެއް މެދުވެރިކޮށް، ވީހާވެސް އަވަހަކަށް، މަސައްކަތްތައް ހިނގާގޮތް ހެދުމަށް. ރަށްރަށުގައި ހުއްޓިފައި ހުރި ހުރިހާ މަޝްރޫޢުތަކެއް ރީ-ސްޓާޓް ކުރުމުގެ މަސައްކަތް، މިހާރު ވަރަށް ބާރު ސްޕީޑްގައި، އިދާރީ ގޮތުން ނިންމަންޖެހޭ ހުރިހާ ކަމެއް އެ ނިޒާމުގެ ތެރެއިން އެބަ ހިނގާ. އޭގެތެރޭގައި އެބަ ހިމެނޭ، ކޮންޓްރެކްޓްގައި އޮންނަ އުޞޫލުގެ ތެރެއިން، ޓަރމިނޭޓް ކުރަންޖެހޭ ފަރާތްތަކުން ޓަރމިނޭޓްކޮށް، މި ދެންނެވިހެން މަސައްކަތް ހިނގާގޮތަށް، ސަރުކާރުގެ ކުންފުންޏަކާ ހަވާލުކުރުން. އެ ކަންތައްތައް އެޓަރނީ ޖެނެރަލްގެ އޮފީހާއި، ކަމާބެހޭ މިނިސްޓްރީއާއި، ކަމާބެހޭ ކުންފުންޏާ އެކީގައި ކުރިއަށްދާނެ.
އެހެންވީމާ، މިކަހަލަ ވަރަށްގިނަ މަސައްކަތްތަކެއް، ކުރިއަށް މިއޮތް ދުވަސްތަކުގައި ހިނގާނެ. މިއީ ހަމައެކަނި މި ރަށުގައި ދަންނަވަން އޮތް ވާހަކައެއް ނޫންވީމާ، ހަމަ ހުރިހާ ރަށަކާވެސް ގުޅިފައި އޮތް ވާހަކައެއްވީމާ، މި ތަފްޞީލަށް އަޅުގަނޑު މިދިޔައީ. ކުރިއަށް އޮތް ދުވަސްތަކުގައި، މިގޮތަށް ބަލާއިރުގައި، ކުޅިވަރުގެ މަޝްރޫޢުތައް އެކަންޏެއްނޫން. ދެންމެ މި ފާހަގަކުރީ ކުނި މެނޭޖްކުރުމުގެ މަޝްރޫޢުވެސް.
އެއް ކުންފުންޏަކަށް 21 މަޝްރޫޢު ދީފައި. އެންމެ ރަށެއްގައިވެސް ނުހިނގާ. އަދި އެޑްވާންސް ޕޭމަންޓްވެސް ދީފައި އޮތީ. އެހެން ހުއްޓިފައި ހުރީ. ހެލްތު ދާއިރާގައިވެސް އެބަހުރި، އެއް ކުންފުންޏަކަށް ވަރަށްގިނަ މަޝްރޫޢުތައް ދީފައި. އެކިވަރުވަރުން ފައިސާ ދީފައި. މިދިޔަ އަހަރުގެ ބަޖެޓުގެ ތެރެއިން އެކަންކަން ކުރެވޭގޮތަކަށް ނެތް ބަޖެޓުގައި ފައިސާ ހިމަނާފައެއް. އެހެންވެގެން، އަޅުގަނޑުމެންނަށް މި ނިމުނު އަހަރުގައި އެކަންކަން ނުކުރެވިދިޔަ ރަށްރަށް ގިނައީ.
ހަމަ އެގޮތަށް، ތަޢުލީމީ ދާއިރާގައިވެސް، ސްކޫލްތައްވެސް އެބަހުރި މިގޮތަށް ބަންޑްލް ކޮށްލާފައި ކުދި އަދި މެދުސައިޒުގެ ކުންފުނިތަކަށް ދީފައި ހުރީ، އެއްގޮތަކަށްވެސް އެކަންކަން ކުރެވޭ ގޮތަކަށް ނޫން. އެހެންވީމާ، ހުރިހާ ރަށެއްގައިހެން ހުރީ ތަޢުލީމީ ދާއިރާގެ މަޝްރޫޢުތައްވެސް، ޞިއްޙީ ދާއިރާގައިވެސް، ކުޅިވަރުގެ ދާއިރާގައިވެސް. އަދި ހަމަ ބޮޑެތި މަޝްރޫޢުތައް މިސާލަކަށް، ފެނާއި ނަރުދަމާވެސް މިގޮތަށް ހުރީ. ވަރަށް ގިނަ ރަށްތަކުގައި ހުންނާނެ ހުއްޓިފައި، މި އަތޮޅަކު ނޫން އަޅުގަނޑުމެން ދިޔަ ބައެއް އެހެން އަތޮޅުތަކުގައި، އެ އަތޮޅެއްގެ ގާތްގަނޑަކަށް ހުރިހާ ރަށެއް އެއް ކުންފުންޏަކަށް ދީފައި، ފެނާއި ނަރުދަމާ. ހަމަ ކޮންމެ ރަށެއްގައިވެސް އެއް މައްސަލައެއް ދިމާވެފައި ހުއްޓިފައި.
އެހެންވީމާ، މި ހުރިހާ އެގްރިމެންޓްތަކެއް ޓަރމިނޭޓްކޮށް، ސަރުކާރުގެ ކޮންޓްރޯލް އޮންނަ ކުންފުނިތައް މެދުވެރިކޮށް، ރީސްޓާރޓް ކުރުމުގެ މަސައްކަތް، ކުރިއަށް އޮތް ދެތިން ހަފްތާގެ ތެރޭގައި އެކީގައި ނިމޭނެ. ނިމި ޢަމަލީގޮތުން މޮބިލައިޒް ވެފައި އޮންނަ، މި ދެންނެވީ މިހާރުވެސް އެހެން މަޝްރޫޢެއް ހިންގަން މޮބިލައިޒް ވެފައި އޮތް ސަރުކާރުގެ ކުންފުންޏަކާ ހަވާލުވެގެންދާނެ. ނަތީޖާއަކަށް ވާނީ ޢަމަލީގޮތުން މިހެން ހުއްޓިފައި ހުރި ހުރިހާ ކަމެއް ހިނގައިގަތުން. އެހެންވީމާ، އެގޮތަށް އަޅުގަނޑުމެން ކަންކަން ރާވާފައި މިއޮތީ. އަޅުގަނޑު މިހާ ތަފްޞީލުކޮށްވެސް މިކަން މި ކިޔައިދެނީ، ރާއްޖޭގައި ހަމަ ވަރަށް ގިނަ ރަށްތަކުގެ ހުރިހާ ރައްޔިތުންނަށް މިކަމުގެ ޔަޤީންކަން ވަރަށް ތަފްޞީލު ގޮތެއްގައި ދިނުމަށްޓަކައި.
އެހެންވީމާ، މި ރަށުގައި މި ދަނޑުގެ މަސައްކަތް، މި ރަށުގެ ސްކޫލްގެ މަސައްކަތްވެސް އޮތީ އެހެންވެފައި. އެ މަޝްރޫޢުވެސް ހަމަ މިގޮތަށް އަޅުގަނޑުމެން މި ދެންނެވި ސިޔާސަތުގެ ދަށުން ޓަރމިނޭޓް ކުރެވި، އަޅުގަނޑުމެން ރީސްޓާރޓް ކުރާނަން. ހަމަ އެގޮތަށް ދެން ހުއްޓިފައި ހުރި މަޝްރޫޢުތައް ދާނީ އެގޮތަށް.
އެހެންވީމާ، ކުރުކޮށްލާފައި ޖުމްލަކޮށް، ޚުލާޞާ ކޮށްލަންޏާ، ރާއްޖޭގެ ހުރިހާ ރަށެއްގައި މިހެން ހުއްޓިފައި ހުރި ގިނަ މަޝްރޫޢުތައް މިހިރީ މިހެންވެފައޭ. އެކަން ޙައްލުކޮށް، ކުރިއަށް މިއޮތް ދެތިން ހަފްތާތެރޭގައި، ކަންކަން ސޯޓްއައުޓް ކުރެވި، ޢަމަލީގޮތުން ގިނަ ރަށްރަށުގައި ހުއްޓިފައި ހުރި ގިނަ މަސައްކަތް، ފެބުރުވަރީ މަސް ނިމެންވާއިރަށް ހިނގައިގަންނާނެ. އެކަން ހަމަ އަޅުގަނޑު ދަންނަވާލަން ބޭނުންވަނީ.
އާދެ، އެހެން ބަލާއިރުގައި، މި ރަށުގައި ކުރިން މި ދެންނެވިހެން ސްކޫލް ޕްރޮޖެކްޓަށް އޮތީ ވަރަށް ގިނަ ފައިސާވެސް ދެވިފައި އެފަރާތަށް. މަޝްރޫޢެއްގެ ކޮންމެވެސްވަރެއްގެ ޢަދަދެއް، ބާރަ މިލިއަން، ދިހަވަރަކަށް މިލިއަން ދީފައި. އެކަމަކު މަޝްރޫޢެއް ނުނިމޭ. އެހެންވީމާ، ޙަޤީޤަތުގައި މިކަންކަން މިހެން ގޮސްފައި މިހުރީ. އަޅުގަނޑުމެންނާ ހަވާލުވީއިރު އޮތް ހާލަތު، މިދިޔަ އަހަރު ތެރޭގައިވެސް އެ ފަރާތަށް ކޮންމެވެސްވަރަކަށް އަޅުގަނޑުމެން ފައިސާދިނިން މަޝްރޫޢު ނިންމައިދޭތޯ. އެކަމަކު އެކަމެއް ނުހިނގާ. ދެން އަޅުގަނޑު މިގޮތަށް މި ހުރިހާ ތަފްޞީލެއް މި ކިޔައިދެނީ، އޭގެ ޓްރާންސްޕޭރަންސީ ޤާއިމުކުރަން. މިކަންކަން ހިނގަމުންދިޔަ ގޮތް ބަޔާންކޮށްދިނުމަށް. އަޅުގަނޑުމެން މިކަން ނިއުޅައިލާ، މިއިން ނުކުމެ ރަށްރަށުގައި ހުރި ކަންކަން ހިންގަންވެގެން މިއުޅެނީ. އެހެންވީމާ، އެ ތަފްޞީލު މިދިނީ އެހެންވެގެން. އާދެ، ޖުމްލަ ގޮތެއްގައި ހަމަ އެގޮތަށް ހުރިހާ މަޝްރޫޢެއްވެސް އަޅުގަނޑުމެން ހިންގާނެ ވާހަކަ ދަންނަވަން.
ދެން އަޅުގަނޑު ހަމަ ފާހަގަކޮށްލަން ބޭނުން، ކައުންސިލުން ފަށާފައި އޮތް މަސައްކަތެއް އެބައޮތް، މޫދަށް އެރޭ ސަރަޙައްދެއްގެ ކަންތައް ކުރުމަށް. އަޅުގަނޑު މިހާރު މިއަދު ބައްދަލުވުމުގެ ތެރެއިންނާ އެކީގައި، އަޅުގަނޑު އެމް.ޓީ.ސީ.ސީ. ގައި ދަންނަވާފައި އޮންނާނެ، ބަނދަރުގެ މަސައްކަތް ކޮށް ނިމޭއިރުގައި އެކްސްޓްރާވާ، ނޫނީވިއްޔާ، އެކްސެސްވާ ގާތައް ބޭނުންކޮށްގެން، އެ ސަރަޙައްދު ކައުންސިލުން އެ އެދޭގޮތަށް ތަރައްޤީ ކޮށްދިނުމަށް. އެހެންވީމާ، އަޅުގަނޑުމެން އިރާދަކުރެއްވިއްޔާ ބަލާނީ ކައުންސިލާއި، ސަރުކާރުގެ ކަމާބެހޭ އިދާރާއާ ގުޅިގެން ތިޔަބޭފުޅުންނަށް، އިސްރަށްވެހިންނަށް ޚާއްޞަކޮށް މި ބޭނުންވާކަހަލަ ގޮތަކަށް، ތިޔަބޭފުޅުން ބޭނުންވާގޮތަށް މޫދަށް އެރޭ ސަރަޙައްދުގެ ކަންތައްވެސް ކޮށްދެން. އެކަން އިރާދަކުރެއްވިއްޔާ އެގޮތަށް ކުރިއަށް ގެންގޮސްދޭނަން.
ދެން އަޅުގަނޑުގެ ވަރަށް މުހިންމު އަނެއް ސިޔާސަތެއް، ޖުމްލަކޮށް ދުޅަހެޔޮކަމާ ގުޅޭގޮތުން ދަންނަވާލާ ވާހަކައެއް. މޫދަށް އެރޭ ސަރަޙައްދުތައް. އަޅުގަނޑު ކެމްޕެއިންގައި ވަޢުދުވިން، އަދި މެނިފެސްޓޯގައިވެސް އޮންނާނެ، މި ދައުރުގައި އަޅުގަނޑު ކޮމަންކޮށް ހުރިހާ ރަށެއްގައި ކޮމްޕްލީޓް ކުރާނެ ކަންކަމަކީ، މޫދަށް އެރޭ ސަރަޙައްދުތައް ހަދައިދިނުން، އައުޓްޑޯ ޖިމްތައް ހަދައިދިނުން، ކުޑަކުދިންގެ ޕާކު ހެދުން، ފިޓްނަސް ރިކްރިއޭޝަން ސެންޓަރުތައް ހެދުން، ކުޅިވަރު ކުޅޭ ތަންތަން ހެދުން. އެއީ، ދުޅަހެޔޮކަން، ޞިއްޙަތު ސަލާމަތުން ބެހެއްޓުމަށްޓަކައި، މިކަހަލަ ކަންކަން ހުންނަންޖެހޭނެތީ.
އެހެންވީމާ، މި އަހަރާއި މި އަންނަ އަހަރާ، 2025، 2026، މި ދެ އަހަރު ތެރޭގައި، ފެސިލިޓީޒް ހަމަކުރެވިގެން، ކުޅޭ އެކިކަހަލަ ސާމާނުތައް ހަރުކުރެވިގެން، ރާއްޖޭގެ ހުރިހާ ރަށެއްގައި ކުޑަކުދިންގެ ޕާކު ހެދުމުގެ ޕްރޮޖެކްޓެއް ކުރިއަށްދާނެ. އޭގެ ތެރޭގައި މި ރަށްވެސް އިރާދަކުރެއްވިއްޔާ ދާނެ. އަދި ޕާކު ހެދިފައި ހުރި ބައެއް ރަށްރަށުގައި، ތަކެތި މަދުކޮށް ހުންނަ ތަންތާނގައި، އިތުރު ސާމާނު ހަރުކޮށްދޭނަން. މި ރަށުގައި ވިއްޔާ ޕާކެއް އޮވޭ. ވަސީލަތްތައް މަދީ. އެހެންވީމާ، ފުރިހަމަކުރެވިފައި އޮންނަގޮތަށް ކުޑަކުދިންގެ ޕާކު ހެދުން، ރާއްޖޭގެ ހުރިހާ ރަށެއްގައި، ދެ އަހަރު ތެރެއަށް ބަހާލައިގެން ކުރިއަށްދާނެ. އައުޓްޑޯ ޖިމް ހެދުން، އިންޑޯ، ފިޓްނަސް އެންޑް ރިކްރިއޭޝަން ސެންޓަރ. އެއީ، އިންޑޯ ޖިމް ހިމެނޭގޮތަށް ޤާއިމުކޮށްދިނުން. މިއީ ދެ އަހަރުގެ ތެރޭގައި ނިމޭނެ ކަންކަން. މޫދަށް އެރޭ ސަރަޙައްދު ބޭނުންވާ ހުރިހާ ރަށެއްގައި، މޫދަށް އެރޭ ސަރަޙައްދު ޤާއިމުކޮށްދިނުން. މިކަންކަން މި އަހަރާއި މި އަންނަ އަހަރު ތެރެއަށް ބަހާލެވިގެން، ހުރިހާ ރަށެއްގައި އަޅުގަނޑުމެން ނިންމާނަން. އެހެންވީމާ، އެގޮތުން މި ރަށްވެސް އިރާދަކުރެއްވިއްޔާ ތިޔަބޭފުޅުން ބޭނުންވާގޮތަށް، އެކަންކަން ފަހިވެގެން، ފުރިހަމަވެގެންދާނެ ކަމުގެ ޔަޤީންކަން އަޅުގަނޑު އަރުވަން.
އާދެ، ދެން އަންހެން ބޭފުޅުން، މި ރަށުގެ އަންހެން ބޭފުޅުންނަކީ ލާމަސީލު ބައެއް. ރަށުގެ ތަރައްޤީއަށްޓަކައި، މިދިޔަ ދުވަސްތަކުގައި، މިދިޔަ އަހަރުތަކުގައި، ވަރަށް ގިނަ މަސައްކަތް ކޮށްފައިވާ ބައެއް. މުޅި ރާއްޖެއަށްވެސް ލާމަސީލު އަންހެން ކަނބަލުން ދިރިއުޅުއްވާ ރަށެއް. އެކަމަށްޓަކައި ތިޔަ ހީވާގި ކަނބަލުންނަށް އަޅުގަނޑު ވަރަށް ބޮޑަށް ޝުކުރުވެސް ދަންނަވަން.
ކަނބަލުން ވަރަށް ބޮޑަށް އެދޭ ކަމެއް، ކުޅިވަރުގެ ދާއިރާއިން ބަލާއިރުގައި ވޮލީކޯޓެއް ޤާއިމުކުރުމަކީ. އެހެންވީމާ އިރާދަކުރެއްވިއްޔާ، މި ރަށުގައި އަޅުގަނޑުމެން ވޮލީކޯޓެއް އަޅާނެކަމުގެ ޔަޤީންކަން ތިޔަބޭފުޅުންނަށް ދެން. އާދެ، އެއީ ހަމަ މި ދެންނެވި ސިޔާސަތުގެ ތެރެއިން ކުރިއަށްދާ ކަމެއް.
އާދެ، ހަމަ އެއާއެކީގައި، ދެންހުރި ކަންކަމަށް ބަލާއިރުގައިވެސް، އިޤްތިޞާދީ ދާއިރާއިން ބަލާއިރުގައިވެސް ކުރަންހުރި ކަންކަން ހުރީ. މި ރަށަށް ޚާއްޞަ ކަންކަން އެބަހުރި. ޔޮޓްފަހަރުގެ ވަރަށް ބޮޑު މަންޒިލެއް. ހަމަ ޒަމާންތަކަކަށް އެކަން އޮތް ޙަޤީޤަތް އެއީ. އެމް.ޕީ.އެލް.އާ އެކީގައި އޮތް އެމް.އޯ.ޔޫ.އެއް އެބައޮވޭ. އަޅުގަނޑުމެންގެ އުންމީދަކީ، އޭގެ ހުރިހާ މަރުޙަލާތަކެއް ކަޑައްތު ކުރެވި، ފައިނޭންސިންގ ކަންތަކާއި، އަދި އޭގައި ހުރި ހުރިހާ ޑީޓެއިލް ވާރކްތަކެއް، އިރާދަކުރެއްވިއްޔާ ކުރިއަށް އޮތް މަސްތަކުގައި ނިމިގެންދާނެ ކަމަށް. މިއަދުގެ ބައްދަލުވުމުގައި، އެކަމާ ގުޅޭގޮތުން އެމް.ޕީ.އެލް.ގެ ސީ.އީ.އޯ. އެ ވާހަކަ ވިދާޅުވެދެއްވި. ޔޮޓްމެރީނާ ޤާއިމުކުރުމުގެ ޢަމަލީ މަސައްކަތް، ގިނަވެގެން ހަމަސް ދުވަހުގެ ތެރޭގައި ފެށޭނެ ކަމަށް.
އަޅުގަނޑު އިރާދަކުރެއްވިއްޔާ އެ ކަންތައް އެގޮތަށްދޭތޯ ޔަޤީންކޮށްދޭނަން. ސަރުކާރުން ބޭނުންވަނީ މި ރަށުގައި، މި ޚާއްޞަ އިޤްތިޞާދީ މަސައްކަތަށް ދާއިމީ ގޮތެއްގައި ފުޅާވެގެންދާ ގޮތަށް ޔޮޓްމެރީނާ ކަންތައް ކުރިއަށް ގެންގޮސްދިނުމަށް. އެހެންވީމާ، އެކަން އެގޮތަށް، ގެންދިޔުމަށް މަސައްކަތް ކުރާނެ ވާހަކަ އަޅުގަނޑު ހަމަ ފާހަގަކޮށްލަން.
އާދެ، މަސްވެރިކަމުގެ ދާއިރާއިންވެސް އަޅުގަނޑު ތިޔަބޭފުޅުންނަށް ދަންނަވާލަން ބޭނުންވަނީ، ސްޕޯޓްސް ފިޝިންގ ބޮއެއް އެޅުމަކީ، ތިޔަބޭފުޅުން ވަރަށް އުންމީދު ކުރައްވާ ކަމެކޭ. މި ރަށާ ވަރަށް ކައިރީގައި އަދި ހަމަ މި ރަށަށް ޚާއްޞަކޮށް ކައިރީގައި، ކުރިއަށް އޮތް ދެ މަހެއްހާ ދުވަހުގެ ތެރޭގައި، މި އަންނަ މަސް ނިމެންވާއިރަށް، ސްޕޯޓްސް ފިޝިންގ ބޮއެއް އިރާދަކުރެއްވިއްޔާ ޤާއިމުކޮށްދޭނެ ކަމަށް ފިޝަރީޒް މިނިސްޓަރ މީޓިންގައި ވިދާޅުވެލެއްވި.
އާދެ، އެހެންވީމާ، ޖުމްލަކޮށް އަޅުގަނޑު މިކަންކަން މި ފާހަގަކޮށްލަދިނީ. އަޅުގަނޑު ފާހަގަނުކުރާ ކަންކަން ނުކުރާނެ ވާހަކައެއް ނޫން. ޖުމްލަކޮށް މި ރަށުގެ ތަރައްޤީއަށްޓަކައި ދެންމެ ކައުންސިލްގެ ރައީސް ފާހަގަކުރެއްވި ކަންކަމާއި އަދި ބައްދަލުވުމުގައި ފާހަގަކުރެއްވި ކަންކަމަކީ، އަޅުގަނޑުމެން ސަމާލުކަންދޭނެ ކަންކަން. ސަބަބަކީ، އަޅުގަނޑުގެ ސިޔާސަތަކީ، އެންމެ އާބާދީ ކުދި ރަށްތައްވެސް، ހަމަހަމަކަމާ އެކީގައި ތަރައްޤީކުރުން.
އެހެންވީމާ، އެގޮތުން މި ރަށުގެ ތަރައްޤީއަށްޓަކައި ކުރަންހުރި ކަންކަން ކުރިއަށް އޮތް އަހަރުތަކުގެ ތެރެއަށް ބަހާލައިގެން ޚާއްޞަކޮށް، މި ދެންނެވި ކަންކަން މި އަހަރާއި މި އަންނަ އަހަރު ކުރިއަށްދާނެ. ތަޢުލީމީ ދާއިރާ، ޞިއްޙީ ދާއިރާ، ދުޅަހެޔޮކަން، ފިޓްނަސް، ކުޅިވަރާ ގުޅޭ ދާއިރާތަކުގެ ކަންކަން އިރާދަކުރެއްވިއްޔާ އަޅުގަނޑުމެން ބަހާލައިގެން، މި ދެ އަހަރުގެ ތެރޭގައި ނިންމާނަން. އަދި ދެން ހުރި ބޮޑެތި މަޝްރޫޢުތައްވެސް ކުރިއަށްދާނެ. މިހާރު ހިނގަމުންދާ މަޝްރޫޢުތައް، މި ދެންނެވި ގޮތަށް، ބަނދަރުގެ މަސައްކަތާއި، މިކަންކަން ދާނީ އަޅުގަނޑު ދެންމެ
ދެންނެވި ގޮތަށް.
އެހެންވީމާ، އެކަމުގެ ޔަޤީންކަން ތިޔަބޭފުޅުންނަށް އަރުވަމުން އަޅުގަނޑު ވަކިވެލާނަން. އިރާދަކުރެއްވިއްޔާ އަނެއްކާވެސް މާލަސްތަކެއްނުވެ، އަޅުގަނޑު ވަރަށް އުންމީދު ކުރަން ތިޔަބޭފުޅުންގެ އަރިހަށް އާދެވޭނެ ކަމަށް.
އަޅުގަނޑުގެ ދުޢާއަކީ އަޅުގަނޑުމެން މިކުރާ މަސައްކަތްތަކުގައި اللهُ سُبْحَانَهُ وَتَعَالَى ބަރަކާތް މިންވަރު ކުރެއްވުން. އާމީން!
وَمَا تَوْفِيقِي إِلَّا بِاللَّهِ عَلَيْهِ تَوَكَّلْتُ وَإِلَيْهِ أُنِيبُ.
وَالسَّلَامُ عَلَيْكُمْ وَرَحْمَةُ اللهِ وَبَرَكَاتُه.