ސަރުކާރުން އެންމެ އިސްކަންދެއްވަނީ ރާއްޖޭގެ އެކި ސަރަހައްދުތަކުގައި މަސައްކަތްފެށުމަށްފަހު، ހުއްޓިފައިވާ މަޝްރޫޢުތައް އަލުން ފެށުމަށް ސަރުކާރުގެ ކުންފުނިތައް މޮބިލައިޒްކޮށް، މަސައްކަތްފަށައި، އެ މަޝްރޫޢުތައް ނިންމުމަށް ކަމުގައި ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ވިދާޅުވެއްެޖެއެވެ. އެމަނިކުފާނު މިހެން ވިދާޅުވީ ހއ. އުލިގަމު ރައްޔިތުންނާ ބައްދަލުކުރެއްވުމަށް އެރަށުގައި މިއަދު ބޭއްވެވި ޖަލްސާގައި ވާހަކަފުޅު ދައްކަވަމުންނެވެ.
މި ބައްދަލުކޮށްލެއްވުމުގައި ވާހަކަފުޅު ދައްކަވަމުން ރައީސުލްޖުމްހޫރިއްޔާ ވަނީ، އުލިގަމާއި ރާއްޖޭގެ އެކި ސަރަޙައްދުތަކުގައި މަސައްކަތް ހަވާލުކުރުމަށްފަހު، އެކި ހާލަތްތަކުގެ ސަބަބުން އެއްވެސް މަސައްކަތެއް ކުރިއަށް ނުގެންދެވިފައިވާ ގިނަ މަޝްރޫއުތަކެއް ހުރިކަން ފާހަގަކުރައްވާފައެވެ. މިފަދަ މަޝްރޫޢުތަކުގެ ތެރޭގައި ޤައުމީ ތަރައްޤީ އާއި ރައްޔިތުންގެ ދުޅަހެޔޮކަމާއި ގުޅިފައިވާ އެތައް މަޝްރޫޢެއް ހިމެނޭކަމަށްވެސް އެމަނިކުފާނު ވިދާޅުވިއެވެ. އެހެންކަމުން، އެންމެ މުހިންމުކަމަކީ މިފަދަ މަޝްރޫޢުތައް ފަށައި، އޭގެ ނަފާ ރައްޔިތުންނަށް ލިބުން ކަމަށާއި އެފަދަ މަޝްރޫޢުތައް ކުރިއަށް ގެންދިޔުމަށްޓަކައި ސަރުކާރުގެ ކުންފުނިތައް މޮބިލައިޒްކޮށް، މަޝްރޫޢުތައް ހިންގުމަކީ ސަރުކާރުގެ އަމާޒުކަމަށް ރައީސުލްޖުމްހޫރިއްޔާ ވިދާޅުވިއެވެ. އަދި، އެކަމަށް ދައުލަތުން ކުރަންޖެހޭ މަސައްކަތްތައް ކުރައްވާނޭކަމުގެ ޔަޤީންކަން ރައީސުލްޖުމްހޫރިއްޔާ ވަނީ ދެއްވާފައެވެ.
މި ބައްދަލުވުމުގައި ވާހަކަފުޅު ދައްކަވަމުން ރައީސުލްޖުމްހޫރިއްޔާ ވަނީ، އުލިގަމުގެ ތަރައްޤީއަށް، ޔޮޓް މެރީނާއެއް ތަރައްޤީކުރުމުގެ މަސައްކަތް ފެބްރުއަރީ މަހު ފެށިގެންދާނޭކަން އިޢުލާންކުރައްވާފައެވެ. އަދި، ސްޕޯޓްސް ފިޝިންގއަށް ބޭނުންވާ ބޮއި، ފެބްރުއަރީ މަހު ހަރުކުރެވި، އޭގެ ފައިދާ އުލިގަމު ރައްޔިތުންނަށް ލިބިގެންދާނޭ ކަމަށްވެސް ރައީސުލްޖުމްހޫރިއްޔާ ވިދާޅުވިއެވެ.
އުލިގަމު ރައްޔިތުން އެންމެ ބޮޑަށް އެދޭ އެއް ކަމަކީ އެރަށު ޞިއްޙީ މަރުކަޒުގެ ފެންވަރު ރަނގަޅުކުރުން ކަމަށާއި، އެކަމަށް ޙައްލެއް ހޯއްދެވުމުގެ ގޮތުން، އެމް.ޓީ.ސީ.ސީ އާއި ހަވާލުކުރެވިގެން އެމަސައްކަތް އަންނަ މަހު ފެށިގެންދާނޭ ކަމަށްވެސް ރައީސުލްޖުމްހޫރިއްޔާ ވިދާޅުވިއެވެ. އުލިގަމަށް ކުރެއްވި ދަތުރުފުޅުގައި ރައީސުލްޖުމްހޫރިއްޔާ ވަނީ އުލިގަމު ޞިއްޙީ މަރުކަޒަށް ޒިޔާރާތްކުރައްވައި، މަރުކަޒުގެ ޚިދުމަތްތަކާއި މަރުކަޒުގައި ޚިދުމަތްދިނުމަށް ހުރި ގޮންޖެހުންތަކާއި ބެހޭގޮތުން މަޢުލޫމާތު އޮޅުންފިލުއްވާފައެވެ.
ރާއްޖޭގެ އެކި ކަންކޮޅުތަކުގައި ދިރިއުޅެމުންދާ ރައްޔިތުންގެ ގާތަށް ވަޑައިގެން އެ ރައްޔިތުންގެ އަޑު އައްސަވައި، ކަންކަން ޙައްލު ކޮށްދެއްވުމަށް އެ މަނިކުފާނު އިސްނަންގަވައިގެން ފައްޓަވާފައިވާ ސިލްސިލާ ދަތުރުފުޅުތަކުގެ ތެރެއިން ހއ. އުލިގަމަށް ވަޑައިގެން، އެ ރަށުގެ ރައްޔިތުންނާ ބައްދަލުކުރެއްވި ރަސްމިއްޔާތުގައި، ބޭންކް އޮފް މޯލްޑިވްސްއިން އުލިގަމުގައި އޭ.ޓީ.އެމް ބެހެއްޓުމުގެ، މަސައްކަތް ކައުންސިލާ ހަވާލުކުރެއްވުންވެސް އޮތެވެ.