އެންމެ ބޮޑު ރަށުގެ ތަރައްޤީއަށް ހިންގޭ މަޝްރޫޢުތަކެކޭ އެއްގޮތަށް، މޮޅަދޫގެ ތަރައްޤީއަށް ހިންގޭ މަޝްރޫޢު ތަކަކީވެސް އެ މަނިކުފާނަށް މުހިންމު ކަންތައްތަކެއް ކަމަށާ، އެހެން ހުރިހާ ރަށްތަކެކޭ އެއްފަދައިން ރައްޔިތުންގެ އުންމީދުތަކާ ގުޅިފައިވާ ކަންކަމުގައި، އިސްކަން ދެއްވައިގެން، ހަމަހަމަކަމާއި އިންސާފާއެކު، ބާރު ދުވެލީގައި އެ ކަންކަން ކޮށްދެއްވާނެ ކަމުގެ ޔަޤީންކަން، ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު، ހއ. މޮޅަދޫގެ ރައްޔިތުންނަށް ދެއްވައިފިއެވެ.
ތިލަދުންމަތީ އުތުރުބުރީގެ ބައެއް ރަށްތަކަށް މިހާރު ކުރައްވަމުން ގެންދަވާ ދަތުރުފުޅުގެ ތެރެއިން ހއ. މޮޅަދޫއަށް ވަޑައިގެން، އެރަށުގެ ރައްޔިތުންނާ ބައްދަލުކުރައްވައި ވާހަކަފުޅުދައްކަވަމުން، ހއ. މޮޅަދޫއަކީ ލޯކަލް ޓުއަރިމް ތަރައްޤީ ކުރުމަށް ފަހި ފުރުޞަތުތަކެއް އޮތް ރަށެއްކަން ފާހަގަކުރައްވައި ރައީސުލްޖުމްހުރިއްޔާ ވަނީ، ހއ. މޮޅަދޫ ކައުންސިލުން ލޯކަލް ޓުއަރިޒަމްގެ މަޝްރޫޢުތަކަށް ބިން ދޫކުރަން ކަނޑައަޅާފައިވާ ސަރަޙައްދަށް ބޭނުންވާ ކަރަންޓާއި، ފެނާއި ނަރުދަމާގެ ޚިދުމަތްތައް ހަމަޖައްސަވައިދެއްވާނެ ކަމުގެ ޔަޤީންކަން ދެއްވާފައެވެ. ރަށުގައި ފެނާއި ނަރުދަމާގެ ޚިދުމަތް ފޯރުކޮށްދިނުމަށް މީގެ ކުރިން ފެށި މަޝްރޫޢުގެ ތެރެއިން ސީދާ ގޮތެއްގައި އެކަން ކުރުމަށް ދަތިތަކެއް ހުރި އިރު، ވަކި ތަރުތީބަކުން އެ ޚިދުމަތްތައް ފޯރުކޮށްދެއްވުމުގެ މަސައްކަތް، ކަމާބެހޭ ފަރާތްތަކާއެކު ކުރިއަށް ގެންގޮސްދެއްވައި އެކަމަށް ޢަމަލީ ސިފަ ގެނެސްދެއްވާނެ ކަމަށް ރައީސުލްޖުމްހޫރިއްޔާ ވިދާޅުވިއެވެ.
ހއ. މޮޅަދޫއަށް ބޭނުންވާ ފެނާއި ނަރުދަމާގެ ޚިދުމަތް ދިނުމަށް، މީގެ ކުރިން ފެށި މަސައްކަތް، ރާއްޖޭގެ ބައެއް އެހެން ރަށްތަތެކެކޭ އެއްފަދައިން ހުއްޓިފައި އޮތް އޮތުމަށް ނިމުން ގެނެސްދެއްވައި، އެކަމަށްވެސް ޙައްލު ހޯއްދަވައިދެއްވާނެ ކަމުގައި ރައީސުލްޖުމްހޫރިއްޔާ ވިދާޅުވިއެވެ. ހަމަ މިފަދައިން ހުއްޓިފައި އޮތް ކުނި މެނޭޖު ކުރުމުގެ މައްސަލައަށްވެސް ހައްލު ހޯއްދަވައި ދެއްވައި، ހއ. މޮޅަދޫގައި ޒަމާނީ ކުނި ކޮއްޓެއް ތަރައްޤީ ކުރައްވާނެ ކަމުގެ ޔަޤީންކަން ރައީސުލްޖުމްހޫރިއްޔާ ދެއްވިއެވެ.
ޢަދަދުގެ ގޮތުން އާބާދީ ކުޑަކަމުގައި ވީ ނަމަވެސް، ފުރިހަމަ ގޮތުގައި ތަޢުލީމު ހާސިލުކުރުމުގެ ފުރުޞަތަކީ ދަރިވަރުންނަށް އޮތް ޙައްޤެއް ކަމުގައި އިޝާރާތް ކުރައްވަމުން ރައީސުލްޖުމްހޫރިއްޔާ ވަނީ، ހއ. މޮޅަދޫގެ ތަޢުލީމީ ދާއިރާއަށް އެކި ގޮތްގޮތުން ކުރިމަތިވެފައިވާ ގޮންޖެހުންތަކާ ހުރަސްތަކަށް ޙައްލު ހޯއްދަވައިދެއްވާނެ ކަމުގެ ޔަޤީންކަން ދެއްވާފައެވެ. ހަމަ މިފަދައިން ރަށުގެ ޞިއްޙީ ދާއިރާއަށް ދިމާވެފައިވާ ދަތިތަކާ ހުރަސްތަކަށްވެސް ޙައްލު ހޯއްދަވައިދެއްވާނެ ކަމަށާ، މި އަހަރުގެ ބަޖެޓުން މި ދެކަންތައް ހަމަޖެހިގެންދާނެ ކަމުގެ ޔަޤީންކަން އެ މަނިކުފާނު ވަނީ ހއ. މޮޅަދޫގެ ރައްޔިތުންނަށް ދެއްވާފައެވެ.
ރައްޔިތުން ދުޅަހެޔޮ ޞިއްޙަތެއްގައި ތިބުމީ އަދުގެ ސަރުކާރުން ޚާއްޞަ އަހައްމިއްޔަތުކަމެއް ދެއްވާ ކަމެއްކަން ފާހަގަކުރައްވައި ވާހަކަފުޅު ކުރިއަށް ގެންދަވަމުން ރައީސުލްޖުމްހޫރިއްޔާ ވަނީ، ހއ. މޮޅަދޫގައިވެސް ފުރިހަމަ ފެންވަރެއްގައި ފިޓްނަސް އެންޑް ރިކްރިއޭޝަން ސެންޓަރެއް ތަރައްޤީ ކުރައްވާނެކަމުގައި ވިދާޅުވެފައެވެ. އަދި ފުޓްސަލް ދަނޑާއި ވޮލީ ކޯޓުގެ މަސައްކަތްތައްވެސް ކޮށްދެއްވާނެ ކަމުގައި އެމަނިކުފާނު ވިދާޅުވިއެވެ.
ހަމަ މިއާއެކު، ރާއްޖެ ޓްރާންސްޕޯޓް ލިންކް (އާރް.ޓީ.އެލް.) ފެރީ ނިޒާމުގެ ކަންކަން އަވަސް ފުރުޞަތެއްގައި ހަމަޖަސަވައިދެއްވައި، ފެރީ ޓާރމިނަލް ކައުންސިލާ ޙަވާލުކުރައްވާނެ ކަމުގައިވެސް އެ މަނިކުފާނު ވިދާޅުވިއެވެ. އަދި ހއ. މޮޅަދޫއަކީ ބިންބޮޑު ރަށަކަށް ވާއިރު، ގޯތި ބޭނުންވާ ފަރާތްތަކަށް އެ ފުރުޞަތު ފަހިކޮށްދިނުމަށްޓަކައި ކުރަންޖެހޭ ކަންކަން ކޮށްދެއްވުމަށްވެސް ރައީސުލްޖުމްހޫރިއްޔާ ވަނީ ރަށު ކައުންސިލަށް ގޮވާލައްވާފައެވެ.
