ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު، ރ. އަތޮޅަށް މިހާރު ކުރައްވަމުންގެންދަވާ ދަތުރުފުޅުގެ ތެރެއިން، އެއަތޮޅު މަޑުއްވަރިއަށް ވަޑައިގެން، ރ. މީދޫ ކައުންސިލާއި، އަންހެނުން ތަރައްޤީއަށް މަސައްކަތްކުރާ (އ.ތ.މ) ކޮމިޓީއާ ބައްދަލުކުރައްވައި ރަށުގެ ތަރައްޤީއަށްޓަކައި ކުރަން ބޭނުންވާ ކަންކަމާ ގުޅޭގޮތުން މަޝްވަރާކުރައްވައިފިއެވެ.
މިއަދުގެ ބައްދަލުކުރެއްވުމުގައި ކައުންސިލްގެ ފަރާތުންވަނީ ރަށުގެ ރައްޔިތުންގެ ކަންބޮޑުވުންތައް ޙިއްޞާކުރައްވާފައެވެ. މިގޮތުން ރަށުގެ ބަނދަރު ތަރައްޤީކުރުމުގެ މަޝްރޫޢު ފައްޓަވައިދެއްވުމަށާއި، ރަށުގެ ޞިއްޙީ މަރުކަޒުގެ ޖާގައިގެ ދަތިކަމާއި، ރަށަށް ދަނާލެއް ބޭނުންވާކަން ފާހަގަކުރެއްވިއެވެ. މީގެ އިތުރުން މީދޫގެ އިޚްތިޞާޞްގެ ތެރެއަށް ރ. ތަވާތާ އިތުރުކޮށްދެއްވުމަށްވެސް ކައުންސިލުން މ ވަނީ އެދިޑައިގަންނަވާފައެވެ.
މި ބައްދަލުކުރެއްވުމުގައި ރައީސުލްޖުމްހޫރިއްޔާ ވިދާޅުވީ ކައުންސިލުން ފާހަގަކުރެއްވި ކަންކަން ބައްލަވައި އެކަންކަމަށް އެދެވޭ ޙައްލެއް ގެނައުމަށް މަސައްކަތް ކުރައްވާނެކަމަށެވެ.
މިއަދުގެ ބައްދަލުކުރެއްވުމުގައި ބައިވެރިވެވަޑައިގެންނެވި ސަރުކާރުގެ ވަޒީރުންނާއި ބައެއް މުވައްސަސާތަކުގެ އިސްވެރިން ވަނީ މީދޫގެ ތަރައްޤީއަށް ސަރުކާރުން ކުރައްވާ މަސައްކަތްތަކުގެ އެންމެ ފަހުގެ މަޢުލޫމާތު ޙިއްޞާކުރައްވާފައެވެ.
