ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު، އެސްޓޯނިއާއަށް މިހާރު ކުރައްވަމުން ގެންދަވާ ރަސްމީ ދަތުރުފުޅުގައި، އެ ޤައުމުގެ ޓާރްޓޫ ސިޓީގައި ހުންނަ، ޔުނިވަރސިޓީ އޮފް ޓާރްޓޫއަށް ޒިޔާރަތްކުރައްވާ، އެ ޔުނިވަރސިޓީގެ ރެކްޓަރ، ޕްރޮފެސަރ ޓޫމަސް އައްސެރްއާއި އެ ޔުނިވަރސިޓީގެ އޮފިޝަލުންނާ މިއަދު ބައްދަލުކުރައްވައިފިއެވެ.
މި ބައްދަލުކުރެއްވުމުގައި ރައީސުލްޖުމްހޫރިއްޔާގެ އަރިހުގައި، ޓާރްޓޫ ސިޓީގެ މޭޔަރ، މިސްޓަރ އަރްމަސް ކްލާސް ބައިވެރިވެ ވަޑައިގެންނެވިއެވެ. މި ބައްދަލުކުރެއްވުމުގައި، ޔުނިވަރސިޓީ އޮފް ޓާރްޓޫގެ އޮފިޝަލުން ވަނީ ސައިންޓިފިކް ރިސަރޗްގެ ރޮނގުން މުޅި ވިލާތު ބައްރުގައިވެސް އެންމެ ކުރިއަރާފައިވާ އެއް ޔުނިވަރސިޓީގެ ގޮތުގައި އެ ޔުނިވަރސިޓީގެ ދަރަޖަ ފާހަގަކުރައްވައި، އެ މުއައްސަސާގެ ވަނަވަރު ތަފްޞީލުކޮށް ދެއްވާފައެވެ. މީގެ އިތުރުން ތިމާވެއްޓާ ރައްޓެހި ސްމާޓް ސިޓީ ސޮލިއުޝަންތައް ހާސިލުކުރުމުގައި ޓާރްޓޫ ސިޓީއިން ކުރި ދަތުރުގެ މައުލޫމާތު ހިއްސާކުރައްވާ، މަޝްވަރާ ކުރެއްވިއެވެ.
މި ބައްދަލުކުރެއްވުމުގައި ރައީސުލްޖުމްހޫރިއްޔާ ދެއްކެވި ވާހަކަފުޅުގައި، އެ ޔުނިވަރސިޓީއަށް ޒިޔާރަތްކުރެއްވުމުގެ ފުރުޞަތު ލިބިވަޑައިގަތުމުން ވަރަށް އުފާކުރައްވާ ކަމަށް ވިދާޅުވިއެވެ. އަދި ޑިޖިޓަލް އީޖާދުތަކާއެކު ރާއްޖޭގެ ސިޓީތަކަށް އެހީތެރިކަން ފޯރުކޮށްދިނުމާއި ޑިޖިޓަލައިޒޭޝަން އަދި ޕޭޕަރލެސް ގަވަރނަންސްގެ ރޮނގުން، ޓާރްޓޫގެ ތަޖުރިބާގެ ބޭނުން ހިއްޕެވުމަށް އެސްޓޯނިއާއާ ގުޅިގެން މަސައްކަތް ކުރެއްވުމުގެ ޝައުގުވެރިކަން ފާޅުކުރެއްވިއެވެ.
ދިވެހި ދަރިވަރުންނަކީވެސް ޓާރްޓޫގައި ކިޔެވުމުގެ ފުރުޞަތު އޮތް ބައެއްކަން ފާހަގަކުރައްވައި، މެޑިސިން، ޑިޖިޓަލް ދާއިރާއާއި، މޫސުމަށް އަންނަ ބަދަލުތަކާއި ތިމާވެށީގެ ސައިންސް ފަދަ އެކި ދާއިރާތަކުންވެސް ފަންނުވެރިން ތަމްރީނުކުރަން ޖެހިފައިވާކަން، ރައީސުލްޖުމްހޫރިއްޔާގެ ވާހަކަފުޅުގައި ފާހަގަކުރެއްވިއެވެ. މި ބައްދަލުކުރެއްވުމުގައި ރައީސުލްޖުމްހޫރިއްޔާ ވަނީ ދިވެހި ދަރިވަރުންނަށް މަތީ ތަޢުލީމު ޙާޞިލްކުރުމަށް ހުރި ސްކޮލަރޝިޕް ފުރުޞަތުތަކާއި މަގުތައް އޮޅުންފިލުއްވާފައެވެ.
ޖަވާބުގައި، ޔުނިވަރސިޓީގެ މަންދޫބުން ވަނީ އެ ޔުނިވަރސިޓީއިން ދިވެހި ދަރިވަރުންނަށް ޖާގަ ދިނުމުގެ ވިސްނުމަށް މަރުޙަބާ ދަންނަވާ، ލިބެންހުރި ސްކޮލަރޝިޕް ފުރުޞަތުތަކާއި، ދެ ފަރާތުން ގުޅިގެން ކުރެވިދާނެ ކަންކަމުގެ މަޢުލޫމާތު ހުށަހަޅުއްވާފައެވެ. އަދި ޢިލްމީ ރޮނގުން ގުޅުން ބަދަހިކުރުމަށް އިތުރަށް މަޝްވަރާކުރުމަށް، ޔުނިވަރސިޓީ އޮފް ޓާރްޓޫ އޮތީ ތައްޔާރަށް ކަމުގައިވެސް މަންދޫބުން ވަނީ ފާހަގަކުރައްވާފައެވެ.
ރައީސުލްޖުމްހޫރިއްޔާގެ ވާހަކަފުޅު ނިންމަވާލައްވަމުން، ޓާރްޓޫ ޔުނިވަރސިޓީގެ އޮފިޝަލުން ދެއްވި މެހެމާންދާރީ ފާހަގަކުރައްވާ، ކުރިއަށް އޮތްތާނގައި ގުޅުން ބަދަހި ކުރެއްވުމުގެ ޝައުޤުވެރިކަން ފާޅުކުރެއްވިއެވެ. އަދި ދެ ޤައުމުގެ ގުޅުން އިތުރަށް ބަދަހިކުރުމުގެ މުހިންމުކަންވެސް ފާހަގަކުރެއްވިއެވެ.
ރައީސުލްޖުމްހޫރިއްޔާގެ މި ދަތުރުފުޅަކީ އެސްޓޯނިއާގެ ރައީސް ޑޮކްޓަރ އަލާރް ކަރިސްގެ ދަޢުވަތަކަށް ކުރައްވާ ރަސްމީ ދަތުރުފުޅެކެވެ. މި ދަތުރުފުޅުގައި، ރައީސުލްޖުމްހޫރިއްޔާގެ އަރިހުގައި ސަރުކާރުގެ މަތީ ފަންތީގެ ވަފުދެއް ބައިވެރިވެވަޑައިގަންނަވައެވެ. އަދި ރާއްޖޭގެ ފަންނިއްޔާތުގެ ދާއިރާގެ މާހިރުންގެ މައްޗަށް އެކުލެވިގެންވާ ވަފުދެއްވެސް މި ދަތުރުފުޅުގައި ބައިވެރިވެވަޑައިގަންނަވައެވެ.
