އުންމީދަކީ 4000 ފްލެޓާ ގުޅިގެން ބައްލަވަންޖެހޭ ހުރިހައި ކަމެއް ބައްލަވައި، އެ ފްލެޓްތައް ޙައްޤުވާ ފަރާތްތަކުގެ ފައިލް ލިސްޓު ވީހާވެސް އަވަހަށް އިޢުލާން ކުރެއްވުންކަމަށާ، މި ހިނގާ 1446 ވަނަ އަހަރުގެ ރަމަޟާން މަހުގެ ކުރިން ލިސްޓު އިޢުލާން ކުރެއްވިދާނެ ކަމުގެ ވަރަށް ބޮޑު ޔަޤީންކަމެއް އެބަ އޮތް ކަމުގައި ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ވިދާޅުވެއްޖެއެވެ.
ރައީސުލްޖުމްހޫރިއްޔާ މި ފަދައިން ވިދާޅުވީ ހުވަދު އަތޮޅުގެ ބައެއް ރަށްތަކަށް މިހާރު ކުރައްވަމުން ގެންދަވާ ދަތުރުފުޅުގައި ގއ. ދެއްވަދޫއަށް ވަޑައިގެން އެ ރަށުގެ ރައްޔިތުންނާ ބައްދަލުކުރެއްވުމަށްފަހު، ދިވެހިރާއްޖޭގެ ބައެއް މީޑިއާތަކަށް ދެއްވި ބަސްދީގަތުމުގައެވެ.
ގެދޮރުގެ ދަތިކަމަކީ ރާއްޖެއަށް ދިމާވެފައި ވާ އެންމެ ބޮޑު މައްސަލަ ކަމަށްވާ ހިނދު، ރިޔާސީ ކެމްޕޭނުގައި ވަޢުދުވެވަޑައިގެންނެވި ފަދައިން ހުރިހާ ރައްޔިތުންނަށް ބޯހިޔާވަހިކަން ކަށަވަރުކޮށްދެއްވުމުގެ މަސައްކަތްތައް މިހާރުވެސް ކުރައްވަމުން ގެންދަވާ ކަމުގައި ރައީސުލްޖުމްހޫރިއްޔާ ވިދާޅުވިއެވެ. ބަޔަކަށް ދީފައިވާ ފްލެޓް ނުވަތަ ގޯތި އަތުލެއްވުމުގެ ވިސްނުންފުޅެއް ނުގެންގުޅުއްވާ ކަމަށާ، ނަމަވެސް ނުގަވާއިދުން ފްލެޓާއި ގޯތި ހޯދާފައިވާ ފަރާތްތަކަކީ އިސްތިސްނާއެއް ކަމުގައި ރައީސުލްޖުމްހޫރިއްޔާ ފާހަގަކުރެއްވިއެވެ. ފްލެޓާއި ގޯތި ހޯދުމުގައި ގޯހެއް ހަދާފައި ނުވާކަމަށް އެންޓި ކޮރަޕްޝަން ކޮމިޝަން (އޭ.ސީ.ސީ) ގެ ހޯދުންތަކުން ހާމަވާ ހަމަ ކޮންމެ ޙައްޤުވެރިއަކަށްވެސް އެ ލިބުނު ތަނަކުން ފްލެޓާއި ގޯތި ހަމަޖައްސަވައިދެއްވަމުން ގެންދަވާނެ ކަމުގެ ޔަޤީންކަން ރައީސުލްޖުމްހޫރިއްޔާ ވަނީ ދެއްވާފައެވެ.
މި އަހަރުގެ ބަޖެޓުގައި ސަރުކާރުން އެންމެ ބޮޑު އިސްކަމެއް ދެއްވަނީ ބޯހިޔާވަހިކަމުގެ މަޝްރޫޢުތަކަށް ޢަމަލީ ސިފަ ގެނެސްދެއްވުމަށް ކަމުގައި ވާއިރު، ރަށްރަށުގައި ތަރައްޤީ ކުރައްވަން ވަޢުދުވެވަޑައިގެންފައިވާ ހައުސިންގް ޔުނިޓްތަކުގެ މަސައްކަތް ޢަމަލީ ގޮތުން ކުރާނެ ކޮންޓްރެކްޓަރުން ހޯދުމަށް މި މަހުގެ ބާކީ އޮތް ދުވަސްތަކުގެ ތެރޭގައި އިޢުލާން ކުރެވެމުން ދާނެ ކަމަށް ރައީސުލްޖުމްހޫރިއްޔާ ތަކުރާރު ކުރެއްވިއެވެ. ކޮންޓްރެކްޓަރުން ހޯދުމަށް އިޢުލާން ކުރެވޭނީ ސަރަޙައްދުތަކަށް ބަހައިލެވިގެން، އަތޮޅުތަކެއް އެއްކޮށްލައިގެން ކަމަށާ، މި ގޮތަށް ކަން ކުރުމުން ހަމަ ޔަޤީނުންވެސް ސަލާމަތްވާނެ ޚަރަދުތަކެއް ހުންނާނެކަން ރައީސުލްޖުމްހޫރިއްޔާ ފާހަގަކުރެއްވިއެވެ. ސީދާ ކޮންޓްރެކްޓަރ ފައިނޭންސިންގ އުސޫލުންވެސް މަޝްރޫޢުތައް އިޢުލާން ކުރެވޭނެ ކަމަށާ، އެއްބަސްވުންތައް ހަމަޖެހެމުން ދާ ވަރަކަށް ޢަމަލީ މަސައްކަތްތައްވެސް ފެށިގެންދާނެކަމަށް ރައީސުލްޖުމްހޫރިއްޔާ ވިދާޅުވިއެވެ.
މި މޭރުމުން ވާހަކަފުޅު ކުރިއަށް ގެންދަވަމުން ރައީސުލްޖުމްހޫރިއްޔާ ވަނީ ހިޔާވެހި ފައިނޭންސިންގް ސްކީމަށްވެސް އަލިއަޅުއްވާލައްވާފައެވެ. އަމިއްލަ ގެދޮރު ބިނާ ކުރުމަށް، އިސްލާމިކް ފައިނޭންސް އުސޫލުން ލޯނު ދޫކުރަމުންގެންދާ މި މަޝްރޫޢަކީ ބޯހިޔާވަހިކަމުގެ ދާއިރާއިން އެންމެ ގިނަ ޢަދަދެއްގެ ރައްޔިތުންނަށް ފައިދާ ލިއްބައިދޭނެ މަޝްރޫޢުކަން ރައީސުލްޖުމްހޫރިއްޔާ ފާހަގަކުރެއްވިއެވެ. މި މަޝްރޫޢުތައް ނިމިގެން ދާއިރު ގެދޮރުގެ ދަތިކަމުގެ މައްސަލަ ޙައްލުވެގެންދާނެ ކަމުގެ ޔަޤީންކަން އެބަ އޮތް ކަމުގައިވެސް ރައީސުލްޖުމްހޫރިއްޔާގެ ބަސްދީގަތުމުގައި ވިދާޅުވެފައިވެއެވެ.
މަސައްކަތްތައް ކުރިއަށް ގެންދެވޭނެ ކަމާ މެދު އެއްވެސް ވަރަކަށް ކަންބޮޑުވެވަޑައިނުގަންނަވާ ކަމަށާ، މި އަހަރާއި 2026 ވަނަ އަހަރަކީ، އެ މަނިކުފާނު ވެވަޑައިގެންފައިވާ ވަޢުދުތައް ޢަމަލީ ގޮތުން ފުއްދަވަން ފަށްޓަވައި، ހިންގަވާނެ 2 އަހަރު ކަމުގައި ރައީސުލްޖުމްހޫރިއްޔާ ވަނީ ވިދާޅުވެފައެވެ.