އެކި ގޮތްގޮތުން ޚާއްޞަ ސަމާލުކަމެއް ދެއްވައިގެން ޙައްލުކުރައްވަންޖެހޭ ގިނަ ކަންތައްތަކެއް އެބަ ހުރިކަމަށާ، އެގޮތުން ގއ. ދެއްވަދޫއަށް މިވަގުތު އެންމެ ބޮޑު މައްސަލައެއްގެ ގޮތުގައި ކުރިމަތިވެފައިވާ ބަނދަރުގެ ޖާގައިގެ ދަތިކަމާއި، ރަށް ގިރުމާއި ކުނިކޮށީގެ މައްސަލައަށް އެކުއެކީގައި ޙައްލު ހޯއްދެވުމުގެ މަސައްކަތްޕުޅު ކޮށްދެއްވާނެ ކަމުގެ ޔަޤީންކަން، ރައީސުލްޖުމްހޫރިއްޔާ ޑޮކްޓަރ މުޙައްމަދު، އެ ރަށުގެ ރައްޔިތުންނަށް ދެއްވައިފިއެވެ.
ރައީސުލްޖުމްހޫރިއްޔާ މި ޔަޤީންކަން ދެއްވާފައި ވަނީ ހުވަދު އަތޮޅުގެ ބައެއް ރަށްތަކަށް މިހާރު ކުރައްވަމުން ގެންދަވާ ދަތުރުފުޅުގައި ގއ. ދެއްވަދޫއަށް މިއަދު ހެނދުނު ވަޑައިގެން، އެ ރަށުގެ ރައްޔިތުންނާ ބައްދަލުކުރައްވައި ވާހަކަފުޅުދައްކަވަމުންނެވެ. މި މޭރުމުން ވާހަކަފުޅު ކުރިއަށް ގެންދަވަމުން ރައީސުލްޖުމްހޫރިއްޔާ ވަނީ، މި ހިނގާ 2025 ވަނަ އަހަރުގެ ބަޖެޓުގެ ތެރެއިން ރަނގަޅު ޙައްލެއް ހޯއްދަވައިދެއްވުމަށް މަސައްކަތްޕުޅު ކުރައްވާނެ ކަމުގެ ޔަޤީންކަން، ގއ. ދެއްވަދޫގެ ރައްޔިތުންނަށް ދެއްވާފައެވެ.
ގއ. ދެއްވަދޫ ކައުންސިލުން ކޮންސްޓްރަކްޝަން މިނިސްޓްރީއާ ގުޅިވަޑައިގެން 3 މައްސަލަ އެކުގައި ޙައްލުވާނެ ވަށާޖެހޭ ޙައްލަކަށް ވަޑައިގަތުމަށް ރައީސުލްޖުމްހޫރިއްޔާ ވަނީ އެދިވަޑައިގެންފައެވެ. މިހާރު ފެށި، ހުއްޓިފައިވާ މަސައްކަތްތައް އަލުން ހިންގަން ފަށާއިރު ރަށްގިރުމުގެ މައްސަލައާއެކު ބަނދަރަށް ދިމާވެފައިވާ ދަތިތައް ޙައްލުކޮށް، ބިމުގެ ޖާގަ އިތުރުކޮށް، ކުނިކޮށީގެ މައްސަލައަށް ޙައްލު ލިއްބައިދެނިވި ގޮތަކަށް ކުރަންޖެހޭ ހުރިހާ ކަމެއް ކުރުމަށް ސަރުކާރުގެ ފުރިހަމަ އެއްބާރުލުން ލިބެމުންދާނެ ކަމުގެ ޔަޤީންކަން ރައީސުލްޖުމްހޫރިއްޔާ ވަނީ ދެއްވާފައެވެ. މި ޙައްލު ލިބުމާއެކު މަސްވެރިންވެސް ހިމެނޭނެހެން ރަށުގެ ހުރިހާ ރައްޔިތުންނަށް ލުއިފަސޭހަކަން ލިބޭނެކަންވެސް ރައީސުލްޖުމްހޫރިއްޔާ ފާހަގަކުރެއްވިއެވެ.
ގއ. ދެއްވަދޫ އައިސްޕްލާންޓްގެ މަސައްކަތް ހުއްޓިފައި ހުންނަތާ 3 އަހަރު ވެފައި ވާ ކަން ފާހަގަކުރައްވަމުން ރައީސުލްޖުމްހޫރިއްޔާ ވިދާޅުވީ، އައިސްޕްލާންޓް މަރާމާތު ކުރުމުގެ މަސައްކަތްތައް ކުރިއަށްދާނެ ކަމަށެވެ. ހަމަ އެއާއެކު އިތުރު އައިސްޕްލާންޓެއް ގެނެސް އޮޕަރޭޝަންތައް ފެށުމަށް ފިޝަރީޒް މިނިސްޓްރީއިން މަސައްކަތް ކުރައްވަމުން ގެންދަވާކަން ރައީސުލްޖުމްހޫރިއްޔާ ފާހަގަކުރެއްވިއެވެ.
މި އަހަރުގެ ބަޖެޓުގެ ތެރެއިން އެންމެ އިސްކަމެއް ދެއްވާ ދާއިރާތަކުގެ ތެރޭގައި ޞިއްޙީ އަދި ތަޢުލީމީ ދާއިރާ ހިމެނޭ ހިނދު، ގއ. ދެއްވަދޫގެ ޞިއްޙީ މަރުކަޒުގައި އިތުރު ފެސިލިޓީތައް ޤާއިމުކުރައްވައި، ކުޑަކުދިންގެ ޑޮކްޓަރަކާއި، އެކްސްރޭގެ ޚިދުމަތް ހަމަޖައްސަވައިދެއްވާނެ ކަމަށް ރައީސުލްޖުމްހޫރިއްޔާ ވިދާޅުވިއެވެ. އަދި ގއ. ދެއްވަދޫ ފަދައިން ޖިއޮގްރަފީ ގޮތުން އެކަހެރި، އަދި ދުރު ދަތުރުތައް ކުރަންޖެހޭ ސަރަޙައްދުތަކަށް ސީ-އެމްބިއުލާންސް ޚިދުމަތް އަދިވެސް އިތުރަށް ފުޅާ ކުރަންޖެހޭއިރު، އެ މަސައްކަތްތައްވެސް މިހާރު ފަށްޓަވާފައި ވާ ކަމަށް ރައީސުލްޖުމްހޫރިއްޔާ ވިދާޅުވިއެވެ.
އަދި ސްކޫލަށް ބޭނުންވާ މަލްޓިޕަރޕަސް ހޯލު ހަމަޖައްސަވައިދެއްވާނެ ކަމަށްވެސް ރައީސުލްޖުމްހޫރިއްޔާގެ ވާހަކަފުޅުގައި ވަނީ ވިދާޅުވެފައެވެ.
ދުޅަހެޔޮ ޞިއްޙަތެއްގައި ތިބުމަށްޓަކައި ކުޅިވަރަކީ ހުރިހާ ރައްޔިތުންނަށްވެސް މުހިންމު ކަމެއް ކަމުގައި ފާހަގަކުރައްވައި، ރައީސުލްޖުމްހޫރިއްޔާ ވަނީ، ގއ. ދެއްވަދޫގެ އަންހެން ބޭފުޅުން އެދިވަޑައިގެންފައިވާ ފަދައިން ވޮލީ ކޯޓަކާއި، ދަނޑުގެ ސަބް-ބޭސް ހެދުމާއެކު ޓަރފް އަޅައި ދަނޑު ނިންމަވައިދެއްވުން ފަދަ، ކުޅިވަރުގެ ދާއިރާއިން ކަންކަން ކޮށްދެއްވާނެ ކަމުގެ ޔަޤީންކަން ދެއްވާފައެވެ. އެގޮތުން ސްޓޭޓް ޓްރޭޑިންގް އޯގަނައިޒޭޝަން (އެސް.ޓީ.އޯ)ގެ ސީ.އެސް.އާރްގެ ދަށުން ގއ. ދެއްވަދޫގައި އައުޓް-ޑޯ ޖިމެއް ތަރައްޤީ ކުރެވެމުންދާކަމާއި، ދާދި އަވަހަށް އެ ޚިދުމަތްވެސް ލިބެމުންދާނެކަން ރައީސުލްޖުމްހޫރިއްޔާ ފާހަގަކުރެއްވިއެވެ.
ރައްޔިތުން ފާޅުކުރެއްވި ޚިޔާލުތައް ބަލައިގަންނަ ކަމަށް ވިދާޅުވެ ވާހަކަފުޅު ކުރިއަށް ގެންދަވަމުން ރައީސުލްޖުމްހޫރިއްޔާ ވަނީ، ވީހާވެސް ޕޮޒިޓިވް ގޮތެއްގައި އުންމީދުކުރެއްވުމަށް އެދިވަޑައިގެންފައެވެ. ސަރުކާރުން ބޭނުންފުޅުވަނީ ރައްޔިތުން އެދިވަޑައިގަންނަވާ ގޮތަށް ކަންކަން ކޮށްދެއްވުމަށް ކަމުގައިވެސް އެ މަނިކުފާނު ވިދާޅުވިއެވެ. އަދުގެ ސަރުކާރަކީ ރައްޔިތުންގެ ފަޅީގައި ސާބިތުކަމާއެކު ރައްޔިތުންގެ ޚިދުމަތުގައި އޮތް ސަރުކާރެއް ކަމުގެ ޔަޤީންކަން ރައީސުލްޖުމްހޫރިއްޔާ ވަނީ ތަކުރާރުކުރައްވާފައެވެ.
