بِسْمِ ٱللّٰهِ ٱلرَّحْمٰنِ ٱلرَّحِيمِ
اَلْحَمْدُ للَّهِ رَبِّ الْعاَلَمِينْ، وَالصَّلاَة وَالسَّلاَمُ عَلَى رَسُولِ ٱللَّهِ وَعَلَى آلهِ وَصَحْبِهِ أَجْمَعِينْ.
ރަތަފަންދޫ ކައުންސިލްގެ ރައީސް އަދި ކައުންސިލަރުން، ޑަބްލިޔު.ޑީ.ސީ. މެންބަރުން، ރަށުގެ މުއައްސަސާތަކުގެ ވެރިން، ދާއިރާގެ ޢިއްޒަތްތެރި މަޖިލިސް މެންބަރު، ވަޒީރުން، ރައްޔިތުންގެ މަޖިލީހުގެ ޢިއްޒަތްތެރި މެންބަރުން، ކުންފުނިތަކުގެ ވެރިން، ވަކިން ޚާއްޞަކޮށް، ރަތަފަންދޫގެ ލޮބުވެތި އެންމެހައި ރައްޔިތުން، އަދި މި ޖަލްސާ ބައްލަވާ، އަޑުއައްސަވާ، ދިވެހި އެންމެހައި ލޮބުވެތި ރައްޔިތުން؛
السَّلامُ عَلَيْكُم ورَحْمَةُ اللهِ وَبَرَكاتُهُ.
މިއަދުގެ މި ހޫނުގަދަ ވަގުތު އަޅުގަނޑުމެންނަށް މި ރަށަށް މި އާދެވުނީ. އެހެންނަމަވެސް، ތިޔަ ލޮބުވެތި ހުރިހާ ރައްޔިތުން ނުކުމެވަޑައިގެން، އަޅުގަނޑުމެންނަށް ވިދާޅުވި ހޫނު މަރުޙަބާއަށްޓަކައި، އަޅުގަނޑުގެ ހިތުގެ އެންމެ ފުންމިނުން ތިޔަ ލޮބުވެތި ހުރިހާ ރައްޔިތުންނަށް ފަށްފަށުން ޝުކުރު ދަންނަވަން. ވަރަށް ބޮޑަށް ޝުކުރިއްޔާ.
ދެންމެގައި ކައުންސިލްގެ ރައީސް ފާހަގަކުރައްވައިފި ކަންތައްތަކެއް. އަޅުގަނޑު ދަންނަވަން ބޭނުންވާ ވާހަކައަކީ، އެއީ މި ރަށަށް ކޮންމެހެންވެސް ކުރަންޖެހިފައި ހުރި، މުހިންމު ކަންތައްތަކެކޭ. އަޅުގަނޑުމެންގެ ވިސްނުމަކީ، އަދި ސިޔާސަތަކީވެސް ކުޑަރަށެއް، ބޮޑުރަށެއް ނުބަލައި، ހުރިހާ ރައްޔިތުންނަށްވެސް ހަމަހަމަކަމާ އެކީގައި ޚިދުމަތް ދިނުން.
މި ރަށުގެ ރައްޔިތުންނަށް ބޭނުންވާ ކަންކަމަކީ، ހަމަ އެންމެ އާބާދީ ބޮޑު ރަށުގެ ރައްޔިތުންނަށްވެސް ބޭނުންވެގެން ކޮށްދެމުންދާ ކަންކަން. އެކި ސަބަބުތަކާ ހެދި މީގެ ކުރިން ނުކޮށް، ނޫނީވިއްޔާ ކުރަންފަށައި، މަޑުޖެހިފައި ހުރި ކަންކަން.
އަޅުގަނޑު ދަންނަވަން ބޭނުންވަނީ، އިރާދަކުރެއްވިއްޔާ މި ކަންކަމުގައި ޢަމަލީ ސިފަ ޖައްސައިދޭނަމޭ. އަޅުގަނޑު ރަށްރަށަށް ދަތުރު މި ކުރަނީ، ރައްޔިތުންގެ ގާތަށް މިހެން އައިސް، ރައްޔިތުންނާ އެކީގައި މިގޮތަށް ވާހަކަދައްކައި، ވަގުތުކޮޅެއް ހޭދަކޮށް، ރައްޔިތުން ބޭނުންވާ ކަންތައްތައް، ރައްޔިތުންގެ ގާތުން އޮޅުންފިލުވައިގެން، އެކަންކަމަށް ޢަމަލީގޮތުން ނަތީޖާ ގެނެސްދިނުމަށް. ނަތީޖާ ނެރެދިނުމަށް. އަޅުގަނޑަށްވެސް ވަރަށް ފަސޭހަވާނެ، މާލޭގައި މަޑުކޮށްލައިގެން ހުންނަން. އެކަމަކު އެއީ، އަޅުގަނޑު ގަބޫލުކުރާ ހަމައެއް ނޫން.
އާދެ، އެހެންވީމާ، މިއަދު މި ރަށަށް އާދެވުނީމާ، ތިޔަބޭފުޅުން ތިޔަ ބަހައްޓަވަމުން ގެންދަވާ ގާތްކަމަކީ، އަޅުގަނޑު ވަރަށް އުފާކުރާ ކަމެއް. އަޅުގަނޑު ޔަގީންކަން ދެން، ތިޔަބޭފުޅުންގެ އުންމީދުތަކުގައި، ޙަޤީޤީ ކުލަ އަޅުގަނޑު ޖައްސައިދޭނެކަމުގެ.
އާދެ، އަޅުގަނޑު ހަމަ އުފާވެރި ޚަބަރު އެ ގޮތުން ދެން. ތިޔަ ވިދާޅުވީ ރަށުގެ ކައުންސިލް އިދާރާ ވަރަށް ބޮޑަށް ހަލާކުވެފައި ހުރި ވާހަކަ. އަޅުގަނޑުމެން މިހާރު ވާނީ ކަމާބެހޭ ވުޒާރާއިން، ސިޓީޒް، ލޯކަލް ކައުންސިލް ވުޒާރާއިން 50 އެތައް ރަށެއްގައި، ކައުންސިލްގެ ޢިމާރާތް އެޅުމަށްޓަކައި ޕްރޮޖެކްޓެއް ބަޔަކަށް ހަވާލުކޮށްފައި. އޭގެ ޢަމަލީ މަސައްކަތް ވީހާވެސް އަވަހަކަށް ފެށޭ ހިސާބަށް އަޅުގަނޑުމެން މި ގެންދަނީ މަސައްކަތްތައް ތަރުތީބު ކުރަމުން. އެ ޕްރޮޖެކްޓްގެ ތެރޭގައި މި ރަށްވެސް ހިމެނޭ. އެހެންވީމާ، މި ރަށުގެ ކައުންސިލް އިދާރާ، އެ ޕްރޮޖެކްޓްގެ ތެރެއިން އެޅިގެންދާނެ.
އަޅުގަނޑުމެން ދެންމެ ވަދެގެން އައިއިރު ފެނޭ، ބަނދަރު އޮތް ހާލަތު. އަޅުގަނޑު ހިތުން މި އަތޮޅުގައިވެސް ހަމަ އެންމެ ހާލަތު ދަށްކޮށް އޮތް ބަނދަރަކަށް ވާނެ މި ރަށުގެ ބަނދަރު. މި އަހަރުގެ ތެރޭގައި އަޅުގަނޑުމެން ކުރިއަށް ގެންދާ ބަނދަރު މަޝްރޫޢުތަކުގެ ތެރޭގައި، މި ރަށުގެ ބަނދަރު ހިމަނައިގެން، މި ބަނދަރު ހަދައިދޭނެ ކަމުގެ ޔަގީންކަން ތިޔަބޭފުޅުންނަށް ދެން.
އާދެ، ޒުވާނުންނަށް ބޭނުންވާ އެކި ކަހަލަ ވަސީލަތްތަކަކީ، އަޅުގަނޑުމެންގެ ސިޔާސަތުގެ ތެރޭގައި، ވަރަށް ސަމާލުކަންދޭ ކަމެއް. އެ ކަންކަން ކުރިއަށް ގެންގޮސްދިނުމަށް، ފުރިހަމަކޮށްދިނުމަށް. މި ރަށުގައި ރަނގަޅު ފެންވަރުގައި ވޮލީކޯޓެއް ގާއިމުކޮށްދީ، އިންޑޯރ ޖިމެއް ހަދައިދީ، އެއާއެކީގައި ވަސީލަތްތައް ފުރިހަމަ ޔޫތު ސެންޓަރެއް އަޅުގަނޑުމެން އަޅައިދޭނަން.
އާދެ، މި އަހަރުގެ ބަޖެޓުގެ ތެރެއިން، އެންމެ އިސްކަމެއްދޭ ކަންކަމުގެ ތެރޭގައި، ޞިއްޙީ ދާއިރާއާއި، ތަޢުލީމީ ދާއިރާ ހިމެނޭ. މި ރަށުގެ ޞިއްޙީ މަރުކަޒުގެ ފެންވަރު ރަނގަޅުކޮށް، ޢިމާރާތާއި، ވަސީލަތުގެ ގޮތުން، މުވައްޒަފުންގެ ގޮތުން، ހުރިހާ ގޮތަކުންވެސް މި ރަށަށް ބޭނުންވާ ފެންވަރުގެ ރަނގަޅު ޞިއްޙީ މަރުކަޒަކަށް އެ މަރުކަޒު އަޅުގަނޑުމެން ހަދައިދޭނަން. އެކަމުގެ މަސައްކަތް ކޮށްދޭނަން.
ހަމަ އެގޮތަށް، ސްކޫލްގައި މިހާރު ހިނގަމުންދާ ކްލާސްރޫމް މަޝްރޫޢުގެ އިތުރަށް، ދެންމެ ތިޔަ ފާހަގަކުރެއްވީ މި ހޯލުގެ ވާހަކަ. މަލްޓިޕަރޕަސް ހޯލު. އާދެ، އަޅުގަނޑު ސަލާންކުރަމުން ދިޔައިރުގައި، ބައެއް ކުދިން ސިއްރުސިއްރުން އަޅުގަނޑުގެ އަތަށް ކުޑަ ގަނޑުކޮޅެއް ދިއްކޮށްލި. އެ ގަނޑުކޮޅުގައިވެސް އޮތީ އެ ވާހަކަ. އޭގައިވެސް މި ބުނަނީ، އަޅުގަނޑުމެންގެ ސްކޫލަށް މަލްޓިޕަރޕަސް ހޯލެއް އިންތިހާއަށް ބޭނުންވެއޭ. ދެން ބޭނުންވާ ސަބަބުތައް ހަމަ ވަރަށް ރީތިކޮށް ލިޔެލާފައި އެބަހުރި. އާދެ، މި ރަށުގައި އަޅުގަނޑުމެން އެންމެ އިސްކަމެއްދީގެން އިރާދަކުރެއްވިއްޔާ އެކަން ކޮށްދޭނެކަމުގެ ޔަގީންކަން އަޅުގަނޑު ދެން. އަޅުގަނޑަށް ފެނޭ އޭގެ ބޭނުންތެރިކަން.
އެހެންވީމާ، މި އަހަރާއި، މި އަންނަ އަހަރު އަޅުގަނޑުމެން ކުރިއަށްގެންދަން ނިންމާފައި މިވަނީ، ރައްޔިތުންނަށް ބޭނުންވާ މިފަދަ މުހިންމު މަޝްރޫޢުތައް ފެށުމާއި، ވީހާވެސް ގިނަ މަޝްރޫޢެއް ނިންމުން. އެހެންވީމާ، މި އަހަރުގެ ބަޖެޓުގެ ތެރެއިން، އަޅުގަނޑުމެން ބަލާނީ ވީހާވެސް ގިނަ ވަޢުދުތަކަކަށް ޢަމަލީ ސިފަ ގެނެސްދިނުމާއި، ޢަމަލީގޮތުން މަސައްކަތް ފެށުމަށް. ދެން މި އަންނަ އަހަރު އެގޮތުން ނުފެށި ހުރި މަޝްރޫޢުތައް ފަށާނީ.
އެހެންވީމާ، މި ދެ އަހަރުގެ ތެރޭގައި، މިގޮތަށް މިހެން ރަށްރަށުގައި ކުރަންޖެހިފައި ހުރި ކަންކަން ޢަމަލީގޮތުން ހަމަ ޙަޤީޤަތުގައިވެސް އަޅުގަނޑުމެން ފަށައިދޭނަން. ފަށައި، ވީހާވެސް ގިނަ ކަންކަން ނިންމަމުން ދާނަން. އެހެންވީމާ، 2025، 2026 އަދި ކޮންމެވެސްވަރަކަށް 2027 އާ އެކީގައި، މި ތިން އަހަރު ވެގެންދާނީ، އަޅުގަނޑު ކެމްޕެއިން ތެރޭގައި ރަށްރަށަށް ގޮސް، ވެފައިހުރި ވަޢުދުތަކާއި، މެނިފެސްޓޯގައި ލިޔެފައި ހުރި ވަޢުދުތަކާއި، އަދި މިހެން ރަށްރަށަށް އައިސް ކައުންސިލްތަކާއި ރައްޔިތުންނާ ބައްދަލުވީމާ، އެ ފާޅުކުރައްވާ، ނޫނީވިއްޔާ ހިއްސާކުރަމުންދާ ކަންބޮޑުވުންތަކުގައި ހުންނަ ކަންކަމަށް ޢަމަލީ ސިފަ ގެނެސްދިނުމަށްޓަކައި ނަތީޖާ ނެރުމަށް މަސައްކަތްތައް ކުރުމަށް. އެހެންވީމާ، ރައްޔިތުންނަށް އެކަން ހަމަ ޔަގީނުންވެސް އިރާދަކުރެއްވިއްޔާ މިގޮތަށް ފެނިގެންދާނެ.
އާދެ، ދެންހުރި ކަންކަމަށް ބަލާއިރުގައި، ފެށިފައި، ވަކި ހިސާބަކަށް ގޮސްފައި ހުއްޓިފައި މިހިރަ މަޝްރޫޢުތަކަށް ބަލާއިރުގައި، ފެނާއި ނަރުދަމާގެ މަސައްކަތް. އާދެ، މި މަސައްކަތް ހަވާލުކޮށްފައިވާ ކުންފުންޏާ ވަރަށް ގިނަ މަސައްކަތް، ކުރީ ސަރުކާރުގައިވޭ ހަވާލުކޮށްފައި. އަޅުގަނޑުމެން ފިނޭންސް މިނިސްޓްރީ ތެރެއިން މި ބަލަނީ، ގޮތްތަކެއް ރާވަން، ފައިސާ ހަމަޖައްސައި ދިނުމަށް. އެކަން އެބަ ވަރަށް ރަނގަޅަށް ޕްރޮގްރެސްވޭ. އެހެންވީމާ، މި ކަންކަން ހަމަޔަކަށް އެޅުވުނީމާ، މި ރަށުގެ މަޝްރޫޢު ހިމެނޭގޮތަށް އަދި އެބަހުރި ހަމަ މި ކުންފުންޏާއި އަދި މިގޮތަށް އެހެން ކުންފުންޏާވެސް މަސައްކަތްތަކެއް ހަވާލުކޮށްފައި މިދިޔަ ސަރުކާރުން.
އެހެންވީމާ، މި ދަންނަވަން އުޅޭ ވާހަކައަކީ، މި ރަށުގެ މި ފެނާއި ނަރުދަމާގެ މަސައްކަތްވެސް އަލުން ހަމަ ވަރަށް އަވަހަށް ފަށައި ގޮސް ނިންމައިދޭނެ ވާހަކަ. އަދި އެކަން ކުރަމުން ދާއިރުގައި، ދެންމެ ކައުންސިލް ރައީސް ފާހަގަކުރި ގޮތަށް، އެކްސްޓެންޑް ކުރަންޖެހޭ ސަރަޙައްދަށްވެސް އެކަން ފުރިހަމަވެގެން ދާގޮތަށް އަޅުގަނޑުމެން ކޮށްދޭނަން. އެކަމުގެ ޔަގީންކަން ދެން.
އާދެ، ދެން ހަމަ އެއާއެކީގައި، އެމް.ޓީ.ސީ.ސީ.އާ ހަވާލުކުރެވިގެން ފެށިފައި އޮތް، ގިރާ ސަރަޙައްދު ހިމާޔަތް ކުރުމުގެ މަޝްރޫޢު، މެޓީރިއަލްގެ ތާށިކަމާ ހެދި، ފައިސާގެ ތާށިކަމާ ހެދި، މަޑުޖެހިފައި އެހެރީ. މިގޮތަށް ހަމަ އެބަހުރި، އެހެން ރަށްތަކުގައިވެސް މަސައްކަތްތަކެއް މަޑުޖެހިފައި. އަޅުގަނޑުމެން މި ބަލަނީ، މިގޮތަށް ހުއްޓިފައި ހުރި ހުރިހާ ރަށަކަށް ބޭނުންވާ ތަކެތި ހަމަކުރަން. ބޮޑުހިލަ އެންމެ ބޮޑަށް. އެންމެ ގިނަ ރަށްތަކުގައި މަސައްކަތް ހުއްޓިފައި އޮތް ސަބަބަކީ، ބޮޑުހިލަ ނުލިބުން. މިދިޔަ ހަފްތާގެ ތެރޭގައި، އަޅުގަނޑު މިކަމާ ބެހޭ ހުރިހާ ކުންފުނިތަކުގެ ވެރިންނާއި، ފިނޭންސް މިނިސްޓަރާއި، އަދި ކޮންސްޓްރަކްޝަން މިނިސްޓަރާ އެކީގައި ބައްދަލުވުމެއް ބާއްވާފައި، ގޮތްތަކެއް ރާވައިފިން، ހުރިހާ ރަށަކަށް ބޭނުންވާ ބޮޑުހިލަ ބަލްކްކޮށް ރާއްޖެ ގެންނަން. އެއީ، އެކި ރަށްރަށުގައި މިހުރީ މަސައްކަތް ހުއްޓިފައި ބޮޑުހިލަ ނެތިގެން. ނޫނީވިއްޔާ އެ ބޭނުންވާ ޝޯރ ޕްރޮޓެކްޝަނަށް ބޭނުންވާ މެޓީރިއަލް ނެތިގެން. ބަނދަރުތަކާއި، ރަށްގިރުމުގެ މައްސަލައާއި، ބިންހިއްކުމުގައި ބޭނުންވާ ތޮށިލުމާއި، މިހެން ހުރި ކަންކަމަށް ބޭނުންވާ ހިލަ. އެހެންވީމާ، މިހާރުވަނީ ކަންތައްތަކެއް ރޭވިފައި. އެކަން ކުރާނެ ގޮތްތަކެއް. ފައިސާވެސް ހަމަޖައްސައިދީފައި އޮންނާނީ، އަޅުގަނޑު މިދިޔަ ހަފްތާ ނިމުނު ތަނުގައި.
މިގޮތަށް މި ކަންތައްތައް މި ރާވައިލީ. އެހެންވީމާ، މި ރަށުގައިވެސްމި މަސައްކަތް އަޅުގަނޑުމެން ކުރިއަށްގެންދާނީ، ގިރާ ސަރަޙައްދު، ނޫނީވިއްޔާ ގޮނޑުދޮށް ހިމާޔަތްކުރުމުގެ މަޝްރޫޢު ކުރިއަށްދާއިރުގައި، ތިޔަބޭފުޅުން މޫދަށް އެރިލާނެ ސަރަޙައްދެއްވެސް، އޭގައި ހިމެނިގެންދާގޮތަށް އެކަން އިރާދަކުރެއްވިއްޔާ ކޮށްދޭނެ ކަމަށް ދަންނަވަން.
އާދެ، އޭ.ޓީ.އެމް.ގެ ވާހަކައަކީ، އަޅުގަނޑު ހަމަ ކޮންމެ ރަށެއްގައިވެސް ދަންނަވަމުންދާ ވާހަކައެއް. އަދި އަޅުގަނޑުމެން މިހާރު އެ މަޝްރޫޢު ފަށައިފައި އޮތް ކަމެއް. މި އަހަރުގެ ތެރޭގައި ރާއްޖޭގެ ހުރިހާ ރަށެއްގައި އޭ.ޓީ.އެމް. އަޅުގަނޑުމެން ގާއިމުކޮށް ނިންމަން އެބަ. މި ރަށް އޭގެ ތެރޭގައި ޔަގީނުންވެސް ހިމެނިގެންދާނެ. އެހެންވީމާ، އެކަމުގައި ކަންބޮޑުވުމެއް ނުބާއްވަވާ. އެކަން ހަމަޖެހިގެންދާނެ.
އާދެ، ދެން މިއޮތީ، ވޭސްޓް މެނޭޖްމަންޓް، ކުނި މެނޭޖްކުރުން. އެވެސް ހަމަ އެފަދަ ކަމެއް. މި އަހަރު ތެރޭގައި، ރާއްޖޭގެ ހަމަ ހުރިހާ ރަށެއްގައި އިރާދަކުރެއްވިއްޔާ އަޅުގަނޑުމެން އެ ރަށެއްގެ އާބާދީއާއި، އެ ރަށެއްގެ ނީޑަށް ބަލާފައި، އެ ރަށަކަށް ބޭނުންވާ ކެޕޭސިޓީގައި، އެ ރަށަށް ބޭނުންވާ ފެންވަރުގައި، ހުރިހާ ކަމެއް ހަމަކުރެވިފައިވާ، ތަކެތީގެ ގޮތުންނާއި، އެކި ކަހަލަ ވަސީލަތްތަކުގެ ގޮތުން، ކަންތައް ފުރިހަމަކުރެވިފައިވާ، ކުނި މެނޭޖްކުރުމުގެ މަރުކަޒެއް، ވޭސްޓް މެނޭޖްމަންޓް ސެންޓަރެއް އަޅުގަނޑުމެން މި ރަށުގައި ގާއިމުކުރާނަން. އެކަން ކޮށްދޭނެ ކަމަށް އަޅުގަނޑު ދަންނަވަން.
އާދެ، އެހެންވީމާ، މިހިރަ ކަންކަމަކީ، އަޅުގަނޑުމެން ހަމަ ކުރާނެ ކަންތައްތައް. އައިސް ޕްލާންޓްގެ ކަންތައް ވެފައި އޮތް ގޮތަކީ، ސަޢުދީ ފަންޑުގެ ތެރެއިން ހިނގާ ކަމެއް އެއީ. އަޅުގަނޑުމެންގެ މާލީ ވަޒީރު ވަރަށް އަވަހަށް ސަޢުދީ ފަންޑާ ބައްދަލުވެސް ކުރައްވާނެ. އެ މަސައްކަތަކީ ހަމަ ސަޢުދީ ފަންޑުންވެސް ވަރަށް އިސްކަންދޭ ކަމެއް. އޭގައި ހުރި ބައެއް ކަންތައްތައް ހަމަޖެހިގެން ދިޔައިމާ، އެ ފަންޑުގެ ތެރެއިން އަޅާ ހުރިހާ އައިސް ޕްލާންޓްތަކެއް އެޅުމުގެ މަސައްކަތް ހިނގާނެ. އެހެންވީމާ، އޭގެ އިތުރު އަޕްޑޭޓެއް މިގަޑީގައި އަޅުގަނޑަށް ދެވޭކަށް ނެތް. ހަމައެކަނި ދަންނަވާލަން އޮތީ، އެއީ ފަންޑު ހަމަޖެހިފައި އޮތް ކަމެކޭ. އޭގެ ފައިސާގެ އިޝޫއެއް ނެތް. މީގައި މިއުޅެނީ އިދާރީ ބައެއް ޕްރޮސީޖަރަލް ކަންތައްތަކެއް. އެހެންވީމާ، އެވަރަށް އަޅުގަނޑު އެކަމުގައި ހަމަ ދަންނަވާލަން. ޔަގީންކަން ދެނީ ފައިސާގެ އިޝޫއެއް ނެތް، ހަމަޖެހިފައި އޮތް މަޝްރޫޢެއްކަން. އިތުރު ތަފްސީލެއް އަޅުގަނޑަށް ހަމަ މި ގަޑީގައި ދެވެން ނެތީ، އެކަމާ ބެހޭ މަޝްވަރާތައް ހިނގަމުންދާތީވެ. ކަންބޮޑުވުމެއް އޮންނަންޖެހޭ ކަމެއްނޫން އެއީކީއެއް.
އާދެ، އެހެންވީމާ، ޖުމްލަކޮށް އަޅުގަނޑު މި ދަންނަވާލީ، ދެންމެގައި ކައުންސިލްގެ ރައީސް އެ ފާހަގަކުރެއްވި، ހުރިހާ ކަމެއް އިރާދަކުރެއްވިއްޔާ އަޅުގަނޑުމެން ކޮށްދޭނަން. މި އަހަރުގެ ތެރޭގައި ވީހާވެސް ގިނަ ކަންކަން ފެށިގެންދާނެ. ހަމަ ގާތްގަނޑަކަށް މީގައި މިހިރަ ހުރިހާ ކަމަކީވެސް މި އަހަރު ފެށޭނެ ކަންކަން. ނުފެށި އޮތް ކަމެއްވިއްޔާ ހަމަ އެންމެ އަވަހަށް ފަށާނަން.
އެހެންވީމާ، މި ރަށުގެ ރައްޔިތުންނަށް މި ބޭނުންވާ ކަންކަމުގައި އަޅުގަނޑުމެން ވަރަށް އިސްކަންދީގެން ކުރިއަށް ގެންދާނަން. މި ރަށަކީ އަޅުގަނޑަށް ފާހަގަކުރެވޭ ގޮތުގައި، ތަޢުލީމަށް ވަރަށް ލޯބިކުރާ ރައްޔިތެއް އުޅޭ ރަށެއް. ވަރަށް ރަނގަޅަށް ކިޔަވައި ވިދާޅުވެގެން ތިއްބެވި، ޤައުމަށް ޚިދުމަތްކުރަމުންދާ އެތައް ދަރިންނެއް އުފައްދަވައިފައިވާ ރަށެއް. ޞިއްޙީ ދާއިރާގައިވެސް މި ރަށަށް ނިސްބަތްވާ އެތައް ޑޮކްޓަރުންނެއް އެބައުޅޭ. އަދި އެހެނިހެން ދާއިރާތަކުގައިވެސް ކިޔަވައިގެން ތިއްބެވި އެކިއެކި ބޭފުޅުން އެބަ ތިއްބެވި. އެހެންވީމާ، ފަޚުރުވެރި ރަށެއް. ފަޚުރުވެރި ޢާއިލާތަކެއްގެ މައްޗަށް ނިސްބަތްވާ ރަށެއް.
އެހެންވީމާ، އެކަން އަޅުގަނޑުގެ ހިތުގެ އެންމެ ފުންމިނުން އުފަލާއެކީގައި، ބަލައިގަންނަން. އެހެންވީމާ، މި ރަށުގެ ތަޢުލީމަށް ދޭންޖެހޭ އިސްކަން، މި ރަށުގެ ދުޅަހެޔޮކަމާއި، މި ރަށުގެ އިޖުތިމާޢީ ހަމަޖެހުމަށް، ކުރިއެރުމަށް ދޭންޖެހޭ ސަމާލުކަން އަޅުގަނޑުމެން ދޭނަން. ރަށުގެ ތަރައްޤީއަށްޓަކައި ބޭނުންވާ ކަންކަމުގައި ކުލަޖައްސައިދޭނަން. އިރާދަކުރެއްވިއްޔާ އެކަމުގެ ނަތީޖާ ނެރެދޭނަން.
އަދިވެސް އެއްފަހަރު، ތިޔަ ލޮބުވެތި ހުރިހާ ރައްޔިތުންނަށް ވަރަށް ބޮޑަށް ޝުކުރު ދަންނަވަން.
އަޅުގަނޑުގެ ދުޢާއަކީ، އަޅުގަނޑުމެން މިކުރާ މަސައްކަތްތަކުގައި اللهُ سُبْحَانَهُ وَتَعَالَى ބަރަކާތް ލެއްވެވުން. އަޅުގަނޑުމެންގެ ޤައުމަށް އުފާފާގަތިކަން މިންވަރު ކުރައްވާށި! އާމީން!
وَمَا تَوْفِيقِي إِلَّا بِاللَّهِ عَلَيْهِ تَوَكَّلْتُ وَإِلَيْهِ أُنِيبُ.
وَالسَّلَامُ عَلَيْكُمْ وَرَحْمَةُ اللهِ وَبَرَكَاتُه.