މި ފެށުނު 2025 ވަނަ އަހަރަކީ ޢަމަލީ ތަރައްޤީގެ އަހަރަށް ވާ ހިނދު، ހުވަދު އަތޮޅު ދެކުނުބުރީ ވާދޫގައި ޢުމްރާނީ ތަރައްޤީގެ މަޝްރޫޢުތައް ހިންގެވުމުގައި، މިވަގުތު އެންމެ އިސްކަމެއް ދެއްވައިގެން ކުރިއަށް ގެންދަވާނީ އެ ރަށުގެ ތަޢުލީމީ ދާއިރާއަށް ބޭނުންވެފައިވާ މަޝްރޫޢުތައް ކަމުގެ ޔަޤީންކަން ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ދެއްވައިފިއެވެ.
ރައީސުލްޖުމްހޫރިއްޔާ މި ޔަޤީންކަންދެއްވީ، ދިވެހިރާއްޖޭގައި މީހުން ދިރިއުޅޭ ހުރިހާ ރަށަކަށް ވަޑައިގެން، ރައްޔިތުންނާ ބައްދަލުކުރައްވައި، އެ ރައްޔިތުންގެ އަޑު އައްސަވައި، ރައްޔިތުން ބޭނުންވާ ކަންކަން އޮޅުންފިލުއްވުމަށް އެ މަނިކުފާނު ފަށްޓަވައިގެން ކުރިއަށް ގެންދަވާ ސިލްސިލާ ދަތުރުފުޅުތަކުގެ ތެރެއިން ގދ. ވާދޫއަށް މިއަދު ވަޑައިގެން، އެ ރަށުގެ ރައްޔިތުންނާ ބައްދަލުކުރައްވައި ވާހަކަފުޅުދައްކަވަމުންނެވެ.
ދިވެހިރާއްޖޭގައި ޢިލްމުފެތުރި ފުޅާވުމުގައި އެންމެ އިސް ދައުރެއް އަދާކުރެއްވި އަލްފަޤީޙުލް ޙާފިޡު މުޙައްމަދު ޖަމާލުއްދީނުލް މަޙްލީ ނުވަތަ "ވާދޫ ދަންނަކަލޭފާނު"ގެ ނަންފުޅުން ނަން ދެވިފައިވާ ވާދޫގެ ޖަމާލުއްދީން ސްކޫލުގެ ހޯލުގައި، އެ ރަށުގެ ރައްޔިތުންނާ ބައްދަލުކުރައްވައި ވާހަކަފުޅުކުރިއަށް ގެންދަވަމުން ރައީސުލްޖުމްހޫރިއްޔާ ވަނީ، ރަށުގެ ތަޢުލީމު ކުރިއެރުވުމަށްޓަކައި، ރަށުގެ ރައްޔިތުން ކުރައްވަމުން ގެންދަވާ އުންމީދުތައް ފުރިހަމަކޮށްދެއްވާނެ ކަމުގެ ޔަޤީންކަން، އެ ރައްޔިތުންނަށް ދެއްވާފައެވެ.
ވާދޫގެ ޖަމާލުއްދީން ސްކޫލަކީ ގދ. ވާދޫއަށް ޚާއްޞަ ތަނެއް ކަމަށް ވިދާޅުވެ، ހަމަ އެފަދައިން ގދ. ވާދޫއަކީ ތަޢުލީމީ ރަށެއްގެ ގޮތުގައި ސިފަކުރައްވައި ވާހަކަފުޅުދައްކަވަމުން ރައީސުލްޖުމްހޫރިއްޔާ ވަނީ، ފަޚުރުވެރި މާޒީއެއް އޮތް "ވާދޫ ދަންނަކަލޭފާނު"ގެ ރަށަށް، ސަރުކާރުތަކުން އަހައްމިއްޔަތުކަން ދެއްވަންޖެހޭކަން ފާހަކުރައްވާފައެވެ. ވަކިން ޚާއްޞަކޮށް، ރަށުގެ ތަޢުލީމީ ދާއިރާ ކުރިއެރުވުމަށް އަހައްމިއްޔަތުކަން ދެއްވަންޖެހޭނެކަމަށް ދެކެވަޑައިގަންނަވާ ކަމުގައިވެސް ރައީސުލްޖުމްހޫރިއްޔާ ވިދާޅުވިއެވެ. އެގޮތުން، ވާދޫ ޖަމާލުއްދީން ސްކޫލަށް ބޭނުންވާ ޢުމްރާނީ ތަރައްޤީގެ ކަންކަން މިއަހަރުގެ ވީހާވެސް ކުރީކޮޅު، ޢަމަލީ ގޮތުން ފަށްޓަވައި ދެއްވާނެ ކަމުގެ ޔަޤީންކަން، ރައީސުލްޖުމްހޫރިއްޔާ ވަނީ އެ ރަށުގެ ރައްޔިތުންނަށް ދެއްވާފައެވެ. ޢުމްރާނީ ތަރައްޤީގެ އިތުރުންވެސް، ސްކޫލަށް ބޭނުންޖެހިފައިވާ އެހެންކަންކަން ކުރުމުގައި ސަރުކާރުން ފުރިހަމަ އެއްބާރުލުން ދެއްވާނެކަމުގައިވެސް ރައީސުލްޖުމްހޫރިއްޔާ ވިދާޅުވިއެވެ.
މި މޭރުމުން ވާހަކަފުޅުކުރިއަށް ގެންދަވަމުން ރައީސުލްޖުމްހޫރިއްޔާ ވަނީ ޢުމްރާނީ ތަރައްޤީގެ ރޮނގުން ގދ. ވާދޫއަށް ދިމާވެފައިވާ ރަށުގެ މަގުތަކުގެ ދަތިކަމުގެ މައްސަލައަށްވެސް އަވަސް ޙައްލެއް ހޯއްދަވައިދެއްވާނެ ކަމަށް ވިދާޅުވެފައެވެ. ސްކޫލު މަޝްރޫޢަށް ފަހު އެންމެ ބޮޑު އިސްކަމެއް ދެއްވައިގެން މި އަހަރުގެ ބަޖެޓުން ވާދޫގެ ތަރައްޤީއަށް ދެން ޚަރަދު ކުރައްވާނީ، އެ ރަށުގެ މަގުތަކަކީ ރައްޔިތުންނަށް ފަސޭހައިން ބޭނުންކުރެވޭނެ މަގުތަކަކަށް ހެއްދެވުމުގެ މަޝްރޫޢަށް ކަމުގައި ރައީސުލްޖުމްހޫރިއްޔާ ވަނީ ވިދާޅުވެފައެވެ. ހަމަ މި ފަދައިން ޞިއްޙީ ދާއިރާއަށް ބޭނުންޖެހިފައިވާ ތަރައްޤީވެސް ހޯއްދަވައިދެއްވާނެކަން އެ މަނިކުފާނުގެ ވާހަކަފުޅުގައި ފާހަގަކުރެއްވިއެވެ.
މީގެ އިތުރުން، ރައްޔިތުންނަށް އިޤްތިޞާދީ ބާރުވެރިކަން ހޯއްދަވައިދެއްވުމަށް ސަރުކާރުގެ ފުރިހަމަ އެއްބާރުލުން ލިބެމުންދާނެކަމުގެ ފުރިހަމަ ޔަޤީންކަންވެސް ރައީސުލްޖުމްހޫރިއްޔާ ވަނީ ދެއްވާފައެވެ. އަދި މުޅި ރާއްޖެއަށް ދިމާވެފައިވާ ކުނީގެ މައްސަލަ ޙައްލުކުރުމުގެ ތެރެއިން، ވާދޫގައި ހިންގަން ފަށައި، ހުއްޓިފައިވާ މަޝްރޫޢު ނިންމަވައި، ޢަމަލީ ގޮތުން އޮޕަރޭޝަންތައް ފެށޭވަރުކޮށްދެއްވާނެ ކަމަށް ރައީސުލްޖުމްހޫރިއްޔާ ވިދާޅުވިއެވެ.
މިހިނގާ 2025 ވަނަ އަހަރާއި، 2026 ވަނަ އަހަރަކީ ރިޔާސީ ކެމްޕޭނާއި މެނިފެސްޓޯގައި ވެވަޑައިގެންފައިވާ ވަޢުދުފުޅުތައް ޢަމަލީ ގޮތުން ފުއްދަވަން ފައްޓަވާ، އަދި ގިނަ މަޝްރޫޢުތަކެއްގެ ނަތީޖާ ނެރެދެއްވާނެ 2 އަހަރު ކަމުގައި ރައީސުލްޖުމްހޫރިއްޔާ ވިދާޅުވިއެވެ.
ޢުމްރާނީ ތަރައްޤީއާއެކު އަޅުގަނޑުމެންގެ މުޖުތަމަޢަކީ ހެޔޮކަންކަމަށް ޢަމުރުކޮށް، ނުބައިކަންކަން ނަހީކުރާ ބައެއް ކަމުގައިވެ، ލޯކުރިމަތީގައި ގޯސްކަމެއް ހިންގާނަމަ އެކަމަށް ނޫނެކޭ ބުނަން ކެރޭ ބަޔަކަށް ވާންޖެހޭކަމަށް ރައީސުލްޖުމްހޫރިއްޔާ ވިދާޅުވިއެވެ. ގދ. ވާދޫގެ ރައްޔިތުންނާ ބައްދަލުކުރައްވާ ރައީސުލްޖުމްހޫރިއްޔާ މިއަދު ހަވީރު ދެއްކެވި ވާހަކަފުޅު ނިންމަވާލައްވަމުން، ރަށާއި ޤައުމުގެ ތަރައްޤީއަށް މަސައްކަތްކުރުމުގައި، ހުރިހާ ރައްޔިތުންވެސް އެކުވެރިކަމާއެކު ކުރިއަށްވަޑައިގެން، އުންމީދު ކުރާ ތަރައްޤީގެ މަސައްކަތްތައް ޙަޤީޤަތަކަށް ހެއްދެވުމަކީ ޢަޒުމެއް ކަމުގައި ކަނޑައެޅުއްވުމަށް އެމަނިކުފަނު ވަނީ އިލްތިމާސްކުރައްވާފައެވެ.
