ރައްޔިތުންގެ މަޖިލީސް ދެން އަންނަ ދައުރަށް ހުޅުވޭ ފުރަތަމަ ހަފުތާ ތެރޭ، އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކަށް ވެވަޑައިގެންނެވި ވަޢުދު ފުއްދެވުމަށް ހުށަހަޅަންޖެހޭ އިސްލާޙް، ހުށަހަޅުއްވާނެ ކަމުގައި ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ވިދާޅުވެއްޖެއެވެ. އެމަނިކުފާނު މިހެން ވިދާޅުވީ، ހުވަދުއަތޮޅުގެ ބައެއް ރަށްތަކަށް މިހާރު ކުރައްވަމުން ގެންދަވާ ދަތުރުފުޅުގެ ތެރެއިން، ގދ. ވާދޫ ރައްޔިތުންނާ މުޚާޠަބުކުރައްވައި ދެއްކެވި ވާހަކަފުޅުގައެވެ.
އެ މަނިކުފާނުގެ ވާހަކަފުޅުގައި، އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކަށް ވެވަޑައިގެންނެވި ވަޢުދު ފުއްދެވުމަށްޓަކައި ވަޒީފާއާބެހޭ ޤާނޫނާއި ލާމަރުކަޒީ ޤާނޫނަށް އިސްލާޙް ގެންނަވަން ރައްޔިތުންގެ މަޖިލީހަށް ހުށަހަޅުއްވާނެ ކަމުގައި ވިދާޅުވިއެވެ. އެގޮތުން މި ދެ އިސްލާޙްގެ ތެރޭގައި މިހާރު ލިބޭ އެލަވަންސަށް މުސާރައިގެ ދަރަޖަ ދިނުމަށް މަސައްކަތް ކުރައްވަމުންގެންދަވާކަން އެ މަނިކުފާނުގެ ވާހަކަފުޅުގައި ފާހަގަކުރެއްވިއެވެ. އެގޮތުން މިހާރު އެލަވަންސެއްގެ ގޮތުގައި ފައިސާ ދެމުންދާތީ، އެ ކަނބަލުންނަށް ރޯދަ އެލަވަންސް ދިނުމަށް ހުރި ހުރަސްތަކާއި ބޭންކުތަކުން ލޯނު ހޯދުމަށް ދިމާވާ ދަތިތަކުގެ އިތުރުން، ވިހެއުމުގެ ޗުއްޓީ ފަދަ ކަންކަން ހަމަޖައްސައިދިނުމުގައި ކުރިމަތިވެފައިވާ ގޮންޖެހުންތައް އެ މަނިކުފާނުގެ ވާހަކަފުޅުގައި ތަފްސީލުކޮށްދެއްވިއެވެ.
ރައީސުލްޖުމްހޫރިއްޔާގެ ވާހަކަފުޅުގައި، މި ބަދަލަކީ މިދިޔަ އެއް އަހަރުތެރޭ އެ މަނިކުފާނަށް ބައްދަލުކުރެއްވުނު އަންހެނުންގެ ތަރައްޤީއަށް މަސައްކަތްކުރާ ހުރިހާ ކޮމިޓީތަކަކުންވެސް އެދިލެއްވި އެއް ކަމެއް ކަމުގައި ވިދާޅުވިއެވެ. އަދި އެގޮތުން މި އިސްލާޙްތައް ގެނެސް އިރާދަކުރެއްވިއްޔާ، އަންނަ ރަމަޟާން މަހުން ފެށިގެން ކޮންމެ ރަމަޟާން މަހެއްގައިވެސް އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކުގެ މެންބަރުންނަށް ރޯދަ މަހުގެ އިނާޔަތް ލިބޭނެ ކަމަށާއި އަދި އެ އެލަވަންސަކީ މުސާރަ ލިބޭ އެހެން މުވައްޒަފުންނަށް ލިބޭ ކަހަލަ މުސާރައިގެ ހައިސިއްޔަތު ލިބިފައިވާ އެއްޗަކަށް ބަދަލުކުރެވޭނެކަން އެ މަނިކުފާނުގެ ވާހަކަފުޅުގައި ފާހަގަކުރެއްވިއެވެ. އަދި އެކަމުގެ ސަބަބުން ފުލްޓައިމްކޮށް ވަޒީފާއަށް ނުކުންނަވަން ޖެހިވަޑައިނުގަންނަވާނެ ކަމަށާއި، މިހާރުވެސް މަސައްކަތް ކުރައްވާ އުޞޫލުން މަސައްކަތް ކުރެއްވުމުން އެ އިނާޔަތްތައް ލިބިވަޑައިގަންނަވާނެކަމުގެ ޔަޤީންކަން އެ މަނިކުފާނު ދެއްވިއެވެ.
އަންހެން ކަނބަލުންނަކީ ކޮންމެ ރަށެއްގެވެސް ރަށު ތަރައްޤީއަށް އެންމެ ހަރަކާތްތެރިކޮށް މަސައްކަތްކުރާ ފަރާތްތައް ކަމަށްވާއިރު، އެކަމުގެ އަގުވަޒަންކުރައްވަން ބޭނުންފުޅުވާކަމުގައި ރައީސުލްޖުމްހޫރިއްޔާގެ ވާހަކަފުޅުގައި ވިދާޅުވިއެވެ. އެކަމުގައި ސަރުކާރުން ދެއްވެން އޮތް ހުރިހާ އެއްބާރުލުމެއް ދެއްވާނެ ކަމަށާއި އަންހެން ބޭފުޅުންނާއި ފިރިހެން ބޭފުޅުންނަކީ ހަމަހަމަކަމާ އެކީގައި، އެއް ހައިސިއްޔަތެއް ލިބިގެން، ރަށުގެ އަދި ޤައުމުގެ ތަރައްޤީއަށް މަސައްކަތްކުރާ ބައެއްގެ ގޮތުގައި ހެދުމަކީ އެ މަނިކުފާނުގެ ވިސްނުންފުޅެއް ކަމަށާއި އެކަމަކީ ސަރުކާރުން ގެންގުޅުއްވާނެ ސިޔާސަތެއް ކަމުގައި ރައީސުލްޖުމްހޫރިއްޔާ ވިދާޅުވިއެވެ. އެގޮތުން މަތިފަޑީގައި، ޓޮޕް މެނޭޖްމަންޓުގައި އަންހެން ބޭފުޅުންނަށް ޖާގަ ދިނުމަކީ ސަރުކާރުގެ ސިޔާސަތު ކަމުގައި އެ މަނިކުފާނު ވިދާޅުވިއެވެ.
މިދިޔަ ހުރިހާ ސަރުކާރުތަކާ އަޅާކިޔާއިރުގައި، މި ސަރުކާރުގައި ކުންފުނިތަކުގެ ވެރިން އަދި އެހެނިހެން އިސް ލެވެލްތަކުގައިވެސް އެންމެ ގިނަވާނީ އަންހެން ބޭފުޅުން ކަމަށާއި މީގެ ކުރިން އަންހެން ބޭފުޅަކު ލީޑް ނުކުރާ މުއައްސަސާތަކުގައި ޤައުމީ ލެވެލްގައިވެސް މިހާރު އަންހެން ބޭފުޅުން ތިއްބަވާނެކަން އެ މަނިކުފާނު ފާހަގަކުރެއްވިއެވެ. އަންހެން ބޭފުޅުން ކުރައްވާ މަސައްކަތުގައި، އެ ދޭންވާ "ރެކޮގްނިޝަން" ދީ، ފުރުޞަތުތައް ފަހިކޮށްދިނުމަކީ ސަރުކާރުގެ ސިޔާސަތު ކަމުގައި ރައީސުލްޖުމްހޫރިއްޔާ ވިދާޅުވިއެވެ.
