ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު، މާލެއަތޮޅު ހިންމަފުށީ ކައުންސިލާއި އަންހެނުންގެ ތަރައްޤީއަށް މަސައްކަތްކުރާ (އ.ތ.މ) ކޮމިޓީގެ މެންބަރުންނާއި ބައްދަލުކުރައްވައި ރަށުގެ ތަރައްޤީއަށް އެންމެ ބޭނުންވާ ކަންކަމާ ގުޅޭގޮތުން މަޝްވަރާކުރައްވައިފިއެވެ. މި ބައްދަލުކުރެއްވުން ކުރިއަށްދިޔައީ މިއަދު ހަވީރު ހިންމަފުށީ ކައުންސިލްގެ އިދާރާގެ ފޯދޭ ހިޔާ އިމާރާތުގައެވެ.
މި ބައްދަލުކުރެއްވުމުގައި ކައުންސިލުން ވަނީ ރަށުގެ ރައްޔިތުންގެ ކަންބޮޑުވުންތަކާއި ރަށުގެ ތަރައްޤީއަށް ބޭނުންވާ ކަންތައްތައް ރައީސުލްޖުމްހޫރިއްޔާއާ ޙިއްޞާކުރައްވާފައެވެ. އެގޮތުން ފުޅާ ދާއިރާއެއްގައި އެފް.އެސް.އެމް ޚިދުމަތް ދެވޭނެ ގޮތް ހައްދަވައި ދެއްވުމަށާއި، ސުކޫލުގެ ހާލަތު ރަނގަޅުކޮށްދެއްވުމަށް އެދިވަޑައިގެންނެވިއެވެ. އަދި ކައުންސިލުން ވަނީ ހިންމަފުއްޓަކީ ގިނަ ޚިދުމަތްތަކެއް ދެމުންދާ ރަށަކަށްވުމުން ޞިއްޙީ މަރުކަޒުން މިހާރު ދެމުންދާ ޚިދުމަތުގެ ފެންވަރު ރަނގަޅުކޮށްދެއްވުމަށް އެދިވަޑައިގެންފައެވެ.
މިއަދުގެ ބައްދަލުކުރެއްވުމުގައި ރައީސުލްޖުމްހޫރިއްޔާގެ އަރިހުގައި ބައިވެރިވެވަޑައިގެންނެވި ވަޒީރުން ވަނީ މާލެއަތޮޅު ހިންމަފުށީގެ ތަރައްޤީއަށް ކުރިޔަށްގެންދާ މަޝްރޫޢުތަކުގެ އެންމެ ފަހުގެ މަޢޫލޫމާތުތައް ޙިއްޞާކުރައްވާފައެވެ.
މިއަދުގެ ބައްދަލުކުރެއްވުމުގައި ވާހަކަފުޅު ދައްކަވަމުން ރައީސުލްޖުމްހޫރިއްޔާ ވިދާޅުވީ ކައުންސިލުން ފާހަގަކުރެއްވި ތަޢުލީމީ ދާއިރާއާ ގުޅުންހުރި ކަންކަން ވަރަށް އަވަހަށް ބައްލަވާނެކަމަށެވެ. އަދި އެފް.އެސް.އެމް ޚިދުމަތް މިހާރު ކުރައްވާކަންކަން ޙިއްޞާކުރެއްވިއެވެ. އަދި ދެންވެސް ކައުންސިލުން ފާހަގަކުރެއްވި ކަންކަން ބައްލަވާނެކަމުގައި އެމަނިކުފާނު ވިދާޅުވިއެވެ.
