ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު، މާލެއަތޮޅު ކާށިދޫ ކައުންސިލާއި އެރަށު އަންހެނުންގެ ތަރައްޤީއަށް މަސައްކަތްކުރާ (އ.ތ.މ) ކޮމިޓީގެ މެންބަރުންނާ ބައްދަލުކުރައްވައި ދަނޑުވެރިކަމުގެ ދާއިރާއަށް ޚާއްޞަ އިސްކަމެއް ދެއްވާނެކަމުގައި ވިދާޅުވެއްޖެއެވެ.
ގާފަރު ކައުންސިލް އިދާރާގައި މިއަދު ބޭއްވި މި ބައްދަލުކުރެއްވުމުގައި ކާށިދޫ ކައުންސިލުން ވަނީ ރަށުގެ ރައްޔިތުންގެ ހުރި ކަންބޮޑުވުންތަކާއި، ރަށުގެ ތަރައްޤީއަށް އެންމެ ބޭނުންވާ ކަންތައްތައް ރައީސުލްޖުމްހޫރިއްޔާއާ ޙިއްޞާކުރައްވައި އެކަންކަމާ ގުޅޭގޮތުން މަޝްވަރާކުރައްވާފައެވެ. އެގޮތުން ރަށުގެ ބަނދަރުގެ ހާލަތު ބަޔާންކޮށްދެއްވައި އެކަމުން ރައްޔިތުންނަށް ކުރިމަތިވާ ގޮންޖެހުންތައް ޙިއްޞާކުރެއްވިއެވެ. އަދި ޞިއްޙީ ދާއިރާގައި ހުރި ކަންބޮޑުވުންތައް ފާހަގަކުރައްވައި އެކަންކަމަށް ޙައްލު ބޭނުންވާކަން ފާހަގަކުރެއްވިއެވެ. މީގެ އިތުރުން ރަށުގެ ފަތުރުވެރިކަން ކުރިއެރުވުމަށް ބޭނުންވާކަން ފާހަގަކުރައްވައި ކައުންސިލުން މިކަން ކުރިއަށްގެންދިއުމަށް އެދިވަޑައިގަންނަވާކަމުގައި ވިދާޅުވިއެވެ. ހަމައެއާއެކު ކާށިދޫގެ ދަނޑުވެރިކަން ކުރިއެރުވުމަށް ސަރުކާރުން ކުރައްވާނެ މަސައްކަތްތައް، މިބައްދަލުވުމުގައި ކައުންސިލުން އޮޅުންފިލުއްވިއެވެ.
މިއަދުގެ ބައްދަލުކުރެއްވުމުގައި ކާށިދޫ އަންހެނުންގެ ތަރައްޤީއަށް މަސައްކަތްކުރާ (އ.ތ.މ) ކޮމިޓީއިން ވަނީ ކުރިއަށްއޮތް ދައުރުގައި އަންހެނުންގެ ތަރައްޤީއަށް މަސައްކަތްކުރާ ކޮމިޓީ އޮންނާނެ ގޮތާގުޅޭގޮތުން ސުވާލުކުރައްވައި އެބޭފުޅުން އެދިވަޑައިގަންނަވާ ކަންކަން ޙިއްޞާކުރައްވާފައެވެ.
މި ބައްދަލުކުރެއްވުމުގައި ރައީސުލްޖުމްހޫރިއްޔާ ވަނީ ދަނޑުވެރިކަމުގެ ދާއިރާ ކުރިއެރުވުމަށް ސަރުކާރުން ކުރައްވާނެ ކަންކަން ޙިއްޞާކުރައްވާފައެވެ. އަދި ސަރުކާރުގެ އެކި މުވައްސަސާތައް އެއްކޮށްލައްވައި، މަސައްކަތްތައް ހަރުދަނާކުރުމަށް ކުރައްވާ ކަންކަން އެމަނިކުފާނު ޙިއްޞާކުރެއްވިއެވެ. މީގެއިތުރުން އެމަނިކުފާނު ވަނީ އ.ތ.މ ކޮމިޓީ ބާރުވެރިކުރުވުމަށް ސަރުކާރުން ކުރައްވާނެކަންކަން ތަފްޞީލީ ގޮތެއްގައި ވިދާޅުވެދެއްވާފައެވެ.
