އެމަނިކުފާނުގެ ވެރިކަމުގެ މި ފަސް އަހަރުގެ ތެރޭގައި ބޭނުންފުޅުވަނީ އިޚުލާސްތެރި ކަމާއެކުގައި ރައްޔިތުންނަށް ކަންކަން ކޮށްދެއްވަން ކަމުގައި ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ވިދާޅުވެއްޖެއެވެ. އެ މަނިކުފާނު މިހެން ވިދާޅުވީ ޖުމްހޫރީ ދުވަހުގެ މުނާސަބަތުގައި މިރޭ ދަރުބާރުގޭގައި ބޭއްވެވި ރަސްމީ ޖަލްސާގައި ވާހަކަފުޅު ދައްކަވަމުންނެވެ.
ރައީސުލްޖުމްހޫރިއްޔާގެ ވާހަކަފުޅުގައި، ރައްޔިތުން ވެރިކަމަށް މީހަކު ހޮވީމާ ރައްޔިތުން މަތިން ހަނދާން ނައްތާލާފައި، އޭނާގެ ވެރިކަން ދިފާޢުކުރުމަށްޓަކައި ކަންކަން ކުރުމަކީ އެކަން ވާންޖެހޭގޮތް ނޫން ކަމަށާއި އެ މަނިކުފާނަށް ވެރިކަން ޙަވާލުކުރި ފަސް އަހަރުގެ ތެރޭގައި ބޭނުންފުޅުވަނީ އިޚުލާސްތެރި ކަމާއެކުގައި ރައްޔިތުންނަށް ކަންކަން ކޮށްދެއްވަން ކަމުގައި ވިދާޅުވިއެވެ. އަދި ކުރިއަށް އޮތް 20 އަހަރު ދުވަހަށް، ޤައުމީ ތަރައްޤީގެ މާސްޓަރ ޕްލޭނެއް ހެދުމަށް ނިންމެވީ، ރައްޔިތުން ކައިރީގައި އަހައިގެން، ރައްޔިތުން ރާއްޖެ ތަރައްޤީ ކުރަން ބޭނުންވާ ގޮތް އޮޅުންފިލުވުމަށްކަން ރައީސުލްޖުމްހޫރިއްޔާގެ ވާހަކަފުޅުގައި ފާހަގަކުރެއްވިއެވެ. އަދި ރާއްޖޭގެ ތަރައްޤީއަކީ އަންނަ ކޮންމެ ސިޔާސީ ބަޔަކު އެބަޔަކު ބޭނުންވާ ގޮތަކަށް ބަދަލުކުރަމުންދާ، ރައްޔިތުންގެ ބައިވެރިވުމެއް ނެތް ކަމެއްގެ ގޮތުގައި ބާއްވަން ބޭނުންފުޅުނުވާކަމުގައި އެމަނިކުފާނު ވިދާޅުވިއެވެ.
ރައީސުލްޖުމްހޫރިއްޔާގެ ވާހަކަފުޅުގައި، ހުރިހާ ރަށެއްގެ ރައްޔިތުންނާއި ފަންނީ ބޭފުޅުންނާއި ސްޓޭކްހޯލްޑަރުންގެ މަޝްވަރާއާ އެކީގައި ހެދޭ ރާއްޖޭގެ ތަރައްޤީގެ ޕްލޭނެއް ޤާނޫނު އަސާސީން ބާރުލިބިގެން އޮތުމުގެ މުހިންމު ކަމުގެ މައްޗަށް އަލިއަޅުވާލެއްވިއެވެ. އެމަނިކުފާނު ވަނީ އެކަމަށް ޤާނޫނެއް ޚާއްސަކުރެވޭ ކަމަކަށް ހައްދަވަން ބޭނުންފުޅުވާ ކަމަށާއި އެކަމަށް ވަޢުދުވެ، މިހާރު މަސައްކަތް ކުރައްވަމުންގެންދަވާކަން ހާމަކުރައްވާފައެވެ. އަދި މިކަމުގެ ބޭނުމަކީ ދިވެހި ރައްޔިތުންގެ ހުވަފެންތަކާއި ތަސައްވުރުތަކުގެ އެހީގައި ރައްޔިތުން އެދޭ ގޮތަށް ދިވެހިރާއްޖޭގެ މުސްތަޤުބަލު ކުރަހާ ބައްޓަންކުރުން ކަމަށާއި ރައްޔިތުންގެ އެ ހުށަހެޅުންތަކުގެ މައްޗަށް ކުރިއަށް އޮތް 20 އަހަރު ދުވަހަށް ޤައުމީ ތަރައްޤީގެ މާސްޓަރ ޕްލޭނެއް އެކުލަވާލައި، އެ ޕްލޭނަށް ޤާނޫނީ ބާރުވެރިކަން ދިނުން ކަމުގައި އެމަނިކުފާނު ވިދާޅުވިއެވެ. އެގޮތުން މި ވަގުތަށް އެކަށައެޅިފައިވާ ކަންކަމަށް ބަލާއިރުވެސް ރާއްޖޭގެ އެންމެ އުތުރާއި އެންމެ ދެކުނުގައި އިންޓަރގްރޭޓެޑް ޑިވެލޮޕްމަންޓް ޒޯންގެ ދެ ޒޯނެއް ތަރައްޤީކުރަން ކަނޑައެޅިފައިވާނެ ކަމުގައި އެ މަނިކުފާނު ފާހަގަކުރެއްވިއެވެ. އަދި ރާއްޖޭގެ އެހެން ސަރަޙައްދުތައް ޝާމިލުވާނެހެން 7 އަރބަން ސެންޓަރެއް ނުވަތަ ޢުމްރާނީ ބިނާވެށީގެ 7 ބިނާވެށްޓެއް ރާއްޖޭގެ 7 ސަރަޙައްދެއްގައި ފައްކާކުރެވޭނެ ކަމުގައި އެމަނިކުފާނު ވިދާޅުވިއެވެ.
