ވޭތުވެދިޔަ އެއް އަހަރުގެ ތެރޭގައި އިސްލާމީ ކަންކަމަށާއި ދިވެހި ޤައުމިއްޔަތު ތަރައްޤީކުރުމަށް އިސްކަންދެއްވާފައިވާ ކަމުގައި ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ވިދާޅުވެއްޖެއެވެ. ރައީސުލްޖުމްހޫރިއްޔާ މި މޭރުމުން ވާހަކަފުޅުދައްކަވާފައިވަނީ މިރޭ ދަރުބާރުގޭގައި ބޭއްވި، ޖުމްހޫރީ ދުވަހުގެ ރަސްމީ ޖަލްސާގައި ޤައުމާ މުޚާޠަބުކުރައްވާ، ވާހަކަފުޅުދައްކަވަމުންނެވެ.
ރައީސުލްޖުމްހޫރިއްޔާގެ ވާހަަކަފުޅުގައި ނިމިގެންދިޔަ 51 ހަފުތާގެ ތެރޭގައި މިސްކިތްތައް އިމާރާތްކުރުމާއި މަރާމާތުކުރުމަށް އޮތް ބަޖެޓު އިތުރުކޮށްފައިވާ ކަމަށާއި އޭގެ ނަތީޖާ މިހާރު ފެންނަމުންދާ ކަމަށް ވިދާޅުވިއެވެ. އަދި، ޤައުމީ ފެންވަރެއްގައި ޒުވާން އިމާމުންނާއި ޚަޠީބުން ތަމްރީންކޮށް، ޤައުމީ ޚިދުމަތަށް ނެރެމުންދާކަންވެސް ރައީސުލްޖުމްހޫރިއްޔާ ފާހަގަކުރެއްވިއެވެ.
މީގެއިތުރުން ދީނުގެ ރުކުންތައްކަމަށްވާ، ޒަކާތާއި ޙައްޖާއި ރޯދައިގެ އަޅުކަންތައް ފުރިހަމަކުރުމަށް ރައްޔިތުންނަށް ދައުލަތުގެ ފަރާތުން އެހީތެރިކަން ފޯރުކޮށްދިނުމުގެ އިތުރުން، ޢީދު ފާހަގަ ކުރުމުގައި ރައްޔިތުންގެ ބައިވެރިވުން އިތުރުކުރެވިފައިވާ ކަމުގައިވެސް ރައީސުލްޖުމްހޫރިއްޔާ ވިދާޅުވިއެވެ.
ދިވެހި ޤައުމިއްޔަތާއި ދިވެހި ބަހުގެ ޚިދުމަތުގައި ކުރެވިފައިވާ މަސައްކަތްތަކަށް އަލިއަޅުއްވާލައްވަމުން ރައީސުލްޖުމްހޫރިއްޔާ ޑޮކްޓަރ މުޢިއްޒު ވިދާޅުވީ، ދިވެހި ބަހަށް، ދިވެހިންނާއި ދިވެހި ޒުވާނުން އަހުލުވެރިކުރުމަށް ދިވެހި ބަހާއި ޤައުމިއްޔަތަށް ޚާއްޞަ ވުޒާރާއެއް އުފައްދަވައި، ޤައުމިއްޔަތުގެ އިސްވާރުން ކަނޑައެޅިފައިވާ ކަމަށެވެ. އަދި، ތަޢުލީމީ މަންހަޖުގައި ހިމަނައިގެން، ދަރިވަރުންނަށް ވަކި މާއްދާއެއްގެ ގޮތުގައި އެކަށައެޅި، އައު ޖީލަކަށް ދިވެހި ބަހުގެ ރިވެތިކަން ގެނެސްދިނުމުގެ ބުރަ މަސައްކަތް ފެށިފައިވާކަަމަށްވެސް، ރައީސުލްޖުމްހޫރިއްޔާ ވިދާޅުވިއެވެ.
