ދިވެހި ރައްޔިތުންގެ ސަރުކާރުން އަބަދުވެސް މަސައްކަތްކުރަމުންދާނީ ރައްޔިތުންގެ ފަޅީގައި ތިބެގެން ރައްޔިތުންނަށް ބޮޑުވެފައިވާ މައްސަލަތަކަށް އިސްކަންދީގެންކަމުގައި ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ވިދާޅުވެއްޖެއެވެ. އެމަނިކުފާނު މިހެން ވިދާޅުވީ، "ހިޔާވެހި ފައިނޭންސިންގ ޕްރޮގްރާމް" އިފްތިތާޙުކުރުމަށް މިއަދު ބޭއްވި ރަސްމިއްޔާތުގައި ވާހަކަފުޅުދައްކަވަމުންނެވެ.
ސަރުކާރުގެ އެންމެ އިސް ސިޔާސަތަކީ ގެދޮރުވެރިކަމުގެ މައްސަލައަށް ދާއިމީ ހައްލެއް ހޯދުންކަން ތަކުރާރުކޮށް ފާހަގަކުރައްވަމުން ރައީސުލްޖުމްހޫރިއްޔާ ވަނީ، މިއީ މިއަދު ފަށާފައި އަންނަ އަހަރު ހުއްޓާލަން ފެށި ސްކީމެއް ނޫންކަމުގެ ޔަޤީންކަންދެއްވާފައެވެ. އެމަނިކުފާނު ވިދާޅުވީ، މިއަދު މި ފެށިގެންދަނީ ރާއްޖޭގެ ރައްޔިތުންނަށް އެންމެ ބޮޑުވެފައިވާ މައްސަލައަށް ދާއިމީ ހައްލެއް ގެނެސްދިނުމުގެ ޕްރޮގްރާމްކަމަށެވެ. އެމަނިކުފާނުގެ ވަޢުދުފުޅާއި، ދިވެހީންގެރާއްޖެ މެނިފެސްޓޯގައިވެސް ހިމަނުއްވާފައިވާ ފަދައިން ފަސް އިންސައްތަ އަށްވުރެ އިންޓްރަސްޓް އިތުރުނުވާނޭ ގޮތަށް ފަރުމާކޮށްފައިވާ މި ޕްރޮގްރާމުގެ ދަށުން، ރާއްޖޭގެ ކޮންމެ ރަށެއްގައި ހުރި މީހަކު ކަމުގައިވިޔަސް، އެމީހެއްގެ އަމިއްލަ ގޯތި، އުޅެވޭ ވަރުގެ ހިޔާވައްސަކަށް ހެދޭނެކަމަށް ރައީސުލްޖުމްހުރިއްޔާ ވިދާޅުވިއެވެ.
2025 ވަނަ އަހަރަށް ސަރުކާރުން ހުށަހަޅުއްވާފައިވާ ބަޖެޓުގައި މި ސްކީމަށް އެކަށައަޅާފައިވާ އެއް ބިލިޔަން ރުފިޔާ، ހިމަނުއްވާފައިވާނޭ ކަމަށާއި، އަދި ކުރިއަށްއޮތް ހަތަރު އަހަރުގެ ބަޖެޓުގައިވެސް މި މަސައްކަތަށް އެ ޢަދަދު ހިމަނުއްވާނޭކަމަށް ރައީސުލްޖުމްހޫރިއްޔާ ވިދާޅުވިއެވެ. އަދި ނަތީޖާއެއްގެ ގޮތުން، ކޮންމެ އަހަރަކު، އެއް ބިލިޔަން ރުފިޔާ ބޭނުންކޮށްގެން ދެ ބިލިޔަން ރުފިޔާގެ ލޯނު ދޫކުރެވޭނޭކަމަށް އެމަނިކުފާނު ވިދާޅުވިއެވެ.
ސަރުކާރުގެ އަމާޒަކީ، ގޯތި އޮވެ، ގެ އެޅޭނޭ ގޮތް ނެތް މީހުންނާއި، ގެ އަޅަން ފެށުމަށްފަހު މަސައްކަތް ހުއްޓާލަން ޖެހިފައިވާ މީހުންނާއި، ޢިމާރާތް ބާވެ މަރާމާތުކުރަން ބޭނުންވެފައިތިބި މީހުންގެ ތަކުލީފުތަކަށް ލުޔެއް ހޯއްދަވައިދެއްވުންކަން އެމަނިކުފާނު ފާހަގަކުރެއްވިއެވެ.
ރައީސުލްޖުމްހޫރިއްޔާ ދެކެވަޑައިގަންނަވަން ބޭނުންފުޅުވަނީ، ރާއްޖޭގައި ގެދޮރުވެރިކަމަށް ފުރުޞަތު ނުލިބޭ ހަމަ އެކަކުވެސް ނުހުންނާނޭ ދުވަހެއްކަމަށް އެމަނިކުފާނު ވިދާޅުވިއެވެ. ރައްޔިތުންނާ ބައްދަލުވެވަޑައިގަންނަވާ އެކި މަންސަތަކުގައި، ބޯހިޔާވަހިކަމާމެދު ރައްޔިތުން ކުރި ޝަކުވާތަކުގެ ޖަވާބުގައި ވެވަޑައިގެންފައިވާ ވަޢުދުތައް، ވަޢުދުވެވަޑައިގެންފައި ހުރިގޮތަށް ފުއްދަވައިދެއްވުމަކީ އެކަމިނުކުފާނު އިސްކަންދެއްވާކަމެއް ކަމުގައިވެސް ރައީސުލްޖުމްހޫރިއްޔާ ވިދާޅުވިއެވެ.
މިއަދުގެ ރަސްމިއްޔާތުގައި ރައީސުލްޖުމްހޫރިއްޔާ ވަނީ މި މަސައްކަތުގައި ސަރުކާރާއެކު ބައިވެރިވާ ބޭންކްތައް ކަމުގައިވާ، ހައުސިންގް ޑިވެލޮޕްމެންޓް ފައިނޭންސް ކޯޕަރޭޝަން (އެޗް.ޑީ.އެފް.ސީ)، ބޭންކް އޮފް މޯލްޑިވްސް (ބީ.އެމް.އެލް) އަދި މޯލްޑިވްސް އިސްލާމިކް ބޭންކް (އެމް.އައި.ބީ)އަށް ޝުކުރު އަދާކުރައްވާފައެވެ.
މި އަހަރުގެ މިނިވަން ދުވަހުގެ ރަސްމިއްޔާތުގައި ރައީސުލްޖުމްހޫރިއްޔާ ވަނީ ގެދޮރުވެރިކަމުގެ މައްސަލައަށް ހައްލެއް ގެނައުމަށްޓަކައި ފަސް އިންސައްތައަށްވުރެ އިންޓަރެސްޓް ރޭޓު ބޮޑުނުވާގޮތަށް ދޫކުރާ ގެދޮރުވެރިކަމުގެ ލޯނުތައް ދޫކުރަން ފަށްޓަވާނޭކަމަށް ވިދާޅުވެފައެވެ.
