بِسْمِ ٱللّٰهِ ٱلرَّحْمٰنِ ٱلرَّحِيمِ
الْحَمْدُ لِلَّـه، وَالصَّلَاة وَالسَّلَامُ عَلَىٰ أَشْرَفِ الْأَنْبِيَاءِ وَالْمُرْسَلِين، وَعَلَىٰ آلـه وَصَحْبِـهِ أَجْمَعِين
ފުރަތަމަވެސް، އަޅުގަނޑަށް މި ފުރުޞަތު ދެއްވީތީވެ، މައިލޯ އެކެޑަމީގެ އިސްވެރިންނަށް ވަރަށް ބޮޑަށް ޝުކުރު ދަންނަވަން. އަދި ޚާއްޞަ ގޮތެއްގައި، މިއަދުގެ ފައިނަލް މެޗުގައި ކުޅުނު ދެ ޓީމުގެ ތެރެއިން، ކާމިޔާބު ހާސިލުކުރި ޓީމަށް ވަރަށް ހޫނު މަރުޙަބާއެއް އަޅުގަނޑު ކިޔަން.
އާދެ، ފައިނަލް މެޗުގައި ވާދަވެރިކޮށް މޮޅު ކުޅުމެއް ފެނިގެންދިޔަ. ތަފާތު ހުނަރުވެރި ކުޅުންތެރިންވެސް ފެނިގެންދިޔަ. އެހެންނަމަވެސް، ކާމިޔާބީގައި އަބަދުވެސް ކޮންމެވެސް އެއްބަޔަކު ކުރީގައި އުޅޭނީ. ބަލިވި ޓީމަށް، ކުރިއަށް އޮތް ތަނުގައި އަޅުގަނޑު ހިތްވަރު ދެން. މިހާ ހިސާބަށް އައުމަށް ތިޔަ ދެއްކެވި ހިތްވަރާއި، މިންނެތް މަސައްކަތް، ކުރިއަށް އޮތް ތަނުގައިވެސް ދެމެހެއްޓުމަށް، އެ ކުޅުންތެރިންނަށް އަޅުގަނޑު މި ފުރުޞަތުގައި ނަސޭހަތްތެރިވަން.
މުޅި މުބާރާތުގައި ބައިވެރިވި، ހުރިހާ އެކެޑަމީ އަދި ކުޅުންތެރިންނަށް އަޅުގަނޑު ދޭން ބޭނުންވާ މެސެޖަކީ، މިއަދަކީ ރާއްޖޭގެ ނަޞްރުގެ ދުވަސް. ސަރުކާރުން ރަސްމީކޮށް މި ދުވަސް ފާހަގަކުރަމުންދާ ދިޔުމުގައިވެސް، ރަސްމީ ޙަރަކާތްތަކެއް ކުރިއަށް ދަނިކޮށް، އަޅުގަނޑު މިތަނަށް އަންނަން މި ޖެހުނީ، މިއަދުގެ ރާއްޖޭގެ ރައީސުލްޖުމްހޫރިއްޔާ، ރާއްޖޭގެ ޤައުމީ ކަންކަމުގައި، ޚާއްޞަގޮތެއްގައި، ކުޑަކުދިންގެ ކުރިމަގަށްޓަކައި ދެއްވާ އިސްކަމަށްޓަކައި. އެކަމަށްޓަކައި އެމަނިކުފާނަށް އަޅުގަނޑު ވަރަށް ޚާއްޞަ ޝުކުރެއް މި ފުރުޞަތުގައި ދަންނަވަން.
ރާއްޖޭގައި ފުޓުބޯޅަ މިއަދު އޮތް ޙާލަތަށް ވިސްނާފައިވެސް މިއީ، މިއަދު އަޅުގަނޑުމެން ވަރަށް ބޮޑަށް ސަމާލުކަން ދީގެން، ކުރިއަށް ނެރެންޖެހޭ ކަމަކަށްވާތީވެ، އެކަން އަޅުގަނޑުމެން ކުރަން ގަސްދުކޮށްގެން މިތިބީ. އަދި މިކަންކަން ކުރިއެރުވުމަށްޓަކައި، ޚާއްޞަ ގޮތެއްގައި، މި މުބާރާތަށް، އެ ކުދިންގެ ބެލެނިވެރިން، ނޫނީ މައިންބަފައިން ތިޔަ ދެއްވާ ހިތްވަރު. ވަރަށް ޅަ، ވަރަށް ހުނަރުވެރި ކުދިން ފެނިގެން ހިނގައްޖެ މިތަނުން. މި ފެންނަނީ، އެ މައިންބަފައިން ރެޔާއިދުވާލު، އެ ކުދިންގެ ކުރިމަގަށްޓަކައި ކުރާ ހޭދަ. ތިޔަ ހޭދައިގެ ފޮނިކަން. މުޅި ދައުލަތުން ބޭނުންވޭ، އޭގެ ފޮނި މަންފާ އެ ރައްޔިތަކަށް، ނޫނީ އެ ބެލެނިވެރިޔަކަށް، އެ މަންމައަކަށް، ނޫނީ ބައްޕައަކަށް ލިބޭނެ ދުވަހެއް ހޯދައިދޭން. އެއީ، އަޅުގަނޑުމެން މި ކުރާ މަސައްކަތަކީ. އެހެންވީމާ، މި ނަތީޖާ ފޮނި އެއްޗަކަށް ވާނީ، އަޅުގަނޑުމެން އެންމެން ގުޅިގެން ކުރާ މަސައްކަތުން.
މިއަދު ރާއްޖޭގައި ފުޓުބޯޅަ ކުރިއެރުވުމަށްޓަކައި، ޚާއްޞަ ގޮތެއްގައި، މި އެކެޑަމީން "މައިލޯ އެކެޑަމީ ޗެމްޕިއަންޝިޕް"ގެ ނަމުގައި މި ކުރިއަށްގެންދާ މުބާރާތުގައި، އަޅުގަނޑު ފާހަގަކޮށްލަން ބޭނުން، އެ ފަރާތްތަކުން އޯގަނައިޒް ކޮށްގެން މި ބާއްވާ ހުރިހާ މުބާރާތެއްވެސް، ވަރަށް ކާމިޔާބީއާ އެކީގައި ކުރިއަށް މިގެންދެވެނީވެސް ތިޔަ މައިންބަފައިން، ތިޔަ ބެލެނިވެރިން ދެއްވާ ސަޕޯޓާ އެކީގައި، ގުޅިގެން މިކުރާ މަސައްކަތުގައި. ހުރިހާ ބޭފުޅުންނަށް އަޅުގަނޑު ޝުކުރު ދަންނަވަން.
މާގިނަ ވާހަކައެއް މި ފުރުޞަތުގައި ނުދަންނަވާނަން. އެހެންނަމަވެސް، ހަނދާނުގައި ބަހައްޓަން ޖެހެނީ، މިވެސް ޤައުމީ މަސައްކަތެއްކަން. ޤައުމީ ލެވެލްގައި، ކޮންމެ ކުއްޖަކުވެސް ޤައުމީ ރޫޙުގައި ކުޅެން މަސައްކަތް ކުރަންޖެހޭކަން. އެއީ، އަޅުގަނޑުމެންގެ ޤައުމީ ކާމިޔާބީއެއް. އެ ކާމިޔާބީއާ ހަމައަށް ދެވޭނީ، ތިޔަ ކުޅުންތެރިންގެ ބުރަ މަސައްކަތާ އެކީގައި.
އަދިވެސް އެއްފަހަރު، މައިލޯ އެކެޑަމީގެ ޗެއަރމަން، އާދެ، ޢަލީ ޝަމީމަށް އަޅުގަނޑު ވަރަށް ޚާއްޞަކޮށް ޝުކުރު ދަންނަވަން، މި ފުރުޞަތު އަޅުގަނޑަށް ދެއްވީތީވެ. އަދި ކުރިއަށް އޮތް ތަނުގައި، އަޅުގަނޑުމެންގެ ސަރުކާރުގެ ފަރާތުން މިފަދަ ހުރިހާ ކަމަކަށް އެއްބާރުލުން ދޭނެ ކަމުގެ ޔަޤީންކަން، މި ފުރުޞަތުގައި އަޅުގަނޑު އަރުވަން. ވަރަށް ބޮޑަށް ޝުކުރިއްޔާ.
وَالسَّلَامُ عَلَيْكُمْ وَرَحْمَةُ اللهِ وَبَرَكَاتُه.