بِسْمِ ٱللّٰهِ ٱلرَّحْمٰنِ ٱلرَّحِيمِ
ޙަމްދާއި ޝުކުރުކުރަނީ އިސްލާމްދީނުގެ ރުކުނެއް ކަމުގައި ޙައްޖާއި ޢުމްރާގެ އަޅުކަން ޝަރްޢުކުރެއްވި ޙިކްމަތްވަންތަ މާތް اللهُ سُبْحَانَهُ وَتَعَالَى ވަތަޢާލާއަށް. ޞަލަވާތާއި ސަލާމާއި، ބަރަކާތް ލެއްވުން އެދި ދުޢާކުރަނީ، ޙައްޖާއި ޢުމްރާގެ އަޅުކަމުގެ މަނާސިކުތައް އެންމެ ފުރިހަމަގޮތުގައި އަދާކުރައްވައި، އެކަންކަން އުންމަތަށް ބަޔާންކޮށްދެއްވި މާތް ސާހިބާ مُحَمَّـد رســول اللّـه صـلّى الله علـيـه وسـلّم އަށް. އަދި މި ޞަލަވާތާއި ސަލާމާއި، ބަރަކާތުގައި އެކަލޭގެފާނުންގެ އާލުއަސްޙާބުން ޝާމިލްކުރަން.
އިސްލާމީ ކަންތައްތަކާބެހޭ ވަޒީރު ޑޮކްޓަރު މުޙައްމަދު ޝަހީމް ޢަލީ ސަޢީދު، ބޭރު ޤައުމުތަކުގެ އެމްބަސީގެ އިސްވެރިން، އިސްލާމީ ކަންތައްތަކާ ބެހޭ ވުޒާރާގެ އިސްވެރިން، ޙައްޖާއި ޢުމްރާގެ ޚިދުމަތް ދެއްވާ އެކި ކުންފުނިތަކުގެ އިސްބޭފުޅުން، އެންމެހައި ހާޒިރީން، ރަސްމިއްޔާތު ހިނގަމުންދާ ގޮތް ބައްލަވަމުން ގެންދަވާ އަދި އަޑުއައްސަވަމުން ގެންދަވާ އެންމެހައި ލޮބުވެތި ރައްޔިތުން،
السَّلَامُ عَلَيْكُمْ وَرَحْمَةُ اللهِ وَبَرَكَاتُه.
އާދެ، އެއްވެސް ޝައްކެއްނެތް، ޙައްޖާއި ޢުމްރާގެ އަޅުކަމަކީ އަޅުގަނޑުމެންގެ ހިތްތަކާ ގުޅިފައިވާ ވަރަށް މާތް އަޅުކަމެއް. ޙައްޖަކީ އެތައް މިލިއަން މުސްލިމުން ކީރިތިވަންތަ، ޙިކްމަތްވަންތަ ﷲ ގެ މަތިވެރި އަމުރުފުޅާ އެއްގޮތަށް، އެ އަމުރުފުޅަށް އިޖާބަދިނުމުގެ ގޮތުން އަދާކުރާ މަތިވެރި ރުކުނެއް. ޢުމްރާގެ އަޅުކަމަކީވެސް މަތިވެރި ދަރުމަހުރި އަޅުކަމެއް. މި ދެ އަޅުކަމަށް، އިސްލާމްދީނުގައި ދެއްވާފައިވާ ޚާއްޞަ މަޤާމުގެ ސަބަބުން މިކަމަށް އަޅުގަނޑުމެން ދޭ އަހަންމިއްޔަތު ބޮޑުވެގެންދޭ.
އެތައް ދުވަހެއްގެ ބުރަ މަސައްކަތުން ހޯދާ ފައިސާ އެއްކޮށްގެން، ޙައްޖާއި ޢުމްރާގެ އަޅުކަން އަދާކުރުމަށް ދާ ދިވެހީންގެ އަދަދު ދަނީ ދުވަހެއް ދުވަހަކަށް އިތުރުވަމުން. މިއީ އަޅުގަނޑުމެން ނުހަނު އުފާކުރާ ކަމެއް. އަދި ޢުމްރާގެ ޚިދުމަތްތައް ފޯރުކޮށްދޭ ކުންފުނިތައްވެސް، ދުވަހަކަށްވުރެ ދުވަހެއް އިތުރުވެ، މީގެތެރޭގައި ފަންސާހަށްވުރެ ގިނަ ކުންފުނިތައް، އިސްލާމިކް މިނިސްޓްރީގައި ރަޖިސްޓްރީ ވެފައިވާކަން އަޅުގަނޑު ފާހަގަކޮށްލަން ބޭނުން.
އަޅުގަނޑުގެ ނަޒަރުގައި، މި ޚިދުމަތްތައް ދޭ ކުންފުނިތަކުން ޚިދުމަތް ދެއްވަވަން ވާނީ ވިޔަފާރިއަކަށްވުރެ ބޮޑަށް އެކަމުން ލިބޭ ދަރުމައާއި ހެޔޮ ޘަވާބަށް އިސްކަންދީގެން.
ޙައްޖުވެރިންނާއި، ޢުމްރާވެރީންނަށް އެހީތެރިވުމުގައި، އެ ހޭދަކުރާ ވަގުތަކީ ގެއްލިގެންދާނެ، ބޭކާރު ވަގުތެއް ނޫން. އެހެންކަމުން، އެ ފަރާތްތަކުން އެ ކުރާ މަސައްކަތުގެ އަގުވަޒަންކޮށް، އެ ޚިދުމަތް ފޯރުކޮށްދޭ އެންމެހައި ފަރާތްތަކަށް އަޅުގަނޑު ޝުކުރު އަދާކުރަން. އަދި އެ ފަރާތްތަކަށް ސަރުކާރުގެ ފުރިހަމަ އެއްބާރުލުމާއި، އެހީތެރިކަން ލިބިގެންދާނެކަމުގެ ޔަޤީންކަން، މި ފުރުޞަތުގައި އަޅުގަނޑު އަރުވަން.
މިއަދު ދިވެހިރާއްޖޭގައި ފުރަތަމަ ފަހަރަށް ޙައްޖާއި ޢުމްރާ ކޮންފަރެންސެއް ބޭއްވޭކަމީ، މި މަސައްކަތް ހަރުދަނާކުރެއްވުމަށް ސަރުކާރުން ކުރައްވާ މަސައްކަތުގެ އަލިގަދަ ހެތްކެއްވެސްމެ. މި ކޮންފަރެންސްގެ ތެރެއިން، އިސްލާމީ ކަންތައްތަކާބެހޭ ވުޒާރާއާއި، މޯލްޑިވްސް ޙައްޖު ކޯޕަރޭޝަނާއި، އަދި އެހެނިހެން ކުންފުނިތައް އެއްތަންވެ މަޝްވަރާކޮށް، މިހާރު ހުރި މައްސަލަތަކަށް ޙައްލު ހޯދިގެންދާނެ ކަމަށް އަޅުގަނޑު ޔަޤީންކުރަން. އަދި ކޮންފަރެންސްގެ ނިންމުންތަކުގެ އަލީގައި، ކުރިއަށް އޮތްތަނުގައި، ޙައްޖާއި ޢުމްރާގެ އަޅުކަން އަދާކުރުމާ ގުޅޭ އިންތިޒާމުތަކާއި، ޚިދުމަތުގެ ދާއިރާ ފުޅާވެ، މުޅި ނިޒާމު ހަރުދަނާވެގެންދާނެ ކަމަށް އަޅުގަނޑު ޔަޤީންކުރަން. ވަކިން ޚާއްޞަކޮށް، ޙައްޖުވެރިން އިންވެސްޓްކުރާ ފައިސާ ރައްކާތެރިވެ، ޙައްޖު ފަންޑު ތަރައްޤީކޮށް ދިރުވުމަށް، އާ ވިސްނުންތަކެއް ވިސްނައި، ޙައްޖުގެ އަގު ތިރިކުރުމަށް ސަރުކާރުން ގެންގުޅުއްވާ ސިޔާސަތު، އަވަސް ކުރިމަގެއްގައި ޙަޤީޤަތަކަށް ވެގެންދާނެ ކަމަށް އަޅުގަނޑު ޔަޤީންކުރަން.
އާދެ، ޙައްޖާއި ޢުމްރާގެ އަޅުކަމުގެ މުހިންމުކަމަށްޓަކައި، އެ ދެ އަޅުކަމާ ގުޅިފައިވާ އިންތިޒާމުތައް ހަމަޖައްސައި، ވީހާ ލުއިފަސޭހަކޮށް އަޅުކަން އަދާކުރެވޭނޭ، ފެންވަރު ރަނގަޅު ޚިދުމަތްތަކެއް ފަހިކޮށްދެއްވުމަކީ، ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ވަރަށް އިސްކަމެއް ދެއްވާ ކަމެއް. މިގޮތުން، ދުރާލާ ޙައްޖުގެ އިންތިޒާމުތައް ހަމަޖެއްސުމަށް، ސަޢޫދީ ޢަރަބިއްޔާގެ ޙައްޖު މިނިސްޓްރީން ކަނޑައަޅުއްވާ އިދާރީ އުސޫލުތަކާއި، ގަވާއިދުތަކާއި، މިންގަނޑުތަކާ އެއްގޮތަށް، ކަންކަން އިންތިޒާމު ކުރެއްވުމަށް ޚާއްޞަ އިސްކަމެއް ދެއްވުމަށް، މި ވުޒާރާގެ ވަޒީރު ވަނީ އިރުޝާދު ދެއްވާފައި. އެހެންކަމުން، ޙައްޖާއި ޢުމްރާގެ ޚިދުމަތް ދޭ ފަރާތްތަކުންވެސް މިމަގުން ޢަމަލުކުރެއްވުމަށް އަޅުގަނޑު އިލްތިމާސް ކުރަން. އަދި ރާއްޖެއިން މި ޚިދުމަތް ދެއްވާ ގިނަ ކުންފުނިތަކުން މި މަގު އިޚްތިޔާރު ކުރައްވާފައިވާކަންވެސް އަޅުގަނޑު އުފަލާއެކީ ފާހަގަކުރަން.
އާދެ، ސަރުކާރުން މިހާރު ހަމަޖައްސަވާފައިވާ ގޮތުން، ޙައްޖަށް މީހުން ގެންދިޔުމަށް، ކަންކަން ކުރައްވަނީ މޯލްޑިވްސް ޙައްޖު ކޯޕަރޭޝަނުން. ޙައްޖު ކޯޕަރޭޝަންގެ ހިންގުންވެސް އަޅުގަނޑުމެން ވަރަށް ބޮޑަށް ހަރުދަނާކުރަން އެބަޖެހޭ. އަދި އެ ކޯޕަރޭޝަނާ ގުޅިގެން ޙައްޖާއި ޢުމްރާގެ އަޅުކަން އަދާކުރައްވާ ފަރާތްތަކަށް ދޭންޖެހޭ ލުއިފަސޭހަތައް، އަދި ފެންވަރު ރަނގަޅު އިންތިޒާމުތަކެއް ހަމަޖައްސަން މަސައްކަތްކުރަން އެބަޖެހޭ. އެހެންކަމުން، ސަޢޫދީ ޢަރަބިއްޔާގެ ކަމާބެހޭ އިސްލާމީ އިދާރާތަކާއި، އިސްލާމީ ކަންތައްތަކާބެހޭ ވުޒާރާއާއި، ޙައްޖުވެރިން ތިއްބަވާ ދުވަސްވަރު، އެ ޚިދުމަތް ދެއްވާ ފަރާތްތަކާވެސް މަޝްވަރާކޮށް، ދިވެހި ރައްޔިތުންނަށް ފަހިވާގޮތަށް، ކަންކަމުގެ އިންތިޒާމު ހަމަޖައްސަވައި، މަގުފަހިވާގޮތަށް ކަންކަން ބައްޓަންކުރުމަށް އަޅުގަނޑު އިލްތިމާސް ކުރަން.
ރައްޔިތުންނަށް ލުއިފަސޭހަ ލިބޭނެ ކަންކަން އިންތިޒާމު ކުރުމަކީ، ސަރުކާރުގެ އެންމެ މުހިންމު މަޤްޞަދުވެސްމެ. ޙަޤީޤަތުގައި މިފަދަ މަހާސިންތާއެއް ނުވަތަ ކޮންފަރެންސެއް ބޭއްވިގެންދިޔުމަކީވެސް، އެކަންކަން ހާސިލުކުރުމަށްޓަކައި ކުރެވޭ މަސައްކަތް.
އަޅުގަނޑު އުއްމީދުކުރަނީ މި މަހާސިންތާއަކީ، އެތައް ގޮތަކުން ގިނަގުނަ މަންފާތަކެއް ލިބިގެންދާނެ ފުރިހަމަ މަހާސިންތާއަކަށް ވެގެންދިޔުން. އަދި ގިނަގިނައިން މިފަދަ މަހާސިންތާ ބޭއްވި، އެކަމުގެ ހެޔޮ ބަދަލު މުޖުތަމަޢަށް ގެނެވިގެންދާނެ ކަމަށް އަޅުގަނޑު އުންމީދުކުރަން.
އަޅުގަނޑުގެ ވާހަކަކޮޅު ނިންމާލުމުގެ ކުރިން، މިފަދަ ބޮޑު ކޮންފަރެންސެއް، ވަޒީރާއި އަދި ވަޒީރުގެ މި ވުޒާރާގެ ސްޓާފުންނާ އެކީގައި، އަދި އެންމެހައި ބައިވެރިންނާ އެކީގައި ބޭއްވިގެންދާ ކަމަށްޓަކައި އަޅުގަނޑު ޝުކުރު ދަންނަވަން. އަދި އިރާދަކުރެއްވިއްޔާ، މި ކޮންފަރެންސް ކާމިޔާބުވުމަށްވެސް އެދި ދުޢާކުރަން.
އަޅުގަނޑުގެ ހެޔޮދުޢާއަކީ، އަޅުގަނޑުމެން މިކުރާ މަސައްކަތުގައި اللهُ سُبْحَانَهُ وَتَعَالَى ހެޔޮ ބަރަކާތް ލެއްވުން. މިއަދަށްވުރެ ފަހި މާދަމައެއް އަޅުގަނޑުމެންނަށް މިންވަރުކުރެއްވުން. އިސްލާމީ ހިދާޔަތުގެ މަތީގައި އަޅުގަނޑުމެން އަބަދުމެ ލަހައްޓަވާށި!
وَالسَّلَامُ عَلَيْكُمْ وَرَحْمَةُ اللهِ وَبَرَكَاتُه.