بِسْمِ ٱللّٰهِ ٱلرَّحْمٰنِ ٱلرَّحِيمِ‎

اَلحَمْـدُ لِلّـهِ رَبّ العَـالَمِـين، وَالصَّلاَة ُوَالسَّلاَمُ عَلَى رَسُولِ ٱللَّهِ وَعَلَى آلهِ وَصَحْبِهِ أَجْمَعِينْ.

މޯލްޑިވްސް މީޑިއާ ކައުންސިލްގެ ރައީސް އަލްފާޟިލް އަޙްމަދު މުސްޠަފާ، ޙަފްލާ އެބަޔަކަށް ޚާއްޞަވާ ޝަރަފުވެރި ނޫސްވެރިން، ވަޑައިގެން ތިއްބެވި އެންމެހައި ޢިއްޒަތްތެރިން؛

السَّلَامُ عَلَيْكُمْ وَرَحْمَةُ اللهِ وَبَرَكَاتُه.

އާދެ، އެއްވެސް ޝައްކެއްނެތް، ނޫސްވެރިންނަކީ މުޖުތަމަޢުގައި ވަރަށް އަގުހުރި، ވަރަށް މަސައްކަތްކުރާ ހިތްވަރުގަދަ، މުހިންމު ބައެއް. އެކި މައުޟޫޢުގެ މަޢުލޫމާތުތަކާއި، ރައްޔިތުން ހޭލުންތެރިކުރުވުމަށާއި، އިޖުތިމާޢީ ގުޅުންތައް ބަދަހިކުރުމަށް އަދި ސުލޫކީ ސިފަތަކުން ޒީނަތްވެފައިވާ މުޖުތަމަޢެއް ބިނާކުރުމަށްޓަކައި އެންމެ ބުރަ، އެންމެ ބޮޑު މަސައްކަތް ކުރާ ފަރާތަކީވެސް ނޫސްވެރިން. ހަމަ އެފަދައިން، ޒަމާނީ ޑިމޮކްރަސީގެ ނަޒަރުގައި، ދައުލަތުގެ ތިން ބާރަށް ފާރަވެރިވެ، އެކަން ޒިންމާދާރު ކުރާ ފަރާތަކީވެސް ނޫސްވެރިން. އެ ތިން ބާރަށް ފާރަވެރިވެ، މިނިވަންކަމާއެކު ބިނާކުރުވަނިވި ގޮތެއްގައި ފާޑުކިޔައި، ޒިންމާދާރުކުރުވުމުގެ އެ މަސްއޫލިއްޔަތު، އެ ބޮޑު ޒިންމާވެސް އުފުލާ ފަރާތަކީ ނޫސްވެރިން.

ޤާނޫނުތަކުގެ ތަރަހައިގެ ތެރޭގައި، އެކަން ކުރުމުގެ ޖާގައާއި، ޤާނޫނީ ބާރުވެރިކަން ނޫސްވެރިންނަށް އޮވޭ. އެހެންވެ، ނޫސްވެރިކަމަކީ ޑިމޮކްރަސީގެ ހަތަރުވަނަ ބާރު ކަމުގައި ސިފަކުރަނީ.

އެނގިވަޑައިގަންނަވާނެ ފަދައިން، އަޅުގަނޑުމެންގެ މި ދިވެހިރާއްޖެއަކީވެސް، ނޫސްވެރިކަމުގެ މިނިވަންކަން އިންތިހާއަށް ތަނަވަސްވެފައި އޮތް ޤައުމެއް. 2008 ވަނަ އަހަރު، އަޅުގަނޑުމެން މިހާރު މި ޢަމަލުކުރަމުންދާ ޤާނޫނުއަސާސީން، ދިވެހި ނޫސްވެރިކަމަށް އުޖާލާކަން ލިބިދޭން ފެށީ. އަދި އެ ޤާނޫނުއަސާސީގެ 27 ވަނަ މާއްދާގެ ދަށުން، ދުލާއި ގަލަމުގެ ޚިޔާލު ފާޅުކުރުމުގެ މިނިވަންކަން ލިބުނު، އަދި ޤާނޫނުއަސާސީގެ 28ވަނަ މާއްދާއިން، ނޫސްވެރިކަމުގެ މިނިވަންކަން ލިބި، ނޫސްވެރިންނަށް ފުރިހަމަ ހިމާޔަތާއި ރައްކާތެރިކަން ކަށަވަރުވެގެން ދިޔައީ. މިގޮތަށް މިކަން ކަނޑައަޅައިފައި ވަނީ، ޑިމޮކްރަސީއެއްގައި ނޫސްވެރިން އަދާކުރާ ޒިންމާގެ ބޮޑުކަމުންނާއި، ނޫސްވެރިންގެ މަސައްކަތުގެ މުހިންމުކަމުން.

ފެހި ޤާނޫނުއަސާސީއަށް 16 އަހަރު ފުރިގެން، ފާއިތުވެގެން ދާއިރުގައި، އެ ޤާނޫނުއަސާސީން ފަހިވެގެންދިޔަ މި ފުރުޞަތުތަކާއެކު، ރާއްޖޭގެ ނޫސްވެރިން ހާސިލުކޮށްފައިވާ ކުރިއެރުންތަކާއި ކާމިޔާބީތައް ގިނަގުނަ. މިއަދު އެކަމަށްޓަކައި އަޅުގަނޑު އުފާކުރާ ވާހަކަ މި ފުރުޞަތުގައި ފާހަގަކޮށްލަން ބޭނުން.

މި ޤައުމު ކުރިއަރުވައި، ޤައުމު ބިނާކުރުމުގައި ނޫސްވެރިން ތިޔަ ކުރައްވާ ބުރަ މަސައްކަތާއި، ހިތްވަރުގަދަ މަސައްކަތްތަކަށް އަޅުގަނޑު އައްސަރިބަހާއި ސާބަސް ދަންނަވަން. އަދި މި ފުރުޞަތުގައި ތިޔަބޭފުޅުންނަށް، ތިޔަ ކުރައްވާ މަސައްކަތްތަކަށް ޝުކުރުވެސް ދަންނަވަން.

މިރޭ، މި ޙަފްލާގެ އެވޯޑްތައް ހާސިލުކުރެއްވި ބޭފުޅުންނަކީ، މި މަސައްކަތުގައި ނަމޫނާ ދައްކަވާފައިވާ ބޭފުޅުން. އެހެންކަމުން، މިރޭ އިނާމު ހާސިލުކުރެއްވި އެންމެހައި ބޭފުޅުންނަށް އަޅުގަނޑު ތަހުނިޔާ ދަންނަވަން. އަދި އެ ބޭފުޅުންގެ ކިބައިން ހިތްވަރު ލިބިގަތުމަށް، އެހެން ނޫސްވެރިންނަށް ނަސޭހަތްތެރިވެސް ވަން.

އާދެ، ނޫސްވެރިކަން، ނޫނީ ނޫސްވެރިކަމަށް، ފަހި ޒަމާނެއް އަޅުގަނޑުމެން މިއަދު ދެކެމުން ދާއިރު، ރާއްޖޭގެ ނޫސްވެރިންގެ ތެރޭގައި، ވަރަށް ގިނަ ޒުވާނުން ފެންނަމުން ދިޔުމަކީ އެއީ، އަޅުގަނޑު ނުހަނު އުފާކުރާ ކަމެއް ކަމުގައި މިރޭ ފާހަގަކޮށްލަން ބޭނުން. އަދި މިއީ، ޤައުމުގެ މުސްތަޤްބަލަށް އުޖާލާ ސިގްނަލެއް ކަމުގައިވެސް ފާހަގަކޮށްލަން ބޭނުން. ހަމަ މިފަދައިން، މި ސިފަ ދެމެހެއްޓުމަށްޓަކައި، އަދުގެ ކިޔަވާކުދިންގެ ހިތްތަކުގައި ނޫސްވެރިކަމަށް އޮންނަ ލޯބި، އިތުރަށް ވަރުގަދަކުރުމަކީ ކޮންމެހެންވެސް ކުރަންޖެހޭ ކަމެއް. މަދަރުސާތަކުންނާއި، ކޮލެޖު، ޔުނިވަރސިޓީތަކުން ކިޔަވައިގެން ނުކުންނަ ކުދިންގެ ތެރެއިން، އެ ޤާބިލް ދަރިންގެ ތެރެއިން މޮޅު ނޫސްވެރިން އުފެއްދުމަކީ، މިއަދު ކޮންމެހެންވެސް އަޅުގަނޑުމެން ކުރަންޖެހޭ ކަމެއް.

އާދެ، މިރޭ މިފަދަ ޙަފްލާއެއް ފާހަގަކުރަމުންދާއިރު، ޚަބަރާއި މަޢުލޫމާތު ފެތުރުމުގައި ނޫސްވެރިން ސަމާލުކަން ދޭންޖެހޭ ކަންތައްތަކެއް ހުރިކަން އަޅުގަނޑުމެން ހަނދާން އާކުރަން ޖެހޭނެ. އެގޮތުން، ޞައްޙަ މަޢުލޫމާތު ރައްޔިތުންނާ ހަމައަށް ފޯރުކޮށްދިނުމަށް ސަމާލުކަން ދިނުމަށާއި، ޙައްސާސް ކަންކަމުގައި ރައްޔިތުންގެ ހިތްތަކުގައި ބިރުވެރިކަން އުފެދޭގޮތަށް ޚަބަރާއި މަޢުލޫމާތު ނުފެތުރުމަށް ހުރިހާ ނޫސްވެރިންނަށް އަޅުގަނޑު މިރޭ އިލްތިމާސް ކުރަން. ހަމަ އެހެންމެ، އިންސާނީ ކަރާމާތް ގެއްލޭގޮތަށް، މީހުންގެ އަބުރާއި ޢިއްޒަތް ނަގާލުމަށް ދޮގު މަޢުލޫމާތާއި ޚަބަރު ނުފެތުރުމަށް ހަރުއަޑުން އަޅުގަނޑު މިރޭ ގޮވާލަން.

މީގެއިތުރުން، މީޑިއާގެ ވަސީލަތްތަކުން ފަތުރާ ޚަބަރާއި މަޢުލޫމާތަކީ، ހުރިހާ އުމުރަކާ ގުޅޭ، އިޖުތިމާޢީ މިންގަނޑުތަކަށް ފެތޭ އެއްޗަކަށް ހެދުމަކީ ކޮންމެހެންވެސް މުހިންމު ކަމެއް. އެހެންކަމުން، ޚަބަރާއި މަޢުލޫމާތު ފެތުރުމުގައި ގެންގުޅެންޖެހޭ ހަމަތަކާއި އުޞޫލުތައް މީޒާންކޮށް، ހަމަކޮށް، ޒިންމާދާރުކަމާއި، ތެދުވެރިކަމާއެކު ނޫސްވެރިންގެ ޒިންމާ އަދާކުރުމަށް ހުރިހާ ނޫސްވެރިންނަށްވެސް މިރޭ އަޅުގަނޑު ނަސޭހަތްތެރިވަން. އަދި އާރޓިފިޝަލް އިންޓެލިޖެންސާއި، އެހެނިހެން މަންސަތަކުންވެސް ހޯދާ މަޢުލޫމާތު، ޢާންމުކޮށް ފެތުރުމުގައި، އެ މަޢުލޫމާތުގެ ޞައްޙަކަން ކަށަވަރުކޮށް، ސާފު ދިވެހިބަހުން ލިޔެ، ވާހަކަދައްކައި ހެދުމަށް މީޑިއާ މެދުވެރިކޮށް، ރައްޔިތުންނަށް ހިތްވަރު ދިނުމަށް ނޫސްވެރިންނާއި އަދި މީޑިއާތަކުގެ ހިންގުންތެރި ވެރިންގެ ކިބައިން އަޅުގަނޑު ނުހަނު އެދެން.

އާދެ، މީޑިއާގެ ނޫސްވެރިން ބާރުވެރިކޮށް، އެހީތެރިކަންދީ، ކުރިއެރުވުމަކީ މިއަދު މި ސަރުކާރުން ވަރަށް އިސްކަންދޭ ކަމެއް. ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު، އެމަނިކުފާނަކީ ނޫސްވެރިންނާ ވަރަށް ގާތުން މަސައްކަތް ކުރައްވާ ރައީސެއް. އަދި އެމަނިކުފާނުގެ ކެބިނެޓާއި، އެމަނިކުފާނު ނޫސްވެރިންނާ ބައްދަލުކުރައްވަމުން ގެންދަވާކަން އަޅުގަނޑު ނުހަނު އުފަލާއެކީ މި ފުރުޞަތުގައި ފާހަގަކޮށްލަން.

އާދެ، މިއަދު ސަރުކާރުގެ ސިޔާސަތުތަކާއި، އެކި ކަންކަމަށް ސަރުކާރުން ކުރާ ހޭދަތަކުގެ މަޢުލޫމާތު، މީޑިއާއަށް ފޮރުވުމެއް ނެތި، ހިފެހެއްޓުމެއް ނެތި ހާމަކުރަމުން ދިޔުމަކީވެސް އެއީ، އަޅުގަނޑު ނުހަނު އުފާކުރާ ކަމެއް.

މީގެއިތުރުން، މީޑިއާ ބާރުވެރިކޮށް، ކުރިއެރުވުމަށް އަޅުގަނޑުމެން މެނިފެސްޓޯގައި ހިމަނާފައިވާ ކަންތައްތައް، އެ މުއައްސަސާތަކުން ގުޅިގެން، މިހާރުވެސް މަސައްކަތް ކުރަމުން އެބަދޭ. މިއަދުވެސް އަޅުގަނޑުމެން ދޭނެ ޔަޤީންކަމަކީ، މި ސަރުކާރަކީ، ނޫސްވެރިންވެރިންނާ ވަރަށް ގާތުން، ގުޅިގެން މަސައްކަތް ކުރާނެ ސަރުކާރެއްކަން. ހުރިހާ ކަމެއްގައިވެސް ދެފުށް ފެންނަ ސިޔާސަތާއި، ހާމަކަން ބޮޑު ކަންކަން ކުރާނެ ސަރުކާރެއްކަން. ނޫސްވެރިންނަށް ދުލާއި ގަލަމުގެ މިނިވަންކަން ފުރިހަމައަށް ދޭނެ ސަރުކާރެއްކަން. ނޫސްވެރިންގެ ޒިންމާ އަދާކުރުމުގައި، މި ސަރުކާރުން ފުރިހަމައަށް އެއްބާރުލުން ދޭނެކަން.

އާދެ، އަޅުގަނޑުގެ ވާހަކަކޮޅު ނިންމާލާނީވެސް، ދިވެހި ނޫސްވެރިކަމަށް ފާގަތި މުސްތަޤްބަލަކަށް އެދެމުން. ދުލާއި ގަލަމުން، ނޫސްވެރިކަމުގެ މިނިވަންކަން އަޅުގަނޑުމެންނަށް ލިބުނު ފަދައިން، އެ މިނިވަންކަން ރައްކާތެރިކުރުމަށް އެންމެހައި ބޭފުޅުންނަށް އިލްތިމާސް ކުރަމުން، ނަސޭހަތްތެރިވަމުން، އަދި ނޫސްވެރިންނަށް ފާގަތި މުސްތަޤްބަލަކަށް އެދެމުން. ޝުކުރިއްޔާ!

وَالسَّلَامُ عَلَيْكُمْ.