ރައީސުލްޖުމްހޫރިއްޔާ މުޙަންމަދު ނަޝީދު، ޕާކިސްތާނުގެ ބޮޑުވަޒީރު ސަޢީދު ޔޫސުފް ރާޒާ ގިލާނީއާ މިއަދު ބައްދަލުކުރައްވާ، ދެޤައުމުގެ ގުޅުމާ އަދި ސަރަޙައްދީ އެކިއެކި މައްސަލަތަކާ ބެހޭގޮތުން މަޝްވަރާ ކުރެއްވިއެވެ.
މި ބައްދަލުކުރެއްވުމުގައި ޕާކިސްތާނުގެ ބޮޑުވަޒީރު ދެއްކެވި ވާހަކަފުޅުގައި، ދިވެހިރާއްޖެއާއި ޕާކިސްތާނާ ދެމެދުގައިވާ ގާތްގުޅުމަށް އަލިއަޅުވައިލައްވައި، މިގުޅުން އިތުރަށް ބަދަހިކުރެއްވުމާބެހޭގޮތުން ވާހަކަފުޅުދެއްކެވިއެވެ. މިމޭރުމުން ވާހަކަފުޅު ދައްކަވަމުން ދިވެހިރާއްޖޭގެ އިންސާނީ ވަސީލަތްތައް ތަރައްޤީ ކުރުމުގައި އެހީތެރިވެދެއްވާނެކަން ފާހަގަކުރައްވައި، ޕާކިސްތާނުގެ ފަރާތުން ރާއްޖެއަށް ސްކޮލަރޝިޕް ފުރުޞަތުތައް ދެއްވަމުން ގެންދަވާކަން ފާހަގަކުރެއްވިއެވެ.
ރައީސުލްޖުމްހޫރިއްޔާ ދެއްކެވި ވާހަކަފުޅުގައި، ޕާކިސްތާނަކީ ރާއްޖޭގެ ތަރައްޤީގެ ބައިވެރިއެއް ކަމުގައި ފާހަގަކުރައްވައި، ޕާކިސްތާނުން ރާއްޖެއަށް ފޯރުއްވައި ދެއްވަމުން ގެންދަވާ އެހީތެރިކަމަށްޓަކައި ޝުކުރުއަދާކުރެއްވިއެވެ.
ރައީސުލްޖުމްހޫރިއްޔާ އިތުރަށް ދެއްކެވި ވާހަކަފުޅުގައި، ރާއްޖެއިން ސާކްގެ މަސައްކަތްތަކުގައި އިތުރަށް ޙަރަކާތްތެރިވާން ބޭނުންފުޅުވާކަމުގައި ވިދާޅުވިއެވެ. އަދި ވިޔަފާރިއާއި އިޤްތިޞާދީ ގޮތުން ސަރަޙައްދުގެ ޤައުމުތަކުގެ މެދުގައި އެއްބާރުލުން އިތުރުކުރެވިދާނެކަމަށް ދެކެވަޑައިގަންނަވާ ކަމުގައި އެމަނިކުފާނު ވިދާޅުވިއެވެ.
ރައީސުލްޖުމްހޫރިއްޔާ ވާހަކަފުޅުގައި ތިމާވެއްޓަށް އަންނަމުންދާ ބަދަލުތަކަކީ ދިވެހިރާއްޖެއަށް ދިމާވެފައިވާ އެންމެބޮޑު އެއް ނުރައްކާ ކަމަށާއި، އެކަމުގެ ސަބަބުން ރާއްޖެއަށް ގިނަ ގޮންޖެހުން ތަކެއް ކުރިމަތިވަމުންދާ ކަމުގައި ވިދާޅުވިއެވެ.
މޫސުމަށް އަންނަބަދަލުތަކުގެ ސަބަބުން ރާއްޖެއަށް ކުރިމަތިވެފައިވާ މައްސަލަތަކަށް ޙައްލެއް ހޯދުމުގައި ރާއްޖެއަށް އެހީތެރިވެދެއްވާނެ ކަމުގައި ޕާކިސްތާނުގެ ބޮޑުވަޒީރު ވިދާޅުވިއެވެ.
މި ކަންކަމުގެ އިތުރުން، ޓެރަރިޒަމާއި، މަސްތުވާތަކެއްޗާ ދެކޮޅަށް މަސައްކަތް ކުރުމުގައި ރާއްޖެއާއި ޕާކިސްތާނާ ދެ ޤައުމުގެ ދެމެދުގައި ގުޅުން ބަދަހިކުރުމާ ބެހޭގޮތުން ދެޤައުމުގެ ވެރިން މަޝްވަރާކުރެއްވިއެވެ.
