ދެކުނު ކޮރެއާގެ ބައެއް މީޑިއާތަކާ ރައީސުލްޖުމްހޫރިއްޔާ މުޙަންމަދު ނަޝީދު މިއަދު ބައްދަލުކުރައްވައިފިއެވެ. މިގޮތުން، އެމަނިކުފާނު މިއަދު ބައްދަލުކުރައްވައި އިންޓަރވިޔު ދެއްވީ، އެސޯސިއޭޓަޑް ޕްރެސް އަށާއި، ދުވަހު ނޫހެއް ކަމަށްވާ "ޑޮންގާ" އަށާއި، "މައީލް ބިޒްނަސް ނިއުސްޕޭޕަރ" އަށެވެ.
މި އިންޓަރވިޔުތަކުގައި، މައިގަނޑު ގޮތެއްގައި ރައީސުލްޖުމްހޫރިއްޔާ އަރިހު ސުވާލު ދެންނެވީ، ރާއްޖޭގެ ތިމާވެށްޓަށް ކުރިމަތިވަމުންދާ މައްސަލަތަކާ ބެހޭގޮތުންނާއި، ބައިނަލްއަޤްވާމީ ސަމާލުކަމަށް މިކަން ގެންނެވުމަށް ރައީސުލްޖުމްހޫރިއްޔާ ކުރައްވަމުން ގެންދަވާ މަސައްކަތްޕުޅުތަކާ ބެހޭގޮތުންނެވެ. ޚާއްޞަކޮށް، މިދިޔަ އަހަރު މޫދުއަޑީގައި ބޭއްވި ކެބިނެޓް ބައްދަލުވުމާ ބެހޭގޮތުން ރައީސުލްޖުމްހޫރިއްޔާ އަރިހު ސުވާލު ދެންނެވިއެވެ. މިޚިޔާލަކީ ރައީސުލްޖުމްހޫރިއްޔާގެ އަމިއްލަފުޅު ޚިޔާލެއް ކަމަށާއި، ބޭނުންފުޅަކީ ރާއްޖޭގެ ތިމާވެށީގެ ނާޒުކުކަމާއި، ތިމާވެށީގެ ޙާލަތު އޮތްގޮތް، ބައިނަލްއަޤްވާމީ ސަމާލުކަމަށް ގެންނެވުން ކަމުގައި އެމަނިކުފާނު ވިދާޅުވިއެވެ.
ރައީސުލްޖުމްހޫރިއްޔާގެ ވާހަކަފުޅުގއި، ރާއްޖޭގެ ރައްޔިތުންނަށް ސަލާމަތްކަމާއި ރައްކާތެރިކަން ހޯއްދަވައިދެއްވުމަށް އެޅުއްވެން ހުރި ފިޔަވަޅެއް އަޅުއްވާނެ ކަމަށާއި، މިމަސައްކަތަށް ބައިނަލްއަޤްވާމީ މުޖްތަމަޢުގެ ފުރިހަމަ އެއްބާރުލެއްވުން ބޭނުންފުޅުވާ ކަމުގައިވެސް ވިދާޅުވިއެވެ.
