ޔުނައިޓެޑް ނޭޝަންސް އެންވަޔަރަންމަންޓް ޕްރޮގްރާމް، ޔުނެޕުންދޭ 2010 ޗެމްޕިއަންސް އޮފް ދި އާރތް އެވޯޑު ލިބިވަޑައިގަންނަވާ ބޭފުޅެއްގެ ގޮތުގައި، ރައީސުލްޖުމްހޫރިއްޔާ މުޙަންމަދު ނަޝީދު އެޖަމްޢިއްޔާއިން ހޮއްވަވައިފިއެވެ. އެމަނިކުފާނަށް މި އެވޯޑު އެރުވުމަށް ހޮއްވަވާފައިވަނީ، ޕޮލިސީ ލީޑަރޝިޕްގެ ދާއިރާއިންނެވެ. މިއަހަރު އެވޯޑު ލިބިވަޑައިގަންނަވާ ބޭފުޅުން އިޢްލާނު ކުރެއްވީ، ދެކުނު ކޮރެޔާގެ ސޯލްގައި މިއަދު ފެށުނު ބިޒްނަސް ފޮރ ދި އެންވަޔަރަންމަންޓް ކޮންފަރެންސްގެ ތެރެއިން މިއަދު 11 ޖެހިއިރު ބޭއްވުނު ޕްރެސް ކޮންފަރެންސެއްގައި، ޔުނެޕްގެ އެގްޒެކެޓިވް ޑިރެކްޓަރ އާކިމް ސްޓައިނާރ އެވެ.
އެވޯޑު ލިބިވަޑައިގަންނަވާ ބޭފުޅުންނަށް އެވޯޑު އެރުވުމުގެ ރަސްމިއްޔާތު އޮންނާނީ، މިއަދު މެންދުރުފަހު ރާއްޖެ ގަޑިން 3 ޖަހާއިރު ބާއްވަވާ ޚާއްޞަ ރަސްމިއްޔާތެއްގައެވެ.
އިނާމު ލިބިވަޑައިގަންނަވާ ބޭފުޅުން ބައިވެރިވެވަޑައިގެންނެވި މި ޕްރެސް ކޮންފަރެންސްގައި ރައީސުލްޖުމްހޫރިއްޔާ ދެއްކެވި ވާހަކަފުޅުގައި، މިއީ ރާއްޖެއަށާއި ރާއްޖޭގެ ރައްޔިތުންނަށް ލިބުނު ޝަރަފެއް ކަމަށް ވިދާޅުވިއެވެ. އަދި ތިމާވެށީގެ ރޮނގުން އެމަނިކުފާނު މިކުރައްވާ މަސައްކަތްޕުޅު ބަލައިގެންނެވިކަމީ، އެމަނިކުފާނަށް ވަރަށްބޮޑު އުފާފުޅެއް ލިބިވަޑައިގަންނަވާ ކަމެއް ކަމަށް ވިދާޅުވިއެވެ.
ރައީސުލްޖުމްހޫރިއްޔާގެ ވާހަކަފުޅުގައި، ތިމާވެށީގެ ދާއިރާއިން އ.ދ.ގެ ސެކްރެޓަރީ ޖެނެރަލް ބަންކީ މޫން ކުރައްވަމުން ގެންދަވާ މަސައްކަތްޕުޅުތަކަށް ތާއީދު ކުރައްވައި، އެމަނިކުފާނުގެ މަސައްކަތްޕުޅަށް ވެދެއްވެން އޮތް އެއްބާރުލެއްވުމެއް ދެއްވާނެ ކަމުގައި ވިދާޅުވިއެވެ.
"ޔޫ.އެން. ޗެމްޕިއަންސް އޮފް ދި އާރތް އެވޯޑް" އަކީ، ދުނިޔޭގެ ސަލާމަތަށްޓަކައި އެބޭފުޅުންގެ ދުރުވިސްނުންފުޅާއެކު، ދުނިޔޭގެ ވަސީލަތްތައް ދެމެހެއްޓެނިވި ގޮތުގައި ބޭނުންކުރެއްވުމާއި، ތިމާވެށްޓާ ރަޙްމަތްތެރި ގޮތުގައި ތަރައްޤީ ޙާޞިލު ކުރުމަށް ކެނޑިނޭޅި މަސައްކަތްޕުޅު ކުރެއްވުމުގައި، ދުނިޔެއިން އެންމެ ފާހަގަކޮށްލެވޭ ފަރާތްތަކަށް، އެބޭފުޅުންގެ މަސައްކަތްޕުޅުގެ އަގުވަޒަން ކުރެއްވުމުގެ ގޮތުން އ.ދ.އިން ދޭ އެންމެ ޝަރަފްވެރި އެވޯޑެވެ.
