ރައީސުލްޖުމްހޫރިއްޔާ މުޙަންމަދު ނަޝީދު، ދެކުނު ކޮރެޔާއަށް މިހާރު ކުރައްވަމުން ގެންދަވާ ދަތުރުފުޅުގައި، ދެކުނު ކޮރެޔާގެ ރައީސް ލީ ޔޮންގ-ބެކްއާ ބައްދަލުކުރައްވައިފިއެވެ. މީގެ ކުޑައިރުކޮޅެއްގެ ކުރިން ބޭއްވި މިބައްދަލުކުރެއްވުމުގައި، ދިވެހިރާއްޖެއާއި ދެކުނުކޮރެޔާއާ ދެޤައުމުގެ ދެމެދުގައިވާ ގުޅުމާއި އަދި މިގުޅުން އިތުރަށް ބަދަހިކުރުމާ ބެހޭގޮތުން ދެބޭފުޅުން މަޝްވަރާ ކުރެއްވިއެވެ.
މިބައްދަލުކުރެއްވުމުގައި، ދެކުނު ކޮރެޔާގެ ރައީސް ލީ ދެއްކެވި ވާހަކަފުޅުގައި، މޫސުމަށް އަންނަ ބަދަލުތައް ދުނިޔޭގެ ސަމާލުކަމަށް ގެނައުމަށް ރައީސް ނަޝީދު ކުރައްވަމުން ގެންދަވާ މަސައްކަތްޕުޅުތައް ފާހަގަކުރައްވައި، އެކަމަށްޓަކައި ޝުކުރު އަދާކުރެއްވިއެވެ. ރާއްޖެއަށް ޒަމާނީ ޑިމޮކްރަސީއެއް ގެނައުމަށް ރައީސުލްޖުމްހޫރިއްޔާ ކުރައްވާ މަސައްކަތްޕުޅުތަކުގެ މައްޗަށް ބައްލަވައިލެއްވުމުގެ އިތުރަށް، ރާއްޖެއާއި ދެކުނު ކޮރެއާއާ ދެޤައުމުގެ ދެމެދުގައިވާ ގުޅުންތައް އެއްދުވަހުން އަނެއް ދުވަހަށް ބަދަހިވަމުންދާކަން ފާހަގަކުރެއްވިއެވެ.
މިބައްދަލުކުރެއްވުމުގައި، ރައީސުލްޖުމްހޫރިއްޔާ ދެއްކެވި ވާހަކަފުޅުގައި، ތިމާވެށީގެ ދާއިރާއާއި މަސްވެރިކަމުގެ ދާއިރާގެ އިތުރަށް ދެޤައުމުގެ ގުޅުން ބަދަހިކުރެވިދާނެ ވަރަށްގިނަ ދާއިރާތައް ހުރިކަން ފާހަގަކުރެއްވިއެވެ. އަދި ރާއްޖެއަށް ފުރިހަމަ ޑިމޮކްރަސީއެއް ގެނައުމަށް ކުރެވެމުންދާ މަސައްކަތްތަކާއި، މިކަމާ ގުޅިގެން އަންނަ ހެޔޮ ބަދަލުތަކުގެ މަޢްލޫމާތު، ދެކުނު ކޮރެޔާގެ ރައީސަށް ރައީސުލްޖުމްހޫރިއްޔާ ދެއްވިއެވެ. އަދި ރާއްޖޭގެ ރަށްރަށަށް ކުރިމަތިވެފައިވާ ތިމާވެށީގެ މައްސަލަތަކުގެ މައްޗަށް ބައްލަވައިލައްވައި، ރަށް ގިރުމުގެ މައްސަލަ ކުރިމަތިވެފައިވާ ރަށްރަށުން މީހުން ބަދަލުކުރަން ޖެހިފައިވާ ކަމަށާއި، އަދި މިކަން ހިނގަމުންދާގޮތުގެ މަޢްލޫމާތުވެސް ރައީސުލްޖުމްހޫރިއްޔާ ދެއްވިއެވެ. މީގެއިތުރުން، ވިޔަފާރީގެ ދާއިރާއިން ދެކުނު ކޮރެޔާގެ ވިޔަފާރިވެރިންނަށް ރާއްޖޭގައި ފުރްޞަތުތަކާ ބެހޭގޮތުންވެސް ރައީސުލްޖުމްހޫރިއްޔާ ވާހަކަފުޅު ދެއްކެވިއެވެ.
