ޖައްވަށް ދޫކުރާ ގެދަބުޅިއާއި ވިހަގޭހުގެ އަގުއަދާކުރަން ޖެހޭނީ މުޅި ދުނިޔެއިން ކަމުގައި ރައީސުޖުމްހޫރިއްޔާ މުޙަންމަދު ނަޝީދު ވިދާޅުވެއްޖެއެވެ. އެމަނިކުފާނު މިހެން ވިދާޅުވީ ޔުނެޕާއި، ޔޫ.އެން ގްލޯބަލް ކޮމްޕެކްޓާއި، ވާރލްވައިޑް ފަންޑް ފޮރ ނޭޗަރގެ ފަރާތުން އިންތިޒާމު ކޮށްގެން، ދެކުނު ކޮރެއާގެ ސޯލްގައި މިއަދު ފެށުނު ބިޒްނަސް ފޮރ ދި އެންވަޔަރަންމަންޓް ސަމިޓްގައި ތަޤްރީރު ކުރައްވަމުންނެވެ.
ރައީސުލްޖުމްހޫރިއްޔާގެ ތަޤްރީރުގައި، މޫސުމަށް އަންނަ ނޭދެވޭ ބަދަލުތަކުގެ ސަބަބުން ލިބޭ ކޮންމެ ގެއްލުމަކީ އިޤްތިޞާދީ އަދި މާލީ ގެއްލުމެއްކަން ފާހަގަކުރައްވަމުން، ގެދަބުޅިއާއި ވިހަގޭސް ބޭރުކުރުމުގެ ސަބަބުން، އެހެން މީހުންނަށާއި ތަކެއްޗަށް ލިބޭ ގެއްލުން އިޤްތިޞާދީ ނިޒާމެއްގެ ތެރެއިން ބެލެވެން އެބަޖެހޭކަން ކަމުގައި ވިދާޅުވިއެވެ. މީގެ މާނައަކީ ގެދަބުޅިއަށް އަގެއް ކަނޑައެޅުން ކަމަށާއި، ދުނިޔޭގައި ލާމެހިފައިވާ އިޤްތިޞާދެއް އޮންނައިރު، ގެދަބުޅިން ލިބޭ ފައިސާ ބޭނުންކުރެވެންވާނީވެސް ދުނިޔޭގެ ހުރިހާ ޤައުމަކުން ކަމުގައި ވިދާޅުވިއެވެ. މީގެއިތުރުން، ގެދަބުޅިއަށް އަގެއް ކަނޑައެޅުމުން، އިޢާދަކުރަނިވި ހަކަތައިގެ ވަސީލަތްތަކުގެ އަގު ހެޔޮވެ، މުޅި ދުނިޔެއިން ފެހި އިންޤިލާބެއް ފެނިގެންދާނެ ކަމުގައިވެސް ރައީސުލްޖުމްހޫރިއްޔާ ވިދާޅުވިއެވެ.
ތަރައްޤީއާއި މުއްސަނދިކަމަކީ، އިތުރަށް ނުސާފުވުން ކަމަށް ބައެއް ޤައުމުތަކުން ދެކޭތީ، އެކަމާމެދު އެމަނިކުފާނު ޙައިރާންވެވަޑައިގަންނަވާ ކަމަށް ވިދާޅުވެ، ވާހަކަފުޅު ދައްކަވަމުން، ކޯޕަންހޭގަން އެކޯޑްގެ ދަށުން ދުނިޔޭގައިވާ އެންމެ ފުރަތަމަ ކާބަން ނިއުޓްރަލް ޤައުމަކަށް ރާއްޖެ ހެދުމަށް ސަރުކާރުން ނިންމަވާފައިވާ ނިންމެވުމުގެ މައްޗަށް ބައްލަވާލެއްވިއެވެ.
ޖައްވު ނުސާފުކުރުމުގެ ހަމަހަމަ ޙައްޤު ހޯދަން ވަކާލާތު ކުރުމަށް ރާއްޖެއިން ގަސްދު ނުކުރާ ކަމުގައި ހާމަކުރައްވަމުން، ވީހާވެސް މަދުން ގެދަބުޅި ބޭނުންކޮށްގެންވެސް ތަރައްޤީއާއި ދުޅަހެޔޮކަން ހޯދިދާނެ ކަމަށް ގަބޫލުފުޅު ކުރައްވާ ކަމުގައި ވިދާޅުވިއެވެ. ޤަރުނުގެ މެދާ ހަމައަށް އާދެވޭއިރު، ކުރިމަތިވެދާނެ ބޮޑު ކާރިސާއަކުން ސަލާމަތްވުމަށްޓަކައި ގެދަބުޅި ބޭނުންކުރާ މިންވަރު މިހާރަށްވުރެ ވަރަށް ބޮޑަށް މަދުކުރަން ދުނިޔެއަށް ޖެހިފައިވާ ކަމަށާއި، ހަމައެއާއެކު ދުނިޔޭގެ ދިރުންތަކަށް އަސަރު ނުކުރާފަދަ ގޮތެއްގައި، ކާނާއާއި ސާފުބޯފެން ފޯރުވައިދެވޭނެ ގޮތްތަކެއްވެސް ހޯދަންޖެހިފައިވާ ކަމުގައި ރައީސުލްޖުމްހޫރިއްޔާ ވިދާޅުވިއެވެ.
އަޅުގަނޑުމެން މިއުޅޭ ދުނިޔޭގެ ވަސީލަތްތަކަކީ ހައްދެއް ހުރި ވަސީލަތްތަކެއްކަން ސައިންޓިސްޓުންގެ ހޯދުންތަކުންވެސް ދައްކަމުންދާ ކަމަށާއި، އެހެންނަމަވެސް މި ޙަޤީޤަތަކީ، އިންސާނުންގެ ތަރައްޤީއާއި ކުރިއެރުމަށް އެޅޭ ކަސްތޮޅެއް ކަމަށް ދެކެވަޑައިނުގަންނަވާ ކަމުގައި ރައީސުލްޖުމްހޫރިއްޔާ ވިދާޅުވިއެވެ.
މޫސުމަށް އަންނަމުންދާ ނޭދެވޭ ބަދަލުތަކުގެ ސަބަބުން ކުރިމަތިވެދާނެ އަސަރުތަކާ ބެހޭގޮތުން ދައްކަމުންދާ ވާހަކަތަކަށް ބައްލަވައިލައްވަމުން، ގެއްލުމާއި ހަލާކާ ބެހޭގޮތުން ދައްކާ ވާހަކަތަކަށްވުރެ ބޮޑަށް އިންސާނުންގެ ކެރިކުޅަދާނަކަމާ ބެހޭގޮތުން ދައްކާ ވާހަކަތަކުގެ ޔަޤީންކަން އެމަނިކުފާނަށް މާބޮޑު ކަމަށް ވިދާޅުވިއެވެ. އަދި މުސްތަޤްބަލްގައި އަޅުގަނޑުމެން ދާންޖެހޭނީ، ކެރިގެން ދެލޯ ހުޅުވައިގެންތިބެ، ކުރިއަށް ކަމުގައިވެސް އެމަނިކުފާނު ވިދާޅުވިއެވެ.
މި ވަގުތަކީ ބަދަލުގެ ވަގުތު ކަމަށާއި، ދުނިޔެ މިހާރު މިޞްރާބު ޖަހާފައިވަނީ، ގޮތް ނޭނގޭ ދުވަސްކޮޅަކާ ދިމާއަށް ކަމުގައިވެސް ރައީސުލްޖުމްހޫރިއްޔާ ވިދާޅުވިއެވެ. އަދި ދަތި ޙާލަތުތަކުގައިވެސް ފުރްޞަތުތައް ތަނަވަސްވެގެންދާ ކަމަށާއި، މި ފުރްޞަތުތައް ފެންނާނީ ހަމައެކަނި މުސްތަޤްބަލާމެދު ޚިޔާލާއި ފިކުރު ގެންގުޅޭ ބަޔަކަށް ކަމުގައިވެސް ވިދާޅުވިއެވެ.
ރައީސުލްޖުމްހޫރިއްޔާގެ ތަޤްރީރު ނިންމަވާލެއްވީ، 20ވަނަ ޤަރުނުގެ ނުސާފު އިޤްތިޞާދު ދޫކޮށް، މުސްތަޤްބަލަށްޓަކައި ސާފު އިޤްތިޞާދެއް ބިނާކުރުމަށް ގޮވާލައްވަމުންނެވެ.
ރައީސުލްޖުމްހޫރިއްޔާ، ބިޒްނަސް ފޮރ ދި އެންވަޔަރަންމަންޓް ސަމިޓްގައި ބައިވެރިވެވަޑައިގަތުމަށް ދެކުނު ކޮރެއާއަށް މިކުރައްވާ ދަތުރުފުޅުގައި، ސަމިޓްގައި ބައިވެރިވެވަޑައިގަންނަވާ ބޭފުޅުންގެ ޝަރަފުގައި، ރޭ ބޭއްވި ރިސެޕްޝަނެއްގައި ރައީސުލްޖުމްހޫރިއްޔާގެ ދެކަނބަލުން ބައިވެރިވެވަޑައިގެންނެވިއެވެ.
ސަމިޓުގައި ބައިވެރިވެވަޑައިގަންނަވާ މަންދޫބުންނާ ރައީސުލްޖުމްހޫރިއްޔާ ބައްދަލުކުރައްވައި، ތިމާވެށީގެ މައްސަލައިގައި އެމަނިކުފާނު އިސްނަންގަވައިގެން ކުރައްވަމުން ގެންދަވާ މަސައްކަތްޕުޅުތަކުގެ މަޢްލޫމާތު، އެބޭފުޅުންނަށް ދެއްވިއެވެ. އަދި ރައީސުލްޖުމްހޫރިއްޔާ ކުރައްވަމުން މިގެންދަވާ މަސައްކަތްޕުޅުތަކަށް އެބޭފުޅުން ހިތްވަރު ދެއްވިއެވެ.
