ރައީސުލްޖުމްހޫރިއްޔާ މުޙަންމަދު ނަޝީދު، ސޭޝަލްގައި ހުންނަވާ ދިވެހިރާއްޖޭގެ އޮނަރަރީ ކޮންސުލް މިސްޓަރ ލެމްބަރޓް ބޮންއާ ބައްދަލުކުރައްވައި، ދެޤައުމުގެ ގުޅުމާ ބެހޭގޮތުން މަޝްވަރާ ކުރައްވައިފިއެވެ. މިބައްދަލުކުރެއްވުން އޮތީ މިއަދު މެންދުރުފަހު ރައީސުލްޖުމްހޫރިއްޔާގެ އޮފީހުގައެވެ.
މިބައްދަލުކުރެއްވުމުގައި ރައީސުލްޖުމްހޫރިއްޔާ ދެއްކެވި ވާހަކަފުޅުގައި، ރާއްޖެއާއި ސޭޝަލްސާ ދެޤައުމުގެ ގުޅުން އިތުރު ދާއިރާތަކަށް ފުޅާކޮށް، ދެޤައުމުގެ ދެމެދުގައި ވިޔަފާރީގެ ގުޅުން ބަދަހިކުރުމަކީ، ވަރަށް މުހިންމު ކަމެއް ކަމުގައި ވިދާޅުވިއެވެ. ހަމައެއާއެކު، ފަތުރުވެރިކަމުގެ ދާއިރާއާއި، މަސްވެރިކަމުގެ ދާއިރާއަކީވެސް ދެޤައުމުގެ ގުޅުން ބަދަހިކުރެވިދާނެ ދާއިރާތަކެއްކަން ރައީސުލްޖުމްހޫރިއްޔާ ފާހަގަކުރެއްވިއެވެ. ރައީސުލްޖުމްހޫރިއްޔާގެ ވާހަކަފުޅުގައި، ކުދި ޤައުމުތަކުގެ މެދުގައި މިހާރަށްވުރެ ގުޅުން ބަދަހިކޮށް، އެއްއަޑެއް ފާޅުކުރުމުން ބައިނަލްއަޤްވާމީ މައިދާންތަކުގައި އެ ޤައުމުތަކުގެ ޚިޔާލު މިހާރަށްވުރެ ބޮޑަށް އިވިގެންދާނެ ކަމުގައި ވިދާޅުވިއެވެ.
މިސްޓަރ ލެމްބަރޓް ބޮން ދެއްކެވި ވާހަކަފުޅުގައި، ސޭޝަލްސުން ރާއްޖެ ދެކެނީ ވަރަށް ގާތް ޤައުމެއްގެ ގޮތުގައި ކަމަށާއި، ދެޤައުމުގެ ގުޅުން ބަދަހިކުރުމަށް އެމަނިކުފާނަށް ވެދެއްވެން އޮތް ހުރިހާ އެހީތެރިކަމެއް ވެދެއްވާނެ ކަމުގައި ވިދާޅުވިއެވެ.
މިބައްދަލުކުރެއްވުމުގައި ސްޕެޝަލް އެންވޯއި އޮފް ދަ ޕްރެޒިޑެންޓް އިބްރާހިމް ޙުސައިން ޒަކީއާއި، އެޑްވައިޒަރ އޮން ޕޮލިޓިކަލް އެފެއާޒް ޙަސަން އަފީފާއި މިނިސްޓަރ އޮފް ޑިފެންސް އެންޑް ނޭޝަނަލް ސެކިއުރިޓީ އަމީން ފައިސަލް ބައިވެރިވެވަޑައިގެންނެވިއެވެ.
