ޅަފަތުގެ ތަޢްލީމަކީ ކުއްޖާގެ ސިކުނޑި އުފެއްދުމަށްޓަކައި އަދި ކުއްޖާގެ މުސްތަޤްބަލުގެ ބިންގާ އެޅުމަށްޓަކައި، އެންމެ މުހިންމު ކަންތައް ކަމުގައި ނައިބު ރައީސް ޑޮކްޓަރ މުޙަންމަދު ވަޙީދު ވިދާޅުވެއްޖެއެވެ. ނައިބު ރައީސް މިހެން ވިދާޅުވީ، ހުވަދުއަތޮޅު ދެކުނުބުރީ އެމް.އެމް.ޕްރީ-ސްކޫލްގެ އަހަރީ ދުވަހުގެ މުނާސަބަތުގައި ރޭ، އެ ސްކޫލުގައި ބޭއްވެވި ޖަލްސާގައި ވާހަކަފުޅު ދައްކަވަމުންނެވެ. ނައިބު ރައީސްގެ ވާހަކަފުޅުގައި، މި ވޭތުވެދިޔަ 42 އަހަރު ދުވަހުގެ ތެރޭގައި މެދުކެނޑުމެއްނެތި، އެ ސްކޫލުން ކޮށްދެއްވި ޚިދްމަތްތައް ފާހަގަކުރެއްވިއެވެ. އަދި އެ ސްކޫލުގެ ބާނީ އަލްމަރްޙޫމް މުޙަންމަދު މާހިރުގެ ޒިކުރާ އާކުރައްވަމުން، އެ ސްކޫލުން މިހާތަނަށް ދިހަހާހަށްވުރެ ގިނަކުދިން ތަޢްލީމު ޙާޞިލުކޮށްފައިވާކަން އެއީ، ތިނަދޫގެ ތަޢްލީމަށްޓަކައި މަރްޙޫމް މުޙަންމަދު މާހިރު، ވަރަށް ބޮޑު ޚިދްމަތެއް ކުރައްވާފައިވާކަމުގެ ދަލީލެއް ކަމުގައި ވިދާޅުވިއެވެ.
ޕްރީ-ސްކޫލަކީ، ތަޢްލީމުގެ ބިންގާކަން ނައިބު ރައީސް ފާހަގަކުރައްވަމުން، ޅަފަތުގެ ތަޢްލީމު ފެށެނީ ޚާއްޞަކޮށް މައިންގެ ތަޢްލީމާއި ޞިއްޙަތާއެކުގައި ކަމަށާއި، އެކަމަށްޓަކައި މަންމައިންނާއި ބައްޕައިން ތައްޔާރުކުރަންޖެހޭ ކަމަށް ވިދާޅުވިއެވެ. އަދި މި ޢުމުރުގެ ކުދިންނަށް ކިޔަވައިދޭ ޓީޗަރުންނަކީ، ވަރަށް ފެންވަރު ރަނގަޅު ޓީޗަރުންނަށްވާންޖެހޭ ކަމަށާއި، މި ސަބަބަށްޓަކައި، ޅަފަތުގެ ތަޢްލީމަށް ވަރަށް ޚާއްޞަ އަހަންމިއްޔަތުކަމެއް ސަރުކާރުން ދެއްވަމުން ގެންދަވާ ކަމުގައި ވިދާޅުވިއެވެ. މި ރޮނގުން ވާހަކަފުޅު ދައްކަވަމުން، ރާއްޖޭގެ ހުރިހާ ރަށެއްގައި ޕްރީ-ސްކޫލް އުފެއްދެވުމަށް މަސައްކަތްތަކެއް ކުރެވެމުންދާކަންވެސް އެމަނިކުފާނު ހާމަކުރެއްވިއެވެ.
ނައިބު ރައީސްގެ ވާހަކަފުޅުގައި، ކުދިން އުނގޭނެއިރުގައި އުނގެނެނީ ތަފާތު ގޮތްގޮތަށް ކަމަށާއި، ހުރިހާ ކުދިންނަކީ އެއްކަމަކަށް މޮޅު ކުދިން ނޫންކަމުގައި ވިދާޅުވިއެވެ. އެހެންވީމާ، އަޅުގަނޑުމެންގެ ތަޢްލީމު އަޅުގަނޑުމެން ބިނާކުރަންޖެހޭނީ، މިފަދަ ތަފާތު ކުދިންތަކަކަށް ދެވޭ ތަޢްލީމެއްގެ ގޮތުގައި ކަމަށް ވިދާޅުވިއެވެ.
ނައިބު ރައީސް ޑޮކްޓަރ މުޙަންމަދު ވަޙީދު، ހުވަދުއަތޮޅު ދެކުނުބުރިއަށް ކުރެއްވި ދަތުރުފުޅު ނިންމަވާލެއްވުމަށްފަހު މާލެ ވަޑައިގަތީ މިއަދު ހެނދުނުއެވެ. އެމަނިކުފާނުގެ މި ދަތުރުފުޅުގައި ތިނަދޫގެ އިތުރުން، އެ އަތޮޅު ހޯނޑެއްދޫއަށާއި، މަޑަވެއްޔަށާއި، ނަޑެއްލާއަށާއި، ރަތަފަންދޫއަށް ވަޑައިގެން، ރައްޔިތުންނާ ބައްދަލުކުރައްވައި، ރަށުގެ ޢާންމު ޙާލަތު އޮޅުންފިލުއްވިއެވެ. އަދި އެ ރަށްރަށުގެ ތަރައްޤީގެ މަސައްކަތްތައް ހިނގަމުންދާގޮތާއި އެ ރަށްރަށަށް ދިމާވެފައިވާ ދަތިތަކަކީ ކޮބައިތޯ ބައްލަވާލެއްވިއެވެ.
