ރައީސުލްޖުމްހޫރިއްޔާ މުޙަންމަދު ނަޝީދު މާދަމާ ދެއްވާ ރޭޑިޔޯ ޚިތާބުގައި، ރާއްޖެ އިސްލާމްވި ދުވަހުގެ މައްޗަށް ބައްލަވައިލައްވައި ވާހަކަފުޅު ދައްކަވާނެއެވެ. އަދި ރާއްޖޭގައި އިސްލާމީ އުޞޫލުތަކާއި، އިސްލާމީ ތަޢްލީމު ފެތުރިގެން އައި ގޮތުގެ މައްޗަށްވެސް ރައީސުލްޖުމްހޫރިއްޔާ ބައްލަވައިލައްވާނެއެވެ.
ރައީސުލްޖުމްހޫރިއްޔާގެ ރޭޑިޔޯ ޚިޠާބުގައި، އެމަނިކުފާނު ޔޫރަޕްގެ ހަތަރު ޤައުމަށް ކުރެއްވި ދަތުރުފުޅުގެ ތަފްޞީލުވެސް ދެއްވާނެއެވެ. އެގޮތުން، އެޤައުމުތަކުން ރާއްޖޭގެ ތަރައްޤީއަށާއި ކުރިއެރުމަށް ވެދެއްވާނެ އެހީތެރިކަމާއި އެއްބާރުލެއްވުމުގެ މައްޗަށްވެސް ބައްލަވައިލައްވާނެއެވެ. މީގެއިތުރުން، ރާއްޖޭގެ ނޫސްވެރިންނަށް ދެމުންދާ އެކިގެއްލުންތައް ކުށްވެރި ކުރައްވައި، ރައީސުލްޖުމްހޫރިއްޔާގެ ރޭޑިޔޯ ޚިޠާބުގައި މާދަމާ ވާހަކަފުޅު ދައްކަވާނެއެވެ.
ރައީސުލްޖުމްހޫރިއްޔާގެ ރޭޑިޔޯ ޚިޠާބު، ދިވެހިރާއްޖޭގެ އަޑުން ފޮނުއްވާނީ، މާދަމާ ހެނދުނު 10 ޖަހާއިރުއެވެ. މިއީ އެމަނިކުފާނު ދެއްވާ 40 ވަނަ ރޭޑިޔޯ ޚިޠާބެވެ.
