ރައީސުލްޖުމްހޫރިއްޔާ މުޙަންމަދު ނަޝީދު، ޔޫރަޕްގެ 4 ޤައުމަކަށް ކުރެއްވި ރަސްމީ ދަތުރުފުޅު ނިންމަވާލެއްވުމަށްފަހު، މިއަދު ހަވީރު މާލެ ވަޑައިގެންފިއެވެ.
އެމަނިކުފާނުގެ މިދަތުރުފުޅުގައި ފުރަތަމަ ވަޑައިގަތީ ޖަރުމަނުވިލާތަށެވެ. ޖަރުމަނުވިލާތަށް ކުރެއްވި ދަތުރުފުޅުގައި، ޖަރުމަނުވިލާތުގެ ޗާންސެލަރާ އެމަނިކުފާނު ބައްދަލުކުރެއްވިއެވެ. އަދި ޖަރުމަނުވިލާތުގައި ބޭއްވުނު ދުނިޔޭގެ އެންމެބޮޑު ޓޫރިޒަމް ފެއަރ އައި.ޓީ.ބީ. ބަރލިންގައި ރައީސުލްޖުމްހޫރިއްޔާ ބައިވެރިވެވަޑައިގެންނެވިއެވެ. މީގެ އިތުރުން ބަރލިންގެ ފްރައި ޔުނިވަރސިޓީގައި ރައީސުލްޖުމްހޫރިއްޔާ ތަޤްރީރުކުރެއްވިއެވެ.
ޖަރުމަނުވިލާތުން ރައީސުލްޖުމްހޫރިއްޔާ ވަޑައިގެންނެވީ އައިސްލެންޑަށެވެ. މިދަތުރުފުޅުގައި އައިސްލެންޑުގެ ރައީސާ ރައީސުލްޖުމްހޫރިއްޔާ ބައްދަލުކުރެއްވިއެވެ. އަދި، ޔުނިވަރސިޓީ އޮފް އައިސްލެންޑުގައި މޫސުމަށް އަންނަ ބަދަލުތަކުގެ މައްޗަށް އަލިއަޅުވާލައްވައި ތަޤްރީރު ކުރެއްވިއެވެ.
ރައީސުލްޖުމްހޫރިއްޔާގެ މިދަތުރުފުޅުގައި، ސްވިޓްޒަރލެންޑަށްވެސް ވަޑައިގެން އެޤައުމުގެ ނާއިބު ރައީސާ ބައްދަލުކުރައްވައި ދެޤައުމުގެ ގުޅުމާބެހޭގޮތުން މަޝްވަރާތައް ކުރެއްވިއެވެ.
ރައީސުލްޖުމްހޫރިއްޔާގެ މިދަތުރުފުޅު ނިންމަވާލެއްވީ ފިންލެންޑުންނެވެ. ފިންލެންޑުގައިވެސް އެޤައުމުގެ ރައީސާއާއި ކުރީގެ ރައީސާ ރައީސުލްޖުމްހޫރިއްޔާ ބައްދަލުކުރެއްވިއެވެ.
