ދިވެހިރާއްޖެއާއި ފިންލެންޑާ ދެޤައުމުގެ ދެމެދުގައިވާ ގުޅުން އިތުރަށް ބަދަހިކުރެއްވުމާ ބެހޭގޮތުން ރައީސުލްޖުމްހޫރިއްޔާ މުޙަންމަދު ނަޝީދު، ފިންލެންޑުގެ ރައީސާ މިޒް ތަރްޖާ ހެލޮނެންއާ މަޝްވަރާ ކުރައްވައިފިއެވެ. މި މަޝްވަރާތައް އޮތީ ފިންލެންޑުގެ ރައީސާ ހުންނަވާ ރަސްމީ ގެކޮޅުގައި މިއަދުއެވެ.
މިބައްދަލުކުރެއްވުމުގައި މޫސުމަށް އަންނަ ބަދަލުތަކާއި އިޢާދަކުރަނިވި ހަކަތައާއި އިންސާނީ ޙައްޤުތަކާ ބެހޭގޮތުންވެސް ދެބޭފުޅުން މަޝްވަރާ ކުރެއްވިއެވެ.
މިބައްދަލުކުރެއްވުމަށްފަހު ރައީސުލްޖުމްހޫރިއްޔާއާއި ފިންލެންޑުގެ ރައީސާއާ ދެބޭފުޅުން ނޫސްވެރިންނާ ބައްދަލުކުރައްވައި ނޫސްވެރިންގެ ސުވާލުތަކަށް ޖަވާބު ދެއްވިއެވެ.
ފިންލެންޑަށް ދަތުރުފުޅެއް ކުރެއްވީތީ، ފިންލެންޑުގެ ރައީސާ ރައީސުލްޖުމްހޫރިއްޔާއަށް ވަރަށް ބޮޑަށް ޝުކުރުއަދާކުރައްވައި މަރްޙަބާ ވިދާޅުވިއެވެ. އަދި މިދަތުރުފުޅަކީ ވަރަށް ކާމިޔާބު ދަތުރުފުޅަކަށް ވެގެންދާނެކަމަށް އުންމީދު ކުރައްވާ ކަމުގައި ވިދާޅުވިއެވެ. ރައީސުލްޖުމްހޫރިއްޔާގެ މިދަތުރުފުޅަކީ، ދެޤައުމުގެ ގުޅުން އިތުރަށް ބަދަހިކުރެއްވުމަށް ކުރެވޭ މަސައްކަތުގެ އާފެށުމަކަށް ވެގެންދާނެކަމަށް ޔަޤީންކުރައްވާ ކަމުގައިވެސް ފިންލެންޑުގެ ރައީސާ ވިދާޅުވިއެވެ. މި ރޮނގުން އެކަމަނާ ވާހަކަފުޅު ދައްކަވަމުން، ދެޤައުމުގެ ގުޅުން ހަރުދަނާ ކުރެވިދާނެ ވަރަށް ގިނަ ދާއިރާތަކެއް އެބަހުރި ކަމަށާއި، އޭގެތެރޭގައި މޫސުމަށް އަންނަމުންދާ ނޭދެވޭ ބަދަލުތަކަށް ޙައްލެއް ހޯދުމަށް ކުރެވޭ މަސައްކަތްތައް ހިމެނޭ ކަމުގައި ވިދާޅުވިއެވެ. އަދި، މޫސުމަށް އަންނަ ބަދަލުތަކާބެހޭގޮތުން ރައީސް ނަޝީދު ކުރައްވަމުން ގެންދަވާ މަސައްކަތްޕުޅުތައް ފާހަގަކުރައްވައި އެމަސައްކަތްޕުޅުތަކަށް ފިންލެންޑުގެ ރައީސާ ވަރަށް ބޮޑަށް ތަޢުރީފް ކުރައްވަމުން، ކޯޕަންހޭގަން ސަމިޓުން ނިންމުނު ނިންމުންތަކާއި އަދި އެ ނިންމުންތަކަށް ޢަމަލުކުރަންފެށުމާ ބެހޭގޮތުން ރާއްޖެއާއެކު މަސައްކަތް ކުރައްވަން ބޭނުންފުޅުވާ ކަމުގައިވެސް ވިދާޅުވިއެވެ. އަދި، މެކްސިކޯގައި ބޭއްވުމަށް ހަމަޖެހިފައިވާ މޫސުމާބެހޭ ބައްދަލުވުމަކީ، ކާމިޔާބު ބައްދަލުވުމަކަށް ހެދުމަށް މިހާރުން ފެށިގެން ރާއްޖެއާއެކު މަސައްކަތް ކުރުމަށް ފިންލެންޑު ތައްޔާރަށްއޮތް ކަމުގައިވެސް ފިންލެންޑުގެ ރައީސާ ހެލޮނެން ވިދާޅުވިއެވެ.
ރައީސުލްޖުމްހޫރިއްޔާ ދެއްކެވި ވާހަކަފުޅުގައި، ފިންލެންޑުގެ ރައީސާ މިޒް ތަރްޖާ ހެލޮނެންއަކީ، އަންހެނުންގެ ޙައްޤުތަކަށް ވަރަށް ބޮޑަށް މަސައްކަތްކުރައްވާ ބޭފުޅެއްކަން ފާހަގަކުރައްވައި، މިއީ، ރާއްޖެއިންވެސް ވަރަށް ބޮޑު އަހަންމިއްޔަތުކަމެއް ދޭ ކަމެއް ކަމުގައި ވިދާޅުވިއެވެ.
ރާއްޖެއަށް ގެނެވިފައިވާ އިޞްލާޙީ ބަދަލުތަކާ ބެހޭގޮތުން ރައީސުލްޖުމްހޫރިއްޔާ ވާހަކަފުޅު ދައްކަވަމުން، ރާއްޖެއަށް ޑިމޮކްރަސީ ތަޢާރުފް ކުރެވި، މިބަދަލުތައް ގެނެވިފައި މިވަނީ ވަރަށް އަމާންކަމާއި އޮމާންކަމާއެކުގައި ކަމަށް ވިދާޅުވިއެވެ. އެހެންނަމަވެސް، ރާއްޖޭގައި ޑިމޮކްރަސީ ހަރުދަނާކޮށް އަށަގެންނެވުމުގައި ބޮޑެތި ގޮންޖެހުންތަކެއް އެބަހުރި ކަމަށާއި، މިކަންކަމުން އަރައިގަތުމަށް ފިންލެންޑުގެ އެހީތެރިކަމާއި އެއްބާރުލެއްވުން ލިބިގެންދާނެކަމަށް އުންމީދު ކުރައްވާ ކަމުގައި ރައީސުލްޖުމްހޫރިއްޔާ ވިދާޅުވިއެވެ.
ރައީސުލްޖުމްހޫރިއްޔާގެ ވާހަކަފުޅުގައި، މޫސުމަށް އަންނަ ބަދަލުތައް ޙައްލުކުރެވޭނީ ހަމައެކަނި މާލީ އެހީތަކަކުން ނޫން ކަމަށާއި، ޑިމޮކްރަސީއާއި ހެޔޮވެރިކަމެއް އަށަގެންނެވުމަކީވެސް މޫސުމަށް އަންނަ ބަދަލުތައް ޙައްލުކުރުމަށް ވަރަށް މުހިންމު ކަމެއް ކަމުގައި ވިދާޅުވިއެވެ. އަދި ހަމައެއާކު މިކަމަކީ ހަމައެކަނި ސަރުކާރުތަކުގެ މަސްއޫލިއްޔަތެއް ނޫން ކަމަށާއި، މޫސުމަށް އަންނަމުންދާ ނޭދެވޭ ބަދަލުތައް ހުއްޓުވައި އެކަމަށް ޙައްލެއް ހޯދުމަށް، ޢާންމު ރައްޔިތުންނާއި މަދަނީ ޖަމްޢިއްޔާތަކުގެ ބައިވެރިވުން މުހިންމު ކަމުގައިވެސް ވިދާޅުވިއެވެ.
މިބައްދަލުކުރެއްވުމަށްފަހު، ރައީސުލްޖުމްހޫރިއްޔާގެ ޝަރަފުގައި ރައީސާ ތަރްޖާ ހެލޮނެން ބޭއްވެވި މެންދުރުގެ ފަރިއްކޮޅެއްގައި ރައީސުލްޖުމްހޫރިއްޔާ ބައިވެރިވެވަޑައިގެންނެވިއެވެ.
