ރައީސުލްޖުމްހޫރިއްޔާ މުޙަންމަދު ނަޝީދު، ޔޫރަޕަށް މިހާރު ކުރައްވަމުން ގެންދަވާ ދަތުރުފުޅުގައި ރޭ ފަތިހު ފިންލެންޑަށް ވަޑައިގެންފިއެވެ.
ރައީސުލްޖުމްހޫރިއްޔާ ފިންލެންޑަށް މިކުރައްވާ ދަތުރުފުޅުގައި، އެޤައުމުގެ ރައީސާ ތަރްޖާ ހެލޮނެންއާ މިއަދު ބައްދަލުކުރައްވާނެއެވެ. އެއަށްފަހު، ދެބޭފުޅުން ނޫސްވެރިންނާ ބައްދަލުކުރައްވާ ގޮތަށްވަނީ ހަމަޖެހިފައެވެ. މީގެ އިތުރުން، ފިންލެންޑުގެ މިނިސްޓަރ އޮފް ޕަބްލިކް އެޑްމިނިސްޓްރޭޝަން އެންޑް ލޯކަލް ގަވަރންމަންޓާއި އެޤައުމުގެ ފަތުރުވެރިކަމުގެ ދާއިރާއާއި ވިޔަފާރީގެ ދާއިރާގައި ޙަރަކާތްތެރިވެވަޑައިގަންނަވާ ބައެއް ބޭފުޅުންނާވެސް ރައީސުލްޖުމްހޫރިއްޔާ ބައްދަލުކުރައްވާނެއެވެ.
ފިންލެންޑަކީ، ރައީސުލްޖުމްހޫރިއްޔާ ޔޫރަޕަށް ކުރައްވަމުން ގެންދަވާ ދަތުރުފުޅުގެ އެންމެފަހު މަންޒިލެވެ.
