ރައީސުލްޖުމްހޫރިއްޔާ މުޙަންމަދު ނަޝީދު، ހުވަދުއަތޮޅު ދެކުނުބުރީ ތިނަދުއަށް ކުރެއްވި ދަތުރުފުޅު ނިންމަވާލެއްވުމަށްފަހު، މިއަދު ހަވިރު މާލެ ވަޑައިގެންފިއެވެ. ރައީސުލްޖުމްހޫރިއްޔާ ތިނަދުއަށް މިކުރެއްވި ދެދުވަހުގެ ދަތުރުފުޅުގައި، ތިނަދޫގެ އެކި މުއައްސަސާތަކުގެ ވެރިންނާއި ކަމުވޮށިވެގެންވާ ބޭފުޅުންނާ ބައްދަލުކުރެއްވިއެވެ. މި ބައްދަލުކުރެއްވުމުގައި، ތިނަދުއަށް ކުރިމަތިވެފައިވާ އެކި ދަތިތަކާ ބެހޭގޮތުން ރައީސުލްޖުމްހޫރިއްޔާ މަޢްލޫމާތު އޮޅުންފިލުއްވިއެވެ. އަދި ސަރުކާރުން ތިނަދޫގެ ތަރައްޤީއަށްޓަކައި ރާއްވަވާފައިވާ ކަންކަމުގެ މަޢްލޫމާތު، ރައީސުލްޖުމްހޫރިއްޔާ އެބޭފުޅުންނަށް ދެއްވިއެވެ.
މި ދަތުރުފުޅުގައި ރައީސުލްޖުމްހޫރިއްޔާ، ގދ. އަތޮޅު ތަޢްލީމީ މަރުކަޒަށް ޒިޔާރަތް ކުރައްވައި، އެ މަރުކަޒުގެ ކަންތައްތައް ހިނގަމުންދާ ގޮތާއި، މަރުކަޒަށް ދިމާވެފައިވާ ދަތިތަކާ ބެހޭގޮތުން މަޢްލޫމާތު އޮޅުންފިލުއްވިއެވެ.
ތިނަދޫ ހައުސިންގ ޕްރޮޖެކްޓާބެހޭ މަޢްލޫމާތު، ތިނަދޫ ރައްޔިތުންނަށް ދެއްވުމަށް ބޭއްވެވި ބައްދަލުވުމުގައިވެސް ރައީސުލްޖުމްހޫރިއްޔާ ބައިވެރިވެވަޑައިގެން ވާހަކަފުޅު ދެއްކެވިއެވެ. އަދި ތިނަދޫގެ ދަނޑުވެރިކަމާއި މަސްވެރިކަމުގެ މަސައްކަތުގައި އުޅުއްވާ ފަރާތްތަކާވެސް ބައްދަލުކުރެއްވިއެވެ.
ތިނަދޫ ކުނި ނައްތާލުމުގެ ޕްރޮގްރާމް، ރައީސުލްޖުމްހޫރިއްޔާ މިއަދު އިފްތިތާޙް ކޮށްދެއްވިއެވެ. އަދި ތިނަދޫ ރީޖަނަލް ހޮސްޕިޓަލަށް ޒިޔާރަތް ކުރައްވައި، ހޮސްޕިޓަލުގެ ކަންތައްތައް ހިނގަމުންދާ ގޮތްވެސް ބައްލަވާލެއްވިއެވެ.
