"މޯލްޑިވްސް ޕޮލިޓެކްނިކް"ގެ ނަމުގައި އާ އިންސްޓިޓިއުޓެއް އުފައްދަވައި، އެތަނަކީ ކޯޕަރޭޓް އުޞޫލުން ހިންގަވާ ތަނެއްގެ ގޮތުގައި ހަމަޖެއްސެވުމަށް ވަޒީރުންގެ މަޖިލީހުން މިއަދު ނިންމަވައިފިއެވެ. މިކަން މިގޮތަށް ނިންމެވީ، މިއަދު ބޭއްވެވި އެ މަޖިލީހުގެ ޖަލްސާގައި، މިކަމާ ބެހޭގޮތުން މިނިސްޓްރީ އޮފް އެޑިޔުކޭޝަނުން ހުށަހެޅުއްވި ކަރުދާހެއްގެ މައްޗަށް މެންބަރުން ވާހަކަފުޅު ދައްކަވައި މަޝްވަރާ ކުރެއްވުމަށްފަހުގައެވެ.
"މޯލްޑިވްސް ޕޮލިޓެކްނިކް" އުފެއްދެވުމަށްފަހު، މޯލްޑިވްސް އިންސްޓިޓިއުޓް އޮފް ވޮކޭޝަނަލް އެޑިޔުކޭޝަން ޓްރޭނިންގ (މިވެޓް) އިން ހިންގަވަމުން ގެންދަވާ ޓިވެޓް ޕްރޮގްރާމްތަކާއި، ފެކަލްޓީ އޮފް އިންޖިނިއަރިންގ ޓެކްނޯލޮޖީއިން ހިންގަވާ ޑިގްރީއަށްވުރެ ދަށުގެ ކޯސްތައް މޯލްޑިވްސް ޕޮލި ޓެކްނިކުން ހިންގެވުމަށްވަނީ ނިންމަވާފައެވެ.
"މޯލްޑިވްސް ޕޮލިޓެކްނިކް" އުފެއްދެވުމުގެ މަޤްޞަދަކީ ރާއްޖެއަށް ބޭނުންވާ ހުނަރުވެރި މަސައްކަތްތެރިން ތަމްރީނު ކުރެއްވުމާއި، ވަޒީފާތަކަށް ކުރިމަތިލާ ޒުވާނުންނަށް ބޭނުންވާ ތަމްރީނުތައް ދެއްވުމާއި، ރާއްޖޭގައި ވަޒީފާ އަދާކުރާ ބިދޭސީންގެ ޢަދަދު މަދުކުރެއްވުމެވެ.
