ސާފް ޗެމްޕިއަންޝިޕް 2009ގެ ފައިނަލް މެޗްގެ ބައްލަވާލެއްވުމަށާއި، ރާއްޖޭގެ ޤައުމީ ފުޓްބޯޅަ ޓީމަށް ހިތްވަރުދެއްވުމަށްޓަކައި ރައީސުލްޖުމްހޫރިއްޔާގެ ޚާއްޞަ މަންދޫބުންގެ ގޮތުގައި ރައީސުލްޖުމްހޫރިއްޔާގެ ޕޮލިޓިކަލް އެޑްވައިޒަރ ޙަސަން އަފީފާއި، މިނިސްޓަރ އޮފް ސްޓޭޓް ފޮރ ހޯމް އެފެއާޒް މުޙަންމަދު ޙުނައިފް، ބަންގްލަދޭޝްގެ ޑާކާއަށް ވަޑައިގަތުމަށް، މިރޭ ފުރާވަޑައިގެންފިއެވެ.
މިދަތުރުފުޅުގައި ފުރާވަޑައިގަންނަވަމުން ރައީސުލްޖުމްހޫރިއްޔާގެ ޕޮލިޓިކަލް އެޑްވައިޒަރ ޙަސަން އަފީފް ދެއްވި ބަސްދީގަތުމެއްގައި، ރާއްޖޭގެ ޤައުމީ ފުޓްބޯޅަ ޓީމަށް ހިތްވަރު ދިނުމަށްޓަކައި ސަރުކާރާއި ސަރުކާރު ބައިވެރިވާ ކުންފުނިތަކުގެ ހުރިހާ މުވައްޒަފުންވެސް މާދަމާ ރަތްކުލައިގެ ހެދުމެއްގައި އޮފީހަށް ވަޑައިގެންދެއްވުމަށް ރައީސުލްޖުމްހޫރިއްޔާ އެދިވަޑައިގަންނަވާކަމުގައި ވިދާޅުވިއެވެ. މުވައްޒަފުން ވަކި ޔުނިފޯމެއް ބޭނުންކުރާ ގޮތަށް ހަމަޖައްސަވާފައިވާ އޮފީސްތައް މިކަމުން ވަނީ އިސްތިސްނާ ކުރައްވާފައެވެ.
ސާފް ޗެމްޕިއަންޝިޕްގެ ފައިނަލް މެޗް ކުޅުމަށް ހަމަޖެހިފައިވަނީ މާދަމާ ހަވީރުއެވެ. މި މެޗުގައި ބައްދަލުކުރާނީ ދިވެހިރާއްޖެއާ އިންޑިޔާއެވެ.
