ކޮމަންވެލްތް ޤައުމުތަކުގެ އެންމެ އިސްވެރިންގެ ޖަލްސާގައި ބައިވެރިވެވަޑައިގަތުމަށް ކުރައްވާ ދަތުރުފުޅެއްގައި ރައީސުލްޖުމްހޫރިއްޔާ މުޙަންމަދު ނަޝީދު، މިއަދު ހަވީރު ފުރާވަޑައިގެންފިއެވެ. ރައީސުލްޖުމްހޫރިއްޔާގެ އަރިހުގައި، އެމަނިކުފާނުގެ އަނބިކަނބަލުން އަލްފާޟިލާ ލައިލާ ޢަލީ މިދަތުރުފުޅުގައި ބައިވެރިވެވަޑައިގަންނަވައެވެ. މިޖަލްސާ އޮންނާނީ މިމަހުގެ 27ން 29އަށް ޓްރިނިޑާޑް އެންޑް ޓޮބޭގޯގެ ވެރިރަށް ޕޯޓް އޮފް ސްޕޭންގައެވެ.
މިނިސްޓަރ އޮފް ފޮރިން އެފެއާޒް ޑޮކްޓަރ އަޙްމަދު ޝަހީދާއި، އިނގިރޭސިވިލާތުގައި ހުންނަވާ ދިވެހި ހައިކޮމިޝަނަރ ޑޮކްޓަރ ފަރަޙަނާޒް ފައިޞަލްވެސް ރައީސުލްޖުމްހޫރިއްޔާގެ އަރިހުގައި، މިޖަލްސާގައި ބައިވެރިވެވަޑައިގަންނަވާގޮތަށްވަނީ ހަމަޖެހިފައެވެ.
