ވެރިކަމުގެ ފަރާތުން ފަނޑިޔާރު މަނިކުފާނުގެ މައްޗަށް ބާރު ނުފޯރުވި ދިޔަ އެއްއަހަރެއް މި ރާއްޖެ މީގެކުރިން ދެކެފައިނުވާ ކަމުގައި ރައީސުލްޖުމްހޫރިއްޔާ މުޙަންމަދު ނަޝީދު ވިދާޅުވެއްޖެއެވެ. ރައީސުލްޖުމްހޫރިއްޔާ މިހެން ވިދާޅުވީ، ސްޕްރީމް ކޯޓުގެ ފުރަތަމަ އަހަރީ ދުވަހުގެ މުނާސަބަތުގައި، މިރޭ ބޭއްވެވި ރަސްމިއްޔާތުގައި ވާހަކަފުޅު ދައްކަވަމުންނެވެ. ރާއްޖޭގައި ޝަރީޢަތް ހިންގުމުގެ ބާރާއި އޭގެ އިންތިޒާމާއި ނިޒާމު، މީގެކުރީގައިވެސް އޮތީ ވަކިވެފައި ކަމަށާއި، ވެރިކަމުގެ ތެރޭގައި ދާދިފަހުން އަޅުގަނޑުމެން މިދުށް ފަދައިން މަސްހުނިވެ ލާމެހިފައެއް ނޫންކަމުގައި ރައީސުލްޖުމްހޫރިއްޔާ ވިދާޅުވިއެވެ.
ރައީސުލްޖުމްހޫރިއްޔާގެ ވާހަކަފުޅުގައި، ރާއްޖޭގެ ޢަދުލް އިންޞާފުގެ ދާއިރާގެ ތާރީޚުގެ މައްޗަށް ވަރަށް ތަފްޞީލު ގޮތެއްގައި ބައްލަވާލެއްވިއެވެ. ފުރަތަމަ ޤާނޫނުއަސާސީ ލިބުމާއެކު، ބާރުތައް ވަކިކުރުމުގެ ފިކުރު އޭގެ ކުރީގައި، އޮތް މިންވަރަށްވުރެ މާބޮޑަށް އަނެއްކާވެސް ދިވެހިންގެ ތެރޭގައި ފާހަގަވާންފެށިކަން ފާހަގަކުރައްވަމުން، 1930ގެ އަހަރުތަކުގައި މިކަން އިތުރަށް ފުޅާވެގެން ދިޔައީ، އޭރު ރާއްޖެއިން ބޭރުން ކިޔަވާ ވިދާޅުވެގެން ވަޑައިގެންނެވި ބައެއް ޒުވާން ބޭފުޅުންގެ ޖޯޝާއި ފިކުރާއި ޚިޔާލުފުޅާއެކުގައި ކަމަށް ރައީސުލްޖުމްހޫރިއްޔާ ވިދާޅުވިއެވެ.
ރައީސުލްޖުމްހޫރިއްޔާގެ ވާހަކަފުޅުގައި، ރާއްޖޭގެ ސްޕްރީމް ކޯޓު އުފެއްދުމުގައި އެންމެ ބޮޑު ދައުރެއް އަދާކުރެއްވީ ޚާއްޞަ މަޖިލިސްކަން ބަޔާންކުރައްވަމުން، މި ގޮތަށް މި ކޯޓު އުފެއްދެވުމަށާއި، ބާރުތައް ވަކިވެފައިވާ ޤާނޫނުއަސާސީއަކަށް މިހާރު ޢަމަލުކުރަމުންދާ ޤާނޫނުއަސާސީ ހެއްދެވުމަށް ރައްޔިތުންގެ ޚާއްޞަ މަޖިލީހުގެ މެންބަރުން ކުރެއްވި މަސައްކަތްޕުޅުތަކަށްޓަކައި އެމަޖިލީހުގެ މެންބަރުންނަށް އަޅުގަނޑުމެން ނިހާޔަތަށް ޝުކުރުވެރިވާންޖެހޭ ކަމުގައި ވިދާޅުވިއެވެ. ޤާނޫނުއަސާސީ އިޞްލާޙުވަމުން އައިހިނދު، މި ރާއްޖޭގައި ބާރުތައް ވަކިވާން ޖެހިފައި އޮތް މިންވަރު އެންމެ ބޮޑަށް ސާފުވެގެން ދިޔައީ، ސްޕްރީމް ކޯޓު އުފެދުނު ދުވަހު، އެކޯޓުން އެތައް ކަމެއް ނިންމަން ޖެހިފައި އޮތުމުން ކަމުގައި ރައީސުލްޖުމްހޫރިއްޔާ ވިދާޅުވިއެވެ.
