ނުކުޅެދުންތެރިކަން މެދުވެރިވެފައިވާ ދިވެހިންނަށް އެހީތެރިވުމުގެ ޕްރޮގްރާމެއް ކަމުގައިވާ "ޕްލީޒް ކެމްޕެއިން" ހިންގެވުމުގައި އިސްކޮށް ޙަރަކާތްތެރިވާ ބައެއް ޒުވާނުންނާ ރައީސުލްޖުމްހޫރިއްޔާ މުޙަންމަދު ނަޝީދު މިއަދު ބައްދަލުކުރައްވައިފިއެވެ.
މިއަދު ހެނދުނު ރައީސުލްޖުމްހޫރިއްޔާގެ އޮފީހުގައި ބޭއްވެވި މިބައްދަލުކުރެއްވުމުގައި، "ޕްލީޒް ކެމްޕެއިން"، މިޕްރޮގްރާމްގެ ދަށުން ހިންގަވަން ރާއްވަވާފައިވާ ކަންތައްތަކާއި، މިޕްރޮގްރާމްގެ ބޭނުމާ ބެހޭގޮތުން ރައީސުލްޖުމްހޫރިއްޔާއަށް އެބޭފުޅުން މަޢްލޫމާތު ދެއްވިއެވެ.
ރައީސުލްޖުމްހޫރިއްޔާ ދެއްކެވި ވާހަކަފުޅުގައި، އެބޭފުޅުން މިކުރައްވަނީ ވަރަށް މާތް އަދި މުހިންމު މަސައްކަތްޕުޅުތަކެއް ކަމަށާއި، މިފަދަ އެހީތެރިކަމުގެ ޕްރޮގްރާމްތަކުގައި މަސައްކަތްޕުޅު ކުރައްވަން ކަނޑައަޅުއްވާފައިވާ ޢަޒުމްގައި ދެމިތިއްބެވުމަށް ހިތްވަރު ދެއްވިއެވެ. އަދި މިކަމުގައި ސަރުކާރުން ވެދެއްވެން އޮތް ހުރިހާ އެހީފުޅެއް ފޯރުއްވައިދެއްވާނެ ކަމުގައިވެސް ރައީސުލްޖުމްހޫރިއްޔާ ވިދާޅުވިއެވެ.
"ޕްލީޒް ކެމްޕެއިން"ގެ ބޭނުމަކީ ނުކުޅެދުންތެރިކަމަކީ ކޮބައިކަމާއި، ނުކުޅެދުންތެރިކަން ދިމާވެފައިވާ މީހުންނަށް މުޖްތަމަޢުން އެހީތެރިކަން ފޯރުވައިދިނުމުގެ މުހިންމުކަމާ ބެހޭގޮތުން ހޭލުންތެރިކަން އުފެއްދުމާއި، ކެއަރ ސޮސައިޓީއިން ހިންގާ ކެއަރ ޑިވެލޮޕްމަންޓް ސެންޓަރަށް ފައިސާހޯދައި ދިނުމާއި، ޤައުމީ ކަންކަމުގައި ރައްޔިތުންގެ ބައިވެރިވުން އިތުރުކުރުމަށް ހިތްވަރުދިނުން ކަމުގައި މިކެމްޕެއިން ހިންގަވާ ޒުވާނުންގެ ޓީމުން މަޢުލޫމާތު ދެއްވިއެވެ.
ޕްރައިމަރީ ގްރޭޑްތަކުގައި ކިޔަވާ ކުދިންނަށް އަމާޒުކޮށް ފޮތްކިޔުމުގެ ޕްރޮގްރާމަކާއި، މިހާރު އުފައްދަވާފައިވާ ޑޮކިއުމެންޓްރީ ފިލްމްތަކެއްގެ ބައިބައި ހާމަކުރެއްވުމާއި، އަންނަ އޮކްޓޯބަރު މަހުގެ 1 ވަނަ ދުވަހު މާލޭގައި މިއުޒިކް ޝޯވއެއް، މި ކެމްޕެއިންގެ ދަށުން ބޭއްވެވުމަށް ހަމަޖެހިފައިވާ ކަމަށްވެސް އެބޭފުޅުން މަޢުލޫމާތު ދެއްވިއެވެ.
