ރާއްޖޭގައި ހުންނަވާ އ.ދ.ގެ ރެޒިޑެންޓް ކޯރޑިނޭޓަރ ޕެޓްރިސް ކަރ-ބިޒޯ، ރައީސުލްޖުމްހޫރިއްޔާ މުޙަންމަދު ނަޝީދާ މިއަދު ހެނދުނު ބައްދަލުކުރައްވައިފިއެވެ. މިއީ، މިސްޓަރ ކަރ-ބިޒޯ، އޭނާގެ މަޤާމުގެ މުއްދަތު ހަމަކުރައްވައި ރާއްޖެއިން ފުރާވަޑައިގެންނެވުމުގެ ކުރިން ބޭއްވެވި ބައްދަލުކުރެއްވުމުކެވެ.
މިބައްދަލުކުރެއްވުމުގައި، އ.ދ.ގެ އެކި ޖަމާޢަތްތަކުން މިހާރު ރާއްޖޭގައި ހިންގަވަމުން ގެންދަވާ މަޝްރޫޢުތަކާއި، ކުރިއަށް ރޭވިފައި ހުރި މަޝްރޫޢުތަކާބެހޭ މަޢުލޫމާތު، މިސްޓަރ ކަރ-ބިޒޯ ރައީސުލްޖުމްހޫރިއްޔާއަށް ދެއްވިއެވެ. މީގެއިތުރުން އ.ދ.ގެ ހުރިހާ ދާއިރާތަކަކުން ކުރާ ހުރިހާ މަސައްކަތެއްގެ ބޭނުމަކީ، ރާއްޖޭގެ ރައްޔިތުންގެ ދިރިއުޅުމުގެ ފެންވަރު ރަނގަޅުކުރުންކަން ފާހަގަކުރައްވަމުން، މިމަޤާމުގައި ދެންވެސް ރާއްޖެއަށް ވަޑައިގަންނަވާ ކޮންމެ ބޭފުޅަކުވެސް މިއަމާޒަށް މަސައްކަތް ކުރައްވަމުން ގެންދަވާނެ ކަމުގެ ޔަޤީންކަން މިސްޓަރ ކަރ-ބިޒޯ، ރައީސުލްޖުމްހޫރިއްޔާއަށް ދެއްވިއެވެ. އަދި ރާއްޖޭގައި މަސައްކަތް ކުރެއްވުމަކީ އޭނާއަށް ވަރަށްބޮޑު އުފާފުޅެއް ލިބިވަޑައިގެންނެވި ކަމެއް ކަމަށް ވިދާޅުވިއެވެ.
މިސްޓަރ ކަރ-ބިޒޯ އ.ދ. ގެ ރެޒިޑެންޓް ކޯޑިނޭޓަރ ކަމުގެ މަޤާމުގައި ހުންނަވައިގެން ކޮށްދެއްވާފައިވާ މަސައްކަތްތަކަށްޓަކައި، އޭނާއަށް ރައީސުލްޖުމްހޫރިއްޔާ ޝުކުރު އަދާކުރެއްވިއެވެ.
