ތަޢްލީމީ ފަންޑް ޒިންމާދާރު ގޮތެއްގައި ހިންގެވުމާ ބެހޭގޮތުން ވަޒީރުންގެ މަޖިލީހުގައި މިއަދު މަޝްވަރާ ކުރައްވައިފިއެވެ. މިނިސްޓްރީ އޮފް އެޑިޔުކޭޝަންގެ ބެއްލެވުމުގެ ދަށުން ހިނގަމުންދާ މިފަންޑް އުފެދުނީއްސުރެ މިއަދާ ހަމައަށް ގިނަ ޢަދަދެއްގެ ފައިސާއާއި، ނުއުފުލޭ މުދަލާއި، ވިޔަފާރީގެ މުޢާމަލާތްތައް، މިފަންޑުންވަނީ ހިންގަވާފައެވެ.
ވަޒީރުންގެ މަޖިލީހުގެ މިއަދުގެ ޖަލްސާގައި މެންބަރުން ދެއްކެވި ވާހަކަފުޅުގައި، ފަންޑު އުފެއްދެވި މަޤްޞަދާއި، ފަންޑުން ކުރެވުނު ކަންކަމަށް ބައްލަވާއިރު، ފަންޑް އުފެއްދެވުމުގެ މަޤްޞަދު އެންމެ ފުރިހަމަ ގޮތުގައި ޙާޞިލު ކުރެވިފައިނުވާކަން ފާހަގަކުރެއްވިއެވެ. ތަޢްލީމީ ފަންޑް އުފެއްދެވީ، ދިވެހި ދަރިންނަށް ރާއްޖޭގައި ލިބެން ނެތް ތަޢްލީމު ހޯއްދަވައިދެއްވައި، މަތީ ތަޢްލީމުގެ ފުރްޞަތު ދިވެހި ދަރިންނަށް އިތުރުކޮށްދެއްވުމުގެ މަޤްޞަދުގައެވެ.
ދެމެހެއްޓެނިވި ގޮތެއްގައި މިފަންޑް ކުރިއަށް ގެންދެވިދާނެ ގޮތްތަކާ ބެހޭގޮތުން މިއަދުގެ ޖަލްސާގައި މެންބަރުން މަޝްވަރާ ކުރެއްވުމަށްފަހު، ފަންޑާ ބެހޭގޮތުން ގޮތެއް ނިންމެވުމުގެ ކުރިން އިތުރު މަޢްލޫމާތު ހޯއްދަވައި، މިކަމާބެހޭ އިތުރު ދިރާސާތަކެއް ވަޒީރުންގެ ކޮމިޓީއަކުން ކުރެއްވުމަށް ނިންމެވިއެވެ.
