ޖަޕާނު ސަރުކާރުގެ އެހީގައި ޢިމާރާތް ކުރައްވާފައިވާ ހިރިޔާ ސްކޫލް، ރައީސުލްޖުމްހޫރިއްޔާ މުޙަންމަދު ނަޝީދު، ރަސްމީގޮތުން މިއަދު ހުޅުއްވައިދެއްވައިފިއެވެ. ހިރިޔާ ސްކޫލް ރަސްމީ ގޮތުން ހުޅުވިގެންދިޔައީ، ސްކޫލްގެ ނަންބޯޑުގެ ފަރުދާ، ރައީސުލްޖުމްހޫރިއްޔާ ކައްސަވާލަ ދެއްވުމުންނެވެ. އެއަށްފަހު ޤައުމީ ދިދައާއި، ޖަޕާނު ދިދައާއި، ސްކޫލްގެ ދިދަ ނަންގަވައި ދެއްވުން އޮތެވެ. ޤައުމީ ދިދަ ނަންގަވައިދެއްވީ ރައީސުލްޖުމްހޫރިއްޔާއެވެ. ޖަޕާނު ދިދަ ނަންގަވައިދެއްވީ، ޖަޕާން ސަފީރު މިސްޓަރ ކުނިއޯ ޓަކަހާޝީއެވެ. ސްކޫލްގެ ދިދަ ނަންގަވައިދެއްވީ، މިނިސްޓަރ އޮފް އެޑިޔުކޭޝަން ޑޮކްޓަރ މުޞްޠަފާ ލުޠުފީއެވެ.
މިރަސްމިއްޔާތުގައި ރައީސުލްޖުމްހޫރިއްޔާ މުޙަންމަދު ނަޝީދު ދެއްކެވި ވާހަކަފުޅުގައި، ޖަޕާން ސަރުކާރުން ރާއްޖެއަށް މިދެއްވި ދީލަތި އެހީއަށްޓަކައި ޖަޕާން ސަރުކާރަށާއި ރައްޔިތުންނަށް ވަރަށް އިޚްލާޞްތެރިކަމާއެކު ޝުކުރު އަދާކުރެއްވިއެވެ. އަދި ޖަޕާން ސަރުކާރުން ރާއްޖޭގެ ތަރައްޤީއަށް، ޚާއްޞަކޮށް ތަޢްލީމީ ދާއިރާއަށް ވެދެއްވާ އެހީތައް، ރައީސުލްޖުމްހޫރިއްޔާ ފާހަގަކުރެއްވިއެވެ. މިރޮނގުން ވާހަކަފުޅު ދައްކަވަމުން، ޖަޕާން ސަރުކާރުން ރާއްޖެއަށް ވެދެއްވާ އެހީ ވެދެއްވަނީ ހެޔޮހިތުން ހެޔޮ ނިޔަތުގައިކަން ވަރަށް ސާފު ކަމުގައި ވިދާޅުވިއެވެ.
ރައީސުލްޖުމްހޫރިއްޔާގެ ވާހަކަފުޅުގައި، ހިރިޔާ ސްކޫލްގެ ބޭނުން ހުރިހާ ފަރާތްތަކަކުންވެސް ރަނގަޅަށް ހިފުމަށް އެދިވަޑައިގެންނެވިއެވެ. ދަރިވަރުންނާއި، މުދައްރިސުންނާއި، ބެލެނިވެރިންނާއި، ސްކޫލް ހުރި ސަރަޙައްދުގައި ދިރިއުޅޭ ރައްޔިތުންގެ އެހީތެރިކަން މިކަމުގައި ބޭނުންވާ ކަމަށާއި، އެފަރާތްތަކުގެ އެހީގައި ނޫނީ މިބޭނުންވާ ނަތީޖާ މި މަދަރުސާއިން ނެރުއްވަން ދަތިވާނެ ކަމުގައި ވިދާޅުވިއެވެ. ތަޢްލީމީ ޙަޔާތަކީ ހަމައެކަނި ކިޔެވުން ނޫންކަން ރައީސުލްޖުމްހޫރިއްޔާ ބަޔާންކުރައްވަމުން، އިތުރު ޙަރަކާތްތަކަކީވެސް ތަޢްލީމީ ޙަޔާތުގެ ވަރަށް މުހިންމު ބައެއް ކަމަށް ރައީސުލްޖުމްހޫރިއްޔާ ވިދާޅުވިއެވެ. އަދި ތަޢްލީމީ ޙަޔާތުގެ ހުރިހާ ކަމަކީ ހަމައެކަނި ކިޔެވުން ކަމަށް ބެލެނިވެރިން ދެކެވަޑައިނުގަތުމަށާއި، ތަޢްލީމީ ޙަޔާތުގައި އެނގޭ ހުރިހާ ކަމަކީވެސް ލިބޭ ހުނަރާއި، ޢިލްމާއި، ތަޖުރިބާ ކަމުގައި އެމަނިކުފާނު ވިދާޅުވިއެވެ. ސަރުކާރުން ކޮށްދެއްވޭނެ ކަމަކީ، އަމިއްލަ ޙަޔާތެއް ހޯދުމަށް ބޭނުންވާނެ ފުރްޞަތާއި ވަސީލަތްތައް ތަނަވަސްކޮށްދެއްވުމަށް މަސައްކަތް ކޮށްދެއްވުން ކަމަށާއި، ހިތްހަމަޖެހޭ ދިރިއުޅުމެއް އަޅުގަނޑުމެންނަށް ނުލިބިއްޖެނަމަ، އޭގެ ގެއްލުން ލިބޭނީ ހަމައެކަނި އެމީހަކަށް ނޫން ކަމަށާއި، މުޅި މުޖްތަމަޢަށްވެސް އެކަމުގެ ގެއްލުން ލިބޭނެ ކަމުގައި ރައީސުލްޖުމްހޫރިއްޔާ ވިދާޅުވިއެވެ.
ރައީސުލްޖުމްހޫރިއްޔާ މިއަދު ދެއްކެވި ވާހަކަފުޅުގައި، ރާއްޖޭގައި ތަޢްލީމު ޙާޞިލުކުރާ ދަރިވަރުންގެ ތެރެއިން ނިކަމެތި ކުދިންނާ ދޭތެރޭގައި އަޅާލެއްވުމަކީ، ސަރުކާރުން ވަރަށްބޮޑު ސަމާލުކަމެއް ދެއްވާ ކަމެއްކަން ބަޔާންކުރައްވައި، އެކުދިންނާ އަޅާލެވޭނެ ގޮތްތަކެއް ހޯދައިދޭންޖެހޭ ކަމުގައި ވިދާޅުވިއެވެ. ގިނައިން އާމްދަނީ ލިބޭ ބެލެނިވެރިންނަށް ދަރިންނަށް ފީ ދެއްކޭނެ ކަމަށާއި، މަދުން އާމްދަނީ ލިބޭ ބެލެނިވެރިންނަށް ސަރުކާރުން އެހީތެރިވެދެއްވޭނެ ކަމުގައި ރައީސުލްޖުމްހޫރިއްޔާ ވިދާޅުވިއެވެ.
ރައީސުލްޖުމްހޫރިއްޔާގެ ވާހަކަފުޅުގައި، ރާއްޖޭގެ ތަޢްލީމީ ޙާލަތު ރަނގަޅު ކުރެއްވުމަށް ސަރުކާރުން ކުރައްވަމުން ގެންދަވާ މަސައްކަތްޕުޅުތަކުގެ މައްޗަށް ބައްލަވާލައްވަމުން، ސްކޫލްތަކުގައި އެއްދަންފަޅިއަށް ކިޔަވައިދޭގޮތަށް ހެއްދެވުމަކީ، މިކަމުގެ ވަރަށް މުހިންމު ލަނޑުދަނޑިއެއްކަންވެސް ފާހަގަކުރެއްވިއެވެ.
ރައީސުލްޖުމްހޫރިއްޔާ ހިރިޔާ ސްކޫލް ހުޅުއްވައިދެއްވުމަށްފަހު، އެ ސްކޫލް ބައްލަވާލެއްވިއެވެ. އަދި ޢިއްޒަތްތެރިން ސޮއިކުރައްވާ ފޮތުގައި އެމަނިކުފާނު ލިޔުއްވައި ސޮއި ކުރެއްވިއެވެ.
