ރައީސުލްޖުމްހޫރިއްޔާގެ އަނބިކަނބަލުން ފާޠިމަތު އިބްރާހީމް، މެލޭޝިޔާ ބޮޑުވަޒީރުގެ އަނބިކަނބަލުން ދާތިން ޕަޑުކާ ސެރީ ރޮސްމާހް މަންސޫރާ ބައްދަލުކުރައްވައިފިއެވެ.
މިއަދު ހެނދުނު މުލީއާގޭގައި އޮތް މިބައްދަލުކުރެއްވުމުގައި، އިޖުތިމާޢީ ތަރައްޤީއާއި، ދެބޭފުޅުން ކުރައްވާ އިޖުތިމާޢީ މަސައްކަތްޕުޅުތަކާއި ބެހޭގޮތުން މަޝްވަރާ ކުރެއްވިއެވެ. އެގޮތުން، ޚާއްޞަ އެހީއަށް ބޭނުންވާ ކުދިންގެ ޙައްޤުތައް ހޯއްދަވައިދެއްވުމަށްޓަކައި ކުރެވޭ މަސައްކަތްތަކާއި ޚާއްޞަ ގޮތެއްގައި އޯޓިޒަމް ބަލީގެ ކުދިންނަށް އަމާޒޮކޮށްގެން ކުރައްވަމުން ގެންދަވާ މަސައްކަތްތަކާ ބެހޭގޮތުން ފުޅާ ދާއިރާއެއްގައި ދެބޭފުޅުން މަޝްވަރާ ކުރެއްވިއެވެ.
މިބައްދަލު ކުރެއްވުމުގައި ވާހަކަފުޅު ދައްކަވަމުން، އޯޓިޒަމް ބަލީގެ ކުދިންނަށް އަމާޒުކޮށްގެން މެލޭޝިޔާއިން ކުރަމުންދާ މަސައްކަތްތައް ރައީސުލްޖުމްހޫރިއްޔާގެ އަނބިކަނބަލުން ފާހަގަކުރެއްވިއެވެ.
މިބައްދަލުކުރެއްވުމުގައި، މިނިސްޓަރ އޮފް ޖެންޑަރ އެންޑް ފެމިލީ އައިމިނަތު ޒެނީޝާ ޝަހީދު ޒަކީ ބައިވެރިވެ ވަޑައިގެންނެވިއެވެ.
